#أحلام_يعرُب ((بين الحب والحرب))
#الحلقة_22(( الفصل الثالث عشر حرب جديدة))
((دراما واقعية مقتبسة من أحداث حقيقية))
.
.
.
لايك قبل تقري ♥
.
.
.
((اللهمَّ احفَظْني بالإسلام قائمًا، و احفَظْني بالإسلام قاعدًا، و احفظْني بالإسلام راقدًا، و لا تُشْمِتْ بي عدوًّا و لا حاسدًا، اللهمَّ إني أسألُك من كل خيرٍ خزائنُه بيدِك، و أعوذُ بك من كل شرٍّ خزائنُه بيدِك))
.
.
.
صكرت الباب ومازالت في حالة ذهول... اي ماضي.. واي دليل.. وشن تعرف نهلة عنها.. وشن تقصد بكلامها.. كانت افكار ادور برأس أحلام ومش فاهمة شي!!
تنهدت ومشت توضت وصلت الظهر... حولت ملاية الصلاة... وقمعزت على السرير اتصلت بيقين
ردت : الو.. حلك رايفتي عليا ياحنة
ابتسمت بتوتر : شن اخبارك... فاضية نحكي معاك؟
عقدت حواجبها : كنك شن في... صوتك ماعجبنيش... يعرب قالك شي والا تكلم معاك على قصة اليوم اخرى؟!
هزت راسها : لا لا معاش قال شي ولا حكى معايا .. هوا زعلان من غادي وزاد موقف اليوم عصبه ومابش يحكي معايا ولا نزل للحوش اصلاً
يقين : ماعليش توا يهدأ ويرضى.. راجل ودمه حامي... سايريه وماترديش عليه ولو تبي الصراحة.. معاه الحق يعني.. موقف بايخ اللي صار قدامه
زمت فمها بمتعأض : والله ساكتة ومش مدورة شي.. وعارفة من حقه يعصب ويهزب.. مع اني مادخلنيش بشي.. لكن زي ماقلتي راجل ودمه حامي والموقف بايخ اصلاً... لكن انا توا مش هذا اللي خلاني اتصلت بيك.. صار معايا موضوع ثاني ومش قادرة نصبر لعند بكرا ونحكيلك
يقين بأهتمام : خير إن شالله... شن صار معاك ياحلوما؟
بلعت بتوتر : تعرفيها نهلة بنت حماتي خديجة.. ماهو حكيتلك عليها من قبل
عقدت حواجبها : نهلة بنت خديجة؟! اي نهلة؟! .. اااااها.. اوكي اوكي تمام... قصدك بنت حماتك الصغيرة والا لا؟
احلام : هيا بعينها.. البنت مش قتلك تحكي مع ولد جيرانهم وكبستها مرة وهزبتها...خلاص معاش دورتها بعدين والامور تمام... واصلاً البنت مهوطة الفترة اللي فاتت كلها ومعاش شفت عليها شي... تنهدت وكملت... لعند اليوم ياحنة بعد روحت من الجامعة شفتها من روشن الشقة تهدرز معاه من عند السور... كلمتها وعيطت عليها خشت تجري للحوش
يقين : ريت البنات الصغار معاش يخافوا ياخيتي ومتكلبات من توا
زمت فمها : تي غير اصبري جايتك بالكلام... اسمعي المصيبة هذي بس وشن دارت
يقين : شنو حي عليها؟
أحلام : ياحنة ركبت لعندي فوق ودقت عليا باب الشقة.. ولما قلتلها كنك وحكيت معاها.. طلقت السانها عليا وقعدت تهدد فيا وتقول في كلام مافهمت عليها شن تقصد بالضبط
