#طوبى "أقحوان وفلة وياسمينه"
#جمان_فريد
#الجزء_الثالث_والخمسين"اواخر الشتا5"
《أحداث هذه الرواية تبدأ من سنه 1996 وتنتهي سنة 2022 ومعظمها حقيقيه》
لو فاتتكم صلاة او خش عليكم وقت صلاة صلوا قبل بعدين اقروا...الصلاة قبل كل شي وكل شي يجي بعدها
وصلوا على الحبيب🌼
#تاج_الذكر
لاإله إله إلا الله وحده لاشريك له له الملك وله الحمد بيده الخير وهو على كل شيء قدير🌸
☕☕☕☕☕☕☕☕☕☕☕☕☕☕☕☕☕
تأفف بقلة صبر وقال؛بنخشلها واللي يصير يصير..
المهدي:عمر..
فتح الباب شده المهدي بقوة..
شبحله عمره وقال بإنفعال:بنمشي نشوف مرتي يامهدي مرتي..
المهدي بهدوء:معليش ..معليش خليك توا ولما يصبح الصبح نخليك تخشلها غصب عنهم..
شبح القدام وين مافي سيارة لطفي بنظرات ألم وعجز..
بعدين سكر الباب بقوة..
رن تليفون المهدي..
طلعه من جيب كبوطه..شاف المتصل رد طول..
المهدي:ايوه بوي..
"روح انت وخوك توا"
المهدي بإستغراب:علاش!؟
"قلتوا روحوا توا يامهدي"..
وسكر عليه..
نزل المهدي التليفون وهو مستغرب..
عمر:شن في!؟
المهدي رد تليفونه لمكانه وشغل السيارة وهو يقول:بوك يبينا..
عمر؛شن يبي فيا!؟؟اني خليني هني مش فاضيله..
تحرك المهدي بالسيارة وهو يقول؛عمر اسكت..
خبط عمر باب السيارة بغضب..
والمهدي مراعي الوضع اللي هو فيه ومخليه يعبر عن غضبه بالطريقه اللي تريحه..
فاتوا من جنب سيارة لطفي..
لما شافوهم قال الحاج علي:مشي روح وخلاها..تفي..
ويوسف ولطفي بدت ع وجوههم ملامح الضيق..
🍃واميمه في حجرتها كانت تمثل انها راقده وامها وعمتها معاها في الحجره..
هاربه من الكلام مع أي حد..ماكانتش تبي تتكلم في أي شي قبل لتفكر كويس...
☘وبنت عمها..
طول عليها الليل وهي سهرانه تفكر في كل شي صار وقاعد يصير..
وقلبها تعبا خوف والقلق من اللي جاي..
ماعاودتش اتصال بالجالي..
خمنت انه ممكن يكون راقد عند صاحبه وراحت عليه نومه..
بس قعدت السؤال اللي يدور في عقلها ومش لاقيتله اجابه..
مه اللي فتح عليها الخط لما اتصلت بيه اخر مرة!؟
فجأة انفتح ضي الكوجينه..
"طوبى"
التفتت وشبحتلها وهي مبتسمه بالغصب..
سدرة؛خيرك فايقه لتوا؟
طوبى؛ماقدرتش نرقد..
قعمزت جنبها وقالت:حصلتي الجالي..
انجبرت تكذب وقالت؛شده صاحبه يبات عنده..
سدرة؛مايعرف شي؟
طوبى وهي تحاول تخفي ارتباكها:مش عارفه هو ماقال شي واني مابيتش نخبره..
قعدت تشبحلها شويه بعدين قالت:طوبى..مرتاحه مع الجالي؟
ابتسمت وقالت:الحمدلله..
سدرة؛يعامل فيك كويس؟
طوبى:احسن معامله ماريتش منه شي وجعني ..
سدرة:متأكده؟
طوبى؛الجالي مش زي عمر ياسدرة..
سدرة؛باهي والعيله معاملتهم ليك شن شكلها قولي الحق..
طوبى:الحق ماغلط فيا حد ولاريت من حدتصرف ضايقني..بس وجعتني معاملتهم لأميمه حكيتلك قبل.
تنهدت وقالت؛هما ناقمين عليها الحق ماكنتش نبيها تخش فيهم ولاكنت نبيلها عمر البنادم هدا من صغره مش طايقاته مش ليها بكل...
طوبى بضيق:بس صراحة سدرة مانبيهاش تطلق..
سدرة:ولا اني..لكن الحياة بعد اللي صار بينهم ولت مستحيله..
طوبى:لامش مستحيله ياسدرة..هو اساس المشكله من مني؟ ..من العيله.. لو يطلعوا برا ويستقلوا يتغير كل شي..
سدرة:اني نقولك عمر نفسه ماينفعش..
طوبى:عنده عيوب بس مش لدرجة ماينفعش عمر يحبها هلبه وهي تحبه الحب يساعدهم يتخطوا اللي صار ياسدرة..
سدرة وهي تفكر:مش عارفه شن نقولك..
طوبى:الطلاق مش حل..بالعكس حيزيدها على مابيها..الناس كلها تعرف انهم خدوا بعض ع علاقه شن اللي يخليها تطلق بعد شهرين!؟ ماتنسيش الفضيحه اللي داره عمي ياسدره والكلام اللي قالوا قاله في شارع..نبيك تتخيلي القصص اللي بيألفوها الناس بعدين..
سدرة وهي تشوف لطوبى بضيق:صدقتي..الناس ليها الظاهر مهما حاولت تحكي حتى لو صدقوها حيقعدوا شاكين فيها..
طوبى؛حتى لو عيلة عمي محمد قالوا للناس تفارقوا لأن مافيش بينهم نصيب الناس مش حتقتنع..
سدرة قعدت ساكته وهي تفكر في كلام اختها..
طوبى تنهدت وقالت:غير يولي حالها باهي تو نهدرز عليها..
شبحت سدرة لطوبى وهي سرحانه تفكر..
بدت ع وجهه ابتسامه فرح خفيفه..
فرحت بأختها..برجاحة عقلها رغم صغر سنها...
يعني في المستقبل شن ماقابلها من مشاكل حتعرف كيف تواجهها وتقدر تتغلب عليها بروحها..
☘☘☘☘☘
"والله نقلبها ع راسها الليله"
مغليه بخوف:حي عليا!!
ومشت تجري لباب الصاله سكراته ووقفت قدامه..
عمر بغضب شديد:حولي يام..حولي..
محمد؛عمر..
والمهدي واقف وحاط ايديه في نصه وهو في قمة الغضب من خديجه..
مغليه بخوف:عمر سلم واهدى وفكر بعقلك..
عمر ودموعه في عيونه قال بإنفعال:قتلت ولدي يام ولدي..اين عقل تحكي عليه!
جاه بوه وحطت ايديه ع ظهره وقال:عندك حق ياولدي عندك حق اسأل ربي يعوضك خير..
عمر:شن تقول يابوي!..المراة وماليها شادين في الطلاق..
نزل محمد ايديه وقال:لاطلاق لاسو..اني تو نتفاهم معاها ومعاهم..
عمر:مش قبل مانتفاهم مع بنتك هادي اللي دمرت حياتي..
مغليه:تبي تفضح اختك تي راجلها يطلقها!؟
بتهكم قال؛ما يقدرش يطلقها ماتخافيش..
محمد:اسمع ياعمر ياولدي انت اطلع من هدا كله وخلي كل شي عليا اني..اني تو ناخد حق مرتك وتو نرضيها هي وماليها..لكن نبيك ماتجيبش اسم خديجه اختك بكل وين يسألوك ع اللي صار..
عمر قعد يشبحله بألم وغضب في نفس الوقت وهو ساكت..
مغليه:اسمع كلام بوك ولدي تربح..واستر ع وخيتك..
عمر:تبوني نقول للناس اني ضربتها وقتلت ولدي..!
مغليه:انت ماتندريش هي ماقالتلكش ولا؟
سكت شويه بعدين هز راسه بضيق..
محمد:خلاص انت ماعليكش ذنب في شي ياولدي وبعدين هي غلطت كبير لما ماقالتش..حاجه زي هادي مفروض انت اول من يعرفها..
مغليه:بش نقولك ياحاج المراة هي مش مزبوطه وشكلها مبيته النيه تطلق من قبل ماتصير مشكله هدا علاش دست..
عمر شبحلها وهو مصدوم..
محمد:لامش معقوله مش للدرجه هادي يامغليه..!
مغليه:انت ماتعرف شي ياحاج ياما صار بينها وبين عمر ع خاطر حكاية الخدمه لما لقت روحها بتتقيد قالت نطلق خير بش تاخد راحتها تطلع امتى ماتبي وتروح امتى ماتبي..
المهدي يسمع بصمت وماباش يدخل نهائي يبي يشوف عمر شن بيدير وشن بيرد..
محمد وهو متفاجئ:معقوله اميمه يطلع هكي عقلها!؟ ماظنش..طلاق هدا مش حاجه ساهله بش تطلبها ع دوة فاضيه..
مغليه:عندها هي مش دوة فاضيه ياحاج..نقولك ع حاجه مرة روحت في الليل لحوش اماليها من غير ماتخبر باتت غادي وجت تاني يوم بعدالظهر وين عاركتها ومن حقي نعاركها لأنها ماعطتش علم وخلت بالي مشغول عليها..نطت فيا بسبعة لسانات وقالت واخده اذن راجلي مش ملزومه نخبر غيره..ومرة قبل روحت في الليل من الخدمه حتى هي ناقشتها بالهادي ياالله ع وضع خدمتها مايجيش منه مفروض دير حل..ردت عليا من فوق راس خشمها خدمتي ومش مخليتها وعارفين من الاول انكم واخدين دكتورة وكلام يحرق دم..
عمر قعد ساكت وهو يفكر في كلام امه وكله غضب..
محمد تنهد بضيق وقال:لاحول ولاقوة الابالله والله الواحد ماعارف شن يقول..
مغليه:اني نسكت ياحاج ونفوت مانبيش نزيد المشاكل بينها وبينه لكن مامشاش الحال..هالزواج من الاول غلطه ولازم تتصلح..وباهي اللي ماداروش صغار..
عمر كان واصل لأقصى مراحل الألم.
وغضبان هلبه من اميمه..
مشي للباب وهو يقول:حولي يام..
وخرت مغليه عن الباب..
وهو فتحه وطلع..
والمهدي طول مشي لحقه وامه معاه بعيونها..
محمد:تو نحاول جهدي بش مايصيرش طلاق..
تنهدت مغليه وقعدت ساكته..
مابتش تزيد تحرضه بش ماتبانش راغبه طلاقهم بقوة..
سكتت وهي عارفه انهم نهايه المطاف حيطلقوا عاجلا ام آجلا..
🍃لحق المهدي ع خوه وهو طالع برا..
شده من ذراعه ووقفه وهو يقول:عمر..
عمر بإنزعاج:مهدي معاش نبي نسمع شي ارجوك..
المهدي:مش مطول عليك هما كلمتين نبي نقولهم بش نبري ضميري..فاهمك وحاس بيك..بس نبيك ماتاخدش قرار وانت مشوش هكي ولاتاخده تحت الضغط...
قعمز مع روحك..فكر كويس..امشي توا اركب لشقتك واقعد فيها..كان قدرت تصبر من غير مرتك ساعه وحده خود قرار الطلاق طول من غير ماتزيد تفكر..
اما لو صار العكس..نبيك تفكر في طريقه تخليك تصلح اللي صار وتخليه معاش يتكرر في حياتك انت وياها مرة تانيه..
عمر قتلك قبل متفكر لما خطبتها ورداتك ماتخليش الغضب يخليك تاخد قرار تكمل عمرك ندم عليه ياعمر..
كان عمر يسمع لخوه وهو يشبح في الفراغ ويفكر في كلامه..
المهدي:هادي نصحيتي الاخيره ليك وانت توا خلاص معاش صغير عمرك تلاتين عام قرارك تاخده بروحك ماتخليش حد يوجهك..
هز عمر راسه..بعدين مشي فتح باب الحوش وطلع..
غير المهدي عنه والتفت للحوش..
ولى خشله مرة تانيه ومشي للصاله..
لقي بوه وامه مقعمزين ويفكروا بهم..
قال...
امي معاش تحرضي عمر..
شبجتله وقالت:اني!
المهدي:من غير ماتحسي قاعده تحرضي فيه ماتخربيش حوش ولدك ويركبك ذنبه وذنب بنت الناس..
محمد:امك تكلمت هكي لأنها خايفه لو يصير شي احرف القدام..
المهدي:يعني انت مأيد طلاقهم!..
محمد:لاياولدي اعوذ بالله..ان نبيه بعد يتصلح الوضع يطلع من هني..
مغليه بآنغعال:ايوه هدا اللي تبيه هي!
محمد بضيق:ارجوك يامغليه اطلعي منها حتى انتي..انتي وولدك ماليكم علاقه بشي خلوني اني بس نتصرف..
سكتت مغليه وهي معصبه..
والمهدي قال:احسن حل لما يطلع هني المشاكل كلها تنتهي..
هي إن شاء الله تصبحوا ع خير..
ومشي طلع من حداهم..
وبوه رد عليه يقول:إن شاء الله..
ناضت مغليه وهي معصبه طلعت من الصاله..
ومحمد تأفف بتذمر بعدين قال:أستغفر الله العظيم..
🍃🍃🍃🍃🍃
وقعد عمر يفكر في كلام خوه المهدي هلبه..
وتفكيره قاده للمصحه..
درس بعدين ونزل كمل ع رجليه وخلسه خشلها بدون مايشوفوه رجال عيلة الواعر..
بشبش ع امن المصحه...وخلوه يخش..
ومشي طول وين ماقاعده اميمه..
دق باب الجناح..
فتحتله مطيره..
عقدت حواجبها وقالت:تخدم ع طريحه انت!؟
عمر وهويحاول المحافظه ع هدوئه:خالتي مطيره اللي داخل مرتي واني الوحيد اللي يحقله يقعد معاها هني..
مطيره:كانهي مرتك حق ماديرش فيها هكي..
ع جية صفيه شافاته قالت؛عمر!.
عمر:عمتي ارجوك نبي نشوف مرتي..
صفيه:خشي ولدي خش..
مطيره شبحتلها بحده ووخرت عن الباب..
وعمر خش
هي قالت؛هيا مطيره..
مطيره: هيا وين !؟
خدتها من ذراعها وفنصت فيها وهي تقول بهمس:اطلعي..
طلعت مطيره وهي معصبه وصفيه طلعت وراها وهي تقول:اني برا ولدي كان تبي حاجه..
وسكرت الباب..
بعد تأكد انهم طلعوا..
التفت ع اميمه وقعد يشبحلها..
عيونه تعبوا دموع وقلبه وجعه ع الآخر..
تفكر مكالمة الفيديو اللي صار بينهم امس..
كيف بانت فيها جميله ومشرقه وكلها سعاده..
بعدين تفكر للي صار اليوم كله..
نظرات عيونها اللي خوفوا..
ماكانوش مليانات غضب بس..حتى الكره واضح فيهم..
شن دار في روحه وفيها..علاش يتصرف من غير مايفكر تصرفات يندم عليها في النهايه!..
تفكرها لما قالت...
《غلطة عمري اللي مش حنسامح روحي عليها لين نموت.. 》
وجعه كلامها هدا هلبه...
قرب الكرسي ليها..
قعمز..وقعد يشوفلها بألم بعدين قال كلمه وحده بس...
"سامحيني"
ونزلت من عينه دمعه مسحها....
حط نظره ع يدها..حط يده عليها وشدها بلطف وهو يشوف لوجهها وهي راقد كان شاحب لونه...
تنهد بألم...
☘☘☘☘☘
"استغفر الله والله شكلي عتبه حق"
نضال؛عينك..هدا قضاء وقدر مادخلناش بيه لااني ولاانتي..
"استغفر الله العظيم..باهي مش عارف ع شن ناوي خوك"
نضال بضيق:والله مانندري علي حاجه ولابيت ندخل روحي في اللي صار..
تنهدت وقعدت ساكته..
نضال:اريج..
"حيي اول مرة تقول اسمي!؟"
ضحك في عز ضيقه بعدين قال:ماهو بنقول حاجه مهمه..
"اطمن مش حيأثر فيا شي انت قلت حني مادخلناش علاش ندفعوا ثمن مشاكلهم!؟.."
ابتسم وقال:متأكده؟!
" مية في المية ابو النضل..نعرف روحي شن نقول راهو"
نضال:من الاخير اريج من الاخير وربي حياة من غيرك مانتحملها تفوتيتي..ن..وسكت..
في بضحكه
"تنتحر!؟"
نضال:يعني مافيش كلمة تبدا بحرف النون غير ننتحر!..
"لافي..نحرق."
بضحكه قال:و..و..ولا..لالا..
وقعدوا يغنوا مع بعض..
نخمم في الحرقة في بالي
زعمة نحرق ولا لالا
عايش في الدنيا زوالي
نبكي والدمعة سيالا
زعمة نحرق ولا لالا ووي ولا لالا
زعمة نحرق ولا لالا ووي ولا لالا
قعدوا يضحكوا هما الزوز من قلوبهم اللي كانت تحب بعضها هلبه...وكلها خوف من اللي جاي...
☘☘☘☘☘☘
تاني يوم...
🍃واقف قدام المرايه بغسل في حوايجه بعطره غسل..
نجاة:بالشويه شن هدا خنقتني!
الجالي وهو متوتر ومعصب:اسكتي مانبيش نسمع صوتك..
خلا ع العطر ع الزيانه ومشي طلع من حداها بسرعه..
لحقاته وهي تمشي بالشويه وتشوفله بنظرات غيظ..
طلع من الشقه..
ولفت ولت للدار وهي معصبه تقول:خايف ع خسارتها..ان شاء الله اميمه تتكلم وتقربعها ع راسك..
وين خشت لدار مشت للدولاب بش طلع حوايجها..
طلعتهم وسكراته والتفتت..
عيونها جو ع شيشة عطره اللي قعدت ع الزيانه..
قعدت تشبحلها للحظات..
وشويه بدت تبان ع وجهها ابتسامة مكر...
☘☘☘☘☘
فتحت عيونها..
بدت توعى...حست بثقل ع يدها اليسار..
شبحتلها..
انصدمت..
جبدت يدها..
وهو ناض مفزوع شبحلها وقعد يقول بفزع:هاه حبيبتي خيرك تحسي في حاجه.!
اميمه بصدمه:انت كيف خشيت هني!؟
عمر:حالك باهي ماتحسي في شي!؟
قعدت تشبحله وهي مصدومه مش عارفه ترد..
عمربألم :اسف ياعمري اسف بالله عليك سامحيني اللي صار فيك كله من تحت راسي..اني الحمار الغبي..
فاقت اميمه من صدمتها وقالت بغضب؛اطلع برا..
عمر:حبيبتي راني موجوع حتى اني العيل اللي راح ليا حتى اني..
اميمه بعصبيه:سكر فمك معاش نبي نسمع صوتك ولانشوف وجهك نوض اطلع نوض..تتكلم وهي تأشر ع الباب..
عمر وهو ضام صوابع ايديه لبعض ويحرك فيهم :غير اهدي شويه بس خل نتفاهموا بهدوء..
استفزها بإلحاحه يتكلم وكأن اللي صار شي عادي..
اميمه:باش تفهم انت باش تفهم..اني امس قلت نبي نطلق خلاص..
بعصبيه قاطعها وهو يقول:تبي عينك!..تحسابيه ساهل الطلاق..يضرك انتي بس انتي اللي تخسري راهو اني راجل مايعورني شي نطلقك وناخد بعدك ميه..لكن انتي معاش يدورك حد..
اميمه بصوت عالي:ياناس..
عمر بصدمه:حي المهبوله سكري فمك!..
اميمه بعياط:ياناس تعالولي..
جاه بيحط يده ع فمها وهو يقول:درتي العار يامختلفه..
وينفتح باب الجناح..
ويخش الحاج علي يشبحه وهو يحاول يشد راس اميمه بش يسكر فمها
وطول يجيه ويرفع العكوز ويبدا يهبد فيه..
عمر بوجع:اااه..
علي وهو يخبط فيه:كيف خشيت يابصطاردي..ياحلوف..يازوفري..
وعمر يتقي ع روحه ويوخر وهويقول:ااه..مرتي هادي مرتي افهم..
علي:سكر فمك ياحلوف ياسفتول..
وطلعه والامن تلقوه شدوه..
علي وهو داهش:قسما بالله كان مازال ريته هني مرة تانيه نهدها ع روسكم مصحتكم هادي..
عمر بتحدي:تو نجي وناخدها من وسط حوشك..
علي بتحدي اكبر:اني نبيك ديرها بش نن.حرك في العتبه..
واحد من جماعة الامن:تحشم ع وجهك ياراجل نديد جدك هدا تكلمه هكي!!
وجبدوه وهو مازال يشوف للحاج علي بحده وغضب..
لين رفعوه غصب عنه..
علي بغضب:خزي ع المالكه وع المنظر..
ولف ومشي بيخش لحفيدته..
لقي دكتورة وممرضه واقفات عليها يحاولوا يهدوها..
وهي تبكي بالعبره..
وقعد واقف في الباب يشوفلها بنظرات ألم ممزوجه بالغضب..
ع جية مطيرة وصفيه اللي كانوا يفطروا في الكافتيريا..
وين شافوه واقف قدام باب الجناح وسمعوا بكي اميمه فهموا اللي صار..
صفيه بخوف:بنتي!؟
وخشت تجري..
علي التفت ع مطيره وقال:من خلاه يخش..!
مطيره بقلق:شن دارلها؟
علي بعصبيه؛نسأل فيك..
انفجعت مطيرة وقالت:صفيه صفيه .
شبحلها علي لقاها تحضن في بنتها قال بتهديد..
قوليلها قالك عمك كانك تبي بنتك تقعد معاه دوري وين تقعدي..
ومشي من حداها..
هي تنهدت بضيق بعدين خشتلهم..
🍃عطوا لأميمه مهدي بش بطلت بكي..
لكن قعدت سرحانه في الفراغ ودموعها تنزل وحالتها النفسيه تعبانه هلبه..
وقلوب امها وعمتها تتقطع عليها..
☘☘☘☘☘☘
"والله ياعمي مش عارف شن نقولك زي مصدوم من اللي صار ولاحول ولاقوة الابالله"
لطفي بضيق:توصل بيه للضرب معقوله!شن يحسابها سايبه ماوراها حد ولامالين منها بش نرضولها بالاهانه!؟
الجالي تنهد بضيق مصطنع يخفي توتره وقال:ربي يهديه والله ربي يهديه..
لطفي:اهو نقولهالك يالجالي وبالمفتشر لو يوم تسولك نفسك تمد يدك ع بنتي ماتلوم الانفسك..
الجالي بصدمه:هدا كلام تقوله ياعمي لطفي ربي يسامحك معقوله اني ندير حاجه زي هادي!؟هادي نظرتك ليا!؟..
لطفي:ماهو ماتوقعنهاش حتى من عمر!
الجالي:ارجوك ياعمي ماتخلطش الامور في بعضها ولاتخلي اللي صار يأثر علينا اني وبنتك..اني عطتيها لراجل بعقله ياعمي لطفي والناس تشهدلي وين تصير عركه في الشارع نقعد نحز بين اطرافها ونصلح بيهم حتى لو كان واحد فيهم خوي..لاعندي في العنف ولانحب تعامل بيه..هدا مع الناس البرانيه..كيف مرتي بنت الناس.! معليشي عمي لطفي بس الكلام هذا ماقبلتاش منك..
لطفي ندم روحه ع الكلام اللي قاله اللي طلع منه في لحظة غضب وقال:حقك عليا ياولدي..الكلام اللي قلته طلع مني في لحظة غضب مش قاصده اللي صار لبنت خوي مش شويه..
غمض الجالي عيونه وفتحتهم وهو يتنهد بعدين قال:حصل خير..وحتى اني سامحني احتديت شويه في الرد..لكن نبيك معاش تفكر هالافكار السودا هادي مرة تانيه عمي بنتك في عيوني مانقدرش نضرها بشبحه..
هز لطفي راسه وقال:ربي يبارك فيكم ويكفيكم كل شر.
الجالي:آمين..بالله ياعمي قول لطوبى تطلع معاش عندي وقت يدوب نلحق نوتي روحي ونمشي للخدمه..
لطفي:حاضر..
🍃وطلع لطفي قال لطوبى تطلع لراجلها..
وطوبى بعد سلمت ع اللي فالحوش روحت مع راجلها..
سلموا ع بعض بالكلام..
ومن بعدها ساد الصمت..
وقعدوا هكي طول الطريق لين وصلوا لحوشهم..
☘في دار النوم..
الجالي هو ملصق كفوفه ع بعض ورافعهم تحت ذقنه بشويه:اسف حبيبتي اسف راحت عليا نومة..
طوبى وهي عاقده حواجبها بضيق:شفت كم مرة متصله بيك!؟
الجالي ضحك بإرتباك وقال؛ايه قالولي الجماعه تليفونه عالق طواري الليل كله..
طوبى ضيقت عيونها وقالت:يعني اللي فتح عليا الخط امس واحد من صحابك!؟.
هو انصمط معاش عرف شن يرد..
طوبى:امس واني نتصل بيك انفتح الخط وسمع صوت غريب زي الشخير...بعدين فصلت المكالمه..
الجالي"يرزيني فيك يابعيده" ضحك فجأة بعدين قال:بكل الجماعة هادم يموتوا في المقالب..فتحوا عليك وسمعوك كيف اني نشخر معناها راقد معاش تعاودي عليه..
طوبى بتعجب:قصدك عادي عندك صحابك يفتحوا ع مرتك الخط لما تتصل بيك!؟
زمط الضحكه وقعد ساكت شويه بعدين قال:ماتفسريش الامور هكي طوبى صحابي ولاد بيتيه ولو نعرفهم لخباطين ومش مزبوطين مانديرهمش صحاب..
طوبى وهي متنرفزة:لامعليشي سامحني بس ماقدرتش نعديها الحركه..
الجالي:تمام تو نكلمهم ونتفاهم معاهم..بس حتى انتي نبيك تشرحيلي حاجه مهمه..
طوبى بآستغراب:حاجة شني!؟
الجالي ضيق عيونه وقال:علاش ماقلتيش ان الخطاط صاحب بوك هو نفسه التارقي عبد القيوم!..
ارتخوا ملامح وجهها وقالت؛لأنك ماتحباش خفت كان نقولك ماترضاش ندخل اللوحه للحوش..
الجالي:وتمشي نخليني نطلب وحده تانيه ونعلقها في مكتبي!.اسمه استغفال هدا ياطوبى!؟
طوبى:هو صح اني غلطت لما ماقلتش من دايرهم..بس ماتوصلش لدرجة الاستغفال الاستغفال كلمة كبيره..
الجالي بإبتسامه:اللي يدرق حاجات تافهه غدوة يدرق حاجات كبيره!؟
رفعت حواجبها وقالت:متأكد!؟.
هو استاقظ لروحه شن قال خفتت ابتسامته وقعد يشبحلها وخلاص..
وهي تراجي في رده..
وهو سارع في انقاذ نفسه لما غمض عيونه وفتحهم بعدين قال:اني مضغوط نفسيا ياطوبى ومتوتر وملخبط اللي داره عمر بيفتح علينا بيبان مسكرة..تي جابلي الدوة مع بوك..
طوبى بإستغراب:شن قالك بابا؟
الجالي:الراجل طايرتله شن مايقول عاذره بنت خوه اللي انضربت وخاف ع بنته يلحقها مالحقها..
طوبى بضيق:مش عارفه خوك شن جاه بش دار هكي..معقوله يضربها هكي ويقتل عيلهم شن هدا!؟
الجالي:حتى بنت عمك سلامتها ياطوبى..لسانه طويل ورافعة خشمها واسلوبها ماينفعش..
طوبى:اميمه هاديه ومحترمه بس اللي يعفس ع ذيلها يتحمل مايجيه..
سكت وهو يشوفلها للحظات بعدين قال:شن رايك حبيبتي حني نقعدوا برا الموضوع ومعاش نحكوا فيه..هو خودي وهي بنت عمك مرات انتي تقولي كلمه توجعني واني نرد عليك بكلمه توجعك وفي جرايرهم تنزاعلوا..
تنهدت طوبى بحزن وقالت:اني مانبيهمش يطلقوا نبيهم يعطوا لبعض فرصه تانيه..
الجالي بكذب:والله حتى اني مانبيشي الطلاق..الطلاق صح ربي شرعه بس يقعد مكروه..لكن مرات يكون فيه خيره للطرفين..
طوبى:مازال في حلول وفرص..مش من اولها طلاق مانبيهمش يظلموا بعض ويظلموا بعضهم في النهايه في حب بيناتهم حرام يريح هكي..اني بنراجيها لين حالها يولي باهي بعدين نهدرز اني وياها..
هز راسه وقال؛ديري اللي يريحك حبيبتي وان شاء الله ربي يهدي سرهم.."ان شاء الله معاش يصير منهم"
طوبى:إن شاء الله..
قرص خدها وقال:هي حبيبي ع السريع وازيلي لبسه قنينه ع ذوقك عندي اجتماع مهم بعد ساعه..
هزت راسها وقالت:حاضر..
وهو طول مشي خش الحمام..
مشت وهي مضايقه للدولاب فتحاته وبدت تطلع في حوايجه...
☘☘☘☘☘
الساعه 11:00صباحا..
في حوش الصيد..
تحديدا شقة محي الدين..
في دار النوم..
محي:لالا وضعك بالهون ياخديجه حرارتك شايطه..
خديجه بتعب:كلم اني تجيني..
محي؛امك شني شن بديرلك امك..بنرفعك نعاينك..
ومشي من حداها بيكلم خوه بش يرفعهم مازال مايقدرش يسوق وهي من كتر ماكانت تعبانه ماقدرتش تناديه وتوقفه..
☘وكل اللي هي فيه توا مش من تأنيب الضمير بل من الخوف☘
🍃وحمواتها وعزوزتها في العياده اللي بيديروا فيها لنجاح العمليه..
قعدوا ساعة يراجوا في التجهيزات للعمليه..
دخلوها وحده من الغرف اللي فيها حالات تشبه حالاتها..
طمنوهم اللي معاها انها عمليه بسيطه وحالتها هي مش خطيره..
لعند ماجتها الممرضه وقالت:هي حبيبتي غيري بسرعه..
نجاح وهي متوتره بعض الشي:هيا..
نجمه؛ربي معاك بنيتي..
عواطف:عمليه تافهه معاش تخممي..وسكرت الستار..
لبست نجاح لبس العمليه..
بعدين طلعوها ع باريلا وامها واختها يدعولها..
وهي طول الوقت تردد في تاج الذكر في قلبها وبلسانها...
☘☘☘☘☘
"معقوله هدا كله يصير في اميمه!."
آلاء:ريتي بالله ع اساس يحبها وماخلى مادار باش ياخدها..
"تبي الصراحه عمر حق.ير في حقيقته استغربت كيف حب اميمه اني'
الاء:ميمو تنحب وهلبه..بس خسارة في شكاله..
"باهي توا شن بيصير "
الاء:يبوا يطلقوها منه ..
"وهي"
الاء:مش عارفه الحق ماقالوش هي شن تبي.
~~~~~~~
نبيله؛لو دارولها تقرير طبي قضيتها تولي ساهله ..
غرفه:مرات ماتفكرش في الطلاق..
نبيله؛هو صح اني مانعرفهاش هلبه بس بنت عمك هادي شخصيتها مستقله ديما نشوف فيها معتزة بنفسها ماترضاش تتنازل حتطلب الطلاق ومش حتتنازل عنه..
غرفه:الله يادنيا كيف البنادم يتغير..اميمه هادي كانت ساذجه سذاجه لاتوصف شخصيتها منعدمه..كلمتين ع بعض ماتعرفش تقولهم..
نبيله وهي متفاجئه:جديات!؟
غرفه بضحكه:كنا مسمينها العبيطه في الشارع..ينضحك عليها بكلمتين..
نبيله؛تعرفي انتي خليتي عندي فضول نتعرف عليها عن قرب..وحده قدرت تغير منها هالتغييرالجذري مش مراة عاديه بكل..
غرفه ؛كان صار وطلبت الطلاق تو نقوللها عليك..
نبيله ضحكت وهي تقول:عليك حالك..
غرفه بضحكه؛خيرك!؟
حركت راسها بالنفي وقالت؛لاشي غير تفكرت حاجه تخص قضية تانيه عندي..
غرفه:اها..باهي قوليلي بتمشي معانا لحوش مختار الخميس الجاي..
نبيله:عمتي عازمتني في نفس اليوم وتبيني نبات عندها..
غرفه؛ايوه هكي احسن باتي انتي عندهم..
فهمت قصدها نبيله وقعدت تضحك..
🍃🍃🍃🍃🍃🍃🍃🍃🍃🍃🍃🍃🍃🍃🍃🍃🍃
ودارت نجاح العمليه وارتاحت من سبب تعبها لأيام طويله..
ومن بعدها قررت تبدا علاج التصفيح وقعدت افضل طريقه للعلاج..
☘واميمه..
طلعت من المصحه بعد يومين بنفسيه تاعبه..
رافضه تشوف حد ولاتتكلم مع حد..
حابسه روحها في دارها في حوش جدها..مع الصلايه والمصحف والتفكير المستمر..
☘واللي تسببتلها في حالتها هادي قعدت يومين مريضة وراجلها وبنتها يعانوا فيها..
ولما سمعت امها جتها تجري بش طمنها ان اميمه ماتكلمتش وان عيلتها كلها مصدقه ان اللي دار فيها هكي راجلها..
☘راجلها اللي خدي مجموعة رحلات عن زملائه بش يقعد بعيد اطول فترة ممكنه هربا من المواجهه..
☘وانتهي عزاء ام فايزة بعد يوم فرق السوء معاش جي حد يعزي خلاص..
ومن رحمة ربي ان القرايه بدت بش يلهوا بيها البنات ويخف شويه من حزنهم..
🍃والحوادث اللي صارت هادي كلها..
نست الكل مختار وجيته للفاتحه..
وفي اللي ماصدق صارت هالحوادث بش مايضطرش يتكلم عليه..زي لطفي...
☘☘☘☘☘
يوم الثلاثاء..
17يناير سنة 2018..
الساعه 11:25صباحا...
في كلية التربيه...
لليوم الثالث ع التوالي يجي عبد القيوم وهو ناوي ومصر يكلم حبيبته اللي كل مايقرب منها تبعد..وكأنها سراب..
اليومين اللي فاتوا ماشافهاش..
واليوم خدي اجازا باقي وقت الدوام يبي يشوفها ويكلمها مش حيروح قبل ليكلمها..
🍃وهو ماشي يدور عليها كان يقول في نفسه..
"كان ماعلي حظك ياعبد القيوم وقفت قيدها ولاسيبت القرايه بكل..استغفر الله العظيم وخلاص"
وقعد يمشي وهو يدور..
ومرات يمشي ويتلفت..
وهو مش مركز ان حركاته هادي مثيرة للشبهه لأن عقله محصور في التفكير فيها هي وبس..
☘وهي كانت تمشي بسرعه وهي تتكلم بالتليفون وتقول:هيا هي هاني طالعه...
ونزلت تليفونها وقعدت تسكر في المكالمه..
☘وهو كان يمشي وهو متلفت لأن لمح وحده فيها شي منها..
وفجأة...
يصير التصادم..
طوبى تليفونها قرب طاح غير شداته كويس في اخر لحظه..
وهو التفت شبحلها بيعتذر...
وهي كذلك كانت تبي تعتذر وتمشي بسرعه..
قامت عيونها جو في عيونه..
هو جمد في مكانه..وقلبه قريب طلع من صدره..
اما هي بسرعه قالت:اسفه..
ومشت خطمت من جنبه وفاتاته..
هو لف وقعد يتبع فيها بعيونه انذهبت شيرته بكل..
ماعرفش حتى يرد عليها..
قال في نفسه..
"الوضع صعب واجد..وواجد اخرى...ماينفعش هكي ياعبد القيوم فكر في طريقه تانيه لو بتم ع هالحال مايصير شي"
ومشي بسرعه لحقها..
قعد يجري جري بش يلحق عليها..
طلع برا لقاها راكبه سيارة موديل غريب شويه بناتيه..
مشي ركب سيارته وطول لحقهم..
عبد القيوم وهو يسوق:اكيد هذي اختها جاية تروح بيها..
وقعدوا وراهم..
لين وصلوا لمنطقه حي الاندلس..
خشوا لوحده من شوارعها..
ووصلوا قدام حوش انفتح باب السحاب..
وخشت السيارة..
وتسكر بعدين..
عبد القيوم؛معناها تسكن هنا وهذى حوشهم..ضحك وقال..تمام بكل هك..احسن شي نعدي نخطبها طول وبعدين نحكي معاها براحتي من غير احراج...
تنهد بإبتسامه وقال..كل تأخيره فيها خير..ربي يبيني نجيها من الباب..
قعد واقف شويه يشوف للحوش بش يحفظ شكله ومكانه لان اغلب حياش الشارع متشابهه..
بعدين تحرك وهو يفكر..
يمشي بروحه في الاول ..ولايبعت حد يتكلم عنه!؟...
🍃🍃🍃🍃🍃
"انتي اول وحده ترضى تخش عليها بالله عليك حاولي تعقليها بنتي"
عائشه؛حندير اللي نقدر عليه والله المستعان..
صفيه:ان شاء الله تنهدى ع ايديك يابنتي..
تنهدت عائشه وقالت:الله المستعان..ربي يهدي النفوس..
ومشت خشت لدار اميمه وسكرت عليها..
وصفيه مشت وهي تدعي ربي يهدي بنتها وتتراجع عن الطلاق..
#اواخر_الشتا
#طوبى
....يتبع....
(قلت اني بنزل جزء جديد بس مالحقتش صغار اختي قاعدين عندي في الحوش وقعدت نجري في جرتهم اغلب الوقت باهي اللي لحقت نكتب هالكم كلمه...
انجبرت نحكي شي مفروض مانحكيش بش مانخلص من انتقادات الناس اللي ماتعرفش تتفهم ولاتقدر مع احترامي لغيرهم)
