#طوبى "جنة طوبى"
#جمان_فريد
#الجزء_الرابع_والسبعين"تحول2"
《أحداث هذه الرواية تبدأ من سنه 1996 وتنتهي سنة 2022 ومعظمها حقيقيه》
🚫الـرجـــــــــــاء الـــتـــركـيــــــــز عـلـــــى الـمــــــــرور الـــزمـنــــــي و الـتــــواريـــــخ والأيــــــــام]🚫
لو فاتتكم صلاة او خش عليكم وقت صلاة صلوا قبل بعدين اقروا...الصلاة قبل كل شي وكل شي يجي بعدها
وصلوا على الحبيب🌼
¤رب اشرح لي صدري○ويسر لي أمري○واحلل عقدة من لساني¤
🌿🌿🌿🌿🌿🌿🌿🌿🌿🌿🌿🌿🌿🌿🌿
🌿🌿🌿🌿🌿🌿🌿🌿🌿🌿🌿🌿🌿🌿🌿🌿🌿
🍃يقولون أن هناك خمسة مراحل للحزن (الإنكار، الغضب، المساومة، الاكتئاب والقبول) حسناََ، أود إضافة مرحلة أخرى (الانتقام).🍃
_________________________________________
في دار المعيشه..
غرفه وبنات اختها مقعمزات يحكوا مع بعض عن موضوع مهم يخص أريج..
غرفه:اشبح شن بيدير توا؟
أريج بكره؛اعلى مافي خيله يركبه..
آلاء بضيق؛استعجلتي يااريج غلط هلبه اللي درتيه..
اريج بتعجب:شن تقولي انتي!؟
آلاء:مالاش ذنب نضال ياأريج..الراجل يحبك هلبه والله كان خسرتيه تكملي عمرك نادمه..
اريج بغضب؛لو كملت معاه نكمل عمري نادمه..تعرفي اخر مرة صار بيني وبينه كلام شن قالي
"شن قالك"
توجهت انظارهم للباب..
شافوها واقفه عليه وع وجهها ملامح التجهم..
أريج ودموعها في عيونها؛قالي انتي دوري سبلة بش تطلقي لأنك حاطه عينك ع غيري..
ابتسمت طوبى تهكما..
غرفه؛علاش قالك هكي!؟
اريج وهي تحاول تخفي توترها:مش خاشله راس اني نبي الطلاق ع خاطر اللي صار وكأن اللي صار مايعنيني ولايعنيه في شي..
آلاء:هو قال هكي من حرقة قلبه..
اريج بغيظ؛مازال دافعي عليه انتي..الحقير هدا قالي انتي دوري في الفلوس فاهمه شن قصده بكلامه مار عليك الكلام هذا ياآلاء ولا؟ اللي حسيتيه انتي وقتها اني حسيت احرف منه..
سكتت آلاء وهي مضايقه وقلبها موجوع..
طوبى:قلتي يحبها ياآلاء..يحبها لعند ماصارت بينه وبينها هالمشكله بدي يعاير فيها!
نزلت اريج راسها ودموعها ينزلوا بألم..
وغرفه تشوفلها بحزن..
رفعت طوبى حواجبها بعدين نزلتهم ومررت نظرها القدام وهي تقول:ع العموم اني كل مالي نزيد نتأكد اني درويشه ونظرتي للناس ساذجه هلبه..
قعدوا يشبحولها..
وهي نزلت نظرها ليهم؛دافعت عنه نضال هذا وعذرته وهو في المقابل شوفوا شن دار..ركزت بنظرها ع أريج وقالت...ان شاء الله تخلصي ع خير..
بعدين لفت ومشت من حداهم...
اريج بحزن؛ويخلصك حتى انتي..
غرفه:عاجلا غير آجل يارب...
وآلاء تسمع وهي مضايقه بعد مافكروها بشي تحساب روحها نساته..
🍃🍃🍃🍃🍃
الساعه 2:00بعد الظهر..
مغليه مقعمزه في الصاله وهي تقرا في ورقه الدعوة متاع الطلاق وهي حزينه ع ولدها وفي نفس الوقت خايفه من ردة فعله..
فكرت تتصل بخديجه بس زعلها منها منعها...
🍃وخديجه في هالوقت شاده فراش وراقده في الصاله المكيفه..وحوش اهل راجلها عزوزتها وحماتها يديرولها في فطورها معاهم بناء ع طلب ولدهم اللي هو راجلها..
محي الدين اللي قريب طار من الفرح بعد ماعرف انها حامل وبدي محاوطها بالدلال والاهتمام وكأنها اول مرة تحمل...
🍃🍃🍃
روح نضال للحوش من الجامعه..
خش داخل وجي بيركب طول لداره لكن امه شداته لما نادت..
"نضال"
وقف وقعد يشوفلها..
مدت مغليه الورقه وهي تشوفله بضيق وتوتر..
هو استغرب وماتوقع شي محدد..نضال مستبعد تماما اللي بيقراه في الورقه...
خداها من امه وقال؛ورقة شنو هادي؟
مغليه؛افتح واقرا..
خدي الورقه...فتحها وقعد يقرا فيها..
وامه تراقب في ملامح وجهه..
بدي يبان عليه الغضب...شافت لرقبته لاحظت انه يبلع في ريقه..
نزل الورقه بعصبيه ومشي ركب فوق بسرعه..
وهي تلحق فيه بعيونها لين اختفي من قدامهم..وبعدها تسمع صوت باب داره تسكر..
نزلت عيونها وهي تقول بألم..
/حسبي الله ونعم الوكيل..
ومشت ولت للصاله...
🍃🍃🍃🍃🍃
الساعه 6:00مساءا..
في شقة فايزة..
كانت في كوجينتها تغلف في وجبة الفطور اللي بترفعها لحوش لطفي الواعر..
كملت ونادت وهي تقول؛واتيات يابنات..
شويه وخشت عليها صفاء وهي لابسه بلوزه طويله ع سروال وحجابها ع راسها وهي تقول:هي ماما..
ومشت طول رفعت حافظه موالح كبيره..
فايزة:بالشويه..
مشت طول صفاء طلعت وخشت بعدها مروة اللي كانت لابسه فستان مستور وحجاب وقالت:شن نرفع ماما؟
فايزة وهي تأشرلها قالت؛الطاجين هداكا..
مشت طول خداته وهي تقول:كيكة مثلجه هادي؟
فايزة؛ايه..
ومشت مروة طلعت بيها..
بعدين هي خدت كيسه فيها خبرة بأنواع مختلفه ومشت رفعت طنجرة وطلعت من الكوجينه..
وين وصلت في الباب لقت تاله تلبس في رجليها..
فايزة:خودي مني الشكاره تعالي..
جتها طول وخدت منها الكيسه..
مشت فايزة طلعت وهي تقول:سكري الباب زين..
طلعت تاله بعدها وسكرت باب الشقه بالمفتاح بعدين حولاته وحطاته في جيب سروالها ونزلت تجري ورا اما..
🍃ومن الباب الفاصل خشت صفيه ومعاها حاجات هي ..
ومشت طول خشت بيهم للحوش..
كان الحوش هادي وشبه مظلم..
حطت الحاجات في الكوجينه وطلعت منها وهي تنادي..
/فردوس..
"هني هني ياخالتي"
مشت لدار المعيشه خشت عليهم لقتهم اللي راقده واللي مقعمزة مقابلات مروحه تخدم بالشحن..
صفيه؛بدينا بسريب هروب الضي..
سالمين:واليوم حمو واجد..
قعمزت وهي تقول:ايه اليوم بزايد..مررت نظرها عليهم وقالت؛وين مطيره؟
سالمين؛في الحمام توا كيف وعت من النوم..
غرفه بتذمر:استغفر الله ياربي عطشانه بنموت وكلي مع بعضي نقطر..
سالمين:خلاص هانت مازال ساعه شويه..
ع خشة مطيره وهي متوضيه قالت بصوت مبحوح..
/كيف حالك صفيه اليوم..
صفيه:الحمد لله..
مطيره وهي تلبس الملايه:الحمد لله ع كل حال..
بعدين مشت وقفت مقابله القبله وكبرت للصلاة..
تنهدت صفيه بضيق..
وسالمين غيرت عيونها عن مطيره لطوبى اللي كانت راقده بالنوم..
فردوس وهي متكيه:صوت الباب..نوضوا وحده فيكم تفتح..
ناضت اريج وهي تهوي ع روحها بيدها وتستغفر..
ومشت طلعت للباب الخارجي..
فتحاته خشوا فايزة وبناتها وهما يسلموا ع بعض بالكلام..
بعد خشوا جت بتسكر الباب شافت نضال مقعمز قدام المطحن وهو يشوفلها بنظرة عتب وغضب في نفس الوقت..
وهي تجاهلاته وسكرت عليه بابها...
🍃🍃🍃🍃🍃
ويعدي الوقت..
والشمس تغيب...والآذان يأذن..
وهما قدامهم سفره عامره بالخيرات..
ومافي حد منهم عنده النيه..ياكلوا بالغصب..لأنها عباده...
حبة التمر في الفم تقعد دقايق طول وهما ياكلوا فيها وعقولهم في عالم تاني...
🍃وفي حوش الجيران المقابلين..
مغليه وراجلها بس ع سفرة الفطور والزوز ياكلوا عادي بس بالهم مشغول..الزوز يفكروا في اللي بيصير القدام...
ونضال هاليوم..
مشي فطر مع عمر في فيلا الجالي..
🍃نضال بتعاسه؛خوك هدا دمرلي حياتي خرب علي روحه وخرب علي غيره.
عمر بحسرة:وخرب عليه..خرب عليا حتى اني الامل اللي كان قاعد عندي قتله بكل حتى الحلم معاش نقدر نحلم بيها..مش غير اني وياك بس يانضال حتى المهدي راح في الدهوما..
قعد نضال ساكت وهو مضايق وموجوع...
عمر تنهد وقال:الله غالب هذا نصيبنا..وخدي السفرة وناض وهو يقول..بعد ساعه بنطلع للمطار...
نضال:مش قلت لغيتها؟
عمر وهو ماشي:لغيت متاع الصبح وخديت في مكانها هادي..
هز نضال راسه بعدين رمي بنظراته التعيسه للأرض وهو يتفكر في نظرات اريج اللامباليه ليه اليوم بعد اللي داراته...
غير عيونه ليده اليمين وقعد يشوف للدبله..
وتفكر يوم البيان لما لبستهاله...تفكر هداكا اليوم بتفاصيله الحلوة..
ضحك لما تفكر كيف كانت لابسه سبيدرو"حذاء رياضة" تحت الفستان متاعها..وكيف كانت ترقص معاه بعفويه..
خفتت ضحكته..والدموع عبوا عيونه..وقلبه قاعد ينعصر عصر من الألم...
🍃بعد ساعه...
طلع عمر بسيارته من فيلا خوه..
ع طلعة سيارة منيه وامها ونساوين خوتها معاها في السيارة..
شافت عمر وهو طالع بالسيارة ولابس لبس الخدمه..
تفاجئت لما عرفت شن يخدم واعجابها بيه زاد اضعاف...
فات من قدامهم بسيارته وهي هايمه معاه..
جميله وهي تشوفلها بإستغراب؛منيه..
التفتت لأمها وقالت؛نعم ماما!؟
وحده من نساوين خوتها قالت؛لينا ساعه في الباب راهو..
هي ضحكت بإحراج وقالت:تفكرت حاجه وسهيت معاها شويه..
امها شبحتلها بشك..
وهي تحركت طول بالسياره..
شافت من المرايه للطريق من الخلف..
لقت نساوين خوتها يشبحولها ويغمزوا..
هي غيرت عيونها عنهم وقعدت شاده ضحكتها...
🍃🍃🍃🍃🍃
"ديما صامت صامت صامت"
اميمه بضحكه؛بحكم العاده دكتور..
خالد وهو يمسح في فمه بالكلينكس قال..
/نفس التبرير..ياستي حطي في بالك واني طيبي ان الدكاترة صحتهم في السليم بياكلوا هالماكله..
ومشي طلع من الحجره..
الممرضه بضحكه؛ماكله صحية هادي يادكتور..
جاها صوته من برا وهو يقول..
"رقعيلها رقعي"
قعدت تضحك اميمه..
ع جية وسام قال بإبتسامه؛عطيك الصحه اميمه
اميمه بمجامله؛تسلم..
جي جنبها وخدي طرف بيتزا ملفوفه..
هي لاحظت انه قريب بزياده تباعدت عنه...
امل وهي تشوفلها بغيره قالت:بصراحه وماتزعليش مني لإني مانحبش نجامل عندك مشكله في حاجات تانيه غير الملح..
رفعت اميمه حاجبها وهي تقوللها؛زي شني؟
امل؛تحسي المقادير مش مزبوطه في طعمه في المبطن مش زابطه..والبيتزا تحسيها عجينه اكثر من الحشو..
الممرضه؛بالعكس رقيقه وخفيفه وحشوتها الله يبارك العله في الملح بس بس..
وسام؛خليها خليها هادي والله ماعارفه راسها من رجليها تعلمي اقلي دحي بعدين قيمي..
ضحكت الممرضه..
امل بتهكم؛عجباتك هلبه انتي..وانت دمك مش خفيف معاش تخففه بالسيف..
وسام ضحك بعدين كلي باقي البيتزا في فم واحد وجي بيمشي ضرب كتفه بكتف أميمه خلاها تتوجع..
وسام وهو موسع عيونه بصدمه مصطنعه؛اسف..اسف سامحيني..وغص باللي كلاه وقعد يسعل بقوة..
ناضت امل وهي تقول بفجعه؛عطوه ميه ميه..
صبتها اميمه في طاسة ومدتهاله..
هو خدي الطاسه من اميمه وشرب..
وهما يشوفوله بقلق...
بعد ماشرب قعد ياخد في انفاسه بعدين حط الطاسه ع الطاوله وقال؛اسف دكتوره بالله ماتواخذنيش..
اميمه بقلق؛مش مشكله صار خير..انت شني توا!؟
ابتسم وقال:لاعادي مافي شي حاجه بسيطه..خدي نفس بعدين قال..سامحوني اربكتكم..
ومشي طلع من حداهم..
امل رمت نظراتها الحاده لأميمه بعدين مشت خدت تليفونها وطلعت..
الممرضه؛بتقعد وراه لعند اخر الدوام..والله مسكينه توجع فيا اللي علقت روحها بواحد زي هدا..
تنهدت اميمه وقالت:بالله عاونيني في لم الحاجات شويه وينادونا..
الممرضة؛هيا هي..
ولموا الحوسه اللي فالحجره وعطروها..بعدين طلعوا منها يشوفوا شغلهم...
🍃🍃🍃🍃
بعد صلاة التروايح...
مربوعه حوش لطفي الواعر تعبت برجاله سمعوا متأخر وجايين يعزوا..
وداخل الحوش..
كان في نساوين جايات يعزوا نص منهم جايين مع الرجاله اللي في المربوعه ونص من الجيران...
وطوبى مقعمزه وسطهم لكن مش معاهم في حديثهم..
تمرر في نظرها عليهم وهي تسأل في نفسها..
"معقوله هادم جايين يعزوا فينا في بوي..!"
سؤالها سؤال شخص مازال مش قادر يستوعب حقيقة اللي صار...
سرحت وزادت بعدت عنهم وهي تتفكر في الايام اللي سبقت موت بوها واللي صار فيهم..
وقعدوا دموعها ينزلوا منها لاإراديا..
وين حست بيهم..مررت نظرها ع الموجودات..
لقت سالمين ونبيله يشبحولها بحزن..
هي غيرت عيونها عنهم..بعدين ناضت ومشت طلعت من الصاله..
وطول للجنان..
قعمزت ع وحده من كراسي الطاوله الخشبيه وصوت المولد المحطوط فوق السطح معبي المكان..
ضجة الخارج تلاقت من ضجة الداخل وزادتها على مابيها..
رفعت عيونها للسمي..بعدين غمضتهم وبدت تستغفر بصوت مسموع ليها...
في بلاد بعيده..في قارة تانيه..
اسكتلندا..كان مقعمز في واحد مقاهيها مع طليقته اللي كانت تشوف لصورة في تليفونه..
فاتن بإبتسامه؛صغيرونه وحلوه..
مختار؛من تشبه؟
فاتن وهي دقق بالنظر؛ماجي في بالي حد..
مختار؛ركزي في عيونها..
ركزت زي ماقاللها بعدين قالت؛ماجي في بالي حد نهائي..
هو خدي منها التليفون وقال..استني شويه..
حطلها ع صورة تانيه بعدين مدلها التليفون..
هي خداته وقعدت تشوف للصورة بعدين قالت..
/زي الفرق بين السمي والارض..
مختار؛نظرات عيونهم تتشابه..
فاتن؛لكن مارييت احلى وجذابه اكثر..
تنهد من قلبه ومرره نظره حواليه..
فاتن؛حبيتها البنت هادي!؟
شبحلها وقال؛ولانقدر..مارييت ماخلتش عندي قلب يحب بعدها..
فاتن بلعت ريقها بعدين ابتسمت وهي تقول:اممم..باهي مختار انت ماجربتش دور عليها!؟
مختار:اول حاجه درتها..
فاتن بفضول؛ولقيت حاجه!؟
مختار بحزن؛طلعت ميته من سنين طويله بمرض..
فاتن بأسف؛الله يرحمها..
خدي نفس عميق بعد زفر وقال:ارتاحت..
فاتن مدتله تليفونه وهي تشوفله بحزن..
خداه وفتح ع الصورة وقعد يتأمل فيها..
هي حمحمت بعدين قالت؛امتى مروح؟
مختار رفع عيونه فيها وقال؛ع العيد..
فاتن:شن في فبالك؟
حط تليفونه ع الطاوله وقال:ع فكرة الكافيه قنين وديكوره مميز..
ابتسمت بيأس وقالت؛Thanks
🍃🍃🍃🍃🍃🍃
"اول تعارف كان في مالطا"
والد فاتن: بالتحديد في بار في مالطا..كان مختار يخدم غادي جرسون يرفع ويجيب وينظف ويطلع في الزبايين اللي يسكروا حد الثماله زي مايقولوا..عرفته ليبي لما سمعته يدوي مالطي طريقة الدوة متاعه خلتني نعرف انه ليبي..متفكر زي توا ناديته وجاني سألته عن اسمه ومن اسمه تأكدت ان ليبي..قعمزته ع الطاوله متاعي وهدرزت عليه وعرفت انه كان محبوس في مالطا فترة طويله وطلع بعفو..
روحت هديكا الليله واني مخلي بالي عنده..الحق ماتحملتهاش كيف ليبي ولد بلادي يخدم خدمه زي هادي في بلاد غريبه وفوق هكي قصته خلتني نتعاطف معاه..المهم تاني يوم بالزبط بعتت من جابهولي غيرت حالته وخدمته عندي كنوع من التعاطف بس..
المحجوب:شن خدمته بالزبط؟
:خدمه عاديه حاجه ع الماشي تجيبله ماياكل ويشرب وسكنه كان عليا..
المحجوب:وبعدين؟
:جاييك في الدوة..قعد قريب مني بحكم ان خدمته عندي كانت تطلب هكي..وهالقرب خلاني اكتشفت فيه حاجات فاجئتني هلبه..الراجل كان دماغه سم ع قولة المصاروة..مرة يعطيني راي مرة يعطيني فكره..واني اللي يقوله يعجبني ونديره طول..وقعدت كل يوم في الصاعد..قربته مني اكثر دخلته في شغلي بزياده..قعد كل يوم يبرز اكثر من اليوم اللي قبله..وراهو مش من فراغ كنت ديما نحس ان في شي يحفز فيه طموح رغبه ماعرفتش شني بالزبط بس في ظرف فترة قصيره دار حاجات خلت اسمي يزيد يكبر اكثر واكثر وطبعا ولى عندي اقرب المقربين وخليته ذراعي اليمين ومش بس هكي..عرفته ع بنتي وبش نضمن قعاده معاي خليته نسيبي..تنهد وقال..وبعد ماتزوج بنتي زاد كبر اكثر..وبدل مانضمن قعاده لقيته جايني يقول نبي نخدم بروحي طبعا ماقدرتش نوقف في طريقه..
المحجوب؛علاش!؟
:لان ماجاش وطلب مني هالطلب الا وهو ضامن نفسه..كان يخدم من وراي لفتره وداير علاقات ياعلاقات خلاته يوقف ع ارضيه قويه يبدا منها شغله الخاص..
المحجوب:وانت طبعا مستحيل تسلم فيه بالساهل هكي عرضت عليه الشراكه..
ابتسم وقال:عرضت عليه الشراكه وهو وافق وقعد ليومنا هدا شريكي..
المحجوب:السنين اللي دار فيهم مختار لروحه الامبراطوريه سنين قصيره ينعدوا ع اصابع اليد الوحده..وهالشي هدا ينحط تحته الف خط..
ضحك والد فاتن ضحكه خفيفه وقعد ساكت..
المحجوب هز راسه وقال؛واضح واضح..
تنهد والد فاتن وقاله؛اسمع مني هالنصيحه اللي يدور في بالك انساه..ماتفكرش تحط راسك براسه ولادور وراه هدا محصن نفسه كويس كويس..وعند وسط الدوله ناس تحمي في مصالحه وين مايكون...يعني لو فكرت دور وراه حيحس بيك ويلذغك طول ويقضي عليك..
رفع المحجوب حواجبه تعجبا..
:ماتشوفش للمكانه اللي انت فيها ماتعني شي قدام علاقات مختار هني..مختار علاقاته قويه مع سطح الدوله وعمقها وعندهم معاه مصالح كبيره حيديروا كل شي بش يحموه..
المحجوب؛مختار ولد اختي كيف حطيت في بالك اني ممكن نفكر نضره!؟
:اني حذرتك في حال فكرت..مختار عنده نزعة الانتقام قويه بشكل ماتتصوراش..خل نعطيك امثله..في محبسه كانوا معاه في مالطا لقوهم مقتولين في الحبس في وقت واحد المحبسه هادم ياما دارو فيه لما كان معاهم..
بدت ع وجه المحجوب ملامح الصدمه..
؛ومش هكي وبس..في ضابط في الحبس غادي كان تعامله مع المحبسه بشكل عام ماينفعش الضابط هدا فصلوه من خدمته وبعد مده مش طويله لقوه منتحر في حوشه..
المحجوب يسمع في الراجل شن يقول وهو مش مستوعب فضاعة اللي يحكي فيه..
:ونزيدك من الشعر بيت..البار اللي كان يخدم فيه شراه من صاحبه والمدير اللي كان يخدم فيه خلاه يخدم الخدمه اللي كان يخدم فيها هو...
المحجوب غير عيونه عن الراجل وقعد يشوف في الفراغ وهو يفكر بصدمه..
:مانبيش نحكيلك اكثر من هكي لأني بجديات خايف عليك تصيرلك حاجه..اني بس حبيت نحذرك ونقولك رد بالك دور وراه دور بس ورا كلامي اني بش تتأكد اني ندوي لمصلحتك..
غير المحجوب نظره ليه وقال؛عارف بجيتك هني..
ابتسم تهكما وقال:حتى لو ماقلتش هو حيعرف بروحه..
هز المحجوب راسه وهو ساكت...
🍃🍃🍃🍃🍃🍃
الساعه 1:00ليلا..
الكهرباء رجعت..وعم الهدوء الاجواء بعد مااختفت اصوات المولدات..
والحوش فضي من المعزين..
واهله بدوا يحوسوا فيه ويضموا..
وهي مقعمزه برا بروحها وقدامها كوباية بابونج تشرب منها شويه وشويه وهي تراجي في شخص ما..
جاها..وقدم ناحيتها وهو يقول..
"طوبى"
حطت الكوبايه ع الطاوله وشبحتله وهي تقول..
/روحت اميمه؟
حسين؛ايه توا روحت بيها..
هزت راسها بعدين قالت؛كلم الشباب اللي يخدموا في المطحن وقوللهم من غدوة ان شاء الله بيولوا للخدمه..
حسين:قصدك نفتحوا المطحن غدوة؟
طوبى:ايه ساده ماقعد مسكر..
حسين؛تم..
طوبى:شن صاير في المحل متاع المواد الغذائيه..تابع فيه؟
حسين؛اكيد..حركة البيع لاقوة الا بالله مشروع ناجح ميه في الميه..
طوبى:الحمد لله..اهم شي تقعد متابعه ياحسين ماتحطوش الثقه في الراجل اللي مشاركينه حتى لو كان صاحب بوي..الواحد حتى في روحه معاش يأمن خلاص..
حسين شبحلها شويه بعدين قال..
/طوبى مش قبل انتي قلتي انك تشوفي فيا خوك الكبير ووقت تحتاجي تناديني تلقيني في ظهرك قلتي هالكلام ولا ماقلتيشي؟
طوبى؛قلته..
حسين؛تمام..راجلك في العزي ماجاش الا يوم واحد وبوه وخوته بعد فرق السو معاش رينا منهم حد..الوضع هدا مش طبيعي بكل ياطوبى..
غيرت نظرها عنه وتنهدت..بعدين نزلت عيونها لإيديها اللي حطتهم ع بعض وقالت؛اني طالبه الطلاق..
هو من صدمته..وخر كرسي وقعمز وقعد يشوفلها وهو مصدوم..
وهي قعدت تمسح بيدها اليمين ع ظهر يدها اليسار وعيونها عليهم..
حط حسين يد ع الطاوله والتانيه شد بيها نصه وقال بغضب..
/بشن وصل فيك الكلب هدا !؟ قولي شن دارلك واني نربيلك فيته..
شبحتله طوبى وقالت؛هدا اللي مانبيشي ياحسين..مانبيش شوشرة ودوشه تكبرها اكثر ماهي كبيره اني نبي نخلص بهدوء ياحسين..
حسين بشي من الانفعال:قصدك تبيه يوصل فيك واني نعرف ونسكت!!؟
طوبى:بوي الله يرحمه ماقصرش فيهم..
حسين؛عمي عارف !؟ وجدي حتى هو؟
طوبى هزت راسها بإيجاب..
حسين؛ومن تاني!؟
طوبى:خالي المحجوب..
حسين؛واني ياطوبى آخر من يعلم!؟
طوبى:عارفينك مش حتتحمل وتتصرف بعاطفتك طول زي مادرت مع اميمه.
حسين خبط بيده ع الطاوله؛شن درت في قصة اميمه مادرت شي! كان مفروض نتش فيه النار الكلب هداكا..
طوبى اشرت بصبعها عليه وقالت؛اهوا..هوهدا اللي مانبيشي..ضيع روحك ع خاطر شكالات حتة الدفال حرام فيهم..
حسين بغيظ؛كان نعرف هالكلب شن دارلك بس!؟
طوبى:مش مهم تعرف ياحسين..المهم اني نبي نطلق من غير خساير..ع خاطر وخيتك ياحسين مادير شي تندم عليه بعدين ومايكونش في صالحي بالله عليك خليك برا الموضوع وصدقني لو احتجتك نقولك طول ياحسين..
قعد يشوفلها بنظرات غضب وقهرة عليها..
هي قالت برجاء؛بالله عليك وخيي.
غمض عيونه بألم بعدين هز راسه وقال..
/حاضر..فتح عيونه وكمل يقول..حاضر ياطوبى حاضر بنطلع روحي منها لكن نبيك تعاهديني وربي شاهد عليك لو احتجتيني قوليلي طول ياطوبى..
طوبى هزت راسها وقالت؛نعاهدك..
حسين؛خلاص راهو ربي شاهد عليك..
يدوب ابتسمت وهي تهز في راسها بإيجاب..
قعدت يشوفلها بنظرات ألم وقهر بعدين ناض وقال؛ماتبي شي..
طوبى؛ماتنساش تكلم الشباب..
هز راسه وقال؛حاضر..حاضر..
ولف طول ومشي وهوشاد ع قبضة يده بقوة من الغضب..
وهي معاه بعيونه اللي كانت نظراتهم كلها قلق...
~~~~~~~
اميمه بضيق:الموضوع مايخصنيش كيف تبيني نحكيلك عليه..
حسين بقهر:هدا هو اللي فضلاته عليا...هدا اللي شجعتوها ترضى بيه هدا..ماكملتش عنده سنه وطلبت الطلاق تي اصلا واضح من وجهها انها مش مرتاحه معاه..وواضح من مواقفه وتصرفاته الكلب هدا انه لامقدرها ولادايرلها قيمه..ااخ ياطوبى ااخ..الله يرحمك ويسامحك ياعمي..الله يسامحك ياسدرة هذا اللي فضلتيه عليا ياوخيتي وينك تجي تشوفي شن دار في اختك..
اميمه بحزن؛نصيبها ياحسين..
حسين برفض:لامش نصيبها..اللي زي طوبى مش هدا نصيبها..حرام فيه الكلب حرام فيه ظفرها اللي تقصه وتلوحه..مش ياخدها الحيوان هدا..وبغيظ عض يده بقوة..
واميمه تشوفله بفجعه وألم..
حول يده وقال بقهر:غير عطيتها كلمه بس..فتح باب دار اخته وطلع وهي تسمع فيه يقول..
"غير عطيتها كلمه"
اميمه بحزن:لاحول ولاقوة بالله...
🍃🍃🍃🍃🍃
وفي محل من محلات عبد الرؤوف..
كان مقعمز ومقابله حد يحكيله بإنفعال ع مشكلته ..
نضال بشي من الانفعال:علاش تخلط في الحابل بالنابل شن علاقتنا اني وياها بمشاكل خوي وخالتها..منطقي الشي هدا ياعبد الرؤوف احكم بالعدل بالله عليك..
عبد الرؤوف:اني مش متحيز لحد يانضال بس لو كانت اختي مانخليهاش تستمر في الزواج هدا وسامحني معليشي..
نضال وهو يحاول يتحكم في اعصابه؛الاسباب عطيني اسباب مقنعه!..
عبد الرؤوف:اني عندي خلفيه ع الموضوع تمام..وراهو موضوع كبير هلبه هلبه يانضال الموضوع فيه كذب وغش يانضال مايتعداش بالساهل..
نضال:تمام..اني شن ذنبي؟
عبد الرؤوف:كيف شن ذنبك!؟ اولهم انك عارف وساكت..تانيهم ان عيلتك وعيلة الواعر صارت بينهم فجوه كبيره يانضال خلاص..
نضال بمحاوله يائسه:باهي ناخدها ونسافر بيها بعيد عن هدا كله..
عبد الرؤوف؛نضال تسمع في روحك شن تقول قدامي!؟
نضال:ندوي ع مرتي!؟
عبد الرؤوف:تدوي عليها وكأن مافيش وراها مالي يخلوها تتزوج بطريقة زي هادي تقول مدايره عمله!؟ البنت مش رخيصه ع ماليها يانضال..
نضال بإنفعال:شن تقول انت!؟ تي هادي مرتي كيف نرخصها ومش عارف شني اوزن كلامك قبل لتقوله..
عبد الرؤوف شبحله شويه وقال:اني عليا نوصللها كلامك وردها عليه يوصلك معاي وتوا ياريت تتوكل عندي ماندير..
ناض نضال وهو مضايق ع الآخر بعدين قال..
/نراجي منك في اتصال..
ومشي طلع من المحل..
خبط عبد الرؤوف بيده ع الطاوله بعصبيه بعدين نادى الشباب اللي يخدموا في المحل يخشوا داخل..
~~~~~~~
غرفه:ملبز معاها يارؤوف..
عبد الرؤوف وهو عاقد حواجبه بغضب:شن قايللها!؟
غرفه؛كلام زي وجهه خلاص..المهم قوله البنت ماتبيكش انت بطوبتك طلبت الطلاق لأنها معاش تبيك وتمت..
عبد الرؤوف هز راسه وهو معصب..
غرفه بحمق:عليك عيلة معفنه طحنا فيهم..
عبدالرؤوف:اختك ع شن ناويه؟
غرفه؛طوبى قصدك..قالت نبي نطلق من غير محاكم وقضايا وفضايح..
عبدالرؤوف:ان شاء الله والله لأن دوشة المحاكم دوشه كله بيولي عليها هي بروحها انشدي نبيله وتو تحكيلك ع البلي اللي صاير في المحاكم..
غرفه بقلق:يارب تطلق من غير ماتخش محاكم يارب..
عبد الرؤوف قعد يتفحص في وجهها بعدين قال..
/تاكلي كويس..
غرفه بضيق:ايه..
عبد الرؤوف؛مش باين.
غرفه؛والله ناكل..
عبد الرؤوف؛غرفه اهتمي بروحك اهتمي بصحتك راك حامل بزوز مش واحد..
غرفه؛عارفه والله وناكل كويس..لكن حاضر تو نزيد نهتم ..
عبد الرؤوف:امتى موعدك مع الدكتورة؟!
غرفه؛بعد العيد..
عبد الرؤوف:باهي غدوة نبي نطلعك نغيرلك جو شويه..
غرفه بضيق:لاوالله مانقدر نديرها نطلع ونغير جو وبوي مازال ماسكرش الشهر!..
عبد الرؤوف؛ تي شن قتلك بنرفعك لعرس!؟ نبي نطلعك برا الجو هدا تشمي هوا تصفي ذهنك شويه تريحي نفسيتك..راك حامل بزوز يامراة وخاشة الثامن..
غرفه بضيق؛والله مانقدر نطلع نغير جوي وخواتي هني متنكدات..
تنهد وقال؛باهي براحتك..
غرفه؛نجيبلك تتسحر..
عبد الرؤوف؛لالا خليك مقعمزه ماديري شي شويه تانيه وماشي لحوش التارقي نتسحر معاه..
غرفة هز راسها وهي ساكته..
هو قعد يتأمل في ملامحها الحزينه..قرصها من خدها بلطف وغمزلها مع ابتسامه..
ارتسمت ع وجهها ابتسامه وهي تشوفله بحب..
🍃🍃🍃🍃🍃
"قسما بالله كنت متمنيها تعيش معاه مرتاحه ماكانتش هامتني روحي بكل"
هدا حسين قاعد يطلع في الغضب والقهر اللي في داخله للتارقي..
والتارقي يسمع فيه وهو مربع ايديه ويشوفله بنظرات لو يركز فيها حسين يعرف ان الشخص اللي قدامه صايرله ماصاير فيه هو واكثر..
حسين بقهر:ااخ..ياربي ااخ..اني ليش نعطي فيها كلمه ليش..وخبط براحة يده ع جبهته بغضب..
عبد القيوم وهو عاقد حواجبه بغضب قال..
/حسين ردبالك تدخل..
شبحله وقال؛حتى انت ياتارقي!
عبد القيوم فرد ايديه واشر عليه وهو يقول بإنفعال..
/انت بالذات اطلع منها اي تصرف ديره ينقلب عليها..ردة فعلك مش حتكون طبيعيه ودير الشك فاهمني..
حسين هدي شويه وهو يفكر وقال..
/توصل بيهم لهني!؟
عبد القيوم: توقع كل شي ياحسين كل شي توقعه لاتقول جيراني لاتقول هلي لاخوتي..في الوقت هذى ماتسبتعد عن حد شي..ردة فعلك لما تكون مش طبيعيه يأولوها ع كيفهم ومافي حد حينضر ساعتها غيرها هي..
ضم حسين ايديه لبعض وهو يشد عليهم بقوة من الغضب والقهر وكان يقول..
/الكلاب الكلاب..يحسابوا بنات الواعر ماوراهم حد شافونا سكتنا في اللي صار لأختي تمادوا مع بنت عمي ومازال بنسكتولهم..وخبط كفوفه ببعض بغيظ وقال...اااخ..ااخ..
عبد القيوم؛والطريحه اللي كلاها عمر ليلتها قريب مات بين ايديك..
حسين؛عبد الرؤوف اللي جي بيني بينه كان هدا راني دفنته في مكانه هالخ.رت.يت..خبط كفوفه ببعض وقال..والكلب الاخر كان معاه وقتها..تعرف قسما بالله كنت نبي نخلطه عليه وكان قالوا خيره يقولوا من الاعصاب معاش يفرز في شي قدامه..
عبد القيوم"ياريتك درتها"..
حسين بحسرة؛اااه..يارب الصبر وخلاص يارب شد فيا..تي هادي..هادي ياعبدالقيوم كانت بنتي ربيتها ع ايديها كنت نخاف عليها من روحي نندم كان كشخت عليها ولاعاركتها ندمت ندم سنين ع خاطر مرة مديت عليها بدي تمنيت نقطعها من مكانها..كيف يفرطوا فيها هكي كيف..
عبد القيوم وهو يسمع فيه..
تجمعت في صدره مجموعه مشاعر كل شعور اصعب من التاني..
الغيرة..الألم..الحزن..الغضب..
ماقدرش يعبر عن اللي يحس بيه الا بحركة رجله اللي كانت تهز بسرعه غصب عنه وهو يشوف لحسين بنظرات اختلطت فيها كل المشاعر..
فجأه..
دق باب الشقه هو طول قال..
عبد القيوم؛عبد الرؤوف..
وناض وخلا حسين وهو مقهور ع طوبى..
طلع من حداه وهو مقهور وموجوع اكثر منه وكان مجبور يكبت اللي يحس فيه..كل اللي قدر يطلعه وقتها..
زفير بعد شهيق عميق..بعدين مشي بيفتح الباب..
🍃🍃🍃🍃🍃
قبل الفجر بساعه اغلب الناس تتسحر..
وهما بعد سحورهم ضموا حوستهم..وطول الكهرباء انقطعت..
ورجعت اشتغلت المولدات مرة تانيه..
فتحوا مكيف الصاله وكلهم فرشوا بيرقدوا فيها..
واولهم غرفه اللي راحت في النوم..بعدين آلاء..
وقعدوا فردوس ومطيره وسالمين واريج وطوبى يراجو في الفجر..
🍃طوبى في طرف الصاله مفرشه صلايتها ومقعمزه ع الكرسي وهي شاده المصحف وتقرا..
جتها سالمين بطاسة ميه وقالت..
/بيبا ياقلبي هاك اشربي..
خدت طوبى الطاسه وقال؛صحيتي..
وقعدت تشرب وسالمين تشوفلها..
بعد ماشربت عطتها الطاسه..
خدتها سالمين ومشت وطوبى ولت تقرا في القرآن..
🍃خشت سالمين للكوجينه رن تليفونها..
طلعاته من جيب قفطانها وفتحت الخط وردت..
/ايوه جبريل.
"ايوه سالمين شن الاخبار"
سالمين؛الحمد لله شن اخباركم انتم ؟
"الحمد لله الامور ماشيه..شن مافيش جديد"
سالمين؛كيف ماخليتنا..
"باهي ماعرفتيش اللي صاير ؟"
سالمين؛مايدونش قدامي في شي وانا مانقدرش نسألهم..
تأفف راجلها وهي قالت بنبرة باكيه..
/مقطعه ياقلبي جبريل مقطعه قلبي
"لاحول ولاقوة الا بالله"
بغضب قالت..
/وكان نطق فيهن العقارب الزوز وفي هالاجرب اللي ينقاله راجلها نطلع منهم اللي داروه فيها..
"الله يرحمه لطفي باينه مامات الا من قهرته عليها"
بصوت مخنوق قالت..
"حتى انا قريب نموت ياجبريل البنيه كانت كيف الورده تقعد تتفرج عليها وماتمل فيها ديما ضحاكه وبسمتها في وجهها خلوها متعوسه وكبروها فوق عمرها عشرين عام غير فجعتها في سدرة لحقت عليها فجعتها في بوها..ناعليا عليها هالبنيه"
وحطت يدها ع فمها وقعدت تبكي بكتمان..
"خلاص ياسالمين صلي ع النبي وبطلي بكا "
خدت نفسها وقعدت تمسح في دموعها وقالت..
/اللهم صل وسلم على محمد..
🍃🍃🍃🍃🍃
وفي حوش سدره..
تحديدا شقة فايزة..
كانت فايزة مقعمزه حدا المروحه تقرا في القرآن وحداها تاله راقده..
وفي.الكوجينه صفاء ومروة يهدرزوا..
صفاء:شن دارتلهم؟
مروة؛بعتت صورهم ومحادثاتهم لخوتهم..
صفاء؛صور شني!؟
مروة؛مانعرفش صور شني مها هكي قالتلي مش اكرام جارتهم قالت بعد الفطور بالزبط سمعنا العياط وبعدين سمعنا صوت سيارة طلعت بسرعه وشورهم بعد ماقصقصوا عرفوا ان اكرام ضاربينها خوتها ورقدوها في المستشفى..
صفاء:والتانيه؟
مروة؛قالتلي صارلها نفس شي يخي هديكا طلعت هاربه من حوشهم وصار عار في شارعهم ع حسب مايخبروا البنات..
صفاء:اللهم لاشماته ياداير يالاقي..
مروة:وهديكا الشيطانه امتى بتلقى بس..
صفاء:جايها الدور تو طيح في شر أعمالها ربي مايخلي شي..
مروة بكره؛يارب خودلي حقي منها هي والحق.يره راما..
صفاء؛تو ياخدلك وتو تشوفي زي ماخدالك حقك من هادم...خل بنمشي نصلي ركعتين ونقرا قران قبل يذن الفجر..
ومشت طلعت..
ومروة خدت مالقي ميه وطاسه وطلعت بيهم من الكوجينه وهي تقول..
"حسبي الله ونعم الوكيل"
🍀🍀🍀🍀🍀
ويمروا من هداكا اليوم ثلاثه ايام..
ونضال نفسيته كل يوم في النازل بالذات بعد ماكلمه عبد الرؤوف وقاله..
"زي مامسكتها بالمعروف سرحها بإحسان معاش عندك معاها نصيب"
حالته اللي قعدت تسوء يوم ورا يوم كانت ع عين امه اللي قلبها كلاه الخوف عليه..
وفي ليله 21رمضان..
ركبتله امه لداره تشوفه وتهدرز عليه..
وين وصلت في داره لقت بابها مردود..
فتحتها وخشت..لقاته مقعمز ورا الروشن اللي يفتح ع حوش الواعر..كان مسكر ونازل عليه الستار وهو وراه..
تسمع فيهم يرشف..عرفاته يبكي..
بوجع قالت؛نضال..
هو طول مسح دموعه بسرعه وبقوة وقال بنبرة مرتعشه..
/نعم يام
قعمزت ع سريره وهي تشوفله بحزن وقالت..
/نضال اشبحلي..
هو غمض عيونه وحاول يتماسك ويتمالك نفسه قدامها..
بعدين فتحهم والتفتلها وقال:خير يام شن تبي؟
ركزت بنظرها ع عيونه المحمرة وقالت..
/خيرك وليدي؟
نضال؛خيرني يام ماخيرني شي..
مغليه بألم:تحبها هلبه وليدي؟
شد روحه بقوة مايبيش يبكي ويبان ضعيف قدام امه وماردش عليها..
مغليه؛اللي جابها وليدي يجيب غيرها واللي يبيعك بيعه وليدي..
غير نظره عنها وشاف للروشن..لحوش لطفي الواعر..
مغليه:كانهي مقدراتك حتى شويه راهي ماوصلتش بيها دير اللي دارته هي خالتها رغم كل شي قالت نبي نطلق من غير دوشه ومانبيش المحاكم..وهي اللي مارت منك كان كل خير فيسع فرطت فيك وخليت بينك وبينها حكم حكمه..
نضال بوجع:خلاص يام بالله عليك ماتزيدهاش عليا..
مغليه؛نبي نوقضك لروحك ولدي نبيك تعرف انها ماتستاهلش اللي دايره في روحك ع خاطرها..
نضال بألم؛بالله عليك يام اطلعي..
تنهدت مغليه بألم وناضت وهي تقول..
/ربي يجبر بخاطرك وليدي ربي يعوضك خير..
ومشت طلعت وهي تشوفله بحزن..
وسكرت الباب..
هو بعد ماطلعت حط قبضة يده في فمه وعضها بقوة من الألم اللي يحس فيه صدره وقعد يبكي..
🍃واريج في هداكا الوقت كانت تعول ع ضيافة ناس جايه تعزي ومافيش في قلبها حزن اكبر من حزنها ع جدها...
من بين الناس اللي كانت ضيف فيهم اريج...
سميرة اخت اسكندر وحداها مطيره تحكيلها..
مطيره؛حتى هي خلاص بتفارق..
سميره:مالا شنو ياكبدي لازم تفارق تبيها تقعد كنة هالعيلة العافنه..
مطيره؛ياريتنا ماخليناه يعقد عليها انحسبت عليها ياسميره وبتتسمى مطلقه..
سميره؛وكانا ياوخيتي وكانا خايفتيها تقعد غدوة يجيها اللي خير منه الف مرة وطيح في ناس تخاف ربي تقدر تعيش معاهم..خيرلها من هالطيحه السودا..
مطيره؛ان شاء الله ياربي ان شاء الله..تخلص هي وخالتها ويفتكوا ويعوضهم خير يارب...
🍀🍀🍀🍀🍀
يوم الإثنين..
11يونيو..سنة 2018..
في اواخر ايام شهر رمضان ..
الساعه 6:35مساءا..
كانت نجاة تجهز في نفسها هي وصغارها بش بتمشي تفطر في حوش اختها مروة..
قبل لتطلع دارت دورتها ع الحوش..
تسكر في الميه ..والضي..وتتأكد من الغاز..
وفي الاخير سكرت الرواشن ووين وصلت في الروشن اللي يفتح ع الشارع..
شافت سيارة حسين درست قدام حوش لطفي..
ونزلوا منها اميمه وطوبى ومشوا الزوز خشوا للحوش وهو نزل بعدهم وخش وراهم..
رفعت حاجبها وهي تفكر بعدين سكرت الروشن وحطت عليه الستار...
🍃🍃🍃🍃
وفي اسكتلندا..
كان مختار مقعمز وسط الطبيعه..
يشرب في شاهي انجليزي ويدور بنظره ع المكان وهو مستمتع بجماله..
قطع عليه لحظه الرواق اللي كان عايشها اتصال جاه من فاتن..
مختار؛شن تبي يامزعجه..
"اليوم مدايره عزومه لصحباتي الفطور"
قطع عليها وقال؛بتعزميني بش تعرفيني عليهم..
"اكيد لا ياطماع..نبي نسألك صايم ولا بش نحسبك"
مختار:لا..بس احسبيني في العزومه..
"حاضر تو نبعتهالك ديلفري"
ضحك وقال:ابعتيها مع وحده من صاحبتك..
"تافه"..وسكرت عليه..
هو قعد يضحك بعدين نزل التليفون وهدا ضحك ونهاها بتنهيده..
ورجع مرر نظره ع المكان...والذاكرة رجعت بيه لأيام حتى لو صابه الخرف او زهامير يستحيل ينساها..
🔺️قبل اكثر من عشرين سنه...
في حوش عيلة الباني...
كانوا في المربوعه ملتمين..
هو والمهدي وربيع ومحي الدين..
يتفرجوا ع فيلم اجنبي وهما منسجمين مع احداثه..
بعد ماتم قال ربيع..
ربيع:الحياة غادي تقولك هاجر وفوتها البلاد هادي بكل..
مختار:تسمي فيها بلاد اللي حني عايشين فيها لما تقارنها بالعالم اللي برا!؟
المهدي؛مش عارف شن اللي واخد عقلكم في حياتهم كلها عوجه..
ربيع:تفلسف تفلسف..
محي:ع اساس حني حياتنا مش عوجه خليني ساكت مانبيش ندوي..
ربيع:قولي ياسي مهدي..نقدروا نولوا يوم من الايام تجار كبار ولارجال اعمال عندنا شركات في البلاد هادي !؟
محي ابتسم تهكما..
المهدي:مشكلتك ياربيع انك طموح زياده عن اللزوم..
محي:وعلاش عيب!؟ مش من حقه يعني!؟
ربيع؛المهدي مايقدرش يفهمنا ولد عيله مربطه حبالها زين مع الجماعه اللي فوق يقدر يحلم ويدير اللي يبيه..
المهدي؛تبالغ هلبه..
محي:سامحني مهدي هدا الحق..
المهدي؛باهي باهي..قولوا اللي يعجبكم وفكروا كيف مايعجبكم اني بنقعد نسمع وخلاص..
ربيع:خلاص قريب نهج من هني..
مختار؛خلاص امورك سلكت!؟
ربيع:الحمد لله بوي سعالي في الموضوع لين صار منه..
محي:واخيرا بعد عام تشحيط..
ربيع:وتوزيع ورق اخضر هني وغادي..
مختار:امتى بالزبط؟
ربيع؛مانقدرش نقولك امتى مازال مش متأكد لكن قريب..انت شن صار فيك..
المهدي قعد يشوف لمختار...
ومختار قال بضيق؛مازال الحكايه صعبه شويه..
ربيع؛ع العموم حتى كان سافرت قبلك وصارلك بعدين تعالى لحوشنا وقول لبوي بش يقولي واني تو نتصرف بش نسهل عليك موضوعك ونخليك تجيني باهي..
مختار هز راسه وقال؛إن شاء الله...
🍃وروح يومها متكدر من حوش الباني عارف انه مش حيقدر يطلع من البلاد بدون مساعده ماليه تسهل عليه السفر بالذات مع الحصار اللي صاير للبلاد في هديكا الحقبه..
وين خش للحوش مشي طول بإتجاه الباب الفاصل اللي يرفع لحوش جده يبي يعرف منه شن صار معاه لأنه داره واسطه بينه وبين بوه..
مجرد ماوصل في الباب سمع بوه يناقش في جده بإنفعال..
لطفي؛منك جد يابوي تدوي معاي في الموضوع هدا..نسألك بالله يابوي مختار يقدر عليها الغربه!؟
علي:باهي لعند امتى يالطفي الولد كبر..
لطفي:كبر جثه وعمر لكن العقل قاعد زي ماهو..مايقدرش يخلص بقرة من طين كيف تبيني نخليه يهاجر قولي..
علي؛هو قالي ربيع ولد الباني بيساعده..
لطفي:غير يساعد روحه ربيع..بوه امس يحكيلي قداش تمرمد بش مشاله اموره وبعدين بيني وبينك ربيع ينعبا عليه الولد خدام ع راسه وفالح ودماغه ماشاء الله ينعبا عليه يحط في اخر الدنيا ويقدر يعيش لكن ولدي لا..تي مختار جيبة الخبزة من الدكان واحل فيها ومخليها لاخته الصغيره! مايعرفش يفرق بين الكتاشفيتا النجمه والعاديا..مايعرفش يركب عجله سياره..شن بنقول لنقول يابوي بس تقول اللي نحكي فيه ماتعرفاش..
تنهد علي بضيق وحط ايديه ورا ظهره..
لطفي؛هو راس هالولد مانبيشي يضيع مني نقعد نتعافر اني وياه لين نديره راجل يقدر يتحمل المسؤوليه ويخلفني من بعدي ولانفرط فيه ونخليه يدير مايبي ويضيع من بين ايديا..
علي:عندك حق ولدي عندك حق..الولد ولدك وانت ادرى بيه وبمصلحته...
🔺️في الوقت الحاضر..
شد بقوة ع طاسه الشاهي اللي كانت في يده لين كسرها من الغيظ..
فجأة سمع صوت نغمة رساله جاته ع تليفونه..
قامه وفتحها وقري المكتب فيها..
بعدين رفع حواجبه ورفع نظره القدام وعيونه مليانات كبر وعنجهية..
🍃🍃🍃🍃🍃
"الحمد لله صحتها كويسه وكل شي فيها طبيعي"
مطيره وهي تبخبخ في الميه برا قالت وع وجهها ملامح ابتسامة خفيفه؛الحمد لله..
سالمين وهي تقطف في الفل من الشجره متاعه..
/تحلي عويناتك ع خير يارب..
طوبى شبحتلها وقالت؛نبيك تحضري جيابي خالتي سالمين..
تعبوا عيون سالمين بالدموع وهي تقول بإبتسامه؛الاسبوع اللي بتجيبي فيه تلقيني حداك من اوله..
ابتسمت طوبى وسط ملامحها الباهته..
سالمين:اهو لمينا فل يافل..ومشت للطاوله اللي عليها سفر الفطور وقعدت تشرتع فيهم عليهم..
مطيره وهي تشوف فيها..
/هالحركه علمتهالنا ورده الله يرحمها..
سالمين؛حتى انا خديتها منها..شبحت لطوبى وقالت..زمان واجد..اول مرة يزورنا فيها هلك..امك شدت فيا دير معاي حاجه قتلها خلاص ديري القهوة..دارتها بعدين سألتني ع الفل اللي زارعاته في جناني قاعد لعند اليوم قالتلي عادي ناخد منه قتلها عدي يمي خودي اللي تبيه..وقطفت منه وطرطاشته ع السفره عجبني منظره بكل..بكل..وخديتها منها وحتى في بنيه..كانت تخدم عندي ممرضة لأمي الله يرحمها سماها عزيزه قعدت يوميا تجيب لأمي في قهوتها والسفره معبيتها فل..الله يرحمها..الله يرحم ورده..
ابتسمت طوبى بألم وهي تسمع في كلام سالمين ع امها وترحمت عليها هي ومطيره..
🍀وبعد ساعه من حديث الذكريات المعطر بالفل..
تلاقوا كلهم ع سفرة الفطور في الجنان ووفطروا في البرودة..
وفهاليوم كانت نفسيتهم متحسنه بعض الشي ياكلوا ويشربوا ويهدرزوا عادي...
🍃وتعدي الساعات وتمر بهدوء عليهم..
لعند الساعه 11 بالزبط..
بعد مابخروا الحوش وجو بيقعمزوا..
سمعوا الباب يدق..
طلعت مطيره طول بش تفتحه..
وين وصلت فيه قالت..
/مني..
ماسمعتش رد..
بس سمعت الدق تكرر..
استغربت هلبه...ومع هذا فتحت الباب...
وتلقى وراه مغليه واقفه وهي شاده شكاير فيهم تمر ولبن وبعض الحاجات....
#تحول
#طوبى
....يتبع....
