انا شاعرك العام والقصيد عيونك

انا شاعرك العام والقصيد عيونك بارت ٣

( بـ قلم الكاتبه آمال ✍️ arwicx )
'

= صار وقت العشاء الكل تعشو وخلصو و س ١١ كل شخص راح لبيته وانتهى العزيمه بكل خير الا صقر الي بالنسبه له ما انتهى على خير الى الان يفكر فيها كل باله معها ، علمت احد عني ولا لا ، وكيف كانت ساكته ولا تكلمت بشيء ليه كانت تطالع فيني بطريقه ولا كاني موجوده؟ الف سوال وسوال براسه انسدح على السرير وهو يحاول ينام لكن ما يجيه النوم تنهد سحب الدخان ونزل طلع من الفندق وقف وهو يدخن غمض عيونه وهو يفكر فيها ويتمنى لو يقدر يعرف عنها شي ،
'
عبدالرحمن كان منسدح على السرير  يطقطق بجواله ترك جواله ومشى عند الشباك وهو يشوف صقر واقف تحت ويدخن استغرب وسحب جواله ولبس ثوبه وطلع نزل لتحت طلع من الفندق وهو يشوف صقر واقف ومعطيه ظهره ويدخن وسرحان مشى بهدوء وحط يده على كتفه : متضايق؟
صقر فز والتفت له وهز راسه بالنفي : لا وانت وش جابك؟
عبدالرحمن: لا تسوقه علي فيك شي متاكد علمني حتى في العزيمه ما كنت على بعضك  فيك شي ؟
صقر نزل راسه وهمس : مافيني شي يا دحوم خلني بحالي ،
عبدالرحمن : طيب اجل راح اسكت بس ماراح اروح من هنا ماراح اتركك لوحدك راح اكون جنبك ،
صقر التفت له : شفت بنت فهد ، عبدالرحمن انصدم وهو يناظر فيه : بنت من! بنت فهد حفيدة عبدالعزيز!
صقر هز راسه بـ اي وهو يناظر له ، عبدالرحمن كان مصدوم،
صقر : ما تعمدت كان صدفه وشكلي طحت فيه ،
عبدالرحمن شال يده عن كتف صقر وهو مصدوم ،
صقر بهدوء : ما كنت ادري راح تلعب بداخلي كذا كانت قدامييي يا عبدالرحمن حتى مسكت يديي كانت لابسه فستانها وواقفه قدامي وتطالع بعيوني ! كانت ساكته ما تكلمت بشيء يا عبدالرحمن وتركتني اتاملها تركتني اطيح نفسي بعذابها عطتني وقت ارمي نفسي ب نارها و هربت ، تكفى يا عبدالرحمن ش.. دفه عبدالرحمن وصد عنه وهو يدخل الفندق صقر لحقه وهو يمسكه من كتفه : بذمتك يا عبدالرحمن بذمتك تحفظ لي ماء وجهي طلبتك !
عبدالرحمن بحده : اذا انت ما احتفظت ب ماء وجهك ولا فكرت في ابوي وجدي ف لا تطلب مني احتفظ ب ماء وجهك.
صقر ناظر فيه : بتخليني اندم! عبدالرحمن ناظر فيه وهو ساكت صقر صد عنه : تمام ماراح اتكلم عنها ولا افكر فيها ،
عبدالرحمن : مانت واثق فيني يا صقر انا صديت عنك وقررت امشي عشان ما اطرحك على الارض وادفنك بدال ابوي ، اما سرك والي سويته والي شفته بعيونك والي تاملته ماراح اعلم فيه احد بس صحصح على نفسك ،
صقر : انا ضعت ماعاد فيني اصحصح ،
عبدالرحمن: دق باب بيتها دامك ضعت ،
صقر : مافيني هالقوه اواجه امي وابوي واعلمهم بلي صار ،
عبدالرحمن تنهد : بهالموضوع حتى انا معك صعب توضح لامي بس بالنهايه مالك حل ثاني ،
صقر صد وهو يناظر للارض وهمس : مو عارف شي يا دحوم ،
عبدالرحمن ناظر لعيونه : اعجاب صح؟
صقر هز راسه بالنفي : اعجاب بيسوي فيني كذا؟
عبدالرحمن : بس مستحيل حُب يا صقر ،
صقر سكت وهو يناظر له عبدالرحمن صد ودخل الفندق صقر لحقه وتوجهو للجناح ،
'
ملاذ كانت منسدحه على السرير وهي تفكر مين الشخص الي مسك يدها رغم انها ما شافته لكن سمعت صوته وحست بيده الي مسك يدينها ! قاطع تفكيرها وهي تسمع صوت خواتها يدخلون الغرفه آمال مشت وهي تحط الشاي ، نجلاء مشت وهي تشبك جوالها بالشاحن ومشت جلست معها ،
آمال : غريبه ملاذ نامت من بدري ،
نجلاء : يمكن تعبت الا بسالك شصار على روحتنا للمزرعه؟
آمال رفعت كتوفها : معرف كان المفروض بنروح اليوم بس بسبب عزيمة جدي تكنسل ،
نجلاء : يالله اشتقت لاجواء المزرعه ،
آمال : ما اشتقت لشيء غير شيهان ،
نجلاء بضحكه : لو بيدك جبتيه للبيت ،
آمال : بخاطري والله بس اعرف جدي راح يرفض ،
فجاه دخلت ام نجلاء وهي تناظر : للحين ما نمتو؟
نجلاء : لا تعالي جالسين نسولف واحلا شاي من يديني ،
ام نجلاء ابتسمت ومشت وهي تجلس وتسمع سوالفهم ،
'
الجد عبدالعزيز كان واقف برا يشم هواء فجاه وقف سيارة فهد ونزل وهو مبتسم : شتسوي هنا يا يبه ؟
الجد ضحك : طفشت من هالبيت ودي بقعده مع سُليمان تذكرت ايامنا كيف كنا نجلس اخر الليل ،
فهد : دامه في المدينه ف ابشر بكره اخذك له ،
الجد : شرايك لو بكره نمر للمزرعه؟
فهد : والله حلو ومنه سُليمان يشوف المزرعه وتعلمه خُطتك الي تبي تسويه بالمزرعه ،
الجد بضحكه : ايي بس بناتك يبون يروحون المزرعه بعد ،
فهد : لا يا يبه ناخذهم وقت ثاني ان شاء الله ،
الجد : على خير يا يبه يلا نمشي نريح تاخر الوقت ،
'
( صباح يوم جديد على ابطالي )
'
الجد سُليمان التفت لعمر : روح جيب فطور ياولدي وبعدين نمشي عند عبدالعزيز اتصل علي نروح له المزرعه ،
سلطان : من الحين اقولكم دام عمر الي بيروح يجيب ف لحد ياكل يجيب من واحد الناموس يدورون حوله وهو يطبخ وبدون قفازات معليش يهمني حياتي ماراح اكل ،
عمر : والله انك كذاب مافي الذ من اكل امس ،
عبدالرحمن: غسلت يدي منكم رايح اخذ لي قهوة ،
يوسف بضحكه : يلا اخلصو لا نتاخر على الرجال ،
سلطان وهو يقوم : انا رايح اخذ لي من البقاله  ،
صقر الي كان بعيد عن سوالفهم وكلامهم وسرحان ، عبدالرحمن مشى جلس جنبه : ماخذه عقلك؟ صقر ما سمعه وسرح في خياله عبدالرحمن دف كتفه بـ كتفه صقر فز ،
عبدالرحمن: تعال نروح نتقوى صحصح شوي عن خيالك ،
صقر قام معه بهدوء ونزلو لتحت عبدالرحمن ركب السياره
مشى عمر لعنده : انت بتاخذ السياره ؟
عبدالرحمن: اي والمطاعم قدامك وشو له سياره روح مشي،
عمر سحب عليه ومشى ، صقر ركب السياره عبدالرحمن ركب وشغل السياره : اي ما قلت لي ايش فكرت ؟
صقر تنهد وهو يصد : خله على ربك وانا اخوك ،
عبدالرحمن بضحكه : تعبك الحُب ؟
صقر : تطقطق علي؟ بيجي يوم وتطيح فيه واذكرك بكلامك واضحك عليك ، والله انه نار اذا طحت فيه يخليك رماد ،
عبدالرحمن: الله لا يجيب اليوم الي اطيح نفسي في هالنار ،
صقر : بتطيح وانا اخوك بتطيح بدون ما تحس على نفسك ،
عبدالرحمن : ليه تشوفه حب وهو يوم وليله لعله اعجاب؟
صقر : الاعجاب ما يسوي كذا يا دحوم والله تعبتني ،
عبدالرحمن : سمعت شي لكن ماودي اقولك ياه واكسرك ،
صقر فز والتفت له : حلفتك بالله تعلمني!!
عبدالرحمن تنهد وهو يهمس : امي كانت تقول لجدي عن بنات فهد وتقول وحده منهم مخطوبه الله اعلم من تكون ،
صقر انصدم وهمس : الله لا يقول انها هي !
عبدالرحمن رفع كتوفه : الله اعلم ف عشان كذا لا تخلي هقوتك واحلامك عاليه طيح حطب الحُب واحرقه من الان عشان ما تنصدم بعدين وتندم ،
صقر سكت وهو يناظر من الشباك بصمت ،
'
الجد سُليمان  ناظر لـ ام صقر : عساكِ لقيتي من عندهم بنت الحلال لعيالك ؟
ام صقر هزت راسها بالنفي : لا والله مالقيت ،
يوسف : اتوقع فهد عنده ٣ بنات ليه صغار هُم ؟
ام صقر : لا نجلاء بنتهم مخطوبه لولد عمتها وملاذ اكيد تعرفون انها ما تشوف ولا تتكلم ف صعب و آمال ما احس انها قد المسؤؤلية وتوها صغيره ف ما فكرت اخطب وحده منهم،
الجد بهدوء : الله يجيب نصيبهم على خير ،
يوسف : كان املي هناك انك تخطبين لعيالك وحده منهم ،
ام صقر هزت راسها بالنفي : كنت متوقعه نفس الشيء ،
'
= بيت الجد عبدالعزيز =
تجمعو على طاولة الفطور وهم يفطرون ،
الجد عبدالعزيز : اليوم نروح المزرعه بيجون احفاد سُليمان ،
آمال بصدمه : مو انت وعدتنا بتاخذنا؟
نجلاء : منجد ليه الحين انتم تروحون واحنا لا ؟
الجد : بس يا بنتي هُم ضيف ل كم يوم وبيروحون ،
آمال : بس انت وعدتني بتاخذنا واشوف شيهان ،
الجد : شوفته اليوم من نصيب الغير ،
فهد : خلاص احنا بنروح بعدين ان شاء الله ،
الجد التفت لفهد : كلم ابو مشعل بيجي؟
نجلاء التفتت لآمال على طاري مشعل آمال ضحكت وصدت وهي تهمس : الا صح متى زواج نجلاء ومشعل ؟
نجلاء فزت ومدت يدها تقرصها ،
ام نجلاء : مستحيل تصير الحين قلنا لهم بعد كم سنه ،
فهد : واختي  بعد كانت موافقه على هالقرار ،
آمال : صح عمتي خطبتها وهي بزره اكيد تكون موافقه ،
'
عبدالرحمن وصقر كانو في الكافيه يتقهون وجالسين ،
عبدالرحمن حط جواله على الطاوله : كلم جدي ،
صقر صد : مستحيل اكلمه ،
عبدالرحمن : شف يا صقر مافي غير جدي الي يقدر يكلم اهلها وانت تدري كلنا نمشي على كلمة جدي وانت زعلان منه عشانك سويت حادث وصارخ عليك ؟ خلاص الشيطان بح و اتفل عليه وتصالح معه ولا ترا اذا رجعنا القصيم بتضيع منك ماندري متى راح نرجع للمدينة او يمكن ما نرجع ،
صقر رفع نظره له : مافيني هالقوه اواجه جدي لمصلحتي ،
عبدالرحمن : طب كلم امي ؟
صقر : خلاص يا عبدالرحمن قفل الموضوع يمكن صح كلامك مجرد اعجاب وبينتهي مع الوقت خلاص انسى ،
عبدالرحمن : متردد من مشاعرك؟ مانت عارف شعورك؟
صقر : ماني عارف مو فاهم نفسي كل الي اشوفه قدامي وجهها وشكلها وفستانها الاصفر وشعرها الاسود ،
عبدالرحمن وهو يصد وضحك : توصف لي زوجتك ؟
صقر فز وابتسم على كلمة ( زوجتك ) ،
عبدالرحمن : عالعموم اذا بغيتها كلم جدي هذا نصيحتي لك ويلا قم تاخر الوقت بنروح نلحق للمزرعة جدها ،
صقر : الله يرزقني الثبات قدام ابوها وجدها ولا انهزم عشانها،
عبدالرحمن : والله وطحت يا صقر ومحد سمى عليك والله يذبحك ابوها لو عرف بشي امشي بس ،
صقر : راضي انذبح دام ابوها الي يذبحني ،
عبدالرحمن ضحك وصد طلع من الكافيه صقر لحقه ،
'
الجد كان واقف تحت والشماغ على راسه : وينهم ذول ،
سلطان : اتصلت عليهم بالطريق جاين ،
عمر : مسوين فيه اجانب يشربون قهوة من صباح الله ،
سلطان : شدخل الاجانب؟ ليتك راقد انت و راسك ذا ،
عمر :  انت شفيك علي ؟ ذابح زوجتك وعيالك انا؟
سلطان : يشيخ اذلف والتفت لجده الي كان يسولف مع ابوه فجاه وقف عبدالرحمن سيارته  و ركبو كلهم ،
يوسف : وين رحتو سنه عشان توصلون ؟
عبدالرحمن : والله الشوارع زحمه يا يبه ،
و توجهو المزرعه "
'
=  المزرعه =
مشعل خطيب نجلاء عمره ٢٢ كان الشماغ على كتفه وهو يصب الشاي للجد وابوه ولفهد ، وفهد وابو مشعل كانو واقفين يحاولون يشبون النار والدنيا برد ، مشعل حط دلة الشاي ومشى وهو يساعدهم بعد مُعاناة قدرو وتجمعو جلسو عند النار وحطو الفرشه على الارض وتكاية الجلسه ،
الجد جلس على الكرسي وهو يشرب الشاي ،
مشعل : والله يبي لنا شيله مع هالاجواء ،
فهد : صادق بس وينهم ما وصلو ذولا ،
فجاه وقف سيارتهم مشعل سمع صوت السياره ومشى وهو يستقبلهم ويدخلهم المزرعه الكل قامو وهم يسلمون ،
يا هلا يا هلا نورتو الله يحيكم تعالت اصوات الترحيب ،
سُليمان ضحك وهو يجلس بالكرسي الي جنب كرسي الجد ،
فهد وابو مشعل كانو واقفين جنب يوسف يسالون عن اخباره.
ومشعل كان مع العيال يصب لهم الشاي ،
عبدالرحمن : والله الدنيا برد وانا ما جبت معي شيء ،
الجد سُليمان كان لابس فروة ، والجد عبدالعزيز نفس الشي،
فهد : يا مشعل يبه تلقى في الغرفه الي داخل فيه جاكيتات جيبهم الله يسعدك ، مشعل قام ومشى يجيبهم والعيال التفتو وهم يناظرون الجاكيت الموفي والوردي والاحمر ،
الجد عبدالعزيز بضحكه : اعذرونا ماعندنا الا بنات ،
عبدالرحمن: اجل خلوني على البرد احسن ،
صقر سكت وهو من بينهم يلمح الجاكيت الاصفر وتذكر فستان ملاذ وهمس : عطني هالجاكيت مشعل مده له صقر رفع راسه وهو يشوف نظراتهم : معليش لازم اتدفى ما يهمني اذا للبنات ، الكل ضحكو ، مشعل حط الجاكيتات على الكرسي. صقر لبس الجاكيت اول ما لبسه شم ريحة عطر نسائي ثقيل وممزوج على ريحة حلاوة لا شعورًيا تذكرها لما مسك يدينها وهو يقومها شم نفس الريحة ! تنهد وهو يناظر للنار الي بوسطهم مد يده وهو يشد الجاكيت على نفسه وكان لابس ثوب ابيض كان يشد الجاكيت حتى يطبع الريحه على ثوبه ، الجد سُليمان قام وهو يفسخ فروته ويمده لـ عبدالرحمن : خذ ياولدي البسه ،
عبدالرحمن بصدمه : لا والله يا عمي ماراح الب.. قاطعه الجد بحده : البسه ومابي ولا كلمه خذ ولا ازعل منك ، عبدالرحمن ابتسم وقام وهو يلبسه ، الجد جلس ،
الجد سُليمان : راح تتعب من البرد خذ حقي انت ،
الجد عبدالعزيز بضحكه : لا والله انا احتريت من قوة النار الي قدامي ، الكل ضحكوا وجلسو وهم يسولفون ،
صقر الي كان بعيد عن سوالفهم و ريحة العطر الي دوخه ومو قادر يستوعب شي غير طيفها تمر بباله ،
عمر ناظر لمشعل : عطني اي جاكيت ما اتحمل البرد ،
مشعل نزل نظره للجاكيت الاحمر والي تاكد انه الجاكيت الاحمر لنجلاء هز راسه بالنفي : خذ جاكيتي انت وفسخ و رماه له وسحب جاكيت نجلاء لحضنه ، رغم انه مافي تواصل بينهم غير الخاتم وخطوبتهم عن عادات وتقاليد الا انه يحبها وجدًا ويعرف انها تحب اللون الاحمر كانت لابسه فستان احمر بالخطوبه وقد صادفها بالمزرعه لابسه هالجاكيت ، والوردي لاخته والموفي الي ما عرفه لمين لكن اكيد لبنات فهد ،
عمر لبس جاكيت مشعل : والله يبي لنا اغنيه ،
الجد : وشو اغنيه وشو خرابيط ،
مشعل : سامحهم يا عمر هُم في زمن غير زمننا ،
يوسف كان يسولف مع فهد وابو مشعل : شف شف شيقول ،
فهد بضحكه : اجل قومو من قدامنا وروحو هناك شبو النار وشغلو اغانيكم ،
الجد عبدالعزيز وهو يقوم : انا اقول نخليهم وحنا ندخل داخل للمجلس احتريت من هالنار ابي اجلس شوي تعبني الكرسي،
الجد سُليمان : صادق والله الكرسي كسر ظهري ، قامو الشياب والرجال وتوجهو للمجلس الي في المزرعه ،
عمر : اخيرًا الحين نقدر نجلس على راحتنا واقدر اسبكم ،
سلطان كان يضحك وهو يشوف صقر لابس جاكيت الاصفر
ومشعل الاحمر انسدح من الضحك ،
عبدالرحمن : والله وضاعت الرجوله يا عيال ،
صقر ضحك وهو يشوف سلطان الي يضحك ،
عمر : والله مشعل ضيع رجولته بيده عطاني جاكيته ولبس حق البنات الحمدلله على نعمة العقل ،
سلطان : الحمدلله لبست من البيت وجيت ولا تفشلت زيكم،
صقر صد عنهم وهو يولع الدخان ويدخن ،
عمر : الله يعين الي لبست جاكيتها تنكتم من ريحة الدخان تلقاه من ريحتك ولا ريحة الدخان ،
عبدالرحمن : والله لازم يغسلونهم بغسيل بسببكم ،
عمر : مع تايد مافيش مستحيل ،
قاطعهم مشعل الي بدا يغني : اشوفك كليوم و اروح ، شبك معه عمر وهو يكمل معه واقول نظره ترد الروح ،
اعيش فيها عشان بكرا عشان ليلي اللي كله جروح ،
تدخل معاهم عبدالرحمن: صحيح النظره ما تكفي من الآلآم ما تشفي لكن عذرنا الحاضر نراعي الوقت والخاطر ،
نفث الدخان صقر وهو يبدا معاهم : ومادام النظر مسموح اشوفك كليوم واروح عسى النظرة ترد الروح ، توصيني على الكتمان وتبغى حبنا ما يبان ، وسكت وهو يرجع يولع الدخان ويدخن وينزل راسه ويشم ريحة العطر من الجاكيت ،
والتفت لهم وهو يشوفهم يغنون بصوت واحد ،
وتحسب حُبنا خافي ترى راعي الهوى مفضوح ،
'
آمال كانت نايمه بغرفتها دخلت نجلاء مشت وهي تشغل اللمبات : بنت اصحي قومي بنمشي للمول ،
آمال التفتت لها : مالي خلق روحو انتم وامي انا بنام ،
نجلاء : ترا بنروح كلنا ناخذ ملاذ بعد وتجي ريما بعد ،
آمال : اي اجل قولي انك رايحه عشان اخت مشعل ،
نجلاء صدت : وع لا تذكريني فيه لو بيدي ما وافقت ،
آمال : الكُره ما يجي من وراه الا الحُب خل عنك بس ،
نجلاء : تمشين ولا لا ؟
آمال وهي تقوم : الا بمشي بس عشان اخذ لي قهوة واصحصح واخذ لي كعب ،
نجلاء : اجل قومي البسي بسرعه وانزلي ،
'
سلطان وهو يقوم : والله لازم نستكشف المزرعه وش فيه ،
عمر : من ساعه اسمع صوت الحيوانات وينهم ذولا ،
مشعل : ما تشوف اخوانك قدامك ؟ وقام يضحك ،
عمر وهو يفلده : ما تشوف اخوانك قدامك شايف نفسك يا بعير؟ اقول امش بس ورنا المزرعه كامل ،
عبدالرحمن وهو يناظر : كانه ذا اسطبل الخيل؟
مشعل : اي و مو واحد في اثنين ، ومشو عند الخيل وهم يشوفونهم ، صقر كان وراهم حاط يده بجيب الجاكيت ،
عبدالرحمن وقف وهو يشوف الخيل والتفت وهو يشوف الصقر الي على الوكر وضحك : اووه صقر لمن ذا؟
مشعل : وشو صقر والتفت اها ذا اسمه شيهان ،
عبدالرحمن : ما شاء الله وش هالاسم ،
مشعل : عاد جدي و ذوقه كل حيوان على اسم ،
عبدالرحمن وهو يسحب الدس القفاز ويلبسهم ويطلع شيهان ، بهاللحظه دخل الجد عبدالعزيز لعندهم وهو يناظر : وين رحتو قاعد ادوركم تعالو ساعدو ابوكم بالكبسه،
سلطان : كبسه والحين وهنا؟؟
عمر : لعبتي الكبسه يا جدي افا عليك بس وين المطبخ ؟
الجد ناظر لعبدالرحمن الي كان ماسك شيهان ومبتسم وهمس : ابيعه ودك فيه؟
عبدالرحمن بصدمه : صدق تبيعه؟ والله لو الف راح اخذه ،
عمر : مو شايف خير ،
الجد بضحكه : والله ما ابيعه بس حلالك يفداك احفاد سُليمان يبشرون بلي خاطرهم فيه والله انه ما يقعد بخاطرك ،
عبدالرحمن : لا والله ياجد..قاطعه الجد وهو يهمس : اعتبره هديه مني وخذه معك للقصيم كل ما تشوفه تذكرني ،
عبدالرحمن ضحك ومشى وهو يقبل راسه ويده ،
صقر كان واقف بصمت ويضحك ،
الجد : يلا على المطبخ والتفت لـ عُمر نشوف طبخك ،
ضحكو ومشو متوجهين للمطبخ ودخلو وهم يشوفون يوسف واقف ماسك الدجاجه وابو مشعل يقطعه ، وفهد ينقي الرز ،
العيال كتمو ضحكتهم من منظرهم ،
التفت لهم ابو مشعل : يلا تحركو واحد يقطع الطماطم بسرعه وواحد يسوي سلطه يلا تحركو ،
'
الجد سُليمان كان جالس عند النار والهواء بارد الجد عبدالعزيز مشى جلس جنبه : والله يا حليله عبدالرحمن ،
الجد سُليمان : ليه شصاير ؟
الجد عبدالعزيز : شفته كان بخاطره شيهان قلت يفداه ،
الجد سُليمان : عطيت صقرك له؟
الجد عبدالعزيز : دامه حفيدك يفداه دمي بعد ،
الجد سُليمان ابتسم : الله يخليك ويطول بعمرك ،
'
عمر ما ينحط فيه ملح سلامات تحط ملح في سلطه؟
سلطان : اقول ابعد بس جاهل شعرفك انا طباخ ،
عبدالرحمن كان واقف يناظر وبيده قرورة مويا يشرب ،
يوسف : الحين رجل الدجاجه ينطبخ ولا نرميه؟
ابو مشعل : كله عظم نرميه ليه نطبخه ،
فهد : ياهوه حطو الدجاجه كامل بالقدر وشو تقطعونه انتم؟
مشعل : لا يا عمي وشو يحطونه كامل ناكل العظم بعد؟
'
'