#طوبى "أقحوان وفلة وياسمينه"
#جمان_فريد
#الجزء_الثالث_والخمسين"اواخر الشتا6"
《أحداث هذه الرواية تبدأ من سنه 1996 وتنتهي سنة 2022 ومعظمها حقيقيه》
لو فاتتكم صلاة او خش عليكم وقت صلاة صلوا قبل بعدين اقروا...الصلاة قبل كل شي وكل شي يجي بعدها
وصلوا على الحبيب🌼
#تاج_الذكر
لاإله إله إلا الله وحده لاشريك له له الملك وله الحمد بيده الخير وهو على كل شيء قدير🌸
☕☕☕☕☕☕☕☕☕☕☕☕☕☕☕☕☕
"شن حالك توا"
تنهدت وهزت راسها وهي تقول:الحمد لله ع كل حال..
عائشه:معاش تكلمتوا انتي وعمر؟
اميمه:معاش في بينا كلام ياعائشه خلاص..
عائشه:مصرة ع الطلاق..
اميمه هزت راسها وهي ساكته..
عائشه:اميمه مش عمر اللي ضربك..
اميمه قعدت تشبحلها وهي ساكته..
عائشه:علاش غطيتي ع خديجه؟
ابتسمت بتهكم وقالت:ماغطيتش عليها..اني نبي نخلص بأقل الخساير..لو قلت خديجه اللي دارت فيا هكي من بيصدقني!؟
لو مشيت وشكيت فيها شن بيصير فيها؟..مايصير فيها شي يطلعوها منها زي الشعره من العجين..ويتبلوني اني بمصيبه بش ينتقموا مني..العيله هادي وليت نعرفهم كويس ياعائشه بش يحافظوا ع سمعتهم وصورتهم قدام الناس يديروا كل شي..
عائشه هزت راسها وقالت:عندك حق..عندك حق..الناس مايصدقوا فيهم شي صعب تقنعي سكان الشارع اللي جمايل عيت شنيبه مغرقتهم انهم ناس مش زي ماهما يشوفوا فيهم...
اميمه:اني همي مش فيهم هما..اني لو كان عندي راجل مقدرني ومحترمني ومدايرلي شان والله الطلاق هدا مانفكر فيه حتى التفكير..اني همي كله في عمر..عمر هو اللي مايصلحش بيا مش عيلته..
عائشه:المشكله بسببه هو يعني..
اميمه:من هو ياعائشه..اني بنحكيلك وانتي احكمي بروحك..
☘☘☘☘☘
"والله ياعبير ماسمعت الا اليوم من البنات"
:ماهو معاش اتصلتي ولادورتي..
طوبي ابتسمت بضيق وقالت:الفترة اللي فاتت صارت هلبه قصص خلتني لاهيه حتى عن نتيجتي..
:شن في ان شاء الله خير!
طوبى: بيان اريج وفاتحتها....وفي نفس اليوم صارت فاجعه..تعرفوها ام فايزة اللي عندها الزهايمير توفت.
هما بأصوات متقطعه:ياروحي..الله يرحمها...
طوبى بحزن؛الله يرحمها..وبعدها بنت عمي سلفتي..صارتلها مشكله كبيره وكانت حامل ورمت..
:ياااه..لاحول ولاقوة الا بالله..
طوبى:قدر الله وماشاء فعل..واني اليومين فاتوا مامشيتش الكليه اليوم بس مشيت وتلاقيت مع مونيا وقالتلي عبير دارت حادث الاسبوع اللي فات..
:كلمتني وقالت ارفعيني توا مادخليش بيك حتى الموعد اللي درته مع خطيبي استعجلت فيه بش نرفعها..تي امتى بديري السيارة ياحصله!
ضحكت طوبى وقالت؛قريبا خلاص الشهاده بعد غدوة ناخدها..
؛بتحصلي فيا بيبو بتبدي ترفعي وتجيبي لين يولي حالي باهي..
طوبى بإبتسامه:من عيوني..امتى تفكي الجبس؟
:مازال اسبوعين تانيات..والقرايه بنبدا فيها من الاسبوع الجاي..
ع خشة ام صديقة طوبى وفي يدها سفرة الضيافه وبدت تفرق عليهم وهي تقول بإبتسامه:مرحبتين..مرحبتين..
☘☘☘☘☘☘
"صدمني صراحة"
اميمه ودموعها ينزلوا؛عمر ماتغيرش هو نفسه عمر زمان اللي لما كنت صغيره مايفوتش فرصه تخليه يهيني ويهزا عليا وياريتها وقفت عند هني وبس وياما دار..بس اني..قلبي مش عارفه كيف حبيته..رشفت ومسحت انفها وهي تقول..حبيته من غير مانحس وفوتله هلبه وصدقته هلبه وحب ليه خلا عيوني ينعموا ع عيوبه اللي ماتنقبلش..عائشه..الحب بروحه من غير احترام وتقدير وتفهم مايقدرش يخلي حياة زوجيه تستمر..تقدري تعيشي مع راجل يحترمك ويقدرك حتى لو كان مايحبكش او انتي ماتحبيشي لكن ماتقدريش تعيشي مع راجل يهينك ويكسرك حتى لو كان يحبك..
عائشه قعدت تسمع في كلامها وتفكر فيه..خطرت عليها حياتها هي والمهدي..
اميمه وهي تمسح في دموعها:اني نبي نمسح الفترة هادي كلها من حياتي...نبي نخلص وتتفرغ لنفسي وطموحي بس معاش نبي شي تاني خلاص...
ابتسمت عائشه بألم وقالت؛ان شاء الله خير يااميمه ان شاء الله خير..
ابتسمت اميمه من بين دموعها وقالت:يارب..
🍃وطلعت عائشه من عند اميمه..
ولاقتها صفيه اللي كانت تستنى ع نار..
عائشه؛اميمه مش صغيره ياخالتي صفيه..بنتك واعيه وتعرف اللي يصلح بيها..
صفيه بإحباط؛مسكرة راسها ع الطلاق..
تنهدت عائشه وقالت؛ربي يفتح عليها ويوجهها للي فيه الخير..السلام عليكم..
ومشت عائشه طلعت وخلت صفيه تبكي بحسرة ع بنتها..
~~~~~~
عائشه:مصممه ع الطلاق..
سدرة بشي من الضيق:مش عارفه نزعل ولانفرح..فرحانه انها بتفك روحها من عمر اللي مايصلحش بيها..وواجعتني مسكينه قاعده عروسه وصغيره..حسبي الله ونعم الوكيل..
عائشه:قدر الله وماشاء فعل ياسدرة..وان شاء الله خيرتها فيها..
سدرة:يارب..شدت يد عائشه وقالت..ماقعدش لطوبى غادي حد غير عويشه بالله وخيتي ردي بالك عليها وجهيها وعلميها كيف تتصرف وكيف تتعامل معاهم ومع راجلها بالذات بعد اللي صار انت تعرفيهم اكثر مني ياعيشه..مانبيش اختي تنظلم حتى هي طوبى صغيره هلبه ياعيشه..
سدرة قاعده تعصر في قلب عيشه بقوة وتجلد في ضميرها جلد..
لكن شن بدير ماتقدرش تقول اللي عندها صعب هلبه تتكلم بالذات بعد اللي صار لأميمه..
حطت يدها ع يد سدرة وقالت..طمني بالك سدرة طوبى في حمايتنا اني والمهدي..
ابتسمت وهزت راسها..
وعائشه بادلتها الابتسامه..
🍃وطلعت عائشه من عند عيلة الواعر وهي حامله ثقل كبير ع صدرها خانقها..كاتم نفسها..
ارتاحت نفسها شويه وين شافت من ورا الخمار من بعيد بنات فايزة مروحات من المدرسه ووراهم ولدها محمد بمسافه...
ركزت ع مروة بحجابها ولطف ملامح وجهها وبرائتها..بعدين ركزت ع ملامح وجهه ولدها محمد اللي تغيروا لما شاف امه وبدي يبان فيهم الاحراج..
ابتسمت..
والبنات وصلوا فيها وسلموا عليها..
عائشه:كيف حالكم بنات..
مروة وصفاء:الحمد لله...
مروة:كيف حالك انتي خالتي عيشه..
عائشه بإبتسامه:الحمد لله..شن جوكم انتم وشن دايرين في القرايه..
صفاء:اهو قاعدين في بداية السمستر التاني..
عائشه:ربي يوفقكم ويفتح عليكم..
الزوز قالوا:آمين..
عائشه:سلمولي ع امكم.
مروة:يوصل خالتي..
عائشه:السلام عليكم..ومشت بتقص الطريق وولدها محمد واقف قدام مطحن بوه ويشوفلهم..
وصفاء ومروة ردوا عليها السلام..ومروة تشوف لمحمد..
هو يدوب ابتسملها مايبيش امه تلاحظ..
وهي يدوب ردتلها الابتسامه بعدين مشت مع اختها..
فاتت عائشه للحوش طول ومحمد وراها..
سلم ع مدير عمال المطحن وقال:ماقالكش بوي وين ماشي محمود:لسوق الجمعه وماقالش علاش..
هز محمد راسه وكمل طريقه للحوش بس وقف لما سمع واحد ناداه..
"محمد"..
التفتله وقال بإبتسامه:اشرف...
ومشاله...
☘وصفاء ومروة كيف خشوا للحوش..
مشت مروة ركبت وصفاء قبل لتسكر الباب شبحت جيهتهم..
لقت اشرف ولد الصيد يشبحلها..
سكرت الباب وحاولت تغلب ابتسامه كانت تبي تنرسم ع وجهها ولفت طول للدروج وركبت تجري..
🍃محمد صافح اشرف وهو يقول:شن جو..
اشرف:ميه ميه...شن جو القرايه يازعيم ..
محمد:كيف باديين وربك يستر..
اشرف:لاشد حيلك نبوك ديما من الاوائل..
ضحك وقال؛ان شاء الله..
اشرف:وكان تعدي ولد عمتك شويه..
محمد؛ربي يهديه شن بنقول..
اشرف؛محمد خليك معاي صريح وماتخافش محمد يهرب من المدرسه..
محمد؛هو مايقراش معاي في نفس المدرسه لكن يقرا مع يزن والحق يزن قالي مايجيش بكل..
غير اشرف عيونه عن محمد وقعد يمرر فيهم يساره وملامح الغضب بانت فيهم..طبطب ع كتف محمد بعدين قال..منور.
ومشي..
محمد:الوحيد اللي يعرفه طبه..
ولف ومشي بطريقه للحوش..
☘☘☘☘☘
الساعه 5:00بعد العصر..
حط الجالي طوبى في حوش بوها ومشي لضرتها..
وهي مشت من حوش بوها بعد ماسلمت ع العيله لحوش جدها بش تشوف اميمه..
وين وصلت في باب الكوجينه الخارجي..
دقت ع الباب..
طوبى:خالتي صفيه..
شويه شافت حسين خاش للكوجينه وجايها..
شافها كيف واقفه وهي لبسه بالطو احمر هافت..
وشاربه فضيه محشيه فيه..وتحت البالطوا سروال من لون الوشاح..وشنطه صغيره سودا حزامها ع هيئة سلسال لونه فضي..
وفي رجليها بوت احمر شاموا..
كانت شاده في ايديه بوكس حلو وفوقه حافظه صغيره..
بس اللي لفت نظره اكثر شي في ايديها خاتم الزواج اللي خلا صدره يضيق بعد ماانشرح بشوفتها..
وهو مبتسم قال:اهلا اهلا بصغيرة حوش الواعر..
طوبي بضحكه؛اهلا بيك..
حسين؛خيرك واقفه برا خشي..
طوبى خشت وهي تقول:شن اخبارك شن امورك..
وحطت الحاجات ع الرخامه..
حسين:زي ماتشوفي وتعرفي..
التفت شبحتله بأسف وقالت؛هي شن حالها..
حسين؛تحاول تتخطى..
طوبى؛قاعده مصرة ع الطلاق..
حسين:اني مصر اكثر منها..
طوبى:الموضوه يخصها بروحها ماتأثروش عليها..
حسين:لا والله ياطوبى مافي واحد مأثر عليها هي شاده في الطلاق..
تنهدت بضيق وقالت؛هي توا شن دير؟
حسين؛مش عارف من جايها صاحبتها ممكن مقعمزات في الصاله..
طوبى:تمام..
ع خشة صفيه بسفرة الضيافه لما شافت طوبى وجهها انقلب..
طوبى:كيف حالك خالتي..
حطت صفيه السفره وقالت:الحمد لله..
جتها طوبى بتسلم عليها وهي تقول؛شن حالها اميمه..
صافحتها صفيه ووين جت طوبى بتسلم عليها بالخد فاتتها وهي تقول:شن بيكون حالها يعني..خافي عليك حالها..
ومشت للاودندينوا تمصمص الطواسي..
طوبى انحرجت وانصدمت من الحركه..
وحسين ضايق ع الآخر..
حاولت طوبى تبان عاديه وقالت؛ربي يفرج ان شاء الله..
صفيه من فوق نفسها؛ان شاء الله..
والتفتت بتمشي تاخد سفرة تانيه جو عيونها ع بوت طوبى قالت:كيف خاشه بهذا؟! تشبحي فيها زريبه الكوجينه خشتيلها بكندرتك!؟
حسين بصدمه:يام خيرك..!؟
صفيه؛اطلع منها معليشي..
طوبى حاولت تتمالك نفسها بقوة وهي دير في روحها عاديه قالت؛عندها حق سامحيني والله راح عن بالي..
ومشت بسرعه طلعت ورمت من رجليها..
حسين فنص في امه..
امه تجاهلاته وقعدت توتي في سفرة ضيافه تاني..
تنرفز منها هلبه بعدين شاف لطوبى لقاها لبست شبشب وخدت السياقه ونشافه..
غسلتها وصبت عليها مطهر..
عصرتها كويس وطرحتها ع الارض بعدين لفتها ع السياقه وقعدت تنشف وهي تقول:من عندها اميمه؟
صفيه؛صاحبتها بنيه الله يبارك زي العسل غير كان ربي يهدي اللي في بالي بس..
شبحت طوبى لحسين وابتسمت..
وهو اصلا كان هايم فيها لما شبحتلها غير ملامحه فيسع وعقد حواجبه..
طوبى بإبتسامه؛ربي يهديه..
صفيه:ويصرف عنه اللي واقف بينه وبين حياته..
حسين وصلت عنده حدها من امه قال:اني طالع وبنروح ماخر ماتحسبنيش في العشي..
ومشي طلع من حداهم وهو معصب..
اما طوبى اللي فهمت قصد صفيه..تجاهلت كلامها..
ومشت ردت السياقه مكانها ومصمصت النشافه وطلعت نشرتها..
بعدين ولت غسلت ايديها وهي تقول:جبت معاي لويزة لأميمه اني دايرتها في الحوش.
صفيه بتهكم؛مابالها غير في لويزة هي..!
ضايقت طوبى هلبه ومابتش ترد عليها..
مسحت ايديها وطلعت من الكوجينه..
صفيه بكره؛جايتها بش تقهرها في عمرها..
🍃وطوبى اللي كانت مضايقه من معامله صفيه..
لما وصلت الصاله خشت عليهم وهي تقول..
طوبى:السلام عليكم..
اميمه بإبتسامه؛بيبو..وناضتلها..
طوبى وهي جايتها:لاوالله تقعمزي اميمه حلفت..
قعمزت اميمه وهي تضحك..
وطوبى جتها سلمت عليها وضمتها..
وحسناء تشوفلهم بإبتسامه..
طوبى:حمد لله ع سلامتك ياقلبي وربي يعوضك خير..
اميمه بإبتسامه:الله يسلمك حبيبتي..
بعدت عنها طوبى وقالت؛صحتك كويسه توا؟
اميمه:الحمد لله رب العالمين..
طوبى بإبتسامه:الحمد لله..شبحت لحسناء
لقتها بنيه جميله للغايه ووجهها لطيف هلبه..
خشت خاطرها وتمنتها لحسين اكثر من صفيه نفسها..
مشتلها وهي تقول:اهلا..
ناضت حسناء وقالت؛اهلا بيك..
وسلموا ع بعض بالخد..بعدين مشت طوبى قعمزت جنب اميمه..
اميمه:صديقتي الوحيده في مجال الخدمه حسناء..حسناء بنت عمي ووخيتي طوبى..
حسناء بإبتسامه؛فرصه سعيده..
طوبى وهي مبتسمه:اني أسعد...
🌼وقعدوا يهدرزوا في مواضيع مختلفه..
وصفيه شاركتهم بعد ماجابت سفرة الضيافه التانيه وحطت فيها من لويزة طوبى..
اميمه:الله لويزة درتها انتي بيبو..
طوبى بضحكه؛وحشيتها مربى فرواله..
اميمه؛ياعمري..وقعدت تاكل منها..امم..تجنن..
طوبى:صحتين..
حسناء:قنينه..تسلم ايديك..
طوبى بإبتسامه؛سلمك..
صفيه؛فيها حاجه ناقصه..
طوبى بإستغراب:شن هي!؟
صفيه:مش عارفه بش ماعجبتنيش مش زي ماديري فيها قبل..
شبحت حسناء لطوبى حستها انحرجت..
اميمه:بالعكس زي قبل واحلى يخي..
صفيه؛انتي تحبي تجاملي هلبه واني قلت الصراحه..
استغربت اميمه في اسلوب امها..
اما طوبى قالت؛ممكن يابسه شويه صح..
حسناء قالت بضحكه:حني مانعرفوا نديروا شي ياكبدي..
اميمه:اسكتي ساكته..
صفيه؛حتى انتم تقروا طب مش اي شي وقتكم كله مش في القرايه..
حسناء:ايه والله انحرمنا من ستين حاجه في جرتها..
طوبى؛واهو حصدتوا نتيجة تعبكم..
اميمه:مازال بكري هلبه ع الحصاد..
حسناء:ربي يعينا..
صفيه؛ربي يفتح عليكم بنياتي..
وطوبى مركزة مع حسناء وهي مبتسمه..
🍃وكملوا هدرزتهم اللي كانت حلوة..
برغم الكليمات اللي قعدت تعزق فيهم صفيه مرة مرة لطوبى..
وروحت طوبى قبل المغرب من غير ماتحصل فرصه مع اميمه وتحكي معاها..
☘☘☘☘☘
بعد المغرب..
في الكوجينه..
نجاح مقعمزة تهدرز ع عواطف اللي تعول ع العشي..
🍃نجاح:تقولك ع خلطه عسل اسود ع زعفران ع مش عارفه شني وكل حاجه بهداكا الحساب وتقولك في الاخير خوديه من عندنا الفازو الواحد حقه 70دينار..وبعد مانكمله وندير الحجامه مش عارفه شن ناخد تاني نديره حتى هو..
اهوا كلها في السبعه وراقي هادو...
عواطف:الحجامه بقداش؟
نجاح:هما اربعه جلسات 40في الاربعه..
عواطف:160..هادم في الشهر قداش يطلعلهم..
نجاح؛ايوه هدا اللي نبيه نوصله تجارة ودوتهم فاضيه حصلتها تعبه ع فاضي لين ناض عليا مكان العمليه..
عواطف:قتلك راجي لين تشدي حيلك اني..
نجاح؛لااضرب الحديد وهو حامي ياعواطف مدامني متشجعه خل نبدا..
عواطف:مع مني بتبدي مادام المراكز كلهم طلعوا دايريتها بيزنز؟
نجاح:كلمت وحده تفهم في الامور هادي ع الفيس قالتلي الموضوع ساهل ومش محتاج تعب.
قالتلي خودي شيشة سبعة ايتارا"لتر"..عبيها ميه..
وخوي ورق سدرة اخضر مش يايبس..
7بالزبط..
واسحنيهم برشاده بعدين حطيهم في الميه واقري..
الفاتحه 7مرات..وانفثي في الميه تلاته مرات..
آية الكرسي 3مرات..وانفثي في الميه تلاته مرات..
خواتيم سورة البقرة تلاته مرات.. وانفثي في الميه تلاته مرات..
سورة الجن مرة وحده.. وانفثي في الميه تلاته مرات
سورة الاخلاص والمعوذتين 3مرات.. وانفثي في الميه تلاته مرات..
بعدين سكري الشيشه خضيها كويس..واشربي منها هي وبش واغتسلي منها مرة في الصبح ومرة في الليل..
عواطف؛فهالصقع الميه تصقع..
نجاح:اللي بتاخديه تغتسلي بيه صبي عليه ميه سخونه عاديه مش مشكله واغتسلي..
عواطف؛بس؟
نجاح؛لامش هدا بس..الصبح بكري نشرب الميه هادي ع الخوا مع كاشيك عسل طبيعي...ومرة وحده في اليوم ناخد سبعه من حبات البركه ونمضغهم ونقعد مسكرة فمي فترة بسيطه بش الابخره اللي تطلع منها تقعد في الجسم وين يشمها العارض مايتحملهاش تزيد تعبه..
عواطف:وشن تاني؟
نجاح:ريتي السور اللي قريتهم ع الميه...نفسهم نقراهم مرة وحده في اليوم واني حاطه يدي ع مكان الرحم..وقالتلي هالبرنامج هدا بش يعطيك نتيجه خليك متمسكه بالأذكار وسورة البقرة..وخليك ع قد ماتقدري بعيده كل البعد عن المعاصي...
عواطف؛باهي وكم المده متاعه..
نجاح:قالتلي مافيش مده محدده..لكن عطتني علامات تبين ان انفك..
الراحه النفسيه..السكينه وانعدام العصبيه..
تحسي روحك مقبله ع الحياة ومنطلقه اكثر مع الناس..
تحسي وكأن في ثقل كبير وهم وانزاح ووليتي خفيفه زي الريشه..
اي حاجه متعرقله في حياتك تمشي وامورك تتيسر..
ولو عندك نصيب حيجيك وتتسهل امورك معاه..
عواطف بضحكه:الاخيره اهم حاجه ولا؟
نجاح:نكذب عليك كان قتلك مش مهمه بس مش اهم حاجه اني عطيني نعيش براحه مسكينه نعيش في سلام داخلي راضيه بكل شي ربي عطيهولي هادم اهم حاجات عندي..
عواطف:كلنا نبوها الراحه...
فجأة..
سمعوا باب الحوش انخبط بقوة..
عواطف:اللطف!..
ومشت وقفت فم باب الكوجينه شافت اشرف فايت للدار ويبان معصب..
عواطف:اشبح مع مني داير دعكه..
نجاح؛شاغله وضع محمد ولد خوك..
التفتت عواطف:شاغليني هو واخته البنت بدت تنفلت يانجاح..
نجاح:حرام عليك مش لهالدرجه.!
عواطف هزت راسها وقالت:تو يبانلك بعدين اني مانبالغش..
~~~~~~~~~
خديجه بإستياء:ضاربه كف مخلي وجهه دم يامحي وقدام ولاد الشارع معقوله هكي!؟
محي:تو انتي ديما تقوليلي.حرش فيه اشرف يتفاهم معاه وتوا مش عاجبك؟
خديجه؛يتفاهم معاه مش يضربه الولد معاش صغير بش يهينه قدام صحابه!..
تنهد محي وقال:خلاص تو نكلمه معاش يضربه مرة تانيه..وولدك هدا اني نتفاهم معاه..
خديجه؛لا مش توا يامحي طايرتله. خليه لين يهدا..
شبحلها محي بإمتعاض وقعد ساكت...
☘☘☘☘☘
واختها..
في حوشها..
خشت لدار النوم خلسه مستغله وجود راجلها في الحمام..
خدت تليفونه وكتبت الرمز..
انفتح..خشت طول ع تسجيل المكالمات..
لقت اخر مكالمه من رقم مجهول..
حطت السماعات وقعدت تسمع فيها..
وزي ماتوقعت كانت لوحده من بائعات الهوى متواعد راجلها هو وياها.. كانت تدعي ان مكان اللقاء يكون حوشهم...
وفعلا كان الحوش..فرحت قريب طارت..
وعرفت انها يوم الخميس االلي قالتله انها فيه بتمشي تبات في حوش ماليها...
طلعت منه طول وحولت السماعات ورداته لمكانه ومشت طلعت من الدار..
وهو بعد لحظات طلع من الدوش وهو يغني.
ياميمه جنب الخيمه دعس خيول معلمه..
☘☘☘☘☘
ونسيبه..
مقعمز في شقة المستأجر منه..
يشرب معاه في طاسة شاهي اخضر تارقي ويهدرز عليه..
المهدي :دوامه ياتارقي دوامه..كلهم يسحبوا فيا..ماليا..ضميري..قلبي...مش عارف من نرضي فيهم كان رضيت حد فيهم يتعبني زعل تاني..معاش عرفت كيف ندير ولاكيف نتصرف..
عبد القيوم:فاهمك..فاهم اللي تحس بيه..لكن بنقولك ان في حاجه وحده من بينهم كان رضيتها تكمل عمرك مرتاح..
المهدي:ضميري..
عبد القيوم؛مادام عندك ضمير حيقعد يوجعك لين تموت رضيت غيره وخليته هو مش حيريحك..وكان رضيته حترتاح بالمرة ومايهمكش من يزعل ومن يرضى بعدين..
المهدي:ياريت الفعل ساهل زي الكلام..
عبد القيوم؛صح مش ساهل ويبي منك مجاهده بس فكرة انك حتقعد مرتاح من داخل طول عمرك تسهل عليك واجد..
تنهد المهدي بضيق وقعد ساكت..
عبد القيوم؛نقولك حاجه..
المهدي قعد يشبحله وهو يراجي فيه يقول..
عبد القيوم:ساد انك ماتصبيش مع الظالم لو ماقدرتش تنصر الحق..
ابتسم المهدي ع جنب اعجابا باللي قاله..
ابتسم عبد القيوم وقال:اشرب شاهيك صقع..
شرب المهدي الشاهي دفعه وحده بعدبن قال:شن صار فيك حقه؟
تنهد وهو مبتسم وقال:تأكدت انها مش مجوزة..
المهدي؛مليح بكل...
عبد القيوم؛عرفت حتى حوشها وين وقررت نعدي نخطبها دغري بلا مايصير بينا كلام قبل يصير شي رسمي..
المهدي:احسن مادير..
عبد القيوم؛المهم فكرت نعدي بروحي بس بعدين حسيتها بايخه..قلت نعدي ومعاي ناس ليها قيمتها يحكوا عني ومعاي..
المهدي:راي كويس..
عبد القيوم؛نبيكم تمشوا معاي انت وعمي لطفي الواعر..
المهدي وهو متفاجئ:اني؟
عبد القيوم؛راني حاسبك خوي الكبير يامهدي وانت قلت قبل كان لقيتها نبيك انت تخطبها ليا..
ابتسم المهدي وقال:والله شن بنقولك..نتشرف ياتارقي وكبر مقدارك..
عبد القيوم بإبتسامه:تسلم ياغالي...
☘☘☘☘☘
الساعه 11:00 ليلا..
في دار نوم المهدي وعائشه..
هو مقعمز ع السرير وهي واقفه تحددله في حوايجه..
عائشه؛منين هي؟
المهدي:مش عارف..
عائشه:مش عارفه بس مانحس فيهم يعطوه..
المهدي:علاش؟
عائشه؛ع خاطر تارقي..
المهدي:تارقي ولاعربي المهم راجل محترم خدام ع راسه ويخاف ربي..
عائشه:ناس ماتفكرش هكي يامهدي..يقولوا بعاد علينا في العادات والتقاليد ومش عرب..وفي منهم مشكك انهم ليبين..
المهدي؛شن المنطق هدا!؟ راهو هادوا زيهم زي جباليه مافيش فرق..مش عرب صح لكن ليبين..
عائشه وقفت كوي وقالت؛كان جي تارقي طلب سدرة في بعدين تعطيه..
المهدي:كان راجل زي عبد القيوم ياخدها بحوايجها اللي عليها...
عائشه:فاجئتني تصدق!؟
المهدي:وعلاش فاجئتك..هدا اني من الاول ماعنديش في العنصريه والتكبر ع خلق ربي.وبعدين الراجل ليبي مسلم واخلاقه كويسه كان نرده لسبب متخلف زي هدا ربي يحاسبني..
ابتسمت عائشه ورجعت لشغلها..
تنهد المهدي وقال:ربي يسهله ويعطيه مايتمنى..قوليلي مافيش امل من بنت عبد المطلب..
حركت راسها بالنفي..
المهدي بضيق؛لاحول ولاقوة الا بالله..
☘☘☘☘☘☘
تاني اليوم..
في فيلا الجالي وطوبى..
الزوز يوتوا في ارواحهم بإستعجال لان فاقوا متأخر..
واقفين المرايه..
الجالي:العطر حبيبي..
حطت طوبى الشاربه ع راسها بعدين مدتله العطر..
خداه وقعد يبخ منه..
طوبى:يهبل يهبل..
ضحك الجالي بعدين حطه ع الزيانه وباس راسها ومش بياخد الشنطه..
هي ساوت الشاربه ومشت خدت بالطو كبوط لونه كريمه فيه فيه زي الفرو لبساته وسكراته وربطت حزامه..
وخدت شنطتها ودوسيه..تطلع خدت عطر الجالي حطاته في الشنطه وهي تضحك ومشت طلعت من الدار..
☘☘☘☘
وبنت عمها..
نزلت من سيارتها اللي درستها في بركيدجو المستشفى..
وسكرتها ومشت وهي بكامل اناقتها وبقوة بإتجاه مبنى المستشفى..
متحديه كل شي حتى وضعها الصحي..
مابتش تستسلم لحالى الضعف اللي كانت فيها..
استجمعت نفسها وقوتها ورجعت تحارب من جديد..
في المستشفى..
في القسم اللي تخدم فيه..
حسناء:مانعرفش السبب الدكتور..
قصي وهو يفكر:اني عارفه..اميمه غلطت في حق نفسها لما تزوجت واحد مايناسبهاش..
حسناء قعدت تشبحله وهي متعجبه..
وشويه وملامح وجهه تبدلت للإستبشار التفتت بتشوف من جاي..
لقت اميمه جايه ناحيتهم..
اندهشت..
ولاكأنه صاير فيها شيء..
انيقه..قويه..مبتسمه..تسلم ع اللي يصادفها..
لعند ماوصلت فيهم وقالت:السلام عليكم..
الزوز ردوا السلام..
وقصي قال:حمد لله ع سلامتك دكتورة..
ابتسمت بأسف واحراج وقالت؛الله يسلمك دكتور..
قصي بإبتسامه:مدهشة انتي بجديات..
شبحتله حسناء..
واميمه هزت راسها وهي مبتسمه مجامله..
قصي وهو مبتسم:خليك ديما بروح التحدي هادي ردي بالك تسمحي لحد يحبط عزيمتك ردي بالك..
اميمه وهي تساير فيه:ان شاء الله..
شويه جت دكتورة تانيه لما شافتها سلمت عليها بحراره..
ولحقوها طبيبات تانيات وممرضات وهي تسلم عليهم وتهدرز وتجامل وقصي يتأمل فيها وهو فرحان لانه قرب يوصل لهدفه..
☘☘☘☘☘
الساعه 2:00بعد الظهر..
بعد حفلة افتتاح معمل التحاليل لصاحبه مختار..
خدي صابرين وعزمها لنفس المطعم بش يحتفلوا مرة تانيه برواحهم..
صابرين بحماس:ماتخيلتش الحفله تكون كبيره هكي..
مختار:شن متوقعه اني ندير حفل افتتاح اي كلام لمعمل كبير زي هدا!؟
صابرين بآبتسامه؛لاطبعا مش أي كلام..بس برضو ماتوقعتاش فخم هكي..
مختار:معاي اني ديما ارفعي سقف توقعاتك..
وطلع من جيت الجاكيت عليه خاتم وحطها قدامها..
صابرين وهي متفاجئه؛شن هدا؟
مختار:افتحيها وشوفي..
خدتها وفتحتها..
انبهرت بخاتم الالماس اللي بريقه وجع عيونها..
مختار:الماس حقيقي..
صابرين وهي مذهوله:مش كأنه هلبه هكي..!؟
مختار:كيف هلبه؟
صابرين:سلمتني اداره المعمل وقلنا شغل..بس هدا لشنو؟.
ابتسم ع جنب وقال؛اعجاب..
قلبها بدت دقاته تتسارع ووجهها احمر..
مختار:عاجبتيني وهلبه ونبي نحظى بقلبك..
صابرين لسانها انعقد ومشاعرها تحركت بقوة..
مختار:راك نقولي قلبي مش عندي وقعد عند زوج الأول..
صابرين في نفسها"اععع":طبعا لا لو كنت نبيه ماكنتش طلبت الطلاق..
مختار:يعني عندي معاك فرصه..
ابتسمت وهزت راسها بإيجاب..وهو قعد يتامل فيها ينظرات غرضها خبيث...
~~~~~~~~
نجاة؛شدي فيه بإيديك وسنونك واعرفي كيف تتصرفي صابرين خليه يجيك يزحف زحف وهو يترجاك تتزوجيه..
صابريه وهي تشوف للخاتم اللي في يدها بإبتسامه؛من غير ماتوصي ياروحي..
☘☘☘☘
وهو في حوشه..
حاط قدام صورها يشوف فيهم ع اللاب توب.
ويتكلم بالتليفون..
مختار:غدوة عازمه يتغدا عندي تو نفتح معاه الموضوع..
"لازم تقنعه يخش في الموضوع ويكلم جماعته يسهلوا علينا بعض الأمور وقوله اللي تبيه حني فيه"
مختار:اكيد اكيد..مش حيطلع من عندي غدوة الا وحني متفقين ع كل شي..
"عابيين عليك يامختار لو صار من الموضوع حنكسبوا من وراها مليارات"
مختار:حط في بطنك بطيخه صيفي ع قولة المصاروة في النهايه هو نسيبي ومش حيردني..
.
#اواخر_الشتا
#طوبى
...يتبع...
اوووه! هذه الصورة لا تتبع إرشادات المحتوى الخاصة بنا. لمتابعة النشر، يرجى إزالتها أو تحميل صورة أخرى.
