فَقيدة أنمار

< The 23th surprise 🌚 >

- الحمدلله صار احسن ، وطلعته هنا حتى ينام .
هز راسه وگال:
= اي زين سويتي بس انتي ما بردانه ملابسج
خفيفه حبيبتي؟
- لا حلو الجو ما عَلي شي .
تقرب باسني بعيني وبخدي وأخذ أدهم من حضني وكال :
= راح اودي بجربايته واجي جبتلج عشه من بره
لا تسوين شي ضلي كاعده هسه أجيج .
هزيت راسي بمعنى اي وهمست (تمام حبيبي).
شال أدهم بحضنه بهدوء وراح ..

شوي واجه شايل بيده علاكه وكلاصات چَاي
خلاهم يمي ونزع جاكيته لفني بي وهوَ يكول :
= تكولين ما بردانه وانتي ترجفين من البرد ،
لا تتمرضين بابا نوب منو إلنه .

- هههه هيج ما تكدر بدوني ها ها يله أعترف .

ضحك وكعد يمي وكال :
= لا يابه وين اكدر انه بدونج الروح والريه انتي .
- اممم يعني انتَ تحبني؟

= لا ما احبج منو كال انه احبج ؟
تقرب علي يباوع بعيوني وهمس :
" هَايم بيچ أنا ميت بيج ، شنو احبج شويه انه بداخلي شي اكثر من الحب ألج ".

ضحكت وحضنته بسته بخده وكلت :
"اويي اموت عليك والله "
ضحك وگال :
= يله كافي ما شبعتي شكد تبوسين تعاي اكلي تره
انه جعت كلش .
رفعت حاجبي وكلت :
- هاا هسه انه صرت ابوس هواي خوش بعد
ما ابوسك عندي جهالي اشبع بيهم بوس .
ضل يضحك وفتح العلاكه انطاني لفه وكوب الجاي وهو هم اخذ وكعدنه ناكل ..
بعد مرور وقت ضلينه كاعدين واحد يسأل الثاني عن احداثنه اليوميه وشنو صار بالشغل ،
مد ايده وره ضهري حضني وميلت راسي على
صدره ، جان الجو مطر خفيف بس صار قوي طفرت نقطة من المطر على عيني شهكت كردة فعل وانمار ضحك وگال :
" تمني امنيه راح تتحقق "
- اتمنى تَضل يَمي طوَل العِمَر وحُبنَه يزيد ما يِقَل .
= يا بعد عيوني انتِ .
ضلينه ساعه كاعدين لحد ما تعبنه ودخلنه للبيتنه》..
...

-" رجعني للواقع صوت تلفوني يرن فتحته جان
انمار متصل فيديو فتحته وخليته كبالي ع الميز وكعدت احجي ويا .
جان نازل واجب صارله اسبوع ونص ، وأوضاع البلد
مو كلش تمام .
خلصت مكالمتي ويا واجت صديقتي وأخوهه راح
تضل خفر بالصيدلية مكاني .
اخذت جنطتي وودعتهه وطلعت للبيت هلكانه
رحت لبيت اهلي فتحت الباب ودخلت ،
لكيت امي كاعده بالمطبخ تسوي گهوة ابتِسمت وكالت :
= هلا يُمه الله يساعدج طولتي اليوم .
رحت بست ايدهه وكلت :
- هلا بيج امي حبيبتي ايي اليوم خطيه ليان
تأخرت علي هسه اجت خذت الخفاره وأنه
اجيت .
شفتهه محضره صينية كرزات واكواب هواي
ما استغربت لأن اكيد هذول خطار اخوي إلي
ما يخلصون ..
كلت :
- شنو هاي ماما الساعه راح تصير ب١٢ والخطار
بعدهم يجون ويرحون ؟.
ذبت حسره وكالت :
= اي يمه جا شأسوي هذا اخوج طلعلي گلب ثاني ،
ما مرتاحه الشغله هذا ، مو أمان كل يوم ناس شكل تجي وتروح ويلعبون بفلوس الناس يجي يوم ويخرب شغله شيكول للعالم ..
- اي امي حبيبتي اهدي الله يخليج لا تحركين كلبج انشالله انه احاجي بلكي يبطل من هذا شغله ونخلص .