أحلام يعرُب ((بين الحب والحرب))

الحلقة 68

#أحلام_يعرُب ((بين الحب والحرب))
#الحلقة_68((الفصل الخامس والثلاثون زهرة الليلك))
((دراما واقعية مقتبسة من أحداث حقيقية))
.
.
.
لايك قبل تقري ♥
.
.
.
«اللهم أعطني بقدر نيتي وأبعد عني شرار خلقك يارب.
اللهمّ أنت حسبي حين تضيق الحياة وأنت المُنتصر حين يغلبني الوجع اللهمّ أنت عوني ونجاتي حين أفقد الحيلة.
اللهم عافية تروي عروق المُتعبين ورحمه لمن استوقفت بهم الحياة»
.
.
.
ايشوف لشخص الواقف قدامه ومش عارف من يكون.. عقد حواجبه وتكلم  :  منو انتا؟!!  وكيف خاش للحوش هكي لا احم ولاتستور

قدم منه  :  أنتا اللي من.. وشن تبي في أحلام

تحرك في اعيونها بينهم.. وحست بالتوتر والجو مشحون.. قدمت منهم  :  عمي جويدة هذا يعرب راجلي

تلفتت على زوجها  :  يعرب هذا عمي اجويدة اخ بوي

بلل شفته وحاول يتكلم بهدوء  :  اهلين.. كيف حالك

اجويدة  :  بخير الحمدالله.. شن اخبارك

يعرب  :  تمام

شاف لاحلام ويعرب وتكلم  :  عليش مصبيين هنا.. خشوا جوا

رفع حواجبه وتنهد  :  مرة تانية والله.. جاي بناخد مرتي وماشي

اجويدة شاف لاحلام واللي بلعت ريقها وطبست  :  بس انا مانبيش نمشي معاك

شافلها زين.. وتحركت تفاحة ادم في رقبته وهذه عادته لما يحاول يكتم غضبه وعصبيته وتكلم بهدوء مصطنع  :  أحلام العني الشيطان وخشي البسي باش تروحي معايا... راهو عندي من المشاكل والهموم ماسادني ومش ناقصني تربحي

رفعت اعيونها فيه  وهزت رأسها  :  مانبيش نمشي يعرب...خليني براحتي وامشي حل مشاكلك وهمومك وريح راسك مني ومن همي

قلب اعيونه ومسح وجهه  :  أحلام بلا عناد ماتخلينيش نفصل عليك

اجويدة  :  البنت ماتبيش تمشي معاك.. خليها براحتها لعند تهدأ

يعرب  :  بالله ماتدخلش بيني وبين مرتي الموضوع مش شورك خليك برا منه افضل

اجويدة  :  هذه بنت خوي ومن حقي اندافع عليها

ضيق اعيونه وتكلم بحدة   :  ادافع عليها من شنو؟!!  شايفني نضرب فيها والا كيف... وبعدين المراة هادي ليها قريب السنة عندي.. اول مرة نشبحك ونتعرف عليك.. وين كنت من قبل وشن جابك ليها توا

قدم منه  :  مواضيع خاصة بينا ومالكش علاقة فيها

الثاني تقدم خطوة منه  :  مافيش مواضيع خاصة بيني وبين مرتي ومش من حقك تدخل بينا

شدت ايديها في بعض.. اتحرك في اعيونها بينهم وبدت ترعش بخوف وترقب

اجويدة  :  مانبيش ندخل بينكم... لكن البنت ماتبيش تمشي معاك والحكاية مش بالغصب