"နောင့်" ရိုးမ ရာဇာ

Ch 5

Unicode

စာအုပ်၊ ဖောင်တိန် ၊ရေဗူး ၊အလွယ်တကူခေါက်သိမ်းရသည့်အိပ်ယာလိပ် ၊အရေးပေါ်သုံးဆေး၀ါး ၊မှန်ဘီလူးအသေး၊ နမူနာပစ္စည်းတို့ထည့်ရန် အိတ်အသေး နှင့် တစ်လက်မအရွယ်အစားလောက်သာရှိသည့် ဖန်ပုလင်းအနည်းငယ်၊ လက်အိတ်၊ အစာခြောက်တချို့ ၊ဓါးမြှောင်အသေး၊ အ၀တ်အစားအပို နှစ်စုံ ၊သန့်စင်သောအ၀တ်ဖြူတစ်စ၊ ဆပ်ပြာခဲ ၊ဆားအနည်းငယ်၊ နှစ်ချောင်းထိုးဓါတ်မီးတစ်လုံး၊ ဓါတ်ခဲအပိုတစ်စုံ ၊မီးခြစ်ဆံဗူး ၊ဖယောင်းတိုင် ......

ပစ္စည်းပစ္စယတို့ အရှေ့တွင်အစီအရီချကာ နောင် ဘာလိုအပ်သေးသည်ကို စဥ်းစားနေမိသည်။ ကျောပိုးအိတ်ထဲထည့်သယ်ဖို့က ပစ္စည်း ခပ်များများထည့်၍မရ။ အပျော်ခရီးသွားတာမဟုတ်ပါဘဲ တောတောင်ထဲ သုတေသနပြုရန် ၀င်ရမည်ဖြစ်သည်ကြောင့် ကျော့မော့နေ၍ မရ။ ဒူပေ ဒဏ်ပေခံနိုင်ရမည်။ ထိုသို့ အပင်ပန်းခံနိုင်သည့်နေရာတွင်တော့ နောင် က ထူးချွန်သည်။

နိုင်ငံခြားတွင်ကျောင်းတက်ခဲ့စဥ်က လက်တွေ့အဖွဲ့လိုက်ကွင်းဆင်းရသည့်အချိန်များတွင် တောထဲ သုတေသနပြုဖူးပေမယ့် တောနက်ထိတော့မ၀င်ခဲ့ဖူး။ ပြောရလျှင် ယခုအကြိမ် ရိုးမထဲ၀င်ဖို့ ဆုံးဖြတ်ခဲ့ခြင်းသည် နောင့်အတွက်ပထမဦးဆုံးအတွေ့အကြုံမို့ စိတ်မလှုပ်ရှားဟုဆိုလျှင်တော့ လိမ်ရာကျလိမ့်မည်။

မနက်ဖြန်နံနက် အာရုဏ်တက်သည်နှင့် ရိုးမထဲ၀င်ကြမည်ကြောင့် ဒီအချိန်မုဆိုးကြီးလည်း နောင့် လိုပြင်ဆင်နေလောက်မလား သိချင်မိသည်။ ထို့ကြောင့်အိမ်ရှေ့ထွက်ကာတစ်ဖက်ခြံကို လှမ်းကြည့်တော့ မုဆိုးကြီးသည် တစ်ခုခုကိုပြင်ဆင်နေပုံပင်။ အိမ်ရှေ့၀ါးကွပ်ပျစ်ပေါ်ထိုင်ကာ ဘေးတွင် ပြောင်းရှည်သေနတ်တစ်လက်ချ၍ တကုပ်ကုပ်လုပ်နေသည်က ပတ်၀န်းကျင်ကိုမေ့လျော့ထားပုံရ၏

"ဗျို့......ညီ နောင် ရေ......."

နောင် တစ်ယောက်တစ်ဖက်ခြံကို သွားရနိုးမသွားရနိုးချိတုံချတုံဖြစ်နေစဥ် ခပ်ကျယ်ကျယ်ခေါ်သံနှင့် နောင့်ဆီ အပြေးရောက်လာသူကတော့ ကိုဒိုးလုံးဖြစ်၏