العمدة "مجنون ليلى"💙مكتملة💙

💙الجزء 122💙

‎👑العمـــــــدة👑
‎♡..مجنــــون ليلــى..
‎ف.الثــالت والاخــير:
‎💔من الحـب مـا قـتـل💔
122

بكر وقف عليهم بهدوء تلاحت عليه حنان كتعنق فيه:على سلامتك اولدي نورتي دارك وشحال توحشتك قلبي كان ايتقطع علييك
حضنها وباس راسها:صافي الوليدة هنا رجعت
عنقاتو حورية وتحنا باس يد باه وراسو وقرب عند الحاج تاهو باس ليه يدو وراسو كيحمدو ليه على السلامة هز ولدو فيديه باسو على خدو وتبسم ليه..
هبة واقفة وشانطتها حداها كتشوف فيهم ومرة مرة تشوف فالدار كيف دايرة وشحال كبيرة وزوينة…حسات باحراج ماعرفات مادير وهو ملهي مع ولدو وكلشي كيشوف فيها تا هوما ماعرفو مايقولو ..حتى جات عينيها على ليلى لي شوية وتكلها بعينيها نزلات راسها خلعوها شوفاتها ..
بكر شاف فليلى لتواني ورجع جلس ونطق:هدي هبة داخلين على مشروع جديد واتكون المساعدة ديالي تلاقينا فأمريكا وتافقنا على الخدمة اتبقا معانا شي يامات وترجع لامريكا تاني
هبة تبسمات ليهم:سلام
حورية قربات سلمات عليها:مرحبا بيك اجي جلسي
هبة:شكرا
قبل تجلس سلمات عليهم تا وصلات عند نور لقاتها مخنزرة فيها تاهي
نور قلبات وجها كتمتم:جاية معاه بوجها حمر
هبة بلعات ريقها وشافت فليلى حداها لقاتها كتر من نور كتافات بابتسامة وشافت بدر هزات ليه راسها ومشات جلسات حدا حورية..
بكر شاف فالخدامة:وصليها لبيت ضياف ترتاح
وشاف فيها:توريك لبيت
هزات راسها باه:سمحولي
وناضت تبعات الخدامة للفوق ..بقاو غير هوما
بكر شاد ولدو بين يديه
محمد:كنتي فالميريكان
بكر:اه مع ياسين
الحاج:خليناك على خاطرك ولكن طولتي
بكر:كان خاص نخوي دماغي
وشاف فليلى لي كتشوف فيه وتهز فرجليها..
مروان بدا يبكي لقاتها سبة تاخدو منو ناضت لعندو:اراه ليا
جر ولدو عندو كتر:كنعرف نسكتو
خنزرات فيه ورجعات جلسات وتواني وكان سكت بين يديه
بدر:الحاج علاش بغيتي تجمعنا خلينا نهضرو وكل واحد يقصد ضوارو حيت بان لي هدشي ماشي تا لتم
الحاج:حيت ماشي تا لتم خاص كلشي  يتصلح
بكر كان كيشوف غا فيها كيف حانية راسها تنهد هي لي وصلاتهم لهادشي عض على سنانو عمر كيتها تبرى فقلبو…
الحاج :حورية طلعي عيطي لكنزة تهبط
طلعات داك الساع تعيط لها ..وهو غير سمع اسمها قلبو فز وبدا يشوف فالدروج كيتسناها تهبط وقع الصمت من غير صوت مروان كيبجغط..
دقايق وهوما يشوفوها جاية هي وحورية..فيكسا عينيه عليها لابسة بيجامة غوز وشعرها مطلوق على طولتو زاد طوال حنيكاتها حومر لقات السلام وجلسات حدا حورية..هزات راسها جات عينيها فعينيه خنزرات وهو ميل راسو حنات راسها داك الساع
الحاج:حنا عائلة وكيف قلت ماغانعاودش نعيش كتر من لي فات دزنا من مشاكيل كلشي غلط..وكاين لي دار شي اغلاط عمرهم يتصلحو..كلشي هاز فخاطرو ..انا دابة ماكانقولكمش رجعو كيف كنتو وبغيو بعضكم انا بغيت كل واحد يشد تيقارو وكل واحد يحتارم لاخور ..بغيت نتجمعو تاني فدار وحدة
ليلى بغات تدوي وهو يقاطعها:مازال كندوي
سكتات وهو كمل:نتي وبكر طلقتو وكل واحد شد طريقو كيف قلتو درنا لي علينا باش زواجكم يستامر ولكن الغالب الله كتاب طلاق…جامعكم ولد محتاج يشوف مو وباه كل نهار واخة ماشي مزوجين ولكن علأقل يكونو فدار وحدة وسط العائلة كولاد العم فقط…
شاف فبدر وكنزة:بدر غلط واحد الغلاط لي صعيب بزاف لي مستحيل يتنسا انا براسي مازال ضارني فخاطري وماناسيهش..طلب يتزوج بيك ومابغيتيش ومن حقك وماغايبزز عليك حد ..نتي بنتنا اتبقاي ديما فوق راسنا ..هو ايبعد منك ويخرج من حياتك ونتي ديريه بحاليلا ماكاينش فهاد الدار ..
رجع نطق:نتمنى كلامي يكون مفهوم وديرو بحساب هاد الشيبات لي على راسي وتحتارمو عمري وتسمعو لكلامي
ليلى كانت جالسة على اعصابها كتغلي بلا والو كانت مضيومة من دوك التصاور لي وصلوها ولكن زاد كمل ملي جابها للدار واتبقة معاهم وقفات:سمحلي الحاج كلامك فوق راسي ونت راك غالي على قلبي ولكن مانقدش نتجمع انا وهاد السيد فدار وحدة خاطري هارب منو لا تجمعنا انقلبوها عداوة
وشافت فبكر
الحاج:جلسي اليلى جلسيي..لا جينا نهضرو فالواقع هاد بكر شنو دار لك باش تعاديه هو كان شاد فيك بيديه وسنانو نتي لي بغيتي طلاق ياك قبل يكون راجلك كان ولد خالتك وكبرتو بجوج ورباك على يديه وماخلا مادار على قبلك..بغيتي دغية ضربي كلشي فالزيرو وتشري معاه العداوة وماديريش بحساب العشرة وتجلسي فدار عائلتك تربي ولدك قدام باه الالة ماقلنالكش رجعي ليه وعمرك تسمعيها من فمناا..
عضات على سنانها نار الغيرة كتحرق فقلبها وهي كتفكر هديك لفوق…ماتقدش تبقة معاهم وتشوفها معاه حتى لشي نهار تلقاهم مزوجين
ليلى:الحاج..
قاطعها:نعلي الشيطان ابنتي هنا عائلتك والعائلة ضارورية فالحياة ولدك يكبر بين عائلتو
بكر وقف :الحاج هي خليها هنا وانا انرجع لاباغطومو ماعنديش مشكل
شافت فيه شوية وتقولو واتديها معاك خاصك غير تستفرد بيها
الحاج:كنقولكم باغيكم مجموعين شكا تخربقو وتعليو ودليو من مخكم كلمة وحدة قلناها
ليلى قربات عند بكر :عطيه لي خاصو يرضع
شاف فيها وفنضراتها الغاضبين ملاميحها متوترين عارف انه ماشي هي هديك مدو ليها خداتو وطلعات للفوق غير دخلات للبيت نزلو دموعهاا لي كانت كاتماهم  منضرهم بجوج مابغاش يحيد من بالهاا…ماندماتش علاش دارت يديها فيد عمران مسحات دموعها:تانا خاص نعيش حياتي …هنا انوريك ابكر ولد خالتي وولد عميي…
لتحت..
كنزة هزات راسها وشافت فالحاج:الحاج انا كلامك كلو على راسي ماعنديش مشكل يرجعو
وشافت فبدر :وهاد الانسان مابقة يعنيلي والو يخرج غا من حياتي ويبعد مني
الحاج:جاتك ابنتي عمرو يضور بساحتك
بدر شاف فيها وتبسم باستهزاء
كنزة كملات:صافي تافقنا
وتبسمات:وماحدكم مجموعين بغيت نقولكم شي حاجة
كلشي شاف فيها
نطقات:تعرفت على ولد الناس ناوي المعقول نيتو حسنة وبغة يجي للدار يطلبني منكم
كلشي قوص حواجبو نطقات:هو عارف كلشي وعاودت ليه كلشي سيد ولد الناس وراجل تفهمني وقالي الماضي ديالي ماكايهموش
بدر بلع ريقو وطلعات معاه الحرارة وملاميحو تبدلو وهو كيشوف فيها هدي شكا تقول
نطق بكر باهتمام:وشكون هدا
كنزة:مانكدبش عليك اخويا تعرفت عليه فالنت غا اصدقاء عمري شتو ولا شافني اول مرة نهضر مع شي حد فشي مواقع التواصل ..هضرنا بكدود حتى ولا باغيني للزواج وفالحلفلة لي مشينالها تعرفنا كتر وعرفني على مو وختو وباغي يجي للدار كنت باغة تا نتأكد اخويا..
الحاج:وهو شكا يدير
كنزة:كان عايش على يرى وجا وهو وعائلتو للمغرب دار مشروع خاص بيه داكشي دلايلكترونيات عندو دارو وكلشي الحمد لله
محمد:ونتي باغاه عاجبك
هزات راسها باه:اه ابابا راجل بمعنى الكلمة محتارمني وقصدني نيشان للزواج وباغي يجي فأقرب وقت ممكن وانا هادا هو الشخص لي باغة ولي بغيتو يكون فحياتي
بدر ماحس براسو تا نطق:دغية هدشي عندكم
شافت فيه مطلعها حاجبها كتشوف لعافية شاعلة فيه غا من عينيه
نطق بكر مخنزر فيه كلامو موجه لكنزة:يجي مرحبا بيه انتسناوه الوقت لي يناسبو
تبسمات فرحانة:صافي اخويا واخة
بدر عض على سنانو جامع يديه على شكل لكمة باغي ينوض يجرها من شعرها ويقولها شمن زواج اشريفة ولكن ماعندوش الحق ويديه مربوطين مسح على راسو ووقف حاس براسو ماغايتحكمش فأعصابو وبعد عليهم من الصالة ماعارفش فين يزييد دمو كيغليي
نور كتشوف فيهم كلشي ترون ..شافت فبكر لي غير ساكت والبقية كيهضرو ويزيدو يسولو كنزة على العريس الجديد..حسات بيه انه تاهو ماشي هو هداك تنهدات وناضت طلعات للفوق ..