انا شاعرك العام والقصيد عيونك

انا شاعرك العام والقصيد عيونك بارت ٢

( بـ قلم الكاتبه آمال ✍️ arwicx )
"
وصل المدينة توجهو للفندق الجد سُليمان دخلو للفندق والعيال وراهم عمر التفت لابوه : ما تكفينا جناح واحد ،
يوسف : انت واخوانك وجدك لحال وانا وامك لحال راح تكفي وما شاء الله الفندق حلو وكبير ،
عبدالرحمن التفت لـ صقر : الساعه كم بالله ؟
صقر ناظر لساعته : ما بقى شي و ياذن بتنام!
عبدالرحمن: والله ميت تعب اريح راسي شوي وتوجه للمصعد صقر لحقه ، يوسف التفت لـ سلطان : روح انت وعمر جيبو غداء نتغدى ونريح شوي وعلى المغرب نمشي ،
سلطان : ابشر يبه والتفت لعُمر : امش يلا وطلعو للسياره ،
يوسف : خلاص يبه انت روح ارتاح وحنا بنمشي لجناحنا ،
الجد عبدالعزيز : لا انا اروح مع العيال سلطان وعمر ومشى لحقهم و ركب السياره معاهم وتوجهو للمطهم ،
'
= جناح عبدالرحمن وصقر =
'
صقر مشى انسدح على السرير : اوف واخيرًا ،
عبدالرحمن : والله ميت نوم انتظر نخلص من هالعزيمه وارجع انام وارتاح مره وحده ،
صقر : بكيفك بس انا بنام الحين ،
عبدالرحمن : الحين يجيك عمر يتهاوش على السرير ،
صقر قام وهو يضحك : على طاري عمر تخيل بالله يقولك حلمه يصير طار قلتله حتى فوق الطياره ما يحطونك ،
عبدالرحمن : تسولف ما شاء الله عليك يا صقر وانت صرت دكتور بواسطه هيا اجحد اشوف ،
صقر : عالاقل نسبتي ماكان زيه نسبته زي وجهه ،
عبدالرحمن: والله انك مانت اقل منه ،
صقر : اقول اسكت بس وانت جدي موظفك بالشركه ،
عبدالرحمن: ابرك من اني اصير دكتور بواسطه الله يستر كم مريض ماتو من يدك ،
صقر : اقول اذلف عني اخلص من عمر تجيني انت ،
عبدالرحمن صد عنه وهو يضحك مشى جلس على الكنب واخذ جواله وهو يطقطق فيه ،
'
عمر : سلطان يا غبي المطاعم قدامك وين تروح انت؟
سلطان : بالله شف باب المطعم كيف مغبر واضح حتى ما يغسلون يدهم قبل يطبخون ،
الجد : اقول انزل و روح جيب واخلص علينا ،
سلطان : والله ماراح اكل من هنا حرك سيارته ،
عمر : يا شيخ انت تاكل من يد صقر الي يغسل يدينه بسنه مره وحده وقف على مطاعمهم؟
سلطان : شف من يتكلم اقول اسكت بس لا اهفك ،
الجد : حسبي الله اوقف خلاص وانزل يا عمر وجيب اي شي ،
سلطان وقف سيارته بعصبيه : هاه يلا انزل جيب والله اني ما ماراح اكل ونشوف مين ياخذكم المستشفى ،
الجد : قم يا عمر روح جيب خلك منه ،
عمر ضحك وهو ينزل ، سلطان : يالله جدي شف حتى قفاز مو لابسين والله لا ابلغ عليهم ،
الجد : قطع العنق ولا قطع الارزاق. 
سلطان : اييي ما شاء الله وهم عادي يذبحونا صح؟
الجد تنهد وسكت وهو يراقب عمر الي نزل يجيب اكل ،
سلطان كان يراقب العُمال : والله مُتنا ،
'
= بيت الجد عبدالعزيز =
-
ام نجلاء كانت جالسه تستشور شعر ملاذ و نجلاء كانت تكلم الشغالات يسون قهوة ويرتبون الفناجيل ،
آمال وهي تقوم : انا بروح اتمكيج تبون شي ؟
ام نجلاء : لا لا روحي بس ،
ملاذ كانت ساكته و ام نجلاء تعدل لها شعرها لا شعورًيا نزلت دموعها ومدت يدها وهي تمسح دموعها وتتمنى لو مره وحده بالحياة تقدر تشوف وجه امها وتقدر تتكلم وتشكرها على كل الي تسويها لها وتتعب عشانها ولا تركتها بين يدين الشغالات دايم تهتم لها اكثر من الكل ، تتمنى لو تقدر تتكلم بكلمه وحده وتقول لها شكرًا وتعبر لامها عن حُبها بس للاسف ما تقدر ،
نزلت راسها ومسحت دموعها قبل احد يلاحظ ،
ام نجلاء استشورت لها شعرها ويفي : اي لون فستان تلبسين اصفر ولا ابيض؟ ملاذ رفعت يدها بمعنى رقم ١ والي هو اصفر،
نجلاء : خلاص يمه تجهزي انتي وانا البسها الفستان ،
ام نجلاء : تمام يا بنتي وكلمي آمال تخلص وتجيني ،
نجلاء هزت راسها بـ اي ومسكت يد ملاذ وهي تاخذها لفوق من الدرج ودخلت للغرفه وهي تشوف آمال مشغله اغنيه وتتمكيج صدت ومشت وهي تجلس ملاذ على السرير ومشت فتحت الدولاب وهي تطلع الفستان الاصفر لملاذ والتفتت لآمال : شرايك تسوين مكياج لـ ملاذ وانا اخلص شغلي؟
آمال : بشرط انك تعطيني فستانك الموفي ،
نجلاء : تمام ومشت فتحت دولابها وهي تدورها وطلعتها لها وحطتها على السرير : شوفيها هنا وناظرت لملاذ : يلا ملاذ،
'
الكل كانو جالسين ياكل الا عبدالرحمن وسلطان ،
عمر : عبدالرحمن لا تصدقه كذاب والله تعال كل ،
عبدالرحمن : والله ماراح اكل كلو انتم بالعافيه ،
سلطان : والله ماني كذاب اقولك حتى قفاز مو لابسين ،
يوسف : خلاص ياولدي خلهم ياكلون لا تقرفهم ،
الجد : خله خله هذا يالسنه يتروش مره وجاي ينتقد الناس ،
عبدالرحمن ضحك وهو يناظر لسلطان الي انصدم من رد الجد وهمس : والله اني يوميًا اتروش والكل يسالني عن عطري ،
ام صقر كانت تضحك على سوالفهم وتكوي ثوب صقر ،
الجد قام وهمس : ما بقى شي وياذن المغرب يلا تجهزو ،
يوسف التفت لـ عمر : جيب بشتي وبشت جدك معلقين ورا بالسياره وانا وجدك رايحين نصلي الحقونا يلا وطلعوا ،
ام صقر مشت وهي تطلع فستانها وحطتها على السرير وناظرت لـ عبدالرحمن : لا تنسى تاخذني الصالون ،
عبدالرحمن ناظر لساعته : تمام اصلي وانتظرك تحت ،
سلطان : يمه تعالي انا اسوي لك المكياج وشو له الصالون ،
ام صقر : انت روح الحق ابوك للمسجد لا يشوفك بس ،
-
= بيت عبدالعزيز =
نزلت ام نجلاء وهي تشوف الشغالات يبخرون البيت ،
والجد عبدالعزيز واقف يلبس البشت وفهد واقف جنبه عند المرايا يعدل شماغه ويحط من العود ، نزلت آمال وهي لابسه فستان موفي وفاتحه شعرها الاشقر ' صابغه ' نزلت ومشت وهي مبتسمه : والله اجواء عيد يا جدي ،
الجد بضحكه : اي والله عيد ، عيد بشوفة عبدالعزيز واحفاده ،
ام نجلاء مشت اخذت البخور من الشغاله ومشت تبخر فهد فهد ابتسم وهو يتبخر ، آمال ناظرت ما شاء الله تبخر زوجها بس عطيني ابخر جدي بعد ، فهد ضحك وهو يلتفت يمين يسار : وينهم ملاذ و نجوله ؟
ام نجلاء : الحين بيجون كلمتهم ،
-
رجعو من المسجد عبدالرحمن ترك امه في الصالون و رجع اخذ له شاور وطلع وهو يلبس ثوبه ويعدل شعره ،
سلطان دخل وبيده العقال : هذا اكبر مني مين ماخذ حقي!
صقر : هو في احد في البيت غير عمر السراق ؟
دخل الجد وهو لابس البشت وماسكه بيده : يلا يبه بسرعه ،
سلطان طلع وهو يدور عمر ناظر فيه كان واقف يعدل شماغه مشى لعنده : عطني عقالي لا اكسر ظهرك ،
عمر : والله انه حقي ،
سلطان : لا تحلف شف هذا الي حقك يا كبر راسك ،
عمر اخذه وهو يشوف وفعلًا طلع حقه مو حق سلطان ،
سلطان سحب عقاله من راسه : الله ياخذك ي شيخ ومشى وهو يلبس شماغه ،
يوسف دخل وهو لابس بشت بُني : رايح اجيب امكم ،
الجد : خلاص نمشي مره وحده وشو له مشوار ثاني ،
صقر كان بالغرفه تجهز وجلس على الكنب يطقطق بالجوال ،
عمر دخل عنده وهو يشوفه جالس : يلا بنمشي ،
صقر قام وقف ومشى يشوف نفسه بالمرايا وتعطر وطلع ،
عبدالرحمن كان واقف يولع الفحم عشان يتبخر ،
سلطان : خلاص اخلص علينا سنه عشان تولع ،
صقر : عطني عطني اولعه اخذه منه وهو يولعه ، وتبخرو كلهم وطلعو نزلو اول ما طلعو من الشقه ودخلو المصعد ، و ريحة العود والبخور امتلى المكان والنظرات الي كانو يناظرونهم الناس وهم يشوفهم متكشخين ولابسين البشت ،
-
ملاذ كانت جالسه على الكنب ولابسه فستان اصفر وشعرها الاسود ويفي على كتفها وهي تسمع اصوات اهلها ولا تقدر تتكلم وتشاركهم بالسوالف ولا حتى تقدر تشوفهم ،
الشغالات طلعوا وهم يجهزو الطاوله ويحطون المعجنات والقهوة ، ونجلاء تعلمهم شيسون ،
ام نجلاء ناظرت لفهد : وينهم تاخرو ؟
الجد عبدالعزيز : بالطريق قالو بيجون الحين ،
آمال : اوف ما اتحمل ريحة القهوة بروح اشرب ،
ام نجلاء : اهجدي الحين بيجون الناس ،
الجد وهو يقوم ويتوجه لمجلس الرجال قام فهد لحقه وطلعو لمجلس الرجال وهم يشوفون الشغالات يبخرون المجلس ،
-
يوسف وقف سيارته عند الصالون وهو يتصل على زوجته ام صقر دقايق و ردت : ثواني باقي ما خلصت ،
يوسف : يا بنت الناس حنا خلصنا وانتي باقي ،
ام صقر : بس باقي شعري دقايق واطلع ،
يوسف : طيب يلا انتظرك بسرعه بس خمس دقايق ،
ام صقر : تمام وقفلت منه ،
الجد : يالله هذا الي كان ناقص ،
سلطان : يبه صرفهم وقل الطريق زحمه ،
عبدالرحمن: توه بدري لو نوصل العشاء افضل ،
الجد : الرجال كلشوي يسال وينكم اقوله بالطريق ،
صقر كان ساكت ويطقطق على جواله ،
بعد دقايق وصلت ام صقر وحركو سيارتهم متوجه لبيت عبدالعزيز "
-
الجد عبدالعزيز كان جالس يسولف مع فهد فجاه سمعو صوت بوري السياره ابتسم وفز قام وهو يعدل بشته فهد قام مشى وهو يشوف السواق يفتح لهم الباب ، دخل سيارته يوسف ونزلو كلهم الجد عبدالعزيز  مشى لعند الجد سُليمان وهو يسلم عليه ويحضنه : يا هلا ياهلا ، فهد قرب وهو يسلم على يوسف والعيال ، بينما ام صقر مشت مع الشغاله لمجلس الحريم ان نجلاء كانت واقفه اول ما دخلت ام صقر ، ام نجلاء قربت تسلم عليها والبنات يسلمون عليهم : كيفك شالاخبار ،
ام صقر ابتسمت : والله انا بخير كيفكم انتم شخباركم؟
ام نجلاء : بخير والله نورتينا تو ما نور المدينة بوجودكم ،
'
= مجلس الرجال =
الكل دخلو جلسو عبدالعزيز التفت للعيال : هاه يا يبه كيفكم وكيف مدينه عجبكم ولا ودكم بالقصيم ،
عبدالرحمن بضحكه : والله مافي زي قصيمنا ،
عمر : انا حبيت اجواء المدينة ،
الجد سُليمان : وانتم متى تنورون قصيمنا ؟
فهد بضحكه : محنا طالعين من مدينتنا ،
يوسف : لا عاد هذا خيانه ،
سلطان كان جالس بضحك على سوالفهم ،
الجد عبدالعزيز: والله انكم نورتو المدينة ،
فهد : والله المدينه منور بـ اهله ،
الجد سُليمان التفت لـ عبدالعزيز : شصار على شركتك ، وكملو سوالفهم عن الشغل والشركه ،
صقر قام انسحب بهدوء وطلع عند السيارات للحديقه يدخن،
'
= مجلس الحريم =
الشغاله قامت وهي تصب القهوة للكل ،
ام صقر : ما شاء الله تبارك الله عندك ٣ بنات ؟
ام نجلاء ابتسمت : اي ربي ما رزقني بعيال ،
ام صقر : سبحان الله شوفي انا عندي اربع عيال و ربي ما رزقني ببنات لكن الحمدلله بكل الاحوال ،
جلسو وهم يسولفون ، نجلاء قامت طلعت وهي تشوف ملاذ بالصاله والشغاله ما حولها فزت ومشت لعندها : ملاذ شتسوين هناك ووين مارلين عنك؟ مشت وهي تدور الشغاله قامت طلعت للحديقه وهي تدورها ، فجاه سمعت صراخ آمال وهي تناديها وهمست : ملاذ انتظريني هنا الحين اجيكِ ومشت عند آمال ، ملاذ مدت يدها قدامها وهي تشوف مافي شي قامت بهدوء تمشي وقفت وهي تشم ريحة الدخان
ماتدري مين الشخص الي موجود فقط تشم ريحة دخان ما حست بنفسها الا وهي تطيح على الارض تعثرت خطواتها وطاحت ، صقر كان ورا السياره فز من الصوت وهو يلتفت يمين يسار لكن وقف من سمع صوت البنت ومشى اتجاه السياره وهو يشوف البنت الي طايحه و لابسه فستان اصفر وشعرها مفتوح ومغطي ظهرها ووجهها منزلتها على الارض وقف وهو يناظر لها بصدمه وينتظرها تتحرك ،
ملاذ رفعت راسها وهي تحاول تقوم ولا تشوف شي قدامها مدت يدها وهي تشوف قدامها شخص واقف مدت يدها له صقر كان مصدوم و مد يده ملاذ مسكت يده وهي تقوم
صقر كان يناظر فيها كانت حاطه مكياج نزل نظره لتحت وهو يشوف فستانها كان مصدوم كيف هي واقفه قدامه تطالع فيه ولا تمشي ولا تتكلم بس ساكته! رفع نظره وهو يناظر فيها ، ملاذ كانت ساكته ما تقدر تتكلم بشيء والدموع تتجمع بعيونها صقر كان متوقع انها تطالع فيه ناظر لعيونه وهو يشوفها عكس هي الي ماكانت تشوف شي قدامها غير السواد صقر تكلم بهمس : انتي بخير ؟ ملاذ فزت من صوته وسحبت يده منه وهي تعرف هالشخص مو ابوها ولا هو جدها تميز صوت اهلها وتعرفهم لكن هالشخص غريب وهي متاكده! صقر انصدم وهو يشوفها ترجع لوراء ، خاف انها تصارخ صد وقام بيمشي اول ما مشى وعطاها ظهره سمع صوت الشغاله بحركه سريعه تخبى ورا السياره ، الشغاله مشت مسكت يد ملاذ وهي تاخذها لداخل ، ملاذ كانت مصدومه وهي ترتجف بخوف و تاشر للشغاله بمعنى من كان هناك الشغاله ما كانت فاهمه شيء واخذتها تجلسها على الكنب ومدت لها المويا ،
'
صقر دخل المجلس جلس وهو مصدوم من نفسه كيف تجرا يوقف قدامها ويمسك يدها! لو هي تكلمت وعلمت الكل مستحيل يتركونه لكن طرد هالافكار من راسه وهو يتذكر شعرها الاسود وفستانها الاصفر وكيف كانت واقفه قدامه ،
غمض عيونه وهو يتعوذ من الشيطان لكن منظرها كل دقيقه يمر بباله ولا يقدر يتهرب من جمال المنظر الي شافه ، لاول مره بحياته يشوف انسانه كذا بكامل اناقتها قدامه ،
'