انا شاعرك العام والقصيد عيونك

انا شاعرك العام والقصيد عيونك ١١،

انا شاعرك العام والقصيد عيونك  ،
'
سلطان نزل وبيده اغراضه ابتسم وهو يرفع راسه ويناظر لبيتهم ومشى طلع المفتاح وفتح الباب و دخل استغرب من الهدوء ترك اغراضه وهو يصارخ : مارليننن ،
الشغاله كانت جالسه بالمطبخ تكلم زوجها فزت و تركت جوالها و ركضت : هلا بابا انتا جيت ما شاء الله ،
سلطان : اي جيت خذي اغراضي لفوق وانا بروح اخذ لي شاور سوي لي شي سريع قبل اطلع ،
مارلين : وماما كيف وعمر وبابا كيف؟
سلطان : كلهم بخير يسلمون عليكِ يلا روحي اخلصي ،
مارلين ابتسمت واخذت اغراضه ومشت ،
سلطان اخذ جواله وهو يتصل على مصعب دقايق و رد ،
مصعب : هلا هلا تو ما نور القصيم ،
سلطان ابتسم : القصيم منور بوجودك والله عالعموم جايك بعد شوي استلم منك ملف القضيه ،
مصعب : على هالطاري ما تقدر تتواصل مع البنت ،
سلطان بضحكه : ما شاء الله وكيف اخذ الادله؟
مصعب : بيوصلك كل شيء بس اوعدني تكسب هالقضيه!
سلطان : ما اوعدك يا مصعب لانه صعب هي رافعه قضيه ضد ابوها واخوانها وانهم يعنفونها ولو ابوها قدر يخليها كذابه وقته وش اسوي خصوصًا انا ما معي اي ادله اثبت انها صادقه لازم اكلمها اجلس معها ابيها تجي المكتب نتفاهم !!
مصعب : صعب يا سلطان ما تقدر تطلع من البيت ،
سلطان : طيب بس ما اضمن لك اني راح اكسب هالقضيه نسبة نجاحه اشوف... قاطعه مصعب : جايك انا ونتفاهم ،
'
صقر نزل من الفندق لتحت وقف وهو يدخن ومبتسم ،
فز من حس بشخص وراه التفت وهو يشوف عمر و عبدالرحمن وناظر فيهم : شعندكم تراقبوني؟
عمر : هالله يا صقر احس نفسي بمسلسل وانا اشوفك كل دقيقه تبتسم كانك تتخيلها قدامك ،
عبدالرحمن : والله ذابحك الحُب يا صقر ،
عمر : تكفى يا عبدالرحمن انت بعد حب وحده وصير نفس صقر شوفه بالله هادئ وساكت وبس يبتسم ويتخيل وينه صقر الي كل دقيقه مسلط علي وينتقدني ويتهاوش معي؟
عبدالرحمن دف عمر : ابعد بس فكني من الحُب ،
عمر : والله ودي اجرب اعيش شعور صقر واتخيل زوجتي ،
صقر بسخريه : قبل تجرب طالعت بنفسك في المرايا؟
عبدالرحمن : لا جن يتقبل فيه ولا انس سلم امرك لله ،
عمر ناظر لصقر : عادي ان شاء الله احب وحده عمياء ما تشوف عشان تتقبل فيني زي ما زوجتك تقبلتك ،
عبدالرحمن التفت لصقر الي صد وواضح تضايق ،
عمر لاحظ وهمس : اقول وين سلطان ما يرد؟
عبدالرحمن : بجيبي يعني وين بيكون شدرانا حنا؟
عمر : تدري يا صقر ابوي مكلمني يبيني اصير عسكري؟
صقر : اي بالله ما منك فايده عالاقل اخدم وطنك يا فاشل ،
عبدالرحمن : هذا يوم يبي يصير طيار ويوم يبي يصير دكتور ويوم يبي يصير عسكري انت زين لو حطوك فوق سيارة الاسعاف تقول يويويو قال عسكري قال اذلف بس ،
صقر بضحكه : ماعليك خله يتخيل ويحلم دام الاحلام ببلاش.
عمر : والله اصير و اوريكم وبتندمون على كلامكم هذا ،
صقر : اقول روح نام وكمل احلامك ،
عمر انقهر منهم : انا الغلطان الي جاي اكلمك صد ومشى.
عبدالرحمن ضحك وهو يلتفت لصقر : يستاهل ،
صقر : والله مدري هذا وش يبي من الحياه ،
عبدالرحمن : بالله امشي معي خلنا نتمشى واعلمك سالفه،
صقر : سوالفك التعبان ما اتخلص منه طول حياتي ،
عبدالرحمن : السالفه تخص زوجتك ،
صقر بصدمه : تخص ملاذ؟ ليه وش عرفك فيها؟
عبدالرحمن دفه من كتفه : اقول حرك عشان اعلمك ،
صقر : يعني بالله عليك احد راح يسمعنا ولا وش ،
عبدالرحمن صد وهو يمشي صقر لحقه ،
عبدالرحمن بهدوء : قبل كم يوم شفت رقم غريب رسل لي ،
صقر : اي كمل؟
عبدالرحمن : وطال عمرك شفت صورة العرض طلعت بنت وتبيني ارجع القصيم وتقول اذا رجعت القصيم راح تشوفني وتعرفني ويوم سالتها مين انتي علميني عيت تعلمني وتقول سيارتك مو في القصيم عرفت انها كذابه وتسوقه علي وسلكت لها تخيل بالله طلعت مين؟
صقر باستغراب : مين و ايش تبي منك؟
عبدالرحمن : بنت فهد ، صقر انصدم والتفت له بصدمه وهو يناظر فيه : بنت فهد اخت ملاذ يعني! كيف طيب ومن وين جابت رقمك و ايش تبي منك؟
عبدالرحمن : ماني عارف يا رجال ويوم علمتها اسم ابوها قامت تجحد وتقول معرف احد باسم فهد ،
صقر : طب يمكن مو بنت فهد شعرفك انت انها بنته؟
عبدالرحمن : لما مشعل اختفى جدها ناداني اطلع له رقم مشعل وشفت رقمها بجوال جدها وعرفتها ،
صقر رجع يدينه لوراء ظهره : ايش تبي منك طيب؟
عبدالرحمن بعصبيه : يخيي ايش عرفني انا ! ما تصارحني ،
صقر : اتصل عليها طيب وكلمها وشف كيف تتهرب ،
عبدالرحمن طلع جواله من جيبه وهو يدخل الواتس ،
صقر : حط سبيكر بسمع شتقول ،
عبدالرحمن عقد حواجبه : بتسمع صوتها؟
صقر : ليه مسوي لي فيه تغار؟
عبدالرحمن : لا تعقب اغار ع وحده معرفها ،
صقر : الله اعلم وش تنتظر للحين ما حذفتها وبلكتها؟
عبدالرحمن بضحكه : بالله ي صقر تحسبني زيك اطيح بوحده عشان مجرد محادثه بيننا؟
صقر : انا تركت المحادثات لك انت انا شفتها قدامي ومسكت يدينها ف لا تلومني وتقول كيف حبيت بهالسرعه ،
عبدالرحمن ابتسم وصد وهو يتصل على رقم آمال ،
'
نجلاء بدموع : معرف يا آمال احس خايفه ،
آمال : خلاص يا نجلاء انتي اخترتي راحة بالك لا تخافين من شي مستحيل بابا يجبرك على الزواج منه!
نجلاء بهدوء : خايفه من جدي يا آمال ،
آمال : لا تخافين بابا يتصرف بهالموضوع قومي نشرب شاي ونروق شوي الاجواء تجنن نمشي للحديقه ،
نجلاء : تمام اغسل وجهي واكلم الشغاله تجلس عند ملاذ،
آمال قامت بتتكلم لكن فجاه رن جوالها استغربت وناظرت للرقم وانصدمت وهمست : نجلاااء قاعد يتصلل!
نجلاء باستغراب مين والتفتت وهي تشوف اسمه كانت مسجله على اسمه السراق لانه اخذ شيهان وسمته كذا ،
نجلاء : لا ترديننن ياويلككك لو رديتي ،
آمال قفلت الخط وقفلت جوالها للابد وحطته ،
نجلاء : ياربي منك الحين هو عرف انك مين والحين يتصل يا خوفي اذا يهددك يا آمال ،
آمال : ماني خايفه منه بقول هو الي كلمني ،
نجلاء : لا بالله على اساسا ماعنده دليل انك انتي راسلتيه؟
آمال بتوتر : ارد و اتفاهم معه واعتذر؟
نجلاء : ياويلككك منييي اذا سويتي كذا قومي امشي معي وخلي جوالك ولا تردين على رسايله ،
'
عبدالرحمن بسخريه : ما ترد وقفلت بوجهي ،
صقر : في شي غريب بالموضوع يا عبدالرحمن وش تبي منك وكيف عرفت رقمك وكيف جابتك وتواصلت معك؟
عبدالرحمن : حتى انا مستغرب كلمتني بعد ما ابوها رفضك،
صقر : لا يكون تحسبك انا؟
عبدالرحمن : ما اتوقع ،
صقر : اجل خلها و شف نهايتها وش بس تكفى لا تسوي شي بسببه تخرب سالفتي مع ملاذ !
عبدالرحمن : لا تخاف ما بيصير شي بينك وبين ملاذ بس هذي ما اخليها لين اعرف وش تبي مني ،
صقر : هد لا تشد حيلك عشان ما تقلب الطاوله عليك ،
عبدالرحمن تنهد : خلنا منها متى بنرجع للقصيم؟
صقر : والله مدري بس الصدق فقدت سلطان ،
عبدالرحمن ابتسم : اي والله من اول ليله فقدته اشتقت وهو يحارش عمر ويتحمس لعرسك خلني اتصل اشوف ،
اخذ جواله وهو يتصل على سلطان ،
'
سلطان طلع من الحمام " يكرم القارىء " ومشى لبس ملابسه وعدل شعره ولبس ثوبه فجاه رن جواله اخذ وهو يشوف الاسم " دحوم " ابتسم و رد : ياهلا ياهلا زين ذكرتني ،
عبدالرحمن حط سبيكر : والله انت الي اشوفك نسيتنا كم لي اتصل عليك ولا ترد وعمر الف مره اتصل عليك؟
سلطان : والله اني ما انتبهت كل عقلي مع هالقضيه ،
صقر : حتى ما كلفت على نفسك تتصل وتبارك ؟
سلطان فز : اوه صقر بعد معك بشرني وافقوا صح؟
عبدالرحمن : يا ذكي قاعد يقول ما باركت لي معناته وافقوا ،
سلطان ابتسم : مبروك مبروك لولوششش ،
عبدالرحمن : اذني يا رجال بشويش فقعت اذني ،
صقر بضحكه : عقبالكم انتم الحمدلله الحين صرت متزوج لا تنادوني باسمي قولو ابو سيف ،
سلطان : سلامات وشو سيف مالي دخل تسميه سلطان ،
عبدالرحمن : لا لا عمر احسن عشان يطلع نفس غباءه ،
صقر : والله راضي اختار اسم حيوان ولا اختار عمر ،
سلطان بضحكه : وينه عمر بالله مشتاق له ،
عبدالرحمن : ابشرك زعل و هج للفندق ،
سلطان : اكيد طقطقتو عليه يا حمار انت وياه ،
صقر بضحكه : تخيل بالله يقولك بيصير عسكري ،
سلطان : هذا حده يحمي بيتك يا صقر ،
عبدالرحمن انفجر ضحك : حسبي الله يا سلطان ،
'
مشعل كان جالس يناظر للنياق وسالم يسوي الشاي بعد دقايق خلص وصب لنفسه ولمشعل ومشى جلس جنب مشعل
ومد له الشاي مُلاحظه ( سالم كبير بالسن كل عمره يعيش في البر وينتبه للنياق و زوجته وعياله في بلدهم )
وهمس : اشرب وانا ابوك اشرب مافي شي راح يتغير هذا انا كل عمري بين هالبر والنياق وتارك زوجتي وعيالي وعايش في الغُرب عشان لقمة عيش و راضي بواقعي والي يصير  متحمل فراق زوجتي وعيالي ،
مشعل : انا مافيني هالقوه اني اتحمل انا مو زيك ،
سالم : صحيح مانت زيي بس راح تتعود صدقني ،
مشعل : بسالك يا عم سالم وجاوبني الصدق ليه الي نحبهم يتركونا؟ ليه وش ذنب هالقلب لما يتعلق فيهم يسون كذا!
سالم : هذا درس لك عشان ما تتعلق باحد ،
مشعل : بس هي كانت بتصير زوجتي! ليه عيشتني بالاحلام وعلقتني فيها والحين تبي تتركني ليه ما تركتني من البدايه؟
سالم : الحُب مافيه خير يا مشعل مافيه خير ،
مشعل : الحُب فيه خير لكن حنا نتعلق بالاشخاص الغلط،
سالم : مو انت اخترت قرارك بتتركها؟
مشعل : اي بس من وين اجيب هالقوه واوقف قدام جدي واقوله ماعاد ابي حفيدتك والله انه يدفنني و يخليها تشرب قهوة عزاي وتتحلى على دمي ،
سالم : اذا تبي رايي ف اقولك لا تسوي شيء خلي الموضوع زي ماهو خلكم متعلقين بالنص لا القرار لك ولا لها اتركو الموضوع على الكبار هُم بنفسهم يتصرفون ،
مشعل تنهد وهو يشرب الشاي وهمس : تشوفه صح؟
سالم : اي اشوفه صح لا انت الي بتندفن ولا هي ،
'
نجلاء و آمال طلعوا وجلسوا برا والشاي قدامهم ،
آمال : لاول مره اندم واعيش بهالخوف الله ياخذه ،
نجلاء : قلتلك لا تسوين بس ما سمعتيني ،
آمال : يخييي كيف جاب رقمي ابي افهم!
نجلاء : معرف الصدق بس العيال خبيثين مافي شي صعب عليهم هذا مشعل ما عطيته رقمي بس طلعه من تحت الارض،
آمال : خليني منهم افكر ملاذ كيف تعيش مع ذا صقر؟
نجلاء : صحيح صعب بس يتعود زي ما تعودنا حنا ،
آمال : بس في فرق يخي هو رجال حنا بنات ،
نجلاء : بس هالرجال زوجها يا غبيه !
آمال : ما اتوقع ملاذ توافق احس راح ترفض ،
نجلاء : سمعت ماما تقول انه ما يتم الملكه الحين بالاول نروح القصيم ونروح بيتهم ومدري وشو ،
آمال : لا يكون جدي وافق بعد على كلام ماما؟
نجلاء : للاسف اي وهم عزمونا عندهم بس مدري متى اظن قالوا اول ما يرجعون القصيم نروح لهم ،
'
" مصعب و سلطان كانو جالسين بالكافيه "
'
مصعب : هُم اثنين خوات الكبيره ماعليها خلاف تقدر تستقر لحالها الي عليها الخلاف الصغيره لانها تحت السن القانوني
قاصره تحت ولاية ابوها هو يعنفهم يضربهم يطلع حرته فيهم
الكبيره زي ما قلتلك يا سلطان ماعليها خلاف تقدر تسوي الي تبي عمرها بالعشرينات لكن الصغيره عمرها ١٠ سنوات تتعنف من ابوها ومحد يقدر يسوي شي لانها تحت ولاية ابوها
ف الكبيره رفعت قضيه مد يده و رمى الملف قدامه وناظر فيه وهمس : تفضل هذا ملف القضيه ،
سلطان بهدوء : شف يا مصعب انا راح اسوي الي علي و اتواصل معها واساعدها قانونيًا لكن هل في ادله تثبت انها البنت الصغير معنفه من ابوها ؟
مصعب : اي في يا سلطان بالاول افتح الملف وشف ،
'
عبدالرحمن وصقر دخلوا الجناح وهم يشوفون الجد نايم
وعمر جالس يطقطق بجواله صقر مشى انسدح جنبه ،
عمر بقهر : ابعد عني روح مكانك !
صقر : ماهو مكانك مكان سلطان سمح لي انام ،
عبدالرحمن بضحكه : بشويش جدي نايم لا يقوم عليكم ،
صقر : عمر تدري شفنا لك عروسه ،
عمر : خله لك انا مابيها ،
عبدالرحمن صد ومشى انسدح وهو ياخذ جواله ويضحك عليهم والتفت لهم : صقر ارجع مكانك ،
صقر مشى انسدح جنب عبدالرحمن وهمس باذنه : بالله شرايك نمقلب عمر ؟
عبدالرحمن : كيف؟
صقر : سوي حساب في اي برنامج بس حساب بنت وارسل له،
عبدالرحمن بضحكه : حرام عليك لا يصدق ،
صقر : بالله خلنا نشوف شيقول احسه راعي بنات ،
عبدالرحمن : عندك حساب طيب؟
صقر : لا يا رجال سوي لك حساب جديد ،
عبدالرحمن دخل السناب وهو يسوي حساب جديد ،
صقر : سمي نفسك ساره عشان يدلع سارونه ،
عبدالرحمن كتم ضحكته وهو يسجل الاسم ساره ،
وفعلًا سوا الحساب وناظر لصقر : عطني سناب عمر ،
صقر : لا تضحك عشان ما يشك، وعطاه السناب ،
عبدالرحمن ضيفه وهو ينتظر عمر يقبله ،
صقر : مسوي لي فيه ثقيل ورا ما يقب..ماكمل كلامه الا وعمر قبل اضافته و دخل كتب لها : منوره ،
صقر انصدم وكتم ضحكته : يقلع عدوه الخفيف ،
عبدالرحمن كتب له : النور نورك ،
عمر كان منسدح ابتسم وكتب : اسمك حلو ،
عبدالرحمن : هذا لازم نسحب منه الجوال الخفيف ،
صقر : قل له اسمك الي حلو ،
عبدالرحمن : لا لو سمحت لازم الثقل وكتب : تسلم ،
عمر : كم عمرك ؟
صقر : قل له انت كم تتوقع ،
عبدالرحمن ضحك وكتب : كم تتوقع ؟
'
نجلاء مشت تنام آمال اخذت جوالها وطلعت لبرا للحديقه ودخلت الواتس وكتبت لعبدالرحمن : ليه اتصلت؟
عبدالرحمن شاف الاشعار وصقر كان جنبه و فزو ،
صقر : هذي بنت فهد صح؟
عبدالرحمن : اي و دخل كتب لها : ليه ما رديتي؟
آمال : تقدر تقول هنا ايش تبغى بدون ما تتصل!
عبدالرحمن : طيب ممكن تعلميني ليه سويتي هالحركات؟
آمال : خلاص اسفه اعتذر غلطت وعرفت غلطتي بس تكفى لاعاد ترسل لي او تتصل علي او تعلم لاحد بشيء ،
عبدالرحمن استغرب وناظر لصقر وكتب : اشوف خايفه ،
آمال : ماني خايفه بس مابي مشاكل خلاص انهي الموضوع،
عبدالرحمن : لا فيني فضول ليه كنتي تبين ارجع القصيم؟
صقر ناظر له : خلاص خلها واضح انها خايفه ،
عبدالرحمن : والله لا العب باعصابها لين تعلمني ليه سوت كذا،
صقر ناظر لعمر الي كان يرسل : ي رجال رد بيموت هذا ،
عبدالرحمن بضحكه : ما صدق انه في بنت رسلت له و دخل وهو يشوف راسل : اتوقع عمرك بالعشرينات وينك ردي ،
صقر : اهب يالخفيف لا بارك الله فيه ،
عبدالرحمن : والله خلنا نسحب عليه لا يقعد يتخيل في بنت تحبه ،
صقر : لا تكفى كمل كمل نشوف ،
'
آمال قفلت الجوال ومشت دخلت الغرفه وهي تشوف نجلاء نايمه فزت من سمعت صوت باب طلعت لبرا وهي تشوف جدها يدخل المطبخ ابتسمت و لحقته : غريب صاحي؟
الجد التفت لها و ابتسم : اي يابنتي جيت اخذ مويا ،
آمال : اذا مافيك نوم عادي تجلس معي ؟
الجد عبدالعزيز : ابشري جيبي لي مويا وتعالي للمجلس ،
آمال ابتسمت ومشت سحبت قرورة مويا ولحقت جدها و دخلوا المجلس الجد مشى جلس وجلست جنبه وعطته المويا الجد اخذ منها وهمس : اي وشفيها بنتي ماتبي تنام؟
آمال : احسني زعلانه بخصوص ملاذ وما تسون لها عرس؟
الجد ابتسم : اعرف هالسوالف ودك بعرس و رقص بس ابوكِ مو راضي يا بنتي يحس انها ملاذ راح تحزن لانها ما تقدر تشوف شيء ولا تستمتع ف ملكه و في البيت افضل. 
آمال : طب نجلاء كانت تقول بنروح للقصيم عندهم صح؟
الجد : اي بنروح ونشوف الوضع كيف والملكه بعد شهر ،
'
سلطان دخل البيت ومشى حط اغراضه على الطاوله وتوجه للمطبخ وهو يشوف مارلين جالسه وسرحانه ضحك ومشى جلس عندها : وش عندك زعلانه ؟
مارلين : مافي شي انتا يبغى شي يجي هنا؟
سلطان : لا ما ابغى شي بس جيت اشوف ايش تسوين ،
مارلين بحزن : انا اشتاق بنت حق انا في فلبين ،
سلطان : طيب اتصلي ؟
مارلين : لا انا ايبغا بنت انا يجي هنا عند انا ،
سلطان : اها وكيف تجي ؟
مارلين بتفكير وناظرت فيه : انتا في زواج مع بنت انا؟
سلطان انصدم وضحك : انا؟؟ واتزوج من بنتك الي عمرها ثمنيه سنوات؟؟
'
'