(مش مسامحه أي وحده تقرا وماتتفاعلش)
#طوبى "أقحوان وفلة وياسمينه"
#جمان_فريد
#الجزء_السابع_والأربعين"زهرة الذهب"
لو فاتتكم صلاة او خش عليكم وقت صلاة صلوا قبل بعدين اقروا...الصلاة قبل كل شي وكل شي يجي بعدها
وصلوا على الحبيب🌼
#تاج_الذكر
لاإله إله إلا الله وحده لاشريك له له الملك وله الحمد بيده الخير وهو على كل شيء قدير🌸
🚫🚫ملاحظه🚫🚫
اي تعليق عنصري حيتم حظر صاحبه
اي تعليق فيه سخريه ع ثقافه الطوارق حيتم حظر صاحبه
واني هني نكتب في الحوارات باللغه الامازيغيه التارقيه لأعزائي التوارق مش لغيرهم احتراما ليهم وحبا لثقافتهم
نتمنى تكونوا قريتوا هالملاحظه كويس..وشكرا ع تعاونكم مسبق🌸
☕☕☕☕☕☕☕☕☕☕☕☕☕☕☕☕☕
تخبط في خدودها بيدها وهي تفيق فيها..
مطيرة بخوف شديد:سدرة سدرة!
ولطفي واقف يشوف لبنته بصدمه ومش قادر يتحرك ولايتكلم..
فز قلبه لما شافها فتحت عيونها..فاقت..
لكن لما فاقت بعدت يدها ع فمها..
لطفي بذعر:بترجع يامطيره..
مطيرة ناضت تجري بدون ماتتكلم..
وسدره حاطه يدها ع فمها بقوة..
وبوها يشوفلها ودموعه في عيونه وقلبه المفزوع يتقطع عليها..
جت تجري مطيرة بالكروانه حطتها قدامها..
سدرة حولت يدها وبدت ترجع..
واللي ترجع فيه كان ينزل من فمها بقوة..
وكان في القيء متاعها لون احمر..
لكن مايبانش دم..
لطفي وهويشوفلها كيف ترجع:شن واكله ياسدره يابنتي..
وسدرة مش لاقيه فرصه للكلام..
كانت ترجع وخلاص..والقيء متاعها كان بقوة وكأنها بطلع احشائها...
صوت الدوشه اللي صارت في حوشهم..
سمعوها حوش الجد علي الواعر..
فاقوا كلهم..
حسين..صفيه..عبد المطلب..والحاج علي..
صفيه وهي طالعه تجري بإتجاه الباب الفاصل:قتلك عياط عمتك مش غابيه في صوتها..
حسين بقلق:يالطيف!
وصلوا في الباب فتحاته صفيه وخشت لحوش سلفها وواها ولدها..
وبعدهم عبد المطلب وعلي..
علي بقلق:خوك الاسبوع اللي فات كله حاله كل لتالي غير يدير في روحه باهي قدامنا..
عبد المطلب:يستر الله..
☘سدرة لما وقفت ترجيع رجعت طاحت مرة تانيه بس من غير ماتفقد الوعي.
كانت حاسه ان جسمها فاشل بالمرة مش قادره تقيمه..
ورجع شعور الموت جاها مرة تانيه..
حطت يدها ع صدرها بعد طاحت وهي تقول بصوت عالي:لاإله إلاالله..
ومطيرة ولطفي حاوليها شادينها..
بوها يقرا عليها وعمتها تمسح ع وجهها بالميه وهي ترعش..
ع خشة امها صفيه وخوها..
وين شافوا حالتها انصدموا وخافوا..
وصفيه قالت...
"بنتي!"
سدرة بصوت عالي اكثر قالت..
"لاإله إلاالله"
☘☘☘☘☘
"خيرك يامهدي شن تحس"
مهدي وهو حاط يده ع قلبه ويمشي في شقته وكأنه كان هارب من شعور الخوف اللي يبي يسيطر عليه..
محمد بذعر:بوي كلمني بالله عليك اشبحلي بوي..
والمهدي يهرب منهم وهو يقول بصوت عالي..
"لاإله إلا الله"
🍃🍃🍃🍃
صفيه وهي حاضنه سدرة وتبكي:خيرك بابنتي خيرك شن جاك..اللطف يارب اللطف..
مطيرة ببكي؛رقدت مافيها حتى حاجه ولاتشكي من حاجه ولاثقلت ع العشي..قسما بالله ماكان فيها سو..
سدرة ودموعها ينزلوا:لاإله إلا الله..
حست بالكتمه القويه..تباعدت عن صفيه وهي تقول بصوت عالي..
"لاإله إلا الله"
🍃عائشه وهي تبكي:واحد منكم ينزل يكلم نضال تحركوا..
طلعوا يجروا من حداها محمد ويزن..
والمهدي واقف ع الحيط وحاط جبهته عليه ويده ع صدره وهو يقول :لاإله الا الله..
بأنفاس متسارعه..وقلب انزاد عم همه..
"ياالله"
شدها حسين وهو يقول بخوف:سدرة سدرة اشبحيلي سدرة اشبحيلي..
لطفي كان مقعمز ع الطاوله بتعب كل شي فيه فشل من صدمته وخوفه يفقد احب بناته ع قلبه زي مافقد امها .
قعد يشوفلها كيف سكتت بعد تكلم حسين .
ورجعت طاحت من طولها بس حسين شدها وهو يقول:ضغطها هبط..ميه وسكر وملح فيسع...فيسع..
مطيره وهي ماشيه تجري للكوجينه؛باهي باهي..
رفع حسين اختها وحطها ع المندار وهو يقول:تعالي يام قيمي رجليها..
جتها صفيه رفعت رجليها فوق..
وحسين قعد يمسح ع وجهها ويقول؛سدرة..
وهي تشوفله وتسمع فيه ومش قادره تتكلم..
علي وهو واقف فم الصاله وشاد عكوزه قال وملامح وجهه باين فيها الوجع؛خيرها شن واكله!؟ مدوشه وطالعه للريح!!؟
لطفي وهو مقعمز وحاط ايديه ع ركابه وملامح الفجعه مازال ع وجهه:مش عارف يابوي مش عارف..
وعبد المطلب واقف يسمعلهم ويشوف في حالة بنت خوه..
ع جية اخته مطيره تجري بطاسة الميه والملح والسكر..
وقفت حدا حسين وقالت:ترا حول خل نشربها..
حسين شبحلها وخدي منها الطاسه وقال:سدرة ساعدي روحك..
ونزلت صفيه رجليها..وهو قعد يشرب فيها..
بوها ناض وقف وقدملها..شافها تشرب من الطاسه وقلبه يرعش عليها من الخوف..
☘زي قلب المهدي اللي ماباش يهدا..
نزله نضال من الشقه ومعاه محمد لوطا بش يرفعوه..
وين وصل لوطا..
لقي امه واقفه تبكي لما شافاته قالت:خيرك يامهدي خيرك شن ترالك ياولدي..
والمهدي مش قادر يرد عليها..
طلعوه نضال ومحمد برا الحوش للسياره..
وعائشه هي وسدرة ويزن نزلوا وراهم وقعدوا في الجنون..
سدره كانت حاطه يدها ع فمها وتبكي..
شافتها حناها جتها خدتها وقالت وهي ترشف؛خلاص بنتي خلاص..بابا مافيه شي..
ومشت خشت بيها داخل ومابتش تعبر عائشه..
عائشه وقتها مش هامها شي غير ان المهدي يولي حاله باهي..
مشت قعمزت ع الطاوله ويزن جاها وهو يقول:امي صقع هني..
عائشه وهي تبكي:سلم ولدي خليني بالله عليك..
شبحلها بأسف وقعمز معاها وقلبه مشغول ع بوه..
☘"سدرة"
حطت يدها ع جبهتها وقعدت تفرك فيها وتقول:نعم..
مطيره:بنتي خيرك شن صارلك فجأة رقدتي مافيك شي..
سدرة وهي ترد بصوت مبحوح:مش عارفه..نضت واني حاسه قلبي بيوقف..نحساب روحي نموت...
حسين:مسيبه الدوا؟
هي تفاجئت..
وهما بين المصدوم والمستغرب...
دوا شني اللي يحكي عنه حسين..!؟
لطفي:دوا شني !؟.
سدرة قعدت تشبح لحسين بضيق..
وحسين بنفس نظرتها شبح لعمه وقال؛سدرة عنده مشكله في الغده الدرقيه وقاعده تعالج عليها..
لطفي بصدمه؛كيف!!؟
سدرة بصوت مبحوح:حاجه عاديه يابوي..
لطفي بإنفعال:حاجه عاديه عينك..اهمال المرض هدا يدير كوارث..معقوله هكي معقوله بنتي تمرض واني اخر من يعلم!
حسين:مافي حد يعرف ياعمي اميمه اكتشفت بالصدفه وقالتلي وحلفتني مانقول لحد..
سدرة:حلفاتك صار!
لطفي:والله ماعارف شن نقولك يابنتي والله ماني عارف..ربي يهديك ويسامحك ياسدره..
علي:بالشويه ع بنت يالطفي هي دست بش ماتكدر حد معاها..غابي فيها بنتك يالطفي..
دموع سدرة نزلوا..
لطفي وهو متألم؛باهي شن رايك في اللي صار يابوي..نحساب بنتي بتموت قدام عيني!
سدرة بنبرة بكاء فيها بحه؛سامحني بالله عليك يابوي..
مطيره وهي دمع:الله يسامحك ياسدرة الله يسامحك..
ومشت خدت الكروانه وطلعت بيها من الصاله..
صفيه:غلط ياسدرة اللي درتيه اكبر غلط المرض مايدرقش يابنتي..
وسدرة تبكي بصمت ومش قادره ترد..
حسين:جاوبي ع سؤالي..وقفتي دواك..
نزلت عيونها وهزت راسها بإيجاب..
خبط بوها ايديه في بعض بأسف وغضب وهويقول؛إنا لله وإنا إليه راجعون..
ومشي طلع من الصاله...
لحقخ عبد المطلب..
وعلي الواعر خشلها وقال:غدوة اني نمشي معاك بش تعايني غصب عنك..
سدرة وهي تبكي هزت راسها بإيجاب..
مسح حسين ع شعرها وقال؛واني نرفعكم..
هي قعدت ساكته وتبكي بصمت وصفيه تشوفلها بحزن..
☘"خلاص ولوا بيا"
محمد شنيبه؛مش ع كيفك يشوفك دكتور قبل بعدين تروح..
المهدي:نحس في روحي..
محمد ولده؛بالله يابوي خل يشوفوك بش نطمنوا عليك ارجوك..
المهدي بإنزعاج؛بيمزرطوني توا ع تحاليل ع اجهزة ع نهار احرف..
نضال؛معليشي المهم في النهايه انت تطمن وحني نطمنوا..
🍃ورفعوه لأقرب مصحه هي اللي يخدم فيها الدكتور إياد اللي كان مناوب ليلتها..
شافهم وهما جايين بالمهدي ساعدهم وجابلهم دكتور جراحة قلب مناوب معاه..
دار الفحوصات والتحاليل اللازمه للمهدي..
وبناءا عليها قال..
الدكتور:شخص انفعالي انت؟
محمد المهدي:هلبه يادكتور..
المهدي شبح لولده بنظرات امتعاض..
ومحمد عارفه يشوفله قعد مركز بنظره ع الدكتور..
الدكتور:تمام..نبي نشرحلك حاجه مهمه..الاعصاب اللي تخدم في الجسم بروحها..واللي تخدم فالقلب بروحها..
يعني القلب مايخضعش لسيطرة الجهاز العصبي عنده اعصاب خاصه بيه هو تخليه يخدم ذاتيا..هدا علاش لما يجوا يخدروا مريض بيديروله عمليه..القلب مايوقفش..
انت ياسيد مهدي عندك مشكله في اعصاب القلب هادي..
خاف محمد..
والمهدي ابتسم ع جنب تهكما..
الدكتور:المشكله هادي خطيره ياسيد مهدي لو استمريت ع حالك هدا..تنفعل بسرعه ع الصغيره والكبيره..يعني ممكن القدام يولي قلبك يخدم بالجهاز .
محمد بخوف:بتاريه يادكتور؟
الدكتور:ايه...خوك هو؟
محمد؛لا بوي..
الدكتور؛كويس...نبي نوصيك ع بوك لأنه واضح مش مدور وضاربها في الحيط..
المهدي:العمر واحد يادكتور ومافيش حد يموت قبل آجله..
الدكتور:أكيد..بس اللي يرمي روحه للتهلكه يولي في حكم المنتحر..
المهدي غير عيونه عنه وشبح لمحمد وقعد يخبط بصوابعه ع طاوله مكتب الدكتور..
ومحمد يشوفله بنظرات خوف وملامه...
☘☘☘☘☘
وفي الطريق..
جده مابطلش ملامه..
محمد شنيبه؛فكر في عيالك في صغارك..في امك..حرام عليك والله حرام..
المهدي يسمع في بوه وهو يشوف للروشن بضجر..
وولده يشبحله..
وجده متابع يقول:اسمع فوتها الخدمه الفترة هادي وامشي سافر..غير جوك...ريح روحك...
المهدي هز راسه مسايرة وهو يقول:حاضر حاضر..
بوه التفتله وقاله؛تمشي فيا ولا؟
المهدي شبحله وابتسم بملل وقال:خلاص ياحاج بتتعب حتى انت راهو..
نضال:لاكله ولا الكابو الكبير..مانسووا حاجه من غيره..
شبحله بوه وقال:هات من الاخير شن تبي..
ضحكوا محمد والمهدي..
نضال بضحكة صدمه:لاحول ولاقوة الابالله..مظلوم اني فهالعيله هادي مظلوم ياربي انصفني..
بوه بإنزعاج:باهي خلاص خلاص ركز في الطريق تو ترزينا في عمرنا..
نضال:حاضر ياحاج حاضر...
وسكتوا للحظات..
بعدين نضال قعد يغني:بويا يابويا يابويا..
بوه بغضب:هي توا بتسكت ولانزلك من السيارة وهي تمشي..
نضال بضحكه:ترا وريني كيف بديرها ترا كيف!؟
المهدي وهو يضحك:تحشم ع وجهك وسوق وانت ساكت..
نضال سكت وهو يضحك..
ومحمد شنيبه قعد يحرك في راسه يمين ويسار..
اما الحفيد فكان يشوف لبوه كيف يضحك وجوه تغير..
مد يده وحطها ع يد بوه...شدها..
المهدي شبحله وشد يده بقوة وغمض عيونه وفتحهم يطمن فيه..
محمد ردله نفس الحركه وهو مبتسم..
☘وبعد طول مسافه وصلوا للحوش..
شاف المهدي لحوش الواعر بقلق....
ادرق عنه لما خش خوه بالسيارة للحوش..
المهدي ومحمد ولده شافوا عائشه ومعاها يزن مقعمزين برا..
لما شافوهم خاشين ناضوا وهما ملهوفين..
اما المهدي ومحمد نزلوا من السيارة ومشولهم وهما مستغربين..
المهدي:من امتى انتم هني؟
عائشه بلهفه وخوف:عاينت؟شن قالولك.؟
محمد؛عاين واموره تمام مافيه شي..جاوبيه ع سؤاله..
يزن؛من لما طلعتوا..
محمد شنيبه:كيف! قاعدين في الصقع من لما طلعنا!؟
يزن؛مافي حد قال لأمي خشي ياجدي..
عائشه بحده؛يزن سكر فمك...
المهدي وهو معصب:اركبوا اركبوا...اركبوا..
ومشي طول لدروج شقته..
عائشه بضيق:تصبحوا ع الخير..ومشت لحقاته..
ويزن وراها..
محمد مرر نظره ع عمه وجده بعدين قال بضيق:تصبحوا ع خير..
ومشي لحقهم..
نضال:جو النساوين هدا يركب جميع الامراض..تصبح ع خير بوي..
ومشي طول خش داخل..
محمد شنيبه حط ايديه ورا ظهره وقعد واقف في مكانه وهو يحاول يهدي من غضبه شويه..
بعدين لف ومشي خش داخل..
لقي مغليه مقعمزة في الصاله ومرقده سدرة ع رجلها ومغطيتها..
هي لما شافاته بلهفه قالت؛شن صار في المهدي!؟.
قدملها وقف قدامها وقال بصوت منخفض غاضب؛ولده قلبه مش حمل مشاكل وحرق دم..استمري في اللي ديري فيه غير ردبالك بعدين كان صارت فيه حاجه تندبي عليه..
رماها بنظرة حاره بعدين مشي طلع من حداها..
وهي خوفها هلبه كلامه لين دموعها نزلت...
☘☘☘☘
وعدت هديكا الليله..
وسدرة خايفه ترقد وتنوض وتعيش نفس الحاله..
قعدت فايقه لين آذن الفجر..
ناضت صلاته..
بعدين ولت لفراشها مرة تانيه وغلبها النوم ورقدت..
بعد ساعتين..
نوضتها عمتها بس تمشي تعاين..
ناضت وهي مضايقه هلبه..وتتفكر في اللي صار الليله اللي فاتت بالذات نظرات بوها وخوفه عليها وغضبه منها..
جهزت نفسها وطلعت برا..
لقت حسين بسيارته ومعاه بوها وجدها يراجو فيها..
مشت ركبت حدا جدها من الخلف..
سدرة:صباح الخير..
ردوا عليها حسين وجدها بس..
تنهدت بضيق وقعدت ساكته..
حسين:شن حالك اليوم..
سدرة:الحمد لله كأن ماصار شي..
علي:تونعرفوا من الدكاترة..
هي غيرت عيونه عنه ونزلت بضيق..
وحسين طول تحرك بالسيارة..
وهو ماشي..فات من قدام الحوش متاع المهدي..
اللي طلع منه عبد القيوم بش يمشي للخدمه..
قعد يمشي ع رجليه...
واللي يفوت من حداه يصبح عليه هو يرد..
لين وصل في المكانيكي..
عبد القيوم:صباح الخير..
ردوا عليه صحابها ومعاهم بلال:صباح النور..
ابتسم وكمل طريقه..
سمع صوت خطوات جري صغيره .
التفت..
شاف بنيات لابسات الزي المدرسي بشناطيهم..
فاتوا من حداه وهو يشوفلهم بإبتسامه..
وصل لبدايه الشارع..ع خشة التونسي وفي يده شكارة فيها مشتلت..
فات من حداه وماسلموش ع بعض..
الزوز مايعرفوش بعض...
التونسي كان مسافر لتونس المده اللي فاتت وروح من يوم واحد مالحقوش يتعارفوا..
وقف عبد القيوم تاكسي..
ركبها..وتوجهت بيه لمكان عمله...
☘☘☘☘
"ااه يانا ياني"
بضحكه ردت عليها صاحبتها تقول:هادي عواقب العراس وقت القرايه..
اريج؛والله لولا انه عرس خالاتي ماكنت عفسته..تراكم عليا المنهج تركيمه كلبه...لا وكله كوم...والشيتات اللي دايرهم الاستاذ المبجل راس المكنسه هدا كوم تاني..مانبيش نحلف لكن اني حاساته دايرهم بلعاني فيا..
صاحبتها بضحكه:والله قلتها لما قعد ياخد ويعرم في هالشيتات وهو في الاصل قليل النادر مايدير شيت..
اريج وهي مصغرة عيونها بغيظ قالت:هالصعلوك المشفشف..
:جي جي...جاينا راهو..!
اريج وهي عاطيه بالظهر:خل يجي بش يتلقى وعده..
وهو كان ماشي ناحيتهم وع وجهه ابتسامه متعجرفه..
وصل فيهم وقال:السلام عليكم..
شبحتله برفعة حاجب وردت:وعليكم السلام..وصاحبتها ردت معاها..
نضال بإبتسامه؛شنجو اماني..
اماني وهي شادة ضحكتها وتشوف لأريج كيف منغاظه ردت تقول:تمام استاذ..
نضال:دوم ان شاء الله..وتوا ياريت من فضلك يعني تخليني مع صاحبتك شويه .
ضحكت وقالت:حاضر..تلقيني حدا الكافتيريا..
ومشت وخلتهم..
نضال شبح لأريج وقال:كيوت صاحبتك..ماعندها حد؟..وغمز بعينه..
اريج وهي تحاول تبان بارده قالت تهكما:مش سادك الاسطول اللي عندك ع قداش بتفرق روحك ريح شويه!؟؟
نضال ضحك ضحكه خفيفه وقال :خديتي الشيتات..
وراته الشيتات وهي تقول:متاع عامين قدام..حسبي الله وخلاص..
نضال:قعمزي لقرايتك وفوتي المواضيع التانيه تو تكمليهم ..
اريج ضيقت عيونها وقالت:مواضيع تانيه!؟
نضال:ايه الخدمه متاعك...خودي اجازة وقعمزي اقري..
اريج؛وانت هادي اللي تخدم عليها لزتي من الخدمه..
نضال؛وانت عاد ماتقدريش ع فراقها..
اريج بحده:غيرنا قاعدين في الكليه بس..
نضال بجرأة:اسمعي جاي..مايغركش الطول والعرض والعيون الملونه وقولة دكتور..الرجال مواقف..
اريج:اللي يسمعك يقول في بيني وبينه حاجه..هدا دكتور نخدم معاه وهو معاي عادي جدا الراجل عمره ماتمادى معاي لا بالنظر ولابالكلام..مش الكل زيك ع فكرة .
نضال: بنعديلك طولة لسانك..وبنقولك عطيني سبوع بس سبوع واحد نجيبلك فيه قراره من جده السابع..
اريج بتعجب:شوفوا اللي كاذب كذبه ومصدقها...يااخي قتلك نخدم معاه مش اكثر من هكي..افهم ياراس القومبالي..
نضال؛باهي فوتيه معاش تخدمي معاه..
اريج؛في احلامك..
نضال:تمام..تمام.....ديري اللي يريحك باهي واني ندير اللي يريحني..
اريج؛برا ديره من شادك..
هز راسه وهو يمرر في نظره ع المكان بعد شبحلها وهو عاقد حواجبه بإبتسامه وقال؛ع العموم امانتك عندي في الحفظ والصون..
اريج:لاامانه لادياولي..خليها عندك الأبد..
رفع حواجبه وقال؛اخر كلام خلاص..
اريج برفعة حاجب؛ومافيش غيره..
ضحك نص ضحكه بعدين قال:خلاص منك خديتها الكلمه..قلبك حيقعد عندي للأبد..سلام يافستق..
ومشي من قدامها وخلاها واقفه في مكانها مصدومه..
الوجه اكتسي باللون الاحمر في مرة..
والقلب قعدت دقاته تتسابق..
شبحتله وهو ماشي..ع وجهها بدت ملامح ابتسامه ع قد ماحاولت تمنعها من الظهور ما قدرتش..
ضمت شيتاتها وبدت تمشي والابتسامه نفسها مازالت ع وجهها..
وصلت في مكان الكافتيريا صاحبتها شافتها نادتله..
"روجه"
هي عقدت حواجبها ومشت وقفت قدامها وقالت؛كيف تخليني معاه بروحي ياجحيشه!
ضحكت وقالت:ع اساس جاية طايرتلك انتي..نشبح فيك من غادي الابتسامه مشركه وجهك..
اريج وهي تعجب عليها:نشبح فيك من غادي نننننن.
ومشت خشت الكافتيريا وخلتها..
وصاحبتها مشت وراها وهي تضحك..
☘☘☘☘☘
"صباح الخير بوي"
المهدي وهو مقعمز ع الطاوله في الكوجينه يفطر قال:صباح الخير..علاش غايب؟
يزن:خفت تصيرلك حاجه مرة تانيه وعمي وجدي ومحمد مهناش..قلت نقعد اني نعرف نتصرف راهو..
ابتسمت عائشه وهي تشوفله..
المهدي:اخر مرة ديرها وتغيب من غير سبب فاهم؟
يزن ابتسم وقال؛حاضر..
سدرة؛بابا حتى بنغيب بش نقعد معاك..
المهدي مسح ع شعرها وقال:تغيبي نوريك..
سدرة بضيق:باهي ماما تمشي للمدرسه وانت تقعد بروحك..
يزن:اني معاه ياذكيه..
سدرة:نولوا زوز احسن شن رايك؟
عائشه:تقرري انتي وياه بروحكم!؟ولانسأل ماما ولابابا!؟
سدرة شبحت لأمها وهي تضحك وقالت؛اسفه ماما شن رايك؟
عائشه:طبعا لا..
ضايقت سدرة وشبحت لبوها..
المهدي وهو يشوف لربع التفاحه اللي بيحطها في فمه:كلام امك يمشي..وكلي ربع التفاحه في مرة..
مدت سدرة شفايفها القدام وهي معصبه..
يزن بضحكه؛الساعه 12..
ضحكت امه..
والمهدي شافلها بطرف عينه..
ركز في ملامح العصبيه ع وجهه..تشبه لملامح محفورة في ذاكرة قلبه حفر...
اصلا هي شبيهة لسميتها في هلبه حاجات...
ابتسم ابتسامه خفيفه وقال؛بعدين نمشي نروح بيك باهي..
بدت ع وجهه ملامح الفرح وشبحتله بحماس وهي تقول:حقه؟!
المهدي؛بالمرة نسأل عليك ونشوف شن يقولوا ابلاتك عليك.
سدرة بضحكه:ايه تعالى بش تولي فرحان هلبه.
ضحكت عائشه وقالت:واثقه من روحها هلبه بنتك؟
سدرة؛حتى اني سدرة المنتهى المهدي شنيبه..
يزن؛اوووو..
وبوها ضمها وهو يقول:بناكلك اني بناكلك..وقعد يعض فيها وهي تضحك..
وامها تشوفلهم بإبتسامة حب وفي عيونها لمعة دموع...
☘وقدام حوش الواعر
درست سيارة حسين وكان يقول..
حسين:فيتامين دال تو ناخده من صيدلية العافيه اللي فالشارع اللي وراها..
علي:ردبالك تنساه..
فتحت سدرة الباب ونزلت وهي تقول؛صحيت حسونه..
حسين:هبله راك اختي!
سدرة بإبتسامه:سلم وخيي..
ابتسم حسين وقال؛لاباس عليك..
سدرة:لايوريك باس..
وسكرت الباب ومشت لباب الحوش..وقفت والتفتت للسيارة شافت لبوها..ملامح وجهها مازال فيها غضب..ماباش يخلي لسانه يخاطب لسانها نهائي..
مشت السيارة..
درت قدام حوش الجد..
نزل منها وخش للحوش..بعدين السيارة تحركت...
تنهدت سدرة بعدين فتحت الباب وخشت داخل..
لقاتها عمتها وهي تكنس فم الحوش الدخلاني..
سدرة:السلام عليكم.
مطيرة:وعليكم السلام..شن قالولك..
سدرة؛لقوا فيتامين دال طايح..وتحاليل الغدة زي الزفت..
مطيرة بتهكم:ماشاء الله عليك عيني ماضرك!
سدرة:سلمك..
ضربتها عمتها بالمكنسه ع رجليها وقالت؛معفنه..
ضحكت ضحكه خفيفه وهي تقول:آااي...ايه قوليلي مااتصل حد؟
مطيره:مالك ومالهم فكري في روحك لاعاد دوري حد لاسبت كلهم عايشين حياتهم حتى انتي فكري في روحك وعيشي حياتك سادك..
سدرة فنصت وهي تقول:حيي غرفه اليوم تطلع؟
تنهدت عمتها بيأس وقالت:مروحه ليها ساعه راجي ساعه تانيه ونمشوا وتوا بري افطري..
سدرة:ماعنديش نيه بنمشي نرقد..
مطيرة بصرامه؛سدرة بري افطري..
شبحت لعمتها شويه بعدين قالت:حاضر..
ولفت ومشت للدار..
مطيره:نلقاك راقده نوضك بكف..وانتي تعرفيني كويس..
جاها صوت سدرة عالي وهي تقول..
"حاضر والله حاضر"
هزت مطيرة راسها وهي تقول:تمشي بالعين حمرا بس..
وطلعت كملت كنس برا..
☘☘☘☘☘
في احد مصارف العاصمة طرابلس..
كان ربيع موجود داخل مع واحد من الاداريين فيه صديق مقرب ليه..
:وهادوا فلوسك ياغالي..
ربيع خدي الظرف الملفوف وقال:بارك الله فيك ياخال..نردوهالك في الفرح..
:نخدموك بعيونا ياربييع ياما خدمتنا..
ربيع بإبتسامه:مش بجميلي حبيبي.
:وحتى اني مش بجميل..واي حاجه تانيه تبيها
تعالى طول مايحشمك شي..
ربيع مد يده وقال؛نوارة ياصاحبي..
صافحه صديقه وقال:تسلم..خلينا نشوفوك..
ربيع:ان شاء الله..السلام عليكم..
صديقه رد يقول:وعليكم السلام..
طلقوا ايدين بعض وكل واحد فيهم مشي في طريق.
وهو طالع..
فات من جنب طوابير طويله رجاله ونساوين من عامة الشعب اللي لاعندهم معارف ولاصحاب يراجو امتى يجي دور كل واحد فيهم بش ياخد هالكم دينار اللي ينزلوا كل ستة شهور ومرات في العام مرة...
وصل برا..قام تليفونه بيدير اتصال..
وهو يدور في الرقم..سمع صوت وحده تتكلم وهي تتوسل ونبرة صوتها باكيه..
شبح يمينه لمصدر الصوت..
انصدم..
نسرين بتوسل:مش عيبه في حقك مرتك تقعد واقفه في الطابور وتتبهدل وهي بوضعها هدا وانت قدرك طلع فلوسها بتليفون واحد..
"والله هادي نتيجه افعالك وكلامك اللي طلعي فيه من فمك وانتي مش حاسبه حسابه..مش عايشة معاي بالسيف ومنقرفه من ومن كل اللي يجي مني..خلاص تحملي مسؤولية نفسك بروحك"
نسرين ودموعها ينزلوا:والله لولا الخوف من كلام الناس والله ماقعدت معاك دقيقه زياده..
سكر في وجهها..
نسرين وهي تبكي بغضب قال:حقير نذل..الله ينزعك ويفكني منك..
نزلت التليفون ومسحت دموعها بكل بالطوها..بعدين التفتت شافت للطابور وقالت:نوقف زيي زيهم خير من ذله الواطي هدا..
وقعدت تمشي لطابور النساء ووقفت في اخره..
وعيون ربيع عليها..وهو حاس بدمه قاعد يفور وسط عروقه..
غير عيونه عنها ومشي بعصبيه خش للمصرف مرة تانيه..
ونسرين واقفه في اخر الطابور ودموعها ينزلوا ورا وهي تمسح فيهم..
☘راجلها لما عرف انها حامل دار مشكله كبيره ماكانش يبي صغار زياده ع اللي عنده..وقالها بصراحه...معاش نبي منك صغار..وهي لما سمعت هالكلام ماخلت ماقالت اللي في قلبها كله طلعاته والكلام اهان حامد هلبه وخلاه يسكر عليها كل شي..لاعاد يعطيها فلوس ولايصرف عليها قرش حتى العيل قاللها تتحمل كل مصاريفه..وزياده ع هكي خدي منها السيارة..
وهدا كله ماخلاش نسرين تسيب الحوش او تطلب الطلاق..خوفا من عواقب الطلاق..
يعني وكأن حياتها قبل الطلاق احسن من عواقب الطلاق!
وهالمشكله اللي صارت..خلت عزوزتها تزيد في شحن الصغار ع امهم..
البنات بالذات بدوا ينفروا منها..اما الولد ع مزاجه مرة باهي ومرة مايدورش فيها بكل..☘
وهي واقفه كانت تسمع في كلام النساوين كل وحده فيهم تشكي من المعيشه الصعبة وتحكي ع ظروفها القاسيه..
وفي داخلها تقول..
"مافي حد مرتاح"
تنهدت بضيق وهي تسمع فيهم..
فجأة..
"مدام نسرين شنيبه"
شبحت يسارها شافت موظفه تشوفلها بإبتسامه وتقول:انتي نسرين شنيبه...؟
نسرين هزت راسها وقالت:ايه..
الموظفه:تعالي معاي..
مشت الموظفه ونسرين لحقتها وهي مستغربه وفكرت بينها وبين نفسها..
زعمه راجلها حن عليها!؟
خشت داخل للموظفه لين وصلوا في مكان لاقاها فيه الموظف الاداري اللي ساعد ربيع في سحب فلوسه..
:مدام نسرين شنيبه اهلا وسهلا..حضرتك جايه قداش جاية تسحبي..
نسرين في بالها"باهي اللي تحركت رجولته شويه و تحشم وجهه شويه" مدت للموظف الشيك وهي تقول:المبلغ هدا..
خداه منها وقال:تفضلي استريحي..
هزت راسها ومشت قعمزت ع كرسي..
:ربع ساعه ونكون عندك..
ومشي هو والموظفه...
قعدت لفترة من الوقت تستنى..
بعدين جاها الموظف وفيده ظرف لونه بيج غامق..
وقال:تفضلي مدام..
🍃وعيون ربيع من بعيد تشوف فيها كيف ابتسمت مجامله لصديقه وشكراته وخدت الفلوس حطتهم في شنطتها بعدين مشت بتطلع..
قدم خطوه وقعد يشوف وهي ماشيه لين درقت من قدام عيونه..
جاه صاحبه وقال؛شن في؟!
شبحله ربيع وهو يقول:شني!؟
غمز بعينه وقال؛مني؟!؟
ربيع بدت ع وجهه ملامح الامتعاض وهو يقول:جارتنا بس بس..والمراة متزوجه بلاش تفكير مسوس..
ضحك وقاله:باهي ياسيدي..خدمناها لعيونك..
طبطب ع كتفه وقال:منور حبيبي منور..
ومشي بسرعه..
☘طلع برا..
لقاها راكبه تاكسي..وطول تحركت بيها..
هو بدت ع وجهه ملامح الاسف بعدين مشي لسيارته..
ركب..وشغلها وتحرك طول...
☘☘☘☘☘
الساعه12:55قبل الظهر..
طلعوا مطيرة وسدرة من الحوش..متوجهين لحوش عبد الرؤوف وغرفه..
والمهدي كان واقف قدام المطحن وهو لابس اسود في اسود..
وموخر البالطو من جهة اليسار للخلف بيده اللي حاطها في جيبه..
لما شاف سدره طالعه..هدا وين تنفس براحه..
تأكد انها بخير ومافيها شي وان اللي صار فيه امس نتيجة تعب عضوي لااكثر....
هي لما طلعت شبحتله..
قعدوا عيونها في عيونه للحظات بعدين غيرتهم عنه وشبحتو القدام وهي تهدرز مع عمتها..
وعيونه معاها لين وصلت في حوش اختها..
رنوا الجرس وقعدوا يراجو..بعدين انفتح الباب وخشوا..
خدي نفس عميق بعدين قال في نفسه.."الحمد لله"
☘وولده الكبير..
كان مروح ورا بنات جيرانهم..
صفاء ومروة...
وعيونه ع مروة اللي كانت معصباته منها لانها مازال ماتبيش تتحجب..
فات من جنبهم واحد تحرش بمروة لفظيا وقال..
"ااه من عويناتها وشعرها"..
وهما الزوز سرعوا مشيتهم..
قدم محمد وهو معصب قال:خير حبيبنا شن في!؟
:شن حرك شعيرك بابا!؟.
محمد؛خواتي ياتافه..
هو قال:قول هكي من الاول..وقولها بإحترام باهي..
محمد:الاحترام للي يستاهله..
قدمله شده من ياقة قميصه وقال:ابلع لسانك خير مانقصه..
محمد بإستفزاز:لا..واها..ومد لسانه برا..
ضربه الولد ع وجهه بوكس..
محمد رده طول وقعدوا يضاربوا..
وصفاء ومروة قعدوا يجروا وهما خايفات خشوا للشارع..
مروة وهي تجري وخايفه:ياربي مايديرله حاجه..
صفاء بخوف:الولد اكبر من محمد مش حيقدر عليه..
الزوز وقفوا لما شافوا المهدي..
مروة؛عمو مهدي..
التفت المهدي وشبحلهم بإستغراب..
وهما مشوله يجروا..
#زهرة_الذهب
#طوبى
.....يتبع......
Oops! This image does not follow our content guidelines. To continue publishing, please remove it or upload a different image.
