" انا شاعرك العام والقصيد عيونك "
'
" نسرع الاحداث ( قبل الملكه بيوم ) "
'
العيال كانوا بالمزرعه وهم يشوفون العمال فوق الجدار ع سقف يعلقون اللمبات ، والجد عبدالعزيز والجد سُليمان واقفين يسولفون ويتقهون ويناظرون.
ومشعل كان يكلم العمال عن ترتيب الكراسي ،
وصقر واقف وبيده يتكلم مع راعين المحل عن التوزيعات،
وعبدالرحمن كان مع ابوه وفهد يقررون عن الفرقه يجيبونهم للملكه يطبلون ويغنون ،
وعمر كان فوق ع الجدار مع العمال يساعدهم يعلقون اللمبات
وكل شخص مشغول هالليله وميتين تعب ،
'
ام صقر كانت بالمزرعه داخل بالمجلس مع البنات ،
وجايبين نقاشه تنقشهم ومارلين تسوي القهوة مع باقي الاشغالات وتسولف معاهم وتتعرف عليهم ومبسوطه ،
ام صقر كانت جالسه تنقش من النقاشه ،
و ام نجلاء جنبها تسولف ويتقهون ويضحكون ،
آمال كانت جالسه مع نجلاء يكلمون القهوجيات ،
نجلاء ناظرت لها : شرايك نطلع نشوف شيسون؟
آمال بصدمه : وين نطلع؟
نجلاء : اقصد من الشباك نشوف شيسون بالمزرعه ،
آمال بحماس : يلا وطلعوا عند الشباك وهم يشوفون ،
آمال : عزتي لهم مكروفين ،
نجلاء كانت واقفه تناظر لمشعل ، الي كان واقف بتعب والشماغ على كتفه ويكلم العُمال ،
آمال ناظرت لصقر : هذا هو زوج ملاذ؟؟؟
نجلاء ناظرت لصقر : اييي هو شفت صورته بجوال بابا ،
'
ام مشعل و ريما كانوا بالبيت والضيوف عندهم ومشغولين معاهم ويسون قهوه والحلا ويجهزون للعشاء ،
سمر ناظرت لمريم : بنمشي معاكم بكره للملكه ،
ريما : ايي ما شاء الله العالم كله جاء عندنا ،
سمر بضحكه : شنسوي بيتنا بعيد عاد وحنا متحمسين ،
ريما : خالتي تحسب بنجيب العروسه معانا ،
سمر باستغراب : ليه ما تجيبونها؟
ريما : لا وين بس ملكه اما هُم العريس الثاني بياخذ ملاذ،
سمر : اجل انتم بعد جيبو عروستكم ،
ريما : لا والله ما يوافقون ما اتفقو ع كذا ،
'
ام صقر كانت مبتسمه ونجلاء وآمال يورونها فساتينهم ،
ام صقر : انا اخذت فستان اخضر تحسون اي لون كعب يليق؟
نجلاء بتفكير : ابيض حلو !
آمال : لا احس ذهبي او فضي ،
ام نجلاء : اي ذهبي بيطلع حلو حتى ابيض ،
ام صقر ناظرت لفستان ام نجلاء : بتلبسين كعب ابيض انتي؟
ام نجلاء : اي الاسود ما يليق عليه الا الابيض ،
ام صقر : حتى الذهبي مع الاسود حلو ،
آمال : طيب انتم ساعدوني اي طقم البس؟
'
الجد عبدالعزيز طلع للعيال : ادخلوا يلا تعشو و ارتاحوا نكمل بعدين تعالوا يا يبه ،
العيال نفضو ثوبهم ويدينهم ودخلو يغسلون و توجه للمجلس جلسوا كلهم يتعشون بعد دقايق خلصوا وتقهوى وارتاحو و رجعو يكملون ، كان شغل كثير للمزرعه عشان الملكه ،
انتهى ليلتهم بتجهيزات ،
'
—————————————————-
( يوم الخميس الصباح واخيرًا اليوم المُنتظر )
'
" بالفندق عند العيال "
صقر الي ما ذاق لذة النوم من الفرحه والحماس قام وتوجه يدخل ياخذ له شاور بعد دقايق طلع وهو يشوف اخوانه باقي نايمين ورمى عليهم المنشفه : يلاا قومو ورانا ليل طويل ،
سلطان بانزعاج : اوف والله امس تعبت ،
عبدالرحمن : ظهري بينكسر من التعب كله منك يا صقر ،
عمر : والله ما شفتوني انا الي قاعد اموت من الم ظهري جلست ساعتين فوق السقف تقول قرد ،
صقر بضحكه : لعيون تهون كل شيء يلا اخلصوا ،
دخل الجد وكان راجع من المسجد : للحين ما صحيتوا ،
الكل فزو وقامو يتوجهون يتوضون ،
'
" بمزرعة الجد عبدالعزيز "
كانوا جالسين على طاولة الطعام والبنات ياكلون بسرعه ،
الجد : استهدو بالله بشويش وراكم مستعجلين ،
آمال : نسيت اقولك يبه ترا طلبت مصوره ،
ام نجلاء : وليه ان شاء الله؟
آمال : وشو ليه مالي دخل لازم ملاذ تتصور وتشوف نفسها بعدين ان شاء الله ، الكل همسو امين ،
نجلاء : يلا بروح الصالون وناخذ ملاذ بعد ،
ام نجلاء : توه بدري يا بنتي ،
آمال : يمه وين بدري اعدل اظافري ونجلاء تبي تصبغ شعرها وتستشور وانا اتمكيج و استشور وملاذ معانا بعد.
فهد التفت لزوجته : انتي بعد روحي معاهم تجهزي؟
ام نجلاء هزت راسها بالنفي : لا ام صقر قالت بتجيني هنا ونتحهز مع بعض خلي البنات يروحون.
آمال ونجلاء طلعوا للغرفه لبسوا عباياتهم والشغاله كانت تلبس العبايه لملاذ وطلعوا والشغاله مشت معاهم وملاذ معاها ركبوا السياره مع السواق.
'
الجد سُليمان : يلا يبه لا تتاخرون بنمشي بدري ،
عبدالرحمن : ليه بدري اليوم بعد يعني ننكرف؟
يوسف بضحكه : اي لازم ونكون هناك ونستقبل الضيوف ،
سلطان كان بعيد عنهم وساكت همه القضيه ،
عمر نزل وناظر فيهم : اروح اخذ البشت للسياره ،
الجد : اي ياولدي خذ حق الكل حقي وحق ابوك واخوانك،
صقر : انا رايح اخذ التوزيعات بسيارتي وانتم روحو مع جدي،
عبدالرحمن : تمام خذ عمر معك يساعدك ،
صقر كان الشماغ بيده والبشت بعد مشى فتح باب السياره وعلقهم ورا ، وعبدالرحمن نزل وشماغه بيده ،
ام صقر ناظرت ليوسف : انا بعد امشي معاكم اتجهز هناك ،
يوسف : تمام يلا تجهزي وحنا تحت ،
'
ام مشعل و ريما كانوا بالصالون ونفس الصالون وصلو لها آمال ونجلاء وملاذ ، نجلاء ناظرت فيهم انصدمت وصدت بهدوء،
آمال تصنعت الابتسامه ومشت تسلم عليهم ،
نجلاء سلمت بدون نفس ومشت جلست ،
آمال : تصبغين شعرك صح؟
نجلاء هزت راسها بالنفي : لا كنسلت ماعاد لي خلق ،
آمال تنهدت بضيق : اعرف ليه تقولين كذا بس تكفين انسي كل شيء وخلي همك مشعل وبس!
'
( العيال وصلوا المزرعه ونزلوا وبنفس الوقت وصل ابو مشعل.
عبدالرحمن مشى وهو يسلم عليه : وينه مشعل ما جاء؟
ابو مشعل : الا ياولدي بالطريق جاي الحين ،
الجد سُليمان التفت للعيال : دخلو كراتين المويا داخل ،
سلطان : كلمت الشغاله تدخلهم الحين ،
الجد عبدالعزيز طلع وناظر لسُليمان ومشى يحضنه ويسلم،
فهد ناظر لـ يوسف وهمس : الله يعدي هالليله على خير ،
سلطان رفع راسه للسماء: شكله بيمطر ونروح فيه ،
عمر : تكفى لا والله بيخرب كل شيء ،
صقر نزل والشماغ بيده واليد الثاني بجيبه يطلع مفاتيحه وناظر لعبدالرحمن : خذ المفاتيح شماغك بسيارتي ،
'
ام نجلاء ابتسمت وهي تستقبل ام صقر وحضنتها ،
ام صقر : والله من الحماس جيتك الحين ،
ام نجلاء : زين سويتي والله وانا كلمت وحده ميكب ارتست تجي تمكيجنا والبنات راحوا الصالون كلهم ،
ام صقر ناظرت لساعته : الحين خمسه العصر مافي وقت ،
ام نجلاء : اي انتي اجلسي خليها تمكيجك وانا اروح اكلم الشغالات يسون القهوه و يولعون الفحم للبخور ،
ام صقر ابتسمت ومشت حطت فستانها على الكنب وجلست،
'
يوسف برفض : لازم الحريم في القاعه شف زحمة السيارات كيف ما ينفع كلهم هنا ما اتوقع المجلس تكفيهم ،
فهد : والله قلت نفس الشيء محد سمعني ،
الجد عبدالعزيز بورطه : والحين ايش الحل؟
عبدالرحمن : والله مافي حل انا اقول نمشيه هالليله ،
صقر : شرايكم طيب اروح اتصرف اشوف قاعه قريب من هنا؟
سلطان : شف قريب من المزرعه في شاليهات وقاعات ،
عمر : يمدي الليله يعني؟
فهد ناظر لسلطان : الحقني ياولدي وتعال نشوف ومشو ركبو السياره ، والكل جلسو واقفين و تورطو وكلشوي يناظرون لساعتهم ويشوفون مافي وقت تنهدو بتعب ،
فجاه وقف سيارة السواق ووصلوا البنات من الصالون ، انصدمو وهم يشوفون زحمة السيارات والعيال الي واقفين برا وواضح في سالفه كلهم متوترين وشماغهم بيدهم والي على كتفهم ويناظرون بوجيه بعض والي يتصلون ،
آمال ونجلاء وملاذ نزلوا ، عبدالرحمن التفت لهم وهو يشوف،
البنات صدو عنهم ودخلوا لداخل ،
عبدالرحمن صد نظره وهمس : اتصلو شوفو شصار ؟
'
فهد وقف سيارته : انزل نشوف هالقاعه قريب من المزرعه ونزلوا وهم ياخذون الرقم الي مكتوب على الجدار ويتصلون،
بعد دقايق رد صاحب القاعه : السلام عليكم ،
فهد : وعليكم السلام جيت ابي نستاجر هالقاعه ،
صاحب القاعه : متى ؟
فهد : الليله ما يهم السعر ايش المهم نبيه الليله ،
صاحب القاعه : والله اعتذر ما يمدي الليله ،
فهد ابتسم : مو مشكله عوافي وقفل منه ،
سلطان : ما وافق؟ فهد هز راسه بالنفي ،
سلطان : شف عمي هنا قدام بعد في قاعه نمشي نشوف ومشو وهم يتصلون وللاسف اغلبهم يرفضون تنهدو بتعب بعد مُعاناة واخيرًا لقو قاعه والساعه صار ٦ و اذن المغرب،
'
YOU ARE READING
انا شاعرك العام والقصيد عيونك
General Fictionانا شاعرك وقصيدي عيونك ، انا شاعرك ومجنونك ومن مثلي ! وانا الصوت اللي يحوفك ، انا شاعرك وقلمي تُكتب لكِ " حساب الكاتبه في الانستا ( arwicx )
