أحلام يعرُب ((بين الحب والحرب))

الحلقة 47

#أحلام_يعرُب ((بين الحب والحرب))
#الحلقة_47 الفصل الثالث والعشرون _حوائي))
((دراما واقعية مقتبسة من أحداث حقيقية))
.
.
.
لايك قبل تقري ♥
.
.
.
«اللهم أسألك أن تكفيني شر كل ذي شر، وأسألك فرجًا قريبًا وصبرًا جميلاً، وأسألك العافية من كل بلية، اللهم بك أدفع ما أنا فيه، وأعوذ بك من شره يا أرحم الراحمين، ولا قوة إلا بالله العلي العظيم»
.
.
.
واقف عند الباب ويشوف للممرضة اتفك في ابرة التغذية من يده
مجرد ماوخرت عنه.. تقدم منه ويساعد فيه لعند قمعز
بلع ريقه ومازال حاس بصدع خفيف.. نزل كمه ويساوي فيه

جمال  :  لاباس عليك إن شالله

ابتسم المهدي ونزل من السرير  :  ماتشوف باس يارب

يشوفله باهتمام  :  احسن توا.. شن الوضع

يلبس في جبوتيه  :  لا الحمدالله.. احسن بواجد

جمال  :  باه الحمدالله

ومشى بجنب المهدي اللي طلع من الحجرة ويسأل فيه  :  شن اخبار يعرب.  مافيش جديد عليه

رفع حواجبه وتنهد  :  مافيش جديد للاسف.. واصلاً معاش قدرت انخش عليه.. بعد الزيارة طلعونا كلنا والامن متشدد بكل غير توا بالسيف خلوني انخش عشان انطلعك بس

تنهد تنهيدة قوية ومسح وجهه  :  ياراجل ماقدرتش نتحمل منظره هكي... حسيت الدنيا برمت بيا ومعاش وعيت لشي

جمال بحزن  :  كلنا تعودنا عليه واقف على رجليه وقوي ومافيش شي يكسره.. وماحد منا توقع في يوم بيشوفه هكي  .. تنهد... اااايه لكن الحمدالله على كل حال.. وإن شالله ربي يشفيه ويعافيه

المهدي  :  إن شالله يارب.. يعرب زي خوي الصغير بالضبط... ولو عندي ولد والله العظيم مش حيكون اغلى منه على قلبي

بلع ريقه ورجع تكلم بحيرة  :  لكن مش عارف ايش انديرله.. كيف نقدر نساعده حاس ايديا مكتفات وماعنديش لا جهد ولا حيلة

مسح جمال وجهه وشد في ذراع المهدي وهم نازلين من الدروج  :  والله العظيم واني حاير زيك بالضبط ومش قادر نقرر شن بنديرله.. الدكتور يقول في كلام واهل يعرب يقولوا في كلام تاني واني معادش عرفت شن اندير وكيف الدبارة معاه

عقد حواجبه  :  قصدك مراته.. كنها شن قالت عليه؟!

جمال  :  قالت دبروله من غير روسكم... خدوه لمصر والا لاي مكان المهم ماتخلوهمش يبتروا رجله لان يعرب مايقدرش يتحمل وضعه بعدين وبيموت بالعرق من حسرته

زم فمه وعاقد حواجبه يفكر  :  كلامها صاح والله

وبعدين تلفت عليه  :  وانتا ليش ماتبيش تاخذه بره

جمال  :  مش اني.. لكن الدكاترة قالولي وضعه حساس وخطير ومش حيتحمل سفر وشحوره.. واني معادش عرفت شن اندير.. وخاصة بعد فكرت في كلامها ولقيته حق.. يعرب لو ناض وشاف رجله مبتورة بيطب ساكت طول ومش حايتحمل عيشته هكي