فَقيدة أنمار

بارت 19

كبل شمرت نفسي ع الجربايه من التعب ،
رغم الجو حار بس الغرفه ثلج من السبلت لفيت نفسي باللحاف ونمت ..
بعد مرور ساعتين تقريباً فزيت على صوت اختي وهيه تحاول تكعدني وتكول بهدوء :
= زهراء ، حبيبتي ، اختي الحلوه يله كُعديي .
فتحت عيوني واني اباوعلهه مستغربه ، كلت :
- شنوو هالدلع كُله إليي ما اصدك خاف ضاربه راسج وفقدتي الذاكره ؟
= ههههه لاا بس يعني حتى تكعدين وتجهيز نفسج لأن أمي كالت انتي عازمتنه على طلعه موو؟
- هاا ايي اكول هسه عرفت هاي كُله علمود الطلعه .
= ايي يله كومي لا نتأخر .
- اوك .

كمت غسلت وبديت اجهز بنفسي سويت مكياج بارز اكثر من كل مره مرتب برز ملامحي ،
بعدهه بدلت ولبست زي رسمي بنطرون وستره وترانشوز لبست حجابي وعطرت ونزلت ،
لكيت اهلي كاملين كبل طلعنه اول شي رحنه لمدينه العاب وبيهه حديقه حلوه ،
امي وابوي كعدو وأختي شمرت جنطتهه وراحت وي اخواني تريد تلعب ،
واني هم انطيت الجنطه لأمي وكلت :
- ماما حتى اني رايحه اركب وياهم بالألعاب .
= لا لا وين تركبين ما يصير مو زين عليج .
- لااا ماما والله حرام انه اختاريت هالمكان حتى اركب بالألعاب .
= بنيتي مو زين كعدي بنيتي .
- افف اوك .
ضليت كاعده مطنكره واني اباوعلهم شلون يركبون بالألعاب ، امي وابوي كاعدين يحششون ويضحكون علي وكل شوي يكولون لي :
"ما فهمنه الطفل بعقلج لو ببطنج"
ضحكت على ضحكتهم وكمت وكلت :
- زين اني رايحه اتمشى شوي لو هم موزين ؟
= لا ماما روحي بس لا تتعبين نفسج شوي وتعاي كعدي .
- اوك امي .
كمت ضليت افتر وحدي واباوع ع الرايح والجاي ،
ما اتحملت رحت كصيت بطاقه وصعدت بالمراجيح العاليه بدون ما احد يدري وهم جنت واثقه انو ما راح تأذيني لأن هيه بس تفتر ..
صار الجو حلو وأخذني الواهس لعبت مرتين بعدهه نزلت ورحت اشوف الألعاب البقيه كلهن خطر على فصعوني ،
أخذت نفس وكلت واني لازمه بطني :
- "شوف حبيبي شلون اخاف عليك والله جان هسه ركبت الألعاب كُلهه بس علمودك بطلت اويي فدوه
يمتى تجي بخير واشبعك بوسات " .
احجي وأضحك ضليت افتر شوي ورجعت يم اهلي .

بعدهه رحنه للمطعم تعشينه بعدهه نزلنه الحلا والچاي وأبوي فتح موضوع الزياره ضلينه نسولف سوه ،
جانت لمتنه حلوه بعد ما كملنه طلبت من ابوي انو يفرنه بالسياره وما رفض طلعنه وضلينه تقريباً ساعتين يله رجعنه ،.
دخلنه للبيت الساعه ١٢ بليل صعدت لغرفتي
أخذت دوش وكعدت بالبرنص ع الجربايه فاتحه شعري وشغلت فلم بحاسبتي وكعدت اباوع وأكل حلويات ،
رن تلفوني فتحته وجان انمار ، كلت :
= الو انمار .
- هلا يبعد عيوني الاثنين بويه شكد مشتاگ لصوتچ شلونج ام فصعوني ؟
= هههه بخير دامك بخير ابو فصعوني .
- حبيتي انتي ، وين كاعده شنو هالصوت اليمج ؟
= كاعده بغرفتي جاي اشوف فلم .
- هاا شنو نوعه ؟
= كوميدي .
- ايي شنو اخبارج احجيلي ما مشتاقتلي ؟
= ههههه ايي، ما اكو شي بس صدُك اليوم جنه طالعين ونسيت اكولك ..
- هاا وين رحتي و وي منو ؟
= رحنه مدينة العاب ومطعم بمناسبة نجاحيي ،
"ركزت ع الكلمه الأخيره "
ضحك وكال :
- ايي عفيه الف مبروك بنيتي .
= ههههه شكراً الله يبارك بيك .
- بمناسبة نجاحج الج مني مفاجأه راح تحبيهه .
= امم وشنو هي المفاجأة ؟
- بعد هيه اسمهه مفاجأه ما يصير تنحجي .
= ههههه تمام .
- ايي شلونج وشلونه فصعونج خو ما مأذيج ؟
= هههه لاا حبيبي ما يأذيني .
- منو يمج ؟
= ما اكو احد ليش ؟
- اريد اجي يمج بس فشله دنيا ليل .
= هههه لاا وين خليهه ع باجر أضل وحدي .
- ليش تضلين وحدج وين اهلج ؟
= ايي نسيت اكولك ، أهلي باجر بليل يسافرون
وأضل بس اني بالبيت .
- هاا بالسلامة انشالله بس بنيتي لو تجين هنا مو احسن من ما تضلين وحدج ؟
= ومنو يضل هنا بالبيت لازم احد يضل هنا .
- وشلون تضلين وحدج ما يصير عيوني انتي .
= ايي انت تعال هنا ومن يرجعون اهلي ارجع وياك هاا؟
- اي هيج احسن ، انه باجر بليل يمج .
= تمام هلا بيك .
سمعت صوت بنيه يمه صار عندي فضول كلت :
- انمااري ؟
= عُيونه
- منو يمك ؟
= محد ليش ؟
- متأكد ؟
= ههههه ليش تسألين؟
- انماار سمعت صوت بنيه منو هاي ؟
= هاا ههههه خلي عندج فضول ما اكول .
- لاا انمار احجي يلا ؟
= وإذا ما حجيت ؟
- ازعل عليك وبعد ما احجي وياك .
= امم خوش زعلي .
- اوك باي .
كلت هيج وسديته ، حرك اعصابي بس جنت واثقه انو هالصوت مو غريب ، احترك التلفون من الاتصالات والرسائل ، ما فتحتهن بس اخر شي كتب :
" زهرااء إذا ما تفتحي والله اجيج هسه "
أخذت نفس وكتبت :
" اريد انام "  شاف الرساله وطلع .
سديت تلفوني وضلت اكلب شوي بمواقع التواصل وسديته ونمت ...