أغدا ألقاك

الفصل التاسع والعشرون الجزء الثاني

بعد مرور اربعه اشهر آخرين..

كان الوضع اصبح اكثر تدهور خاصا بعد طلاق غالية فهى منذ تلك اللحظه وهى تعانى من انهيار عصبي جعلها حبيسة غرفتها بمنزل سماح فهى بعد ان فاقت من تلك الاغماءة أصرت ان تعود إلى هناك بمفردها ولكن فرحه لم تكن تريد أن تتخلى عنها او تتركها أبدا لتظل معها على الرغم من إلحاح الجميع على ان يبقوا بجوارها خاصا بعد ان أودعت لاميس لوالدة تيم واصبحت وحيدة تماما لم تكن تريد أن تقابل احد ولا ترى احد، حاول الجميع أن يخرجها من تلك الازمه ولكنها لم تكن تشعر بشئ غير الوجع والانكسار والألم الذي تلقته منه فتلك الضربة كانت القاضية عليها جعلتها فقدت القدرة على التمسك بالحياة جعلتها هشة ضعيفة وكل ماكان يجول ببالهاهى كلمه واحده لماذا؟؟..

دلفت إليها فرحه متنهده بحزن على حالها لتحاول معها لتاكل اى شئ لتطالعها بحزن واسي على ما آلت اليه حياتها فهى كانت تجلس بفراشها متخذة موضع الجنين بوجه ذابل تبكى بلا انقطاع وهى مازالت لا تصدق انه هو من فعل بها ذلك حبيبها زوجها الذي كانت واثقة انه يعشقها ولا يرجو غيرها من الحياة لتتفاجئ بفعلته تلك التى اوقعتها بقوة وقسوة على واقع مرير لم تكن تتخيل ان يحدث لها..

جلست بجوارها فرحه تمسد على شعرها برفق قائلة:-غالية ياحبيبتى قومى ياقلبى قومى ياضنايا كلى ولو لقمه بس عشان خاطرى..

غالية بصوت ضعيف باكى:- مش عاوزة اكل سيبنى لوحدى يادادة لو سمحتى ارجوكى..

فرحه بحزن:-يابنتى ده مش هيحل حاجه انا عارفة ان اللى عمله ده..

قاطعتها غاليه باكية:-دادة لو سمحتي ارجوكى ماتجبيش سيرته خلاص انا نسيته مش عايزة اسمع اى حاجه عنه..

فرحه:-ياريت الكل مايجبش سيرته وتنسيه فعلا ياضنايا ياريت قلبك يبطل يلومك ياريتك تصدقى وتبطلى تحبيه بس ازاى وانا عارفاكى..

غالية دامعه:-خلاص انا مش عاوزة اسمع سيرته ولااسمه تانى هو اختار انه يبعد واختار انه يطلقني هو حر..

فرحه بحزن:-طب وانتى هتفضلى كده لحد امتى هتفضلى منكسرة وضعيفة كده وتضيعى نفيك بسببه..

غالية باكية:-هفضل لحد ما اموت وارتاح يادادة الموت أهون من الضربة اللى قتلني بيها..

ضمتها فرحه بلهفة اليها وهى تمسد على شعرها بحنان:-بعد الشر عليكى ياقلبى ان شاءالله اللي يكرهك ،اوعى اسمعك تقولى كده تانى سامعه اخ اخ بس لو اشوفه..

وقتها لم تتحمل اكثر وشهقت باكية بقوة وهى تحدثها:-انا خلاص تعبت مابقتش عايزة اعيش انا مش عارفة ليه الدنيا بتعمل معايا كده ، ليه كل حاجه بتروح من ايدى، ليه لما املك السعادة بين ايديا الاقيها بتروح منى بلحظه ، ليه كل اللى بحبهم بيبعدوا عنى ، واللى بيحبوني ابعد عنهم ليه يادادة انا عملت ايه غلط فى حياتى حد يقولى انا اذنبت فى ايه بس..