طوبى "شارع القهوة"
#جمان_فريد
#الجزء_الخامس "بمية راجل"
لو فاتتكم صلاة او خش عليكم وقت صلاة صلوا قبل بعدين اقروا...الصلاة قبل كل شي وكل شي يجي بعدها
وصلوا على الحبيب🌼
☕☕☕☕☕☕☕☕☕☕☕☕☕☕☕☕☕
"توا قال وصلنا"
صفيه:باهي الحمد لله ع سلامتهم...
عبدالمطلب بإنزعاج:الفرخة قاعدة تبكي لتوا..
صفيه:فاقده امها مسكينه..
عبدالمطلب؛دبروا كيف تسكتوها عندي خدمة من صباحات ربي .
ومشي لداره وهو متعفلق...
وصفيه بعد ماشبحتله بنظرة إزدراء مشت للدار اللي قعدوا فيها البنات..
لقت سدرة حاضنه اختها وتحاول تهديها شبحت لمرت عمها وقالت؛شن قالك عمي؟
صفيه؛قال وصلوا الحمد لله..
سدرة تنفست براحه وقالت:الحمد لله..
غرفه ببكي:نبي امي نبي امي..جيبولي امي نبيها..
سدرة؛تو تروح ان شاء الله تو تروح وياما بتجيبلك معاها حاجات ياغرفه هلبه قفاطين حلوات قفاطين الاميرات اللي انتي تحبيهم..
غرفه:نبي امي اني امي نبيها مانبيش الا امي بس...
سدرة تنهدت بضيق وقالت:تو بيضايق عمي..
صفيه؛لابنتي لايضايق لاشي...مشتلها وقالت..تعالي غريفه بنتي تعالي..
وغرفه شي ماتبيش تطلق اختها..
شويه طل حسين من الباب وقال؛ماتبيش تسكت..
سدرة بضيق؛معليشي ياحسين ماخليناكمش ترقدوا..
حسين:لالا مش هدا قصدي..
خش حسين وهو يقول:وجعتني بس..
طبس ع روس صباعه وطلع من جيب التوته مستكه زمان مشهورة مدورة وكبيروة ولونها احمر وقال..خودي هادي مش تحبيها انتي...
قعدت تشبح للمستكة وتقول:نبي امك..
حسين بإبتسامه:قصدك انتي قاعده بيبي نحسابك كبرتي..
ضحكوا سدرة وصفيه..
غرفه؛لااني مش بيبي.
حسين؛باهي علاش تبكي توا مش تبي امك البيبيات بس يديروا زيك..
غرفه:لالا مش بيبي اني وقعدت تمسح في دموعها..
ابتسم وقال:باهي خودي..
خدت منه المستكه..
حسين:ومعاش تبكي مرة تانيه وامك تو تروح باهي ..
غرفه هزت راسها وفتحت غلاف المسكته..
هو ضحك وناض وقال:خل نمشي نرقد...
سدرة بإبتسامة؛صحيت ياحسين..
ابتسم حسين ومشي طلع بدون مايرد عليها...
صفيه بإبتسامه؛يعرف يتعامل مع الصغار حتى اخته اميمه لما تبكي هو يسكت فيها..
سدرة:والله الخو الحنين نعمه ربي يحفظهولها..
صفيه:يحفظه ليكم كلكم وخيكم حتى انتم..
سدرة:تسلمي خلاص..
ناضت صفيه وقالت؛هي خلاص ارقدوا توا وراك جامعه..
سدرة؛باهي..
مشت صفيه وقالت؛نطفي الضي..
سدرة:اطفي..تصبحي ع خير..
صفيه؛قدامك كل خير..
ومشت طلعت وسكرت الباب..
سدرة:ماتاكليهاش المستكه توا بترقدي..
غرفه كلتها وقالت؛نبي ناكلها..
سدرة بعصبيه؛بااهي ادمدري ..
غرفه رقدت وهي ساكته لانها خافت منها..
وسدرة وجعتها اختها في النهايه امهم مش موجوده لازم تكون هي مكانها توا..
رقدت وضمتها لحضنها بدون ماتكلمها..وغرفه شدت فيها وقاعده تمضغ في المسكته...
🌻تاني يوم..
الكل كان نايض ماعدا غرفه واميمه قراريتهم في العشيه..
لما مشت تفطر سدرة تفاجئت بالفطور خبزة وطماطم حكة وشويه زيت...
ماستوعبتش بكل ان هدا شي يتاكل ع الصبح..
مابتش تاخد اخطا من فنجان القهوة..
صفيه؛خيرك مافطرتيش..
سدرة بإستعجال:مانحبش نفطر..خل نمشي نطلع نلحق ع الأفيكو..بالسلامه..
كلهم قالوا:بالسلامه..
ومشت طلعت..
يوسف:عندها الحق مش واخده ع فطور زي هدا..
عبدالمطلب:وخيره فطور زي هدا نعمة من ربي مامن يتمناه وبعدين مش عاجبها تصرف من اللي عطاهولها بوها..
كلهم سكتوا ومافي حد بي يرد حتى من الجد..عارفين ان الكلام معاه مافيش منه فايده...
🌻طلعت سدرة من الحوش..
لاقت المهدي مقعمز في سيارته وكان يراجي في طلعتها..
المهدي:انزلي بسرعه..
نزلت نسرين تجري ومشت لسدرة...
نسرين؛سدرة سدرة..
وقفت وقالت بإبتسامه استغراب:صباح الخير خيرك!؟
نسرين وهي داهشه:صباح الفل..شن جو ..
سدرة؛تمام الحمد لله..
نسرين:الحمد لله ع سلامة بوك وامك امس اتصل وبوي رد عليه وقاله وصلوا ع خير..
سدرة؛الله يسلمك..
نسرين؛ماشيه الجامعه..
سدرة:ايه..
نسرين:باهي تعالي نوصلوك..
شبحت سدرة للسيارة جو عيونها في عيون المهدي تجاهلاته وقالت؛لاصحيتي طالعه توا للإفيكو اكيد عيشة تراجي فيا..
شدت نسرين يدها وقالت؛لابالله عليك سدرة تعالي والله من فجر ربي نوضني وهو يقولي كلميها تمشي معانا نبي نكلمها ..
سدرة رفعت حاجبها وقالت:سامحيني نسرين ماعنديش كلام مع واحد معنداش ثقة وفي اخلاقي وخوني...ومشت وخلتها..
وهو قعد يتبع فيها بعيونه وقعد يتنفس بسرعه من العصبيه..
مشتله نسرين تجري وركبت وهي تقول؛قالت ماعنديش كلام مع واحد معنداش ثقة في اخلاقي وخوني وبصراحه مهدي ومن غير عصاب عندها حق .
هو قعد ساكت ولاكلمه شغل السيارة وقعد يسخن فيها..
🌻وسدرة ماشية في طريقها...
فاتت من قدام حوش السوريه..
وكانت قدام سيارة اياد ومعاه امه وولده..
هو كيف جي بيركب شبحها وقال؛صباح الخير..
هي نزلت عيونها ويدوب ردت..
امه كلمتها؛بنتي سدرة صباح الخير..
سدرة تحشمت ووقفت وقالت:صباح النور خالتي..
ام اياد؛كيفهم امك وبوك وصلوا لبنغازي بخير وسلامه..
سدرة:ايه الحمد لله..
اياد وامه؛حمد لله ع سلامتهم..
اياد؛ماشية للجامعه..
سدرة هزت راسها بدون ماتشوفله..
ام اياد؛اركبي نوصلك بنتي..
سدرة:لا اني نمشي في الافيكو..
ام اياد؛وليش يابنتي تشحططي في المواصلات مادام في سيارة اركبي بنتي اركبي..
اياد؛طريقنا ع طريقك..
سدرة؛لاشكرا..
ام اياد؛طب والله حتركبي معنا بوك امك وصونا عليكم نحنا كمان ولا مش متعتبرتينا جيران..
انحرجت سدرة هلبه مراة كبيرة وحلفت ماقدرتش تردها لقت روحها مجبورة توافق وقالت؛صحيتي ..
اياد ابتسم وطول فتحلها الباب الخلفي..
هي طول الوقت منزله راسها..وركبت طول..
وهي ركبت من هني..
والمهدي جاي بسيارته وشافها راكبه..
انصدم بقوة وقال:هدا شني!!!؟؟.
ونسرين عضت ع شاربها وهي تقول في نفسها
"شن درتي ياسدرة!!؟"
ركب اياد السيارة وتحرك طول..
المهدي قعد يخبط ع دومان السيارة وهو يقول:شن دير هادي شن دير...شن دير ...
ونسرين قريب تموت من الخوف...
وطلع اياد بسيارته من الشارع...
والمهدي وقف وهو بشوف للسيارة كيف ماشيه ويقول:وربي لما نعطيه طريحه تخليه وين يشوفها جايه يغير طريقه..
وتحرك بعدين رجع بخبط ع الدومان ويقول...سدرة سدرة سدرة سدرة...
ونسرين تدعي طول الطريق توصل للمعهد ع خير...
🌻🌻🌻🌻🌻
في الجامعه..
عائشه:انتي ثبتي في الكلام عليك هكي..
سدرة:مراة كبيرة حلفتلي تبيني نحثها؟!
عائشه؛والله ماعارفه شن نقولك بس هكي الحكايه بتزيد تتعقد وفوق تعرفي ان حني شارع واحد فيسع مايطلع الكلام وينتشر .
سدرة؛طز فيهم عارفه روحي اني شنو ومادرتش غلط والراجل مافيش بيني وبينه حاجه وهو مسكين عمره ماقالي كلمه برا الطريق..غير السيد مهدي متحسس بس من ردة بوي ليه..
عائشه:ربي يهدي النفوس وخلاص..باهي خلينا منهم واسمعي اخر الاخبار..احمد خطب فايزة..
سدرة بدهشه؛الله!
عائشه بضحكه:والله..امس بس قالتلي وقالت قولي للبنات يجوني اليوم بيجيب ماليه وتبينا معاها..
سدرة بضحكه؛والله وصار منها شرادة وبتنخطب قبلنا..
عائشه:المهم تعقل..
سدرة:ماعقلت اختي فردوس اللي مهبله راجلها بطلباتها وهو ياريته يقول لا بكل راجلها طايح عليها طياح..
عائشه:قولي الحمد لله..
سدرة:الحمد لله ع كل حال..بس مايجيش هكي لازم يشد معاها مايحللهاش ياعيشه غدوة تركبهاله ويجي يشكي منها وتبدا المشاكل..
عائشه:لالا مدام يحبها كله عنده عادي ماتخافيش عليها
سدرة:ان شاء الله يطلع هكي..
رفعت عائشه يدها وشافت الساعه بعدين قالت:هي نوضي وقت ع المحاضرة..
ناضت سدرة هي وعائشه ومشوا لمحاضرتهم..
🌻🌻🌻🌻🌻
"حي عليها سدرة حي هادي بلعاني تحرقله في دمه"
نسرين؛قولي شيطاته اقسم بالله مانحسابه الا بيدير بيا حادث..
فايزة بأسف؛قاعده تخرب فيها اكثر..
نسرين؛حتى خوي مادارش طيب وصلت بيه انه يخونها وتبيها تفوتهاله..
فايزة؛لكن تحبه يانسرين تحبه هلبه شفت انتي فهالشهر شن صار فيها..
تنهدت نسرين وقالت؛الله يسامح عمي لطفي كان وافق منين خطبها راهو ماصارش هكي..
فايزة؛ربي يجعل اخرها خير..
نسرين:آمين...
فايزة:ماتنسوش العشيه نبيكم كلمكم ..
نسرين بضحكه؛حاضر...
🌻🌻🌻🌻
الساعه 12:00قبل الظهر..
غرفه بقرف:لالا ماناكش هكي اني..
صفيه بضيق:باهي شن تبي تاكلي..
غرفه:اني عندي فلوس عطتني سدرة نشري من المقصف..
صفيه:باهي ع راحتك..
غرفه؛هيا اميمه..
مشت غرفه ووراها اميمه اللي معاش تبي ترفع معاها نص الخبزة والطماطم..خاطرها حتى هي في نفاص القصف بس ممنوع عليها..
ولاأمها مسكينه تكساب قرش بش تعطيها للعقل ان يتخيل انه مايخليهاش حتى ربع جني تشري بيه خبزة كان نقصت عليها..
والحاج علي مسكر راسه وحلف معاش يحط قرش بعد اللي راه منه..
بعد ماكان يصرف وهو يتحكم في مافي يصرف فيه..
ولما يحط في يد صفيه فلوس كان ياخد فيهم منها غصبا قهرا...
امثال عبد المطلب يامكثرهم وبالذات في وقتنا هدا...
🌱🌱🌱🌱🌱🌱
الساعه 4:00قبل العصر..
خشت سدرة مع عائشه للشارع بعد ماحطهم الافيكو وهما يهدرزوا مع بعضهم..
شويه خشوا دكان..
خدت منه سدرة حلوة وشكلاطه الورد بعدين طلعوا الزوز وكملوا طريقهم للحوش..
سدرة:بالسلامه عويشه .
عائشه:بالسلامه...
ومشت عائشه..
وخشت سدرة لحوشهم..
ومشت طول للمخزن وخدت كيسه كبيره..
عبتها بضاعة فطور...
وطلعت من المخزن ومشت لباب حوش عمه فتحاته وخشت...
مشت طول خشت للحوش وقالت: السلام عليكم..
جدها وهو يشوف فيها شن جايبه في ايديها:شن هدا اللي جايبتيه؟
سدرة؛حاجه قعدوا في الحوش جبتهم...
ع جية صفيه؛روحتي بنتي..حي شن هدا اللي جايبتيه..
سدرة؛شدى عليا خالتي بالله...
جت شدت عنها وقالت:علاش يابنتي..
سدرة:شن علاش خالتي صفيه ناكلوا كلنا مع بعضها راهو حني نصرفوا وانتم تصرفوا..هي توا خليني نمشي نوتي حوايجي بنمشي لحوش خالتي مشتده اليوم خطبة فايزة..
ومشت من حداهم..
صفيه وهي تشوف للحاجات في يدها قالت:ربي يكمللها ع خير...
وتنهدت بضيق ومشت للكوجينه..
وعلي ابتسم ع جنب وهز راسه ورجع يتفرج ع التلفزيون.فجأة قصوا ع البث وجابوا المؤتمرات الشعبيه..
علي الواعر:تفي عليكم وع من داركم يلعن بوكم وبوه ..
صفيه طلعت تجري تسكر في الرواشن والبيبان..
علي: كمشه كذابين قالك الشعب يحكم نفسه بنفسه..
طياح سعدهم..
صفيه مشت سكرت التلفزيون وقالت:نجيبلك الراديو تحط ع اذاعة لندن؟
علي وهو ياخد في انفاسه بعصبيه:جيبي جيبي..
ومشت تجري بتجيب الراديو ع طلعت سدرة من الدار وهي تقول بضحكه؛جابتنا طبة جماعيه في جرة جدي..
صفيه؛نراجي فيها كل يوم..
ضحكت سدرة وخشت للحمام...
🌻🌻🌻🌻
بعد العصر..
طلعت سدرة من حوش عمها ع طلعة نسرين من حوشهم..
مشتلها تجري وصلت فيها وقالت؛شن جوك بعد حرقة الدم اللي درتيها اليوم..
سدرة:اقسم بالله ماقصدي وانتي تعرفيني مانديرش هكي اني..امه هي اللي حلفت عليا وماقدرتش نردها..
نسرين؛والله قريب هبل يا سدرة..
سدرة اضايقت وقعدت ساكته..
وكملوا طريقهم وهما ساكتين لين وصلوا لحوش فايزة..
🌱فهالوقت..
المهدي كان واقف قدام دكان قريب ع حوش الدكتور اياد
كان يراجي فيه..
لحظات وكانت خاشة سيارة..
والمهدي وقفله وقعد يراجي امتى ينزل..
درس السيارة ونزل..
بعدين مشي ينزل في امه..
قدم المهدي وقال؛السلام عليكم..
ردوا عليه السلام..
المهدي؛دكتور دخل الوالده واطلعلي نبيك شويه..
بإبتسامة جانبيه قال اياد؛باهي..
ومشي اياد دخل امه..
والمهدي مشي لسيارته وحط ايديه عليها من فوق وقعد يخبط بصوابعه عليها ويراجي..
ع طلعة اياد سكر الباب وقال:شن حالك خوي المهدي..
المهدي وخر السيارة وقال :الحمد لله..
جاه اياد ووقف قدام وقال؛شن حال الاهل..
المهدي:الحمدلله كلنا كويسين..رشف وقال..ع العموم اني مش جاي نهدرز..عندي ليك كلمتين بنقولهم ونبيك تحطهم في راسك ماتحولهمش منه.بكل بكل...
عقد حواجبه وهو مبتسم وقال:اللي هما!؟
المهدي:سدرة المنتهى...بنت لطفي الواعر...قدمله وقرب وجهه ليه وقاله...فوتها...
ضحك اياد وقال:نفوتها كيف يعني؟
المهدي؛يعني لما تجي فايته...اووين تشوفها جايه تغير طريقك تنزل عيونك دير روحك ماتعرفهاش..
اياد؛علاش مش بنت شارعي حتى اني!؟
المهدي وهو يتمالك في اعصابه قال:انت سألت عن شارع القهوة كويس ولا ..
اياد؛سألت..
المهدي؛وقالولك شن المهدي وشن سدرة ولا!؟
ضحك وقال؛اها قالولي..
ابتسم المهدي وقال؛اها مليح بكل..واني نقولك المهدي مايخلي حد يقرب من سدرة ولايكلمه لانه تخصه بعد وقت بتولي مرته واني عرضي نقتل ع خاطره حتى القتل..
اياد؛لما تولي عرضك بعدين نتفاهموا .
شد المهدي اياد من ياقة سوريته وقال:ماتفهمش بالدوة انت..
شد اياد يد المهدي بقوة ونزلها وقال بإبتسامه:لو صار وعاودتها صدقني حتشوف مني شي عقلك مايتصوراش..
ومشي اياد لحوشه فتح الباب وخش وسكر الباب بقوة..
المهدي كان يبي يضربه يكسره تكسير بس ماتعودش يمد يده ع جيرانه..
وهو جار جديد والناس ماشافت منه الا كل خير لو دار فيه حاجه بينحط الحق عليه هو ..
ومع هدا بش يفش غله..خبط السيارة بيده بكل قوة..
ومشي ولى للمطحن وهو يغلي من الغضب..
🌱🌱🌱🌱🌱
"حلوة يابنات"
الثلاته بصوت واحد:تهبلي..
شويه انفتح باب الدار وخشت مرت خو فايزة وهي تقول:شكله جايك يام حلوة يافايزة..
قالتها متهكمه..
فايزة؛علاش!؟
:امه واخته حسيتهم اشبح كيف..
سدرة؛لما تعاشرهم تحكم عليهم..مامنهم اللي اول ماشفناهم نحسابوهم ناش باهيه طلعوا كلاب ..حاشاك..
فايزة عجبتها تلقيحه سدرة ع مرت خوها لأنها كانت تقصدها .
مرت خوها عرفت الكلام عليها بس قالت:الله اعلم..هيا اطلعي..
شافت فايزة للمرايه. ساوت شعرها بعدين مشت طلعت مع مرت خوها .
راجوهم لين طلعوا بعدين قالت وحده منهم..
نسرين:مبردها مرت خوها..
سدرة؛وحده محسديه...
وعائشه تسمع فيهم وساكته...
🌻في وسط الحوش...
ام احمد؛هو توا يلم في مبلغ بش ياخد شقه ويبيله ع الاقل عامين تصبري عامين عادي..
فايزة:مش مشكله لين تم قرايتي..
ام احمد:خلاص كان هكي..
اخته؛معناها بنديروا بيان ..
فايزة؛مانبيش نكلف عليه حتى تلبيسه بسيطه ساده..
ام احمد عجبها كلام فايزة لكن قالت؛نردوا عليه الشيره ونشوفوا..وان شاء الله خير..
مشتدة؛ان شاء الله..
مشتده شبحت لفايزة..
فايزة فهمتها وناضت طول ومشت طلعت للدار...
وصلتها وخشت للبنات وقالت؛واك عليك موقف واعر..
عائشه؛علاش؟
فايزة؛مش عارفه تخافي وتتوتري غصب عنك..
نسرين؛طبيعي..باهي شن قالولك..
فايزة؛يبوني نقعد مخطوبه عامين لين احمد يحصل حق شقه
نسرين؛كويس هكي تكملي قرايتك بالراحه
ناضت سدرة وقالت:باهي ربي يتمم ع خير...
فايزة:وين ماشيه؟
سدرة: للمطحن عندي فيه خدمه سامحيني فايزة..
فايزة:ولايهمك حبيبتي بري ربي يعاونك...
سدرة بإبتسامه؛تسلمي..
سلمت سدرة ع صاحباتها...بعدين مشت طلعت من الحوش بدون مايشوفوها الضيوف..
وتوجهت للمطحن لقت صغار عمها داخل...
سدرة؛ها شن جو..
يوسف؛ماشيه..
سدرة؛مابعتوش هلبه ولا؟
حسين؛الناس كلها قدام مطحن حوش شنيبه..قالوا بدوا يعطوا حتى للمحلات..
التفتت وشبحت برفعة حاجب لمطحن حوش شنيبه وحطت يدها في نصها وقالت؛يصير خير...
يوسف ابتسم ع جنب وهو يشوفلها عرف في راسها شي..
🌻روحت بعد صلاة العشاء من المطحن للحوش...
قعمزت قرت شويه..بعدين قرت اختها..
وشويه وناضت وعاونت مرت عمها في الحوش
وماجي وقت النوم الا صلت العشي ورقدت واختها في حضنها..
وفي من ساهر ليلها مش قادر يرقد غمضه ونار الغيرة تاكل في قلبه وروحه ماكله...
يشوف لحبات القهوة وهي تطحن قدامه ويحس في روحه زيها قاعد ينطحن طحن ويتفتت من حب ماشافش فيه الا العذاب...
🌱ثاني يوم...
وحوش عبد المطلب كلهم فايقين..
والفطور هالمرة غير كل مرة سفرة معبيه...
عبدالمطلب؛علاش هالخساير هادي كلها..
سدرة:جايباته من حوشنا ياعمي .
عبدالمطلب:حتى كان جايبتيه من حوشكم ماتسرفيش..
سدرة؛اني حرة في رزق بوي ياعمي..
عبدالمطلب:شن الرد هدا!؟
علي بصوت عالي؛عبدالمطلب خلينا نعرفوا نفطروا زي خلق الله صبح يافتاح..
ناض عبد المطلب وقال؛اقعدوا فيها اللي يتكلم ع الصح معاكم يطلع اعوج..
ومشي طلع..
صفيه؛سامحينا يابنتي..
سدرة؛هدا عمي يا خالتي مش جديد عليا..افطروا.افطروا ومادوروا شي..
يوسف ناض وقال وهو مبتسم؛عطلت ع الكليه..ماتبوا شي..
سدرة؛دس فلوسك لعمرك وراك مستقبل .
صفيه:صدقت سدرة .
وضحك ومشي وهو يقول:هي السلام عليكم..
ومشي طلع..
ناض حسين وهو مستعجل؛خودني في طريقك..
وناض وفي يده نص طن ومشي بسرعه...
علي؛شن ماعندكش جامعه اليوم..
سدرة؛لا عندي بس متأخر..اهو نكسدوا اني وياك في المطحن اليوم..
ابتسم وهز راسه...
وشويه وناضت سدرة مع مرت عمها ضموا الحوش...
بعدين مشت مع جدها للمطحن...
سدرة؛شاغليني بوي وامي زعما شن صاير فيهم توا..
علي:شن صغار هما...وبعدين ماشيين يقعدوا عند ناس يعرفوهم ماعندك علاش تنشغلي..
سدرة تنهدت وقالت؛ان شاء الله يتيسر حاله ياربي..
علي هز راسه وقال:آمين...تنهد وقال..الحال مش عاجبني المطحن معاش يجيه حد...
سدرة وهي تشوف لمطحن حوش شنيبه؛الرزق على الله ياجدي وتو يجيبه...
🌻وجي موعد مشية سدرة للكليه..
قبل لتمشي وتت طرمس قهوة متوسط..ناويه ترفعه معاها للكليه...
~~~~~~
في القاعه..
قبل المحاضرة بعشرة دقايق...
:الله بنتها تهبل..
؛ريحتها بروحها تعدل الدماغ..
سدرة:هادي القهوة من المطحن متاعنا مطحن جنه..
واحد من زملائها قال؛وين يجي؟
سدرة؛في ******* شارع القهوة تحديدا
:ايه سامع بيه..
وحده من زميلاتها:قداش ليها امي ادور ع القهوة الباهيه كان نقوللها عليه معاش تشري الا من غادي..
ابتسمت سدرة...
وعائشه تشوفلها بإبتسامة إعجاب..
شويه وخش الدكتور..وسدرة سكرت الطرمس وحطاته لوطا..
والطلبه قعمزوا في اماكنهم..
الدكتور وهو يمرر في نظره عليهم:من جايب معاه قهوة .
سدرة؛اني دكتور..
الدكتور ابتسم وقال؛باين عليها قهوة صح من ريحتها..
سدرة بإبتسامه؛هادي قهوة المطحن متاعنا اسمه جنه في شارع القهوة دكتور في******
هز الدكتور راسه بعدين قال؛هي ركزوا معاي في المحاضرة..
~~~~~
"الله ع الريحه الله"
اياد بإبتسامه؛اشرب وشوف الطعم..
رشفت الدكتور اللي معاه منها وقال؛عمري ياراجل ماذقت قهوة زي هادي..وين طحت فيها..
اياد بإبتسامه جانبيه؛ساكن في شارع اسمه شارع القهوة ياعزيزي..فيه مطحن اسمه مطحن جنة خديتها من غادي..
:جايكم بإذن الله..
ع خطمة ممرضه من حداهم:الله محلاها ريحة القهوة..
ابتسم اياد وبدي يحكيلها عنها...
🍀وبدوا الزباين يهلوا ع مطحن بن الجنه..
وسدرة ويوسف وحسين مش ملحقين...
وتفاجئت سدرة لما عرفت ان في زباين جايين من الطرف الدكتور اياد..
وحست ان تصرفاتها بدت واضحه ..تصرفات شخص يحاول يتقرب منها...
🌻🌻🌻🌻🌻
مقعمزين في الكوجينه ع بساط وهما يحشوا في مصارين وكرش بيديروا عصبان وهما يهدرزوا...
مطيره؛صحة لبنية خوي صحه بمية راجل..
ابتسمت سدرة وقالت؛الدنيا هكي تبي المراة تكون ياعميمتي بمية راجل..
فردوس؛وين الانوثه قصدي وين يجي ياخدك راجل يلقاك راجل زيه!؟
مطيرة؛يلقاه مراة ليه هو وبس ياأنوثه انتي..
ابتسمت سدرة..
صفيه بضحكه؛شكله وحمك بدي يطير..
فردوس بإبتسامه؛ايه الحمد لله...
خش عليهم عبد المطلب وهو يقول:شن هالبحبوحه هادي كل يوم دايرين حاجه شكل..
سدرة؛خير ربي مايتمش ياعمي..
عبدالمطلب؛ربك قال كلوا واشربوا ولاتسرفوا..
مطيره؛اللطف تي غير وين الاسراف ريت حاجه درناها وقعدت ولا لوحنا حاجه..
عبدالمطلب:مهما كان الواحد مايفتحش يده هلبه يامطيره..
سدرة؛كله في حدود المعقول ياعمي مدام الواحد عنده مايحرمش روحه والرزق ع الله...
معاش عرف مطلب مايناقش اكثر من هكي طلع طول من حداهم..
صفيه؛معاش قدر يرد عليك..
مطيرة بضحكه؛سفرة لطفي ووردة جت لصالحكم ياصفيه..
ضحكت وقالت:ايه والله..
تنهدت فردوس من قلبها وقالت:استاحشت امي هلبه..
سدرة ارتسمت ع وجهها ملامح الحزن..
فجأة سمعوا تليفون الحوش يرن..فزت..
ناضت طول وطلعت من الكوجينه..وفردوس لحقتها..
لقت عمها رد ع التليفون..
عبدالمطلب:ايه الحمد لله كلهم كويسين ياكلوا ويشربوا وماخاصتهم حاجه......اهيا قدامي..تعالي ياسدرة..
سدرة مشت بسرعه وخدت التليفون وشداته بين رسغيها بين حطاته ع كتفها وردت:ايوه بوي.
"هاه بنتي شن حالك وشن حال خواتك وشن دايرين..."
سدرة:الحمد لله الامور كلها تمام..حتى المطحن اموره تحسنت يا بوي..
"كيف تخدمي فيها ؟!"
سدرة:ايه مرة مرة بوي..انت شن امورك شغلك غادي..
"اهو باديين في مشروعنا وان شاء الله ربك ييسرها"
سدرة:يارب...وين امي بوي..
"اهي حداي تبكي"
سدرة ودموعها في عيونها:عطيهالي عطيهالي..
"اهي معاك"
"ايوه سدرة بنتي"
سدرة؛يما شن حالك حبيبتي..
"الحمد لله بنتي انتم شن حالكم ياغواليا"
سدرة:الحمد لله اميمتي والله في خيار الخير ياغاليه..
"فردوس شن حالها"
سدرة:الحمد لله حتى وحمها طار..
"الحمدلله..بعدين ضحكت وقالت..هي وحمها طار واني بدي فيا"
سدرة بإستغراب:كيف؟
"طلعت حامل واني مانندريش على روحي"
سدرة بدهشه:الله!
"ريتي عليك حشمة البنت وامها حوامل"
قعدت تضحك سدرة وقالت؛حي عليك من غرفه حي..
"والله حتى اني نخمم فيها"..
سدرة وهي تضحك:عليك جو...ان شاء الله يجينا وليد..
سمعتها فردوس وتفاجئت..
"اللي يجي من ربي باهي..هي توا بنسكر بنتي المكالمه بفلوس راهو"
ضحكت سدرة وقالت؛باهي المهم طمنا عليكم سلمي ع بوي هي بالسلامه..
"ردوا بالكم ع رواحكم بالسلامه.."
وسكرت سدرة والتفتت لفردوس..بعدين شبحت لعمها..
ومشت بسرعه خدت اختها ومشت بيها للكوجينه..
خشت عليهم وقالت:امي حامل..
شهقوا صفيه ومطيرة بدهشه..
فردوس:حي ع العار اني وامي حوامل!
نفضت سدرة يدها وقالت؛عار شني وانتي لسانك مايطلع كان في الخايبه..
مطيره :صدقت تحطي في كلامك وماتفكري في جد..
فردوس:خيركم هبيتوا فيا مش قصدي اني انصدمت بس!
صفيه بضحكه:ان شاء الله تحل عويناتها ع خير ويجوا العيل وخاله نداد وصحاب..
مطيرة بضحكه؛ان شاء الله..
ولت سدرة قعمزت وهي تقول:بيجي شرقاوي هدا ..
مطيره:ومن قالك ولد..
سدرة؛يارب يطلع ولد...
صفيه:اللي يجيبه ربي باهي..
فردوس ولت قعمزت معاهم وقالت؛زعمه مافيش خطر عليها الجياب فهالعمر...
مطيرة؛ياما منهم جابوا في عمرها وماطرالهم شي..
فردوس؛ربي يسلمها ويحفظها..
كلهم بأصوات متقطعه قالوا:آمين..
🍀🍀🍀🍀
وتمر الايام..
والحال كما هو عليه...
وكل ماله المهدي يزيد يحب سدرة اكثر...يحب كبريائها واعتزازها بنفسها يحب عدم رضوخها يحب عدم تهاونها في اي شي يخص كرامتها..
اللي يقول مع الحب مافيش كرامه هذا من الاصل ماعنداش كرامه...
الحب يكون فيها تنازلات عن كل شي الا الكرامه..
والمهدي خونها ووصل في اخلاقها مستحيل سدرة تعديهاله مهما دار .
بس في نفس الوقت كانت تتهرب من اياد..كانت تغار ع روحها لحبيبها ومش متقبله اي حد يقربلها غيره ولاتبي اي حد يحبها غير المهدي..
🌻سدرة وهي تمرر في نظرها قدامها:نحس في ربي خالقني ليه هو بس ماينفعش نكون لغيره بكل..مانقدر نتخيل راجل تاني في حياتي غير المهدي..
عائشه بإبتسامه؛من وين انتم صغار سبحان الله تتفكري..ديما يحسسنا فينا انك حاجه تخصه حتى اولاد الشارع مايخليش فيهم يلعبوا معاك..وحني كان واحد ناشبك ولاتعارك معاك يعطيه طريحة نباش القبور..
ضحكت سدرة وقالت؛ياوخيتي نحبه نحبه..يجري في دمي البنادم هدا...
عائشه بإبتسامه:ربي يلم شملكم ..
تنهدت سدرة وقالت:آمين..
"السلام عليكم"..
اختفت ابتسامة سدرة ورفعت راسها وشافت من كلمها وانصدمت..
عائشه طول ناضت وتباعدت..
وقفت سدرة وهي تقول بجديه:وعليكم السلام..ان شاء الله خير!؟
اياد بإبتسامه؛خير خير...اول شن كيف حالك..
سدرة؛الحمد لله..وياريت تخش في الموضوع طول..
اياد بضحكه؛علاش منفعله ضايقاتك جيتي هني..
سدرة؛ايه..
ابتسم وقال:تمام اني اسف..بس الموضوع اللي جاي ع خاطره يستاهل..
سدرة؛خش فيه بسرعه لوسمحت..
عائشه وهي تمشي وتجي في مكانها بعيد شوي عن سدرة لمحت حد واقف ع بعد مسافه بسيطه يشوفلها من بعيد وين ركزت عليه انصدمت وجت لسدرة تجري وهي تقول:المهدي ياسدرة المهدي..
التفت اياد..وسدرة شافتله وهي مصدومه..
شبحلها بنظرة واعرة وجعت قلبها هلبه..
بعدين لف ومشي..
هي كانت حتبكي وفي نفس الوقت انتابها الغضب الشديد شبحت للدكتور وقالت بلهجة شديده؛اسمع يادكتور ريته هدا المهدي شنيبه اني متسميه عليه من صغري وعمري ماحنرضى بغيره ولانشوف غيره لهدا ماتعبش روحك معاي بكل...ومعاش تكلمني ولاتفوت حتى من ركني..فهمت..
رفع اياد حواجبه وقال: زي ماتبي حاضر...لكن نبي نقولك حاجه قبل نمشي..كله ع النصيب...
ولف ومشي وخلاها بتبكي...
عائشه:عليك عمله وخلاص..
ولت سدرة وقعمزت ع الكرسي وقعدت تبكي وعائشه قعمزت حداها قعدت تهدي فيها...
🌻والمشكله ان فهاليوم تلبسية فايزة..
يعني سدرة حتمشيلها متنكده ومش حتقدر تفرح لصاحبتها...
من جهة تانيه..
خديجه:ريت هالحفله المطنطنه كلها ع بعضها تلبيسه .
نسرين؛نقولك حاجه احسن اقعدي..
وحطت شاربتها ع راسها وجت بتطلع لقت قدامها المهدي..
شافت خديجه وقعدت مركزة معاهم..
المهدي؛بنسألك وتجاوبيني بصدق ماتكذبيش...سدرة حق مايله لهداكا الزفت..
نسرين؛اقسملك بالله لا والله لا يامهدي..
خديجه؛وكان مافي شي علاش يجيبلهم في زباين للمطحن ويومها وصلها بسيارته..
لمعوا في عيون المهدي اللي كلهم غضب دموع..
نسرين التفتت ع خديجه وقالت؛سكري فمك انتي ياسوسه..
شبحتله والله هي مادخلها بحاجه هو يتلصق..
المهدي هز راسه وقال:تمام ..رشف وقال..نبيك اليوم تسأليه كان مازال ليا عندها قيمه ولالا خلي نعرف راسي من رجليا خل نسكر بابها مرة وحده ونرتاح..
خديجه؛تستاهل خير منها الف مرة..
نسرين؛باهي وصدقني مش حتسمع مني ع اللي خاطرك تسمعه..
هز راسه ومشي...
ونسرين التفتت لخديجه وقالت:تفو..
وطلعت وسكرت الباب ومشت..
فتحت خديجه الباب وقالت:ع وجهك ياحقيرة...
وفايزة طنشتها ومشت طلعت من الحوش لقت الجالي يراجي فيها..
مشت هي وياه وقالت:وليت اطول مني..
الجالي بضحكه؛وشن تبيني ديما نقعد صغير..
نسرين؛لا اكبر اكبر ودير سيارة بش تقعد ترفع فينا وتجيب بالك واسع انت مش زي المهدي..
ابتسم وقعد ساكت..
وكمل بيها الطريق لين وصلها لحوش فايزة..
ولف ورجع ع طلعت وحده من الجارات:جالي ياجالي..
مشالها وقف عليها ونزل راسه وقال:نعم ياخالتي..
:تغرف تركب بمبله غاز..
الجالي:ايه..
؛باهي بالله خش ركبهالي..
قال :حاضر..
وخش للحوش وركبلها بمبلة الغاز..
وطلع والمراة وراه تدعيله:ربي يفتحها عليك ويعطيك الصحه..
الجالي:بارك الله فيك خالتي..
ومشي الجالي وهو فرحان بروحه وبالشكرانيه اللي حصلها..
وكل ماله تزيد ثقته بنفسه من المدح اللي يسمع فيها يوميا ومن كل الاطراف..
وصل للمطحن وخشله وقال:جيتك ياقلبي جيتك...الله عليك ريحه..غمض عيونه وقعد يشم فيها وهو مستمتع ع الآخر...
🌻وفي حوش جيرانهم...
كان حسين اللي من عمره مقعمز يعزف ع آلة موسيقيه اسمها
"الآكورديون" اختاروه المدرسه بش يكون من ضمن الفرقة الموسيقيه متاعها..
كان يعزف بيها في دار اميمه وكانت معاها غرفه يسمعوا فيه وهما منسجمات..بعد كمل قال..
حسين بإبتسامه؛حلو..
اميمه:هلبه...
غرفه؛تعطيني نجرب..
حسين بإبتسامه؛تعالي..
جاته...
وهو حوله وقعد يلبس فيها كان اكبر منها وهو شادهولها..
قعدت تحاول تقلد بس كان اللي يطلع معاها نشاز..
واميمه وحسين يضحكوا عليها..
غرفه بضحكه خجوله:مانعرفش زيك..
خداه منها وقال؛مازال قاعده صغيرة..
ناض وقال:هي خلوني بنمشي نقرا..
غرفه:باهي انت قتلي بتساعدني في الواجب...
خبط راسه وقال؛نسيت بكل..
مشي حط الآكورديون في تركينه وقال؛بري جيبي كراستك..
غرفه:باهي..
ومشت تجري جابت شنطتها..
وطلعت كراستها وطرحتها..
وهو قعمز حداها وقال:هيا تعالي حتى انتي اميمه..
اميمه؛لالاساهل نعرفه..
غرفه؛ديري في روحك شاطرة!
حسين:كان بتبدوا تتعاركوا بنطلع..
غرفه:لالا خلاص هيا حل معاي..
وقعد حسين يشرحلها في علميات الجمع ويعلم فيها كيف دير...
الكبير في راسي والصغير في ايديا...وهكذا لين فهمها..
بعدين ناض وقال:خل نمشي اني نقرا توا...
وخدي الآله وطلع..
وغرفه دست كراستها في الشنطه..
اميمه؛تلعبي بمبله يابمبله..
غرفه؛باهي تعالي...
🌻🌻🌻🌻🌻
وفي حوش صبري الخويلدي..
تعالت اصوات الزغاريد بعد مالبست ام احمد فايزة الدبله..
وكانت فايزة فرحانه ومش قادرة درق فرحتها..
وامها طارتلها منها كانت تبيها تبان رزينه بش مايقولوش ماصدقت..
وياريت فايزة كانت تفكر هكي...
وفي عز.الفرحة بفايزة..
خدت نسرين سدرة ع تركينه ونقلتلها كلام المهدي..
سدرة ودموعها ينزلوا:خوك غبي والله غبي من صغري واني نشبح فيه ومانشبحش فيه غيره ولتوا واني عيوني وقلبي معميين عن غيره..خيره غبي هكي...وانت جايه زي الغبيه وتسألي في نفس السؤال..
ع جية فايزة قالت؛خيركم..
نسرين بضحكه؛عارفاته ياروحي والله عارفه بس خوي مغيار هلبه ياسدرة وانتي تعرفيه..
مسحت سدرة دموعها وقالت؛اني هداكا اللصيقه درتله حد اليوم..
ع جية عائشه قالت سدرة ؛وحتى اسألوا عويشه شن درت اني اليوم لهداكا اللصيقه..
عائشه؛والله عطاته ع راسه..
سدرة؛اها بري قولي لخوك الغبيه سدرة ربي بلاها بيك وماتبيشي يرفع هالبلوة بكل..هالبلوة هدا ..
ومشت من حداهم وهي معصبه..
والبنات يضحكوا عليها...
~~~~~~~~
"كان اني بلوة هي مصيبه"
نسرين بضحكه؛كلكم زي بعضكم..
فنص فيها..
ضحكت وقالت؛نبصر..المهم توا سادكم هبال وانت خفف شويه غيره بالله عليك خوي وتحكم في اعصابك بش ماتخسرهاش..سدرة صح تحبك لكن كان كترت عليها نقولهالك تمسحك من حياتها وكأنك ماكنت ..
المهدي؛باهي وانتي ماصدقتي فتحتلك خديتي راحتك انزلي ارقدي..
نسرين يضحكه؛قبلها نبي نشوف طاهر قوله يجي مرة تانيه..
المهدي؛نرفعك للجامعه وين مايقرا تشوفيه..
نسرين بفرحه؛ياريت .
ابتسم ع جنب وقال:خلاص وتي روحك غدوة ان شاءالله رافعك..
نسرين؛خلاص نكنسل المعهد غدوة ع خاطره...تصبح ع خير ونزلت تجري..
وهو تنهد بإبتسامه بعدين قال؛صار اني بلوة يامصيبة المصايب..
وركب وهو يضحك..
🍀🍀🍀🍀🍀
ومشت نسرين لطاهر في كلية الهندسه وهو فرح بجيتها ع الاخر..
وفات محاضراته ع خاطرها وقعدوا يهدرزوا عن كل شي..
نسرين مابطلتش هدرزة وهو يسمع فيها ومايبيش يقاطعها كان فرحان بيها فرحان اللي عنده اخته مرحه دخل ع قلبه السرور زيها...
طاهر:لاستي في بنيه عاجبتني بس مازال صغيرة شويه تقرا ثانيه ثانوي..
نسرين؛قنينه؟
طاهر؛هلبه..
ضحكت وقالت؛ شوقتني نشوفها..
طاهر بإبتسامه:يجي يوم وتشوفيها ان شاء الله..
نسرين؛باهي شن اسمها..
طاهر؛نجاة..
نسرين ابتسمت وقالت..نجاة....
~~~~~~
فايزة:احمد بتقعد دايرلي زي الحارس قصدك؟
احمد؛اكيد ياعيوني مالاشنو راك خطيبتي..
فايزة ضحكت بعدين قالت:باهي لكن كان خوتك يندروا عليك تجيني هني يديروا مشكله..
احمد بإبتسامه؛نجيك من بعيد لبعيد..
فايزة بضحكه؛خلاص برا بعيد..
ضحك وقال:ااخ منك انتي..
ومشي بعد عنها وقعمز تحت شجره..
وهي فتحت مذكرتها زعيمتها تقرا ويقعدوا هما الزوز يسرقوا لبعض في النظر...
🌻🌻🌻🌻🌻
مروحه من الكليه ومعاها صاحبتها شافت سيارة خضرة مدرسه قالت..
سدرة؛خل نمشي ناخد رباطي معدنوس بش نديروا طعميه خاطري فيها..
عائشه بضحكه؛شن داير عمك معاكم..
سدرة:نساير مرة ونسكته مرات..قداش يوجعوا فيا عيلته ياناري كان تشوفي وجوههم توا كيف انطلق فيها الدم..
عائشه؛ والله كل العيوب تتقبليها فالراجل الا البخل الراجل البخيل بخيل في كل شي حتى مشاعره..
سدرة؛صدقتي..
وصلوا في سيارة الخضرة وقالت:نبي معندوس بدينار خوي..
الراجل خدالها مجموعه رباطي وحطهم في كيسه..
وكيف جت بتمد الدينار..
المهدي:تفضل خوي.. وخدي منه الكيسه..
هي قعدت تشبحله بصدمه وعائشه متباعده عنهم..
شبحت للراجل وتنحنت بعدين مشت وهي منحرجه وعائشه لحقتها..
والمهدي قعد ماشي وراهم..
لين وصلوا حوش عمها..
عائشه مشت طول بدون ماتسلم ع سدرة..
وهو وقف وقال:خودي..
هي خدت منه الكيسه وقالت:معاش تحرجني هكي قدام الناس..
المهدي:طز فيهم اني بعد يروح بوك بناخدك وتم الكلام ومافي حد عنده معاي حاجه..وتوا انتي بنت جيرانا ومافي حد عنده معاي حاجه...
هي يدوب ابتسمت..
المهدي :بعدين بنجيبلكم بضاعة الجمعيه بوك وصانا عليها..
سدرة هزت راسها وخشت وسكرت الباب..
هو ابتسم ع جنب ومشي للمطحن..وجوه مافيش احلى منه...
🍀🍀🍀🍀🍀
وتمر ايام وتبعها ايام...
لين تولي شهور وتلحقها شهور..
وتجيب فردوس...بنوته زي العسل..
دارولها احلى اسبوع في حوش بوها وكله تكفلت بيه مغليه..
اللي الناس قعدت تشكر فيها وفي افعالها وكل مالها تزيد تكبر فيهم...
وتكبر في قلوب عيت الواعر اكثر واكثر...
سدرة؛سمتها أريج يام ...اريج..
"اياه تو بتكبر هي وخالتها معناها"
سدرة:قصدك انتي حامل ببنيه..
"ايه بنيه..وبوك من توا اختار اسمها"
اضايقت سدرة بس مابتش تبين لأمها وقالت:شن بيسميها..
"طوبى"
سدرة:طوبى لمن وجد في صحيفته استغفارا كثيرا..كان ديما يقول فيه الحديث هدا لما يخش علينا ويلقانا ساكتين..
"وحني نبدوا نستغفروا..."
فجأة بكت ورده..
سدرة:خيرك يام!
"تمنيت نكون مع فردوس او جيبة ليها وامها مش معاه"
سدرة:ياما بتجيب بعدين يام وديريلها احلى سوابيع..
"ان شاء الله...خدمة بوك هني ماشيه ماشاء الله"
سدرة؛وحتى حني يام في رمضان ربحنا ربح الله يبارك شكلها طوبى هدا خيرها جي معاها من قبل ماتجيبيها..
"ان شاء الله ماتجيب معاها كان كل خير"
سدرة:ووك عليا يما خشت خاطري من توا كيف بنصبر ع شوفتها بعد عام زياده...
"يفوتوا زي الريح ع قولتك"
سدرة:يارب....
🍀🍀🍀🍀🍀🍀🍀🍀🍀🍀🍀🍀🍀🍀🍀🍀
ومازال الزمان يعدي بأيامه وشهوره.. وسنينه...
عدت سنه 96...ولحقتها 97...اللي جت طوبى في عز صيفها...في شهر ثمانيه..
انولدت غادي ومافي حد حضر ولادتها الا عرب بنغازي صحاب لطفي ودارولها احلى سبوع...
وخدت عليها مرت جبريل اللي كانت تعاني فيها مع وردة لين طقت سنه ومعاها....
وهني ..حان وقت العودة لطرابلس...
بعد مادار فيها لطفي مايبي ومطحن الجنه ولى مشهور في الشرق وحصل منه مربح كبير..
وخلا شريكه يتولي الفرع اللي غادي واتفقوا يجوا ع بعض ويجوا بش يراجعوا الحسابات مع بعض وياخد لطفي حقه من الربح...
في اواخر سنه 98شهر 11 ....روح لطفي بوردة وطوبى لطرابلس....
🌱🌱🌱🌱🌱🌱🌱
دور وهي تبخر في الحوش..
سدرة:عمتي بالله شوفي طاجين الدجاج في الكوشه..
"طاب طفيت عليه"
حطت البخارة ع تركينه ومشت للمربوعه...
وقفت فيها وقالت؛خلاص معاش تبي شي خالتي..
صفيه بإبتسامه:ايه كله تمام بنتي ..
فجأة سمعوا صوت كلاكس...
سدرة بفرحه ؛جو جو..
وطلعت تجري خدت كبوطها ومحرمتها ولبستهم وطلعت تجري وطلعت وراها غرفه تجري..
ووراهم صفيه ومطيرة بعد لبسوا حجابهم...
مشت سدرة فتحت الباب..
لقت سيارة مصطفي جايه ووراها سيارة بوها..
والجيران..
اللي يتفرج من الروشن واللي يتفرج من فوق السطوح زي..
عواطف؛تقول مروحين من الحج..
نجاح؛عيت الواعر ديما يحبوا يهولوا حاجتهم...
عواطف:حي شوفي خالتي وردة نازله ببنيه صغيرة من السيارة...
🌼هالبنيه الصغيره..
كانت لابسه ابيض في ابيض..
فقطان ابيض..عليه جاكيت ابيض زي الفرو فيع من الخلف جوانح فراشه...
ولابسه ع راسها كارونه بيضا رقيقه...
هدا كلها ماحكاش عن جمالها..
جمال وجهها وعيونها...لطافة شكلها البراءة اللي تبان زياده عن براءة الاطفال..
اللي ييشوفها يقول بذهول...."الله يبارك "
بس سدرة عيونها دمعوا لما شافوها..
البنيه ذابت في قلبها زي حبة السكر... امها لما شافت الكل كيف منبهر بيها قرصتها من يدها لين حستها وقعدت تبكي..
جتها سدرة تجري وهي تقول:لالا لا..عطيهالي يام..
وردة بإبتسامه؛غير سلمي قبل..
سدرة؛حي عليا والله انذهبت شيرتي..
وضمت امها واختها في مرة وطوبى مازال تبكي..
مصطفى؛خشوا داخل ياجماعه صقع ع الصغار..
لطفي:ايه عندك حق .
وخشوا كلهم داخل وقعدوا يسلموا ع بعض...
قدام حوش الجيران..
عمر؛زي البمبله البنيه..
الجالي:صح احلى من خواتها كلهم..
🌻🌻🌻🌻🌻
في وسط حوش لطفي
وردة وهي حاضنه غرفه؛استاحشتك هلبه هلبه غريفتي كبرتي..
غرفه؛خشيت صف ثالث...
وردة:ياعمري اني..
مطيره:اطلقي طوبى شويه ياسدرة خل نشوفوها..
سدرة بضحكه؛هي مكبشه فيا ماتبيش..
صفيه؛عرفت وخيتها..
فردوس؛شوفي حفيدتك يام..
وردة:ياربي نجيها هاتي هاتي..
وخدت اريج من امها؛اكبر من طوبى بشوي..
فردوس:ايه...نقشها جي ع الاكحل لمتاعيني..
وردة؛لكن زي العسل..عرفتيني اني مني حنينه وردة..
سدرة:طوبى...وطوبى
بعدت طوبى وهي شاده في سدرة وتشبحلها..
سدرة؛ياعمري محلاك..وقعدت تبوس فيها..
طوبى قالت بلغة الاطفال"مما"
وردة؛ايه حقه ديرلها ماتاكل سلم بنتي طول الطريق ع الرضاعه وخلاص..
ناضت بيها سدرة وهي تقول:من عيوني...
ومشت بيها للكوجينه...
وعيون غرفه بغيره معاها...
🌻في الكوجينه..
حطت سدرة طوبى ع الكرسي وقالت؛راك تتحركي..
خل نديرلك بشكوط وحليب..
ع خشة يوسف ومعاه حسين..
يوسف:الله يبارك ..بالله نقيمها شويه..
سدرة بضحكه؛كان خلاتك..
يوسف:هي تعالي هي..وقعدت يأشرلها بايديه..
وهي طول جاته..
يوسف بضحكه؛مااستغربتش بكل..
ورفعها في حضنه..
وسدرة ادق في البشكوطي وتضحك..
حسين قعد يشبحلها ويلاعب فيها وهو يديرلها في حركات بوجهه..
ضحكت .
حسين بضحكه؛ضحكت ضحكت...ربي يحفظها..
يوسف؛طيحتكم كلكم هادي..
سدرة:خلها والله طيح هالعسل..قعمزها وسيفه خل نوكلها..
قعمزها يوسف ع الكرسي..
وبدت سدرة توكل في طوبى...
وحسين يتفرج عليهم..
ع خشة مطيرة؛طول انسجمتي معاها سدرة..
سدرة؛تو بالله مش عسل تخش الخاطر من اول ماتشوفيها..
مطيرة وهي تشبح لطوبى وتضحك:ايه والله..يانجي نجي...
🌻🌻🌻🌻🌻🌻
وجو بعدين الجيران رجالة والنساوين يتحمدوا بالسلامه..
ووردة عمدا رقدت طوبى بس ماتطلعش للناس من خوفها عليها...
وهديكا الليله مشت في الهدرزة عن احوال بعض وشن صار فهالعامين..وشن احوال بنغازي وشن دار لطفي غادي...
وطبعا..
عبدالمطلب كان اهم شي عنده حصته من المربح اللي مارقدش لين خداها....
اما عن سدرة اللي تعبت هالسنتين في خدمة المطحن...
🌻لطفي:عارفك بنتي والله عارفك بمية راجل وكنتي قدها وقدود..
سدرة بإبتسامه:حتى اني رباية لطفي الواعر..
لطفي؛مهبول لوين تجيه بنت يتكدر المفروض يحمد ربه ليل نهار..
سدرة بضحكه؛ربي يطول في عمرك ياغالي...
مسح ع شعرها وقال:خلاص بري ارقدي توا تعبتي..
سدرة؛حاضر..تصبح ع خير...
لطفي؛قدامك كل خير...
ومشت سدرة لدارها وخشت وسكرت الباب..
وبوها تنهد من قلبه بعدين مش لداره..
لقي وردة ضامه طوبى لحضنها وراقدات..
ابتسم وعيونه لمعوا بالدموع...بعدين مشي رقد حداهم وتغطى هو وياهم بغطا واحد...
ورقدوا كلهم هديكا الليله بسلام وراحه وهدوء ...
لكن مع ساعات الفجر الأولى...
فاقوا مفجوعين ع صوت عياط.....
#بمية_راجل
#طوبى
....يتبع...
