Unicode
" ဖိုးထောင် ..... မင်း ဟာက ဟုတ်ရော ဟုတ်ရဲ့လားကွ"
"ကျွန်တော့်ကို ယုံလိုက်ပါနောင်ကြီးမိုးရိပ် ရ။ ပြော-ပြောတာ မဟုတ်ဘူးဗျ။ ကြက်ထောင်တဲ့နေရာတော့ နောင်ကြီးစက္ကတောင် ကျုပ်လောက်ကျွမ်းမှာ မဟုတ်ဘူး။ ဒီညတော့ ကျိန်းသေ ကြက်ဘူးပဲ။ ရွာတောင်က ကြည်အောင် တို့က ဘူးသီး နှစ်လုံးလောက်ယူလာမယ်ပြောတယ်ဗျ။ ခပ်နုနုခူးခဲ့ဖို့သေချာမှာလိုက်တယ်။ အဓိက ကြက်ပဲဗျ။"
ဖိုးထောင်၏ ခေါင်းမော့ရင်ကော့ ပြောစကားကြောင့် နောင် ချုံအကွယ်မှ ကြက်ထောင်ထားသည့်နေရာသို့ ပြန်အကြည့်ပို့လိုက်သည်။ အခုအခြေအနေကို ပြောပါဆိုလျှင် နောင် တစ်ယောက် ကလေးနှင့် ပေါင်းကာချုံအကွယ်တွင် ကုန်းကုန်းကွကွနှင့်။ အကြောင်းက ညနေ မစောင်းတစောင်းအချိန်တွင် ကြက်ဖတစ်ကောင်ပိုက်ကာ နောင့်ခြံထိရောက်လာသည့် ဖိုးထောင်တစ်ယောက်ကြောင့်ဖြစ်သည်။
ဒီနေ့ ရွာထဲ ကာလသားတွေ လူပျိုလှည့်ကြလိမ့်မည်။ ထိုသို့ညမျိုးဆို လူစုံတက်စုံမို့ ရွာဓလေ့အတိုင်း ကာလသားချက် ချက်စားကြသည်။ ထိုအတွက် ကြက်ဖမ်းတာဝန်ကျသူက ဖိုးထောင်ဖြစ်၏ ကြည့်ရသည်က ကြည်အောင် တို့အုပ်စု သည်ဖိုးထောင်ကိုအချိုသပ်ကာ ကြက်ဖမ်းခိုင်းလိုက်ပုံပင်။
ကြည်အောင်တို့ဟူသည် လယ်ထဲဆင်းချိန်မှလွဲ ထန်းတောထဲအမြဲမူးရူးကွဲပြဲနေသည့်အဖွဲ့။
နှင်းနွယ် ၏ ခင်မင်မှုနှင့် ၏ မြထွေး၏မျက်နှာသာပေးမှုကိုပါ တစ်ပြိုက်နက်တည်းရထားသည့် နောင့် ကို ထိုအဖွဲ့ကသိပ်တော့မကျေနပ်။ ထို့ကြောင့် ရွာလမ်းဆုံမိလျှင် မထိတထိ ရန်ထောင်တတ်ကြပေမယ့် နောင် မသိချင်ယောင်သာဆောင်လိုက်သည်။ စက္ကပါလျှင်တော့ ဒီကောင်တွေ ခေါင်းမော့၍ပင်မကြည့်ရဲ။
"ဖိုးထောင်.....မင်း ကြည်အောင်တို့နဲ့ ပေါင်းတာကပေါင်း။ မကောင်းတဲ့အကျင့်တွေတော့မကူးစေနဲ့"
"နောင်ကြီး ကလည်း ပုံမှန်ဆိုကျုပ်ကသိပ်မလုပ်ပေးပါဘူးဗျ။ ဒီတစ်ခါတော့ နောင်ကြီးမိုးရိပ်ကိုစားစေချင်လို့ဗျ။ "
"အေးပါကွာ....ဟုတ်ပါပြီ"
ရွာထဲ ဖိုးထောင်တို့မိသားစုက ဆင်းရဲသည်။ ဖိုးထောင်မိဘများက သူများလယ်တွင်သူရင်းငှားလုပ်ရပြီး ဖိုးထောင်ကတော့ ဦးဓန နွားများကိုကျောင်းပေးရသည်။ တခြားရွယ်တူများနှင့် ဆော့ကစားချိန်ဟူသည်လည်းရှိခဲ့ပုံမပေါ်။ အပေါင်းအသင်းမိတ်ဆွေဟူသည်လည်းမရှိ။ ထို့ကြောင့် သူ့ကို အရေးတယူလုပ်သူဆိုလျှင် စိတ်ရင်းမှန်နှင့် ခင်ပစ်လိုက်တတ်သည်။
YOU ARE READING
"နောင့်" ရိုးမ ရာဇာ
Fantasyကြမ်းတမ်းတဲ့ ရိုးမရာဇာ မုဆိုးကြီးရဲ့ အသည်းနှလုံးကိုခြွေယူဖို့က ဘိလပ်ပြန် သုတေသနပညာရှင်လေးရဲ့ အပြုံးနုနုသာလိုပါသတဲ့...... မြို့ပေါ်မှာမွေး ဘိလပ်မှာ ပညာသင်ကြားခဲ့တဲ့ သုတေသန ပညာရှင်လေးဟာ မုဆိုးကြီးရဲ့ လက်ဖဝါးကြမ်းကြမ်းကိုကိုင်ဆွဲလိုက်ရရင်ဖြင့် ပဲခူးရို...
