فَقيدة أنمار

بارت 18

(After five months )

- طول هاي الفتره جانت بين الشغل والبيت وجان اغلب وقتي يخلص بالواجبات ، بين كل فتره من انزل من الشغل اروح اتطمن على زهراء واصبر نفسي بشوفتهه مرات يكون من طرف اختهه بالسر او انتضر يم بيتهم لحد ما تطلع اشوفهه تروح وارجع للشغل ،.

أما من ناحية ملاك عقدت عليهه بس ما تقربت منهه ابد هيه بغرفه وانه بغرفه وره فتره خليتهه تسوي فحص العذريه والحمدلله طلع كلامي صح انو انه ما متقربلهه وهيه تتبلاني ،.
بس ما ردت افضحهه عفتهه بالبيت ما مسويتلي مشكله لفترة دامت شهر ،
مره من المرات تمادت وي امي لدرجه حاولت تضربهه ما كدرت اسيطر على اعصابي اخذتهه للغرفه كتلتهه بحيث ما ضليت اسمعلهه نفس واخذتهه رجعتهه لبيت اهلهه ووديت ورقة طلاكهه وراهه ،..

بعد فتره رجع عم الهدوء ع البيت وانتشرت السعاده خاصه من تحدد تاريخ زواج حنين وبدت التجهيزات والهوسه بالبيت ،
بيوم من الايام الظهر كاعد بغرفتي ادخن واگلب بصور زهراء بحاسبتي ،.
اندك الباب اجه صوت حنين وهيه تكول :
= انمار عادي ادخل
- تعاي يبعد اخوج دخلي .
اجت حنين وهيه تبتسم عرفتهه عدهه مصلحه وكفت كبالي وضلت تمدح وتغازل :
= "اخوي الزود ، اخوي الحلو ، اخوي حبيبي، تدري انه اموت عليك ؟"
- ههههه اي ادري ، كولي من الأخير شتردين .
= شسمه عادي تاخذني للمول عندي كم شغله نقص .
- يمتى تردين ؟
= العصر خوش وقت .
- صار العصر نطلع ما عندي شي .
= صدوك حبيبي فدوه والله احبك ، تكول هيج وهيه حاضنتي وتبوس بيه .
- ولج كافي لزكتي وخري مني .
= يله حبيبي انه نازله اجهز نفسي مو تغلس علي .
- الله كريم اذا تلحين ما اخذج تره .
= لا لا هاي نازله ، كالت هيج وطلعت تركض .
ضحكت عليهه واجت على بالي زهراء صارلي فتره ما شايف اخبارهه ،
عندي حساب اختهه زينب راسلتهه كتبت :
" السلام عليكم "

وره ثواني جاوبت كتبت :
" وعليكم السلام تفضل "

- " بس ردت اسئل على زهراء شلونهه وشنو اخبارهه"

= " زينه احسن من قبل مخلصتهه من الدوام للبيت لو وي صديقاتهه تطلع "
- " شلوون ، تطلع بس هيه وصديقاتهه؟ "
= " ايي ليش شنو عصبت "
- " لاا بس يعني شلون تخلوهه تطلع وحدهه"
= " تره هيه جبيره مو صغيره وعدهه سياره وتطلع وين المشكله "
- " تمام زين هسه هيه وين ؟"
= " هسه هيه طالعه بمول *** وي صديقاتهه"
- " تمام شكراً محتاجين شي ؟"
= " لا سلامتك ، بس عادي بعد ما تراسل هواي عن زهراء لأن هيه ما تدري ولو تدري تكلب الدنيا على راسي وإذا صار شي مهم اني اراسلك تمام "
- "هههه تمام مع السلامه"

سديت التلفون وكمت لبست ع السريع وأخذت حنين وطلعنه لنفس المول إلي بي زهراء ، دخلنه وعيوني تدور عليهه ..
واكفين انه وحنين يم محل ولمحتهه من بعيد بس درت هيه دارت وجرت البنات وياهه وطلعت تركض ، ضليت اضحك عليهه باوعتلي حنين بأستغراب وكالت :
= ها عيني ضحكنه وياك ؟
- ما اكو شي سلامتج يله كملي .
= اممم متأكد شو العيون ضلت تلمع والابتسامة وين واصله .
- انجبي لج كلت ما اكو شي .
= هههههه تمام .