နတ်ဘုရားမအဖြစ် ပြန်လည်ပေါ်ထွက်လာခြင်း[ဘာသာပြန်] ✔️✔️✔️

Chapter [1]

"ဒါဆို မင်းက မိန်းကလေးနဉ်ပေါ့..? ကျွန်တော့်နာမည်က ဝမ်ဟယ်ပါ.. မင်းကိုကြိုဖို့ ကုမ္ပဏီက စီစဉ်ပေးလိုက်တဲ့လူပါ.. ကျွန်တော့်ကို ရှောင်ဝမ်လို့ ခေါ်လို့ရပါတယ်.."

ပြောပြီးသည်နှင့် လက်ကိုပွတ်လိုက်ပြီး နဉ်ရှီဆီသို့ ဆန့်ထုတ်လိုက်သည်။

"တွေ့ရတာ ဝမ်းသာပါတယ် အစ်ကိုဝမ်.." နဉ်ရှီက သူ့ရဲ့လက်ကိုကိုင်ကာ နှုတ်ဆက်လိုက်ပြီး.. "ဒီနေ့ ရှင့်ကိုပဲ အနှောင့်အယှက်ပေးရတော့မယ်.."

"အနှောင့်အယှက်မဖြစ်ပါဘူး.. အနှောင့်အယှက်မဖြစ်ပါဘူး.." ဝမ်ဟယ်က အပြုံးဖြင့် ငြင်းဆန်လိုက်ပြီး.. "အိမ်ပြန်ရောက်ရုံပဲရှိသေးတာ.. ကုမ္ပဏီအသစ်နဲ့လည်း လက်မှတ်ထိုးပြီးပြီဆိုတော့ အခက်အခဲရှိခဲ့ရင် ကျွန်တော့်ကို ပြောလို့ရပါတယ်.."

နဉ်ရှီဘယ်ကပြန်လာမှန်း သူ,မသိပါချေ။ သို့သော်လည်း နိုင်ငံခြားမှာ ရှိနေစဉ်မှာပင် လျိုခွင်း၊ ကျန်းချင်းယွင်တို့နှင့် သီးသန့်လက်မှတ်ထိုးနိုင်ခဲ့သည့်အပြင် ကုမ္ပဏီကလည်း သူမအတွက် အကောင်းဆုံးစီစဉ်ပေးခဲ့သည်။ ထို့ကြောင့် သူမက ပါရမီပါရှင်တစ်ဦး ဖြစ်ချေလိမ့်မည်။ ထို့ကြောင့်ပင် အတော်ကြာအောင် စောင့်ဆိုင်းနေခဲ့ရသော်ငြား ဝမ်ဟယ်က စောဒကမတက်ရဲခဲ့ပေ။

လေယာဉ်ကွင်းမှ ထွက်ခွာလာကြရင်း နှစ်ယောက်သား စကားစမြည် ပြောလာခဲ့သည်။ နဉ်ရှိခမျာ နေအပူရှိန်ကြောင့် သူမရဲ့ခန္ဓာကိုယ်က လောင်ကျွမ်းသွားရသလို ခံစားလိုက်ရတာကြောင့် စိတ်မသက်မသာ ဖြစ်သွားခဲ့သည်။ ကံကောင်းထောက်မစွာဖြင့် ဝမ်ဟယ်၏ကားက သိပ်မဝေးသောကြောင့် အချိန်အကြာကြီး လမ်းမလျှောက်လိုက်ရပေ။

အဲယားကွင်းဖွင့်လိုက်တော့မှ နဉ်ရှီလည်း စိတ်သက်သာရာရသွားသလို အသက်ရှူထုတ်လိုက်သည်။ သူမ၏ဖုန်းကို ထုတ်ပြီးကြည့်လိုက်တော့ မွန်းလွဲချိန်ဖြစ်နေချေပြီ။

ဝမ်ဟယ်က နဉ်ရှီကို နေ့လယ်စာစားရန် စားသောက်ဆိုင်တစ်ခုသို့ လိုက်ပို့ခဲ့ပြီးနောက် ကုမ္ပဏီမှ စီစဉ်ပေးခဲ့သည့် အဆင့်မြင့်တိုက်ခန်းတစ်ခုသို့ ခေါ်ဆောင်သွားလိုက်သည်။ ထိုတိုက်ခန်း၌ အိပ်ခန်းတစ်ခန်း၊ ရေချိုးခန်း၊ မီးဖိုအပြည့်အစုံ ပါဝင်သလို အနီးပတ်ဝန်းကျင်ကလည်း စိမ်းစိမ်းစိုစိုဖြင့် သစ်ပင်ပန်းမာန်များ ပြည့်နှက်နေသည့် နေရာကောင်းတစ်ခုပင်။ ဝမ်ဟယ်က နဉ်ရှီရဲ့လက်ဆွဲအိတ်ကို ကူသယ်ပေးလိုက်ပြီး အခန်းတံခါးကိုဖွင့်ကာ သော့ကိုလက်လွှဲပေးလိုက်သည်။