انا شاعرك العام والقصيد عيونك

انا شاعرك العام والقصيد عيونك بارت ١

اهلًا انا الكاتبه آمال وهذا حسابي انستا : arwicx )
جيتكم بروايه جديده واتمنى تنال اعجابكم ، موجود على حسابي في الانستا اذا ودكم تقراونه هناك ، عالعموم مالكم بالطويل يلا ،
بسم الله نبدا بقلم الكاتبه آمال ✍️ ،
_____________________

'
- بدون تعريف الشخصيات راح تعرفون شخصيتهم مع البارتات والاحداث ، -
"
( احفاد سُليمان ) اهل القصيم ،
-
عبدالرحمن بن يوسف وحفيد سُليمان الفرحه الاول للعايله ، يمتلك من العُمر ٣٢ ،
-
دكتورنا صقر بن يوسف الابن الثاني لـ يوسف عمر ٢٩،
-
المُحامي سلطان بن يوسف عمره ٢٨ ،

اخر العنقود من احفاد سُليمان عمر بن يوسف ، عمره ٢٢،
'
يوسف الابن الوحيد والاكبر لـ سُليمان عمره ٧٦ عنده فقط ٤ عيال ،
'
" سُليمان عمره بالتسعينات صديق عبدالعزيز "
-
= حفيدات عبدالعزيز = اهل المدينة اهل الكرم ،
'
ملاذ بنت فهد حفيدة عبدالعزيز عمرها ٢٥ ،
-
نجلاء بنت فهد حفيدة عبدالعزيز عمرها ٢٣
-
آمال بنت فهد حفيدة عبالعزيز عمرها ١٩ سنه ،
'
فهد بن عبدالعزيز الابن الكبير لعبدالعزيز عمره ٦٠ ،
'
____________________
بيت سُليمان بيت الجد ، كبير البيت وله كلمته على الكل وعلى احفاده ، دخل البيت والعكاز بيده ويمشي بهدوء دخل وهو يشوف سلطان جالس على الكمبيوتر وجنبه قهوته ،
ابتسم بخفه يحب يشوف احفاده وهُم يشتغلون وواقفين على رجولهم فخور فيهم كلهم ولكن سلطان الاقرب لقلبه ويحبه اكثر من الكل رغم انه ما يفرق بينهم ولكن القلب يميل لسلطان دخل وصوته يسبق خطواته : السلام عليكم ،
فز سلطان من صوته وابتسم ونطق : وعليكم السلام ، قام مشى لعنده وهو يقبل راسه ويدينه : استريح جدي اجلس ،
جلس سُليمان وترك العكاز سنده على الطاوله وجلس وهو يلتفت يمين يسار بينما سلطان كان يصب له القهوة ،
قرب اخذ منه القهوه وهو ينطق باستغراب : ما هُم في البيت؟
سلطان رفع كتوفه : لا مو موجودين امي راحت عزيمه ،
الجد شرب رشفه من القهوة : مو عن امك ،
سلطان عرف مين يقصد لكن تعمد ما يجيب طاريه وقفل الكمبيوتر وحطه على جنب وهو يناظر : عبدالرحمن ؟
الجد هز راسه بالنفي : ماهو عبدالرحمن ولا هو عُمر ، سكت قبل ينطق ويقول صقر مسك لسانه عن اسمه وصد ،
سلطان تنهد وهو يعرف هالزعل الي بينهم ما ينهيه شي صقر الي كان قريب من جده اكثر من الكل ويحبه ويجلس على باب البيت حتى يوصل ويشوفه ويقبل راسه قبل الكل ، هالمره هو صد ولا وده ينهي الزعل ، بينما الجد كان جالس ينتظر سلطان يعطيه اخبار صقر ، فاقده وجدًا فاقد حُبه ملهوف عليه ومشتاق فاقد صقر وحنيته ، سلطان سكت وهو يوفي بوعده لصقر حلف له عليه انه ما يعلم اخباره لجده ، الجد انتظر لثواني ولا سمع رد من سلطان ، ترك الفنجان من يده برجفه وهو يقوم ويمسك عكازه ويمشي بطريقه لغرفته ، سلطان ناظر فيه حتى اختفى من قدامه تنهد وهو ياخذ جواله ويتصل على صقر ، بعد ثواني ترك جواله على جنب وهو يشوف انه مايرد!
قاطع حبل تفكيره دخول عبدالرحمن وهو يدخل ويفسخ نظارته ويحطه على الطاوله وابتسم : من يدين امي؟
سلطان هز راسه بالنفي : ماهي موجوده ،
عبدالرحمن: اجل حرام علي اشرب رشفه منه ،
سلطان : صقر يا عبدالرحمن ،
عبدالرحمن رفع نظره لملامح سلطان وعرف في شي بالموضوع وجلس على جنب : وش به صقر ماله جيه؟
سلطان : جدي سال عن اخباره ولا نطقت لساني ماله قوه يكسر وعدي له ، ودي اوفي بوعدي وماودي اكسر جدي ،
عبدالرحمن تنهد بقلة حيل : صقر عنيد يا سلطان ،
ناظر له سلطان وهمس اعرف يا عبدالرحمن وجدي مو اقل منه بالكبرياء بس ايش الحل ؟
عبدالرحمن: خله على ربك يلا اروح اريح راسي شويتين ،
سلطان هز راسه ونطق نوم الهناء يارب والخير يحتويك ،
'
_ بيت عبدالعزيز _
'
نجلاء صبت الشاي بالاكواب والشغاله ترتب الشابوره دخلت آمال وهي تسحب مويا من الثلاجه : يالله تاخرتو ساعه تسون شاي ،
نجلاء التفتت له : ساعدينا طيب ،
آمال : انا بروح اجلس مع جدي بسرعه تعالو ، وطلعت للحديقه وهي تشوف الشغالات يحاولون يشبون النار والجد جالس يطالع فيهم وابوها يولع النار ، مشت سحبت الكرسي وهي تجلس : يووه برد ، فجاه دخلت ام نجلاء وبيدينها جاكيتات البنات وشال الجد ومشت وهي تحط الشال على كتف الجد و رفعت نظره لفهد : بردان؟
فهد التفت لها : تدفيني؟ ابتسمت وهي تهز راسها : اي اعطيك شالي تدفي نفسك من هالبرد ، مشت وهي تمد الجاكيت لآمال : خذي حقك وحق خواتك ، آمال هزت راسها بالنفي لا بروح عند جدي اتدفى معه بالشال حقه مشت وهي تجلس جنبه الجد ضحك وهو يضمها له ويسحب شاله لها ،
فهد التفت لزوجته لطيفه ام نجلاء : تعالي هنا جنبي ،
قامت ام نجلاء ومشت وهي تدفيه بـ شالها وجلست جنبه ،
فجاه دخلو البنات مشت نجلاء وهي تحط الشاي على الطاوله الشغاله مشت وهي تصب ، نجلاء حطت الشابوره وهي تاخذ جاكيتها من امها وتلبسها : اوف تثلجت من البرد ،
آمال مدت يدها وهي تاخذ فنجان الشاي من الشغاله وتحطه قدام الجد ومدت اخذت الشابوره ومدت للجد ، الجد اخذ منها وهو يغمسه بالشاي وياكل ،
فهد : شرايك يبه لو نشوي دجاجه؟
نجلاء : هالله وتكتمل اجواء الشتاء ،
الجد : لا يا يبه خلنا على الشاي ،
آمال التفتت لـ نجلاء : الساعه كم ؟
نجلاء ناظرت لساعتها وهمست : توه بدري صارت عشره ،
آمال : اوف فيني نوم كله من ماما خلتني اصحى بدري ،
ام نجلاء التفتت للجد : كله من جدك هو قال يجونا ضيوف ،
الجد : اي بس انشغل الرجال بيجي بكره ،
فهد باستغراب : من يا يبه سُليمان ؟
الجد : اي وانا ابوك عزمتهم من زمان ما قابلته ولا شفته مشتاق له والله مشتاق لـ ايامنا ،
فهد : يجي لوحده ولا مع احفاده ؟
الجد : والله انا عزمت العايله كله ، ملاذ كانت جالسه ولطيفه امهم ام نجلاء كانت تغمس الشابوره و تـ اكلها ، مُلاحظه بنتهم ملاذ ما تشوف بمعنى عمياء ولا تتكلم ' ،
آمال وهي تقوم : انا بروح غرفتي بنام مصدعه ،
الجد : انتبهي على نفسك وابعدي عن النار ، آمال ابتسمت وقربت باست جبينه ومشت طلعت متوجه تدخل البيت ،
'
وقف سيارته يوسف والتفت لزوجته : ابوي كلمك بشيء؟
ام صقر هزت راسها بالنفي : لا ما كلمني ليه ؟
يوسف بهدوء : بكره معزومين عند صديق له في المدينة الصباح طيارتنا نطلع من القصيم ونروح المدينه ،
ام صقر : اي على هالطاري كلمني سلطان ،
يوسف : اي جهزي الاغراض ويمكن نجلس في المدينة كم يوم من زمان ما رحت اشتقت لاجواء المدينة ،
ام صقر ابتسمت : خلاص ان شاء الله بنروح ، ونزلت من السياره صادفت عُمر كان طالع من البيت : وين رايح؟
عمر ناظر فيها : رايح اجيب اشوف صقر وينه تاخر عن البيت،
يوسف التفت لهم : ليه وين راح ؟
عمر : معرف ما يرد علينا ، يوسف اخذ جواله وهو يتصل عليه ، ام صقر مشت داخل للبيت ،
-
صقر كان حالس بسيارته ويدخن فجاه رن جواله اخذه وهو يناظر لاسم كان ابوه ، مايقدر يقفل بوجهه ولا يقدر انه يتجاهل اتصالاته تنهد وهو يرد : هلا يبه؟
يوسف بحنية وخوف : وينك ياولدي عمر يقول انك ما ترد ومن الصباح مختفي؟ فيك شي يابوي؟
صقر بهدوء : مافيني شي يا يبه بس ابي اكون لحالي ،
يوسف : اعرف انك زعلان بسبب جدك وانه ضربك وعصب منك بي بالنهايه هذا جدك ياولدي ويخاف عليك من الغلط ، تعال البيت انا واقف عند الباب انتظرك ، تعال وما يصير الا الي بخاطرك وانا اتفاهم مع ابوي بكل شيء ،
صقر : يبه انت نام و ريح راسك راح ارجع متاخر ،
يوسف : اقولك تعال ولا تشغل بال امك وتتعبها يلا ارجع انتظرك وقسم بالله يا صقر ماني حاط رجلي داخل البيت لين تجي انت رجلي على رجلك يلا تعال وانا ابوك ،
صقر ابتسم على حنيته وحُبه وخوفه ، دايم يوسف يتعامل مع عياله بكل حُب وحنيه يحبهم كثير ويحب انهم يتربون ويكبرون على الحُب والحنان ،
'
دخلت ام صقر البيت حطت عبايتها على الكنب ومشت لغرفة عبدالرحمن تتطمن على عيالها اول ما فتحت الباب فزت من برود الغرفه كان بارد زي الثلج مشت شغلت الضوء وقفلت المكيف وناظرت لعبدالرحمن كان نايم ولا حاس بهالبرد تنهدت وهي تهمس : الله يهديك لو تمرض شسوي فيك انا مشت وهي تسحب اللحاف وتدفيه طفت الضوء وطلعت توجهت لغرفة سلطان فتحت الباب ناظرت فيه كان جالس على السرير والاوراق بيده ويشتغل ابتسمت بهدوء ،
سلطان رفع نظره لها : هلا بالغاليه تعالي اجلسي كيفك؟
ام صقر ابتسمت : انا بخير الحمدلله ما نمت للحين؟
سلطان : والله اليوم عندي شغل كثير الظاهر ما اذوق لذة النوم ، علميني انتي صقر كلمك ؟
ام صقر : لا والله ما كلمني عمر كلم ابوك عنه وهو يتفاهم معه، وانت تعرف صقر عنيد ما يرجعه الا ابوك ،
سلطان تنهد : جدي ندمان على تصرفاته مع صقر ،
ام صقر : الله يهديهم ياولدي ايش اقول بعد ،
'
صقر وقف سيارته فتح الباب نزل وهو يشوف ابوه واقف مع عمر ويسولفون مشى وهو يسلم على ابوه ويقبل يده ، يوسف سحبه وهو يحضنه ويطبطب على كتفه : خل عنك الزعل ،
صقر بعد عنه وهو يناظر : مو زعلان ،
يوسف : يلا ادخل البيت ونام ارتاح وبكره نتفاهم ،
عمر : خلاص عاد صقر اتفل على الشيطان وامشي ،
صقر دخل مع ابوه للبيت عمر قفل الباب ولحقهم ،
ام صقر نزلت ومشت وهي تحضن صقر : وين كنت؟
صقر بكذب : كان عندي شغل توي خلصت ،
يوسف : يلا كل واحد على غرفته نامو ورانا سفر ،
صقر : يبه انا ما بمشي روحو انتم ،
يرسف : ولا كلمه يا صقر يلا روح وانا اكلم الشغالات يجهزون اغراضكم يلا كل واحد على غرفته ،
'
'
نجلاء كانت ماسكه يد ملاذ دخلتها الغرفه وسدحتها وحطت اللحاف عليها والتفتت لـ آمال كانت نايمه مشت وهي تقفل المكيف : حسبي الله من بنت بنموت من البرد وهي نايمه على المكيف والتفتت تناظر لملاذ : ملاذ تبين شي ولا انام؟
ملاذ هزت راسها بالنفي بمعنى لا مابي شيء ،
نجلاء ابتسمت وقامت تمشي بتنام فجاه انفتح الباب ،
دخلت لطيفه : للحين ما نمتو انتم؟
نجلاء : الحين بننام وبنتك المجنونه مشغله المكيف ،
لطيفه ضحكت والتفتت لملاذ : ملاذ بتنامين يا ماما؟
ملاذ هزت راسها بـ اي ، منيره همست استودعتكم الله يلا نامو نوم الهناء يارب ، ومشت طلعت وقفلت الباب ، نجلاء مشت سحبت جوالها انسدحت وهي تطقطق بجوالها ،
'
————-
' يوم جديد على ابطالي ' س ٨ الصباح '
'
عبدالرحمن كان جالس على جواله يطقطق والشغاله ترتب اغراضه في الشنطه دخل سلطان : عبدالرحمن اخلص يلا،
عبدالرحمن : خلاص خلاص جاي روحو انتم ،
سلطان : جدي يقولك بنمشي بسياره واحد للمطار ،
عبدالرحمن: وين يا ابني ماراح تكفي الاغراض.
سلطان : ماعليك راح تكفي بس اخلص علينا انت ،
عبدالرحمن: والله عزيمة جدي هذا يقروشنا الظاهر ،
دخل صقر : سلطان وين شاحني؟
سلطان : شعرفني انا روح اسال من عُمر الي ما ترك شاحن احد في البيت كل ما لقى شاحن شبكه بجواله ،
صقر : الله ياخذ هالعُمر راح يخرب لي شاحني مشى طلع وهو يصارخ : عم..وقف من شاف جده عبدالعزيز كان نازل من الدرج صد بيدخل لغرفة عبدالرحمن لكن وقفه صوته ،
عبدالعزيز : خلك انسان وسلم عالاقل ،
صقر بهدوء : السلام عليكم ، الجد رد السلام وصد طلع ،
صقر حط جواله بجيبه والتفت لسلطان وعبدالرحمن الي طلعو من الغرفه ، ام صقر ناظرت فيهم : يلا نمشي؟
عبدالرحمن: اي يا يمه يلا وطلعوا وهم يشوفون ،
يوسف كان يحاول يحط الاغراض كله بسياره وحده ،
عبدالرحمن: والله الي يشوف بيقول نهاجر حنا ،
سلطان : يبه في مكان ولا ارجع الباقي للبيت؟
يوسف : ماعليك في في جيبهم ،
صقر : يبه شوي ويقلب السياره وانت تقول في في ،
عبدالرحمن : قلتلكم ما تكفي سياره وحده ما سمعتوني ،
الجد سُليمان : لاحول ولا قوة الا بالله لو تقفل فمك انت واخوك راح ندبر امورنا صد ومشى يركب السياره ،
عمر بضحكه : والله قفلو فمهم ولا ما قفلو مافي مكان يعني مافي ، يوسف ناظر فيه والله انت الي لو تكرمنا بسكوتك ،
ام صقر مشت وهي تركب السياره عبدالرحمن صد ومشى يركب ، يوسف وسلطان بعد محاولات حطو الاغراض كله ،
ومشو يركبون وتوجه للمطار ،
-
" بيت عبدالعزيز "
'
الجد عبدالعزيز ناظر لفهد : كلمني قال بيجون على المغرب او العشاء،
فهد : وينهم هُم الحين ؟
الجد عبدالعزيز : الحين طالعين على المطار ويروحون الفندق يريحون شوي ويجون على المغرب ،
فهد : اجل يلا انا اروح اخلص شغلي بالشركه ،
الجد عبدالعزيز : وانا اروح مع السواق اشوف موضوع الذبيحه ،
ام نجلاء كانت واقفه تكلم الشغالات ينظفون ،
وهمست : يلا بسرعه نظفو زين و رتبو كل شيء و مجلس الرجال وحده تروح تمسح الطاولات يلا مافي وقت ،
نزلت آمال وبيدها التفاحه : يمه مرره بدري ،
ام نجلاء : اسكتي انتي و روحي شوفي اختك ملاذ وين ،
آمال : مع نجلاء اكيد وين بتكون يعني ،
ام نجلاء : طيب اسكتي وابعدي عن طريقي لا تلهيني عن شغلي و روحي جهزي نفسك بتجي امهم بعد ،
آمال : ماعليك جاهزه انا خليهم يوصلون بس بعدين نشوف،
نزلت نجلاء وهي ماسكه يد ملاذ : آمال انتبهي لملاذ الشغالات كلهم مشغولين وانا بروح استشور شعري ،
آمال : يوه نجلاء انتي وامي ما شاء الله عليكم مستعجلين توه صار ظهر في وقت كثير ،
نجلاء : ادري في وقت بس انتي تعرفين ماراح افضى وادخل اشوف القهوة واكلم الشغالات اعلمهم شيسون ،
آمال : تمام روحي ، اخذت ملاذ ومشت جلست بالصاله ،
ام نجلاء ناظرت فيها : قومي روحي جيبي جوالي من فوق ،
'
_ في الطياره تحديدًا -
'
عبدالرحمن وهو يدف سلطان : ابعد عني خنقتني يا كبر راسك مالقيت الا كتفي تنام عليه ،
سلطان : والله اني ما نمت زين كنت سهران اخلص شغلي ،
عبدالرحمن سحب السماعات حطهم باذنه وشغل اغنيه ،
سلطان حط راسه على كتفه و فز بانزعاج : الله ياخذك يا عبدالرحمن ، عبدالرحمن ضحك وهو يناظر : تستاهل ،
وصقر و عمر كانو جنب بعض جالسين ،
صقر ناظر لساعته : ياهوه متى بنوصل تعبت والله ،
عمر : ليه لا يكون انت الي تسوق فينا الطياره ؟
صقر : والله فله ضحكتني اقول اذلف عني ،
عمر : تدري يا صقر وش حلمي؟ اكون طيار والله فله ،
صقر : انت اخلص دراستك بعدين نشوف ايش تصير والله من نتائجك حتى فوق الطياره ما يحطونك ،
عمر : شف من يتكلم وانت بغيت تقتل مريض بالمستشفى،
صقر بضحكه : والله انك كذاب ابعد عني بس ،
عمر : الا اقولك ايش مناسبة العزيمه؟
صقر : اسال من جدك شعرفني انا الا ولازم كلنا نروح ،
'