# طوبى "شارع القهوة"
#جمان_فريد
#الجزء_الثاني_والعشرين"استغلال فرص2"
لو فاتتكم صلاة او خش عليكم وقت صلاة صلوا قبل بعدين اقروا...الصلاة قبل كل شي وكل شي يجي بعدها
وصلوا على الحبيب🌼
☕☕☕☕☕☕☕☕☕☕☕☕☕☕☕☕☕
خش المهدي لداخل الحوش..
وقعد يمشي ويدور لين لقاهم في الصاله..
وامه واخته خديجه مقعمزات..
وعمر واقف عليهم يسمع فيهم شن يقولوا..
مغليه وهي حامقه:السفيرة عزيزة مش عاجبها قالت عمر مايناسبنيش..
خديجه بعصبيه:تقول ماعنداش شهاده..ووين قلنالها ع الشقة قالت...معناها دايرهاله عمي محمد..
عمر يسمع في كلامهم..حس بكبريائه انجرح..
وان كلام اميمه في اهانه واضحه..
مغليه:ماني عارفه شن حاسبات في ارواحهم بنات الواعر..لكن الحق مش فيها الحق في اللي ماشي يخطبها ويعزها بنت الفقري عبد المطلب..شبحت لولدها وقالت..والله والله..نخطبلك احلى منها وخير منها مية مرة وبنت عيلة معروفه خل تكسر خشمها هالجربه..
خديجه:قريبة حامد يام بنت الله يبارك عليها ومن عيلة متسميه تمسح اميمه وفيتها كامله..
"رد بالك ديرها"
سكتوا امه واخته وشبحوا للمهدي..
وعمر التفت وشبحله
المهدي وهو واقف في الباب وشاد الفردة متاعه؛رد بالك ديرها..تحساب كان درتها بتبرد ع روحك!؟ راك ماتحرق كان فيها...عمر خل رايك من راسك وقعمز مع روحك وفكر كويس
وانت ادرى باللي صاير..ادرى منا كلنا..
"ماتغلطش غلطي وتعيش باقي عمرك تموت ندم"
ومشي من حداهم..
مغليه شبحت لعمر:في فرق بينك وبينه كبير..هادي مشينالها وردتنا وقال مايناسبنيش..صدقت روحها هالجربه..
خديجه:اسمع كلامي وبرا كلم نسرين عن قريبة راجلها صدقني تنسيك اميمه واللي جابوها..
رفع عمر حاجبه وقال:لااني مكلم نسرين ولاحامد..اني كان جيت بنتزوج يااميمه يابلاش منه بكل...
ومشي بسرعه طلع من حداهم..
مغليه وهي مصدومه:ريتي!؟
خديجه:المهدي قلبله دماغه في ثانيه...
☘وعمر ركب بسرعه لداره..
خشلها ومشي وقف فالروشن..وحول الستار.
وقعد يشبح لحوش عبد المطلب وعيونه في لمعة دموع...
《 تقول ماعنداش شهاده..ووين قلنالها ع الشقة قالت...معناها دايرهاله عمي محمد..》
ضم شواربه لداخل بعصبيه..
بعدين رد الستار..ومشي خدي مفاتيحه وتليفونه وطلع من داره...
☘☘☘☘☘☘
"بارك الله فيك عواطف ربي يجعله في ميزان حسناتك"
عواطف بإبتسامه:ماعنديش فيه جميل..والله نشوف فيها زي امي..والحمد لله دارت العمليه وحالها ولى باهي مانبي شي اكثر من هكي..
:تسلمي يارب..
عواطف ضحكت وقالت:هي نستأذن توا وراي خدمه..
:تفضلي..
مشت عواطف طلعت من الحجرة بتشوف باقي شغلها.
وهي ماشية تلاقت مع مراد..
اللي ماصدق شافها وقال:ابله عواطف..
عواطف:ممرضة لوسمحت..
مراد بضحكه:ممرضة عواطف طويله هلبه..
عواطف:قول سستر..
مراد ضحك وقال:وشن الفرق..
عواطف:فرق كبير..
مراد ابتسم وقال:باهي ياسستر اول شي شن حال خالتي..
عواطف:الحمد لله اليوم احسن..
مراد:الحمد لله..تاني شي شن حالك انتي..
عواطف:الحمد لله..
مراد:دوم ان شاء الله.
هي يدوب ابتسمت وماردتش..
مراد:ع فكرة الالوان الفاتحه تطلع عليك اكثر..
هي شبحتله بنظرات مفاجئه..
وحست بنبضات قلبها تسارعت..
اول مرة تسمع كلام زي هدا من راجل..اول مرة يكون في راجل شايفها وملاحظها ومركز ع لبسها..!
ابتسم ابتسامه جذابه وهو يقول:ربي يحفظك..
ومشي..
وخلاه مازال مش مستوعبه اللي سمعاته..
قعدت تمشي وهي تسمع فالكلمات الحلوة تتردد ع مسامعها اكثر من مرة...
قعدت تقول لروحها..
"هذا كان يكلم فيا اني!!...قالي الالوان الفاتحه تطلع عليك!..واضح مركز فيا هلبه!
اهو حتى انتي ياعواطف عندك معجب ومركز معاك"
شدت ضحكتها بعدين قالت:لكن نحس في صغير شويه..
فات من جنبها زميل ليها سمع كلمتها وقال:من هو هدا..
عواطف:الهى بخدمتك الهى..
هو قعد يضحك..
وهي قعدت تمشي بعصبيه وتقول:هادي اللحظات هادي يخربوها عليك...!
☘☘☘☘☘☘☘
مقعمزة في دار النوم..
مسكرة ع روحها ومقعمزة ع السرير..
وفي يدها البوم صور..تتفرج عليه وهي تبكي..
تحاول تكتم صوتها بس بناتها مايسمعوهاش.
فايزة ببكي وصوت منخفض:مش مصدقه لتوا انك خليتنا خلاص..معاش بنشوفك معاش بتسمع حسك...كيف بنكمل حياتي من غيرك مش عارفه..اني حاستها تمت يااحمد خلاص من بعدك تمت..فايزة ماتت معاك خلاص..
لو بنكمل فهالدنيا ع خاطر بناتنا بس...تنهدت من قلبها تنهيده قهر.. بعدين طلعت صورة من الالبوم وسكراته وقعدت تشبحلها...خدوها في ذكرى زواجهم الاخيرة..
كانوا الزوز اسعد ناس هداكا اليوم..
ولاهو لاهي كانوا عارفين انها اخر مرة..
..برا من الدار...
كانت امها تكلم في وحده من خوتها بالتليفون..
مشتده:كيف هكي كيف!! نساوين بايتات في شقه برواحنا..
"وشن بيصيرلكم "
مشتده:انتم كيف راضيينها ع ارواحكم يسمع بينا الناس يعيبوا عليكم..
"بالله فكيني من كثرة الدوة يام اني راجل نخدم وتاعب وايامي سود ونبي نرتاح انتي تبي تروحي قولي غدوة نجيك نروح بيك"
مشتده بصدمه:ونخلي اختك وبناتها بروحهم!؟
"عند الله ماعندهاش ومقطوعه من شجره...مامنهم عايشات برواحهم هما وصغارهم ماصار فيهم شي"
امه سكرت في وجهه معاش تحملت تسمع ماتوقعتش ولادها يكونوا عديمي نخوة ومروءة لهالدرجه!
وزاد خوفها ع فايزة وبناتها زاد هلبه..
☘☘☘☘☘☘
طالع بمخده وبطانيه من الدار وهي تمشي وراه وتقول..
عائشه؛كيف هكي مايجيش راهو..
المهدي:قتلك ندعيكم..
وقعد يسعل بقوة..
عائشه بخوف؛ياربي كحتك قويه هلبه..
المهدي وقف سعال وقال:ااه..من قبل هكي..
وفتج الباب وطلع..
شدت عائشه الباب وقالت؛بننزل معاك..
المهدي؛ديريها وانزلي ياعايشه وشوفي شن بصير فيك..
ونزل لوطا بسرعه وهو يسعل بقوة..
وهي بتموت من خوفها عليه.
~~~~~~~~
مغليه وهي تدهن في صدره بزيت زيتون؛معقوله تخليك تطلع من حداها هكي..خايفه منك تدعيها هي والصغار..
المهدي؛واااك يام..والله العظيم مني اني..اني قلتلها بننزل نرقد في المربوعه بش ماندعيكش انتي والصغار..وحلفت عليها بالطلاق ماتلحقنيش.
مغليه نزل فانيلته وهي تقول؛باهي وانت كليتني ع خاطرها..كل حد يشحط في عروقه عليا ع خاطر السنيورة متاعه واني مامدورني حد ان شاء الله ننحرق.
وناضت وفيدها صونيه ومشت طلعت من المربوعه..
والمهدي غمض عيونه وحرك راسه يمين ويسار بعدين حط ذراعه ع عيونه وحاول يرقد..
بس بدون فايده...
السعال معاه زاد...ومن قوته قعد يحس بوجع في صدره..
وبين الكحة والتانيه كان يطلع صوت تصفير من صدرة..
مغليه بخوف:لالا هدا يبي مستشفى ياحليلي..
محمد بقلق:هي نوض يالمهدي..
المهدي بشي من التعب:خلوني هني.
بوه بنرفزة؛تي نوض تحرك نوض..
الجالي بقلق:ماتعاندش يامهدي..ومشي طلع من حداهم بش يولع سيارته..
عائشه كانت خايفه تنزل لأن حالف بالطلاق..
لين خدوه وطلعوه من الحوش بوه وخوه ورفعوه للمستشفى..
نزلت تبكي وهي تقول:علاش رفعوه..
مغليه وهي تبكي قالت بعصبيه:كان هامك ولامدروتيه ماخلتيش يوصل لهالحاله..
عائشه ببكي:ولدك ياعمتي مايبيش ياخد شي ع قد مانديرله وانت بروحك تعرفي طبعه هدا انتي اللي قلتيلي عليه..
مغليه بغضب:كانك مراة مقومه راك غيرتي هالطبع..طيح سعد لافلحتي في هادي ولاغيرها..
ومشت وخلتها وهي تشوفلها بنظرات ألم..
☘☘☘☘☘
رفعوا المهدي لعيادة وغادي داروله الفحوصات اللازمه وعرفوا ان عنده التهاب في الشعب الهوائيه...
وداروله دخول فيها..بيقعد فيها مده معينه ياخد كورس علاجي وبعدين يكمله في الحوش...
وعائشه مسكينه مارقدتش ليلها كله وهي تراجي فيهم يروحوا..
ولما روحوا نزلت تجري..وسمعت عن اللي صار فيه من بوه وخوه وزادت انغمت اكثر...
🌻🌻🌻🌻🌻
تاني يوم...
الساعه 11:00صباحا...
درس بسيارته قدام حوش نساباته..
نزل منها وهو يتكلم بالتليفون..
الفاندي:وتوا وقفت فم الباب بالزبط وبنطق..اها..
وقعد يدق في الباب دقه بلحن..
"هيا هيا هاني وصلت في الباب"
الفاندي سكر..وقعد يمشي في شعره للخلف وهو يساوي فيه..
وينفتح الباب..
لطفي بإبتسامه؛اهلا اهلا اهلا..
الفاندي من الصدمه معاش عرف شن يقول للحظات بعدين ابتسم بارتباك وقال؛كيف حالك عمي..
لطفي:الحمد لله..هي تفضل خش..
الفاندي جي بيخش وهو يقول:يزيد فضلك..بعدين استاقظ انه نسي حاجه وقال..اه ايه حقه..وع وجهه ابتسامة الارتباك نفسها..
ولف ومشي لسيارته فتح الكوفني وطلع منه قابيه وراته..
لطفي:تي غير علاش هدا كله؟
الفاندي حط القابيه وقال:ماقالتلكش السدرة اليوم عازمكم ع الغدي..
لطفي بإستغراب:وين؟
الفاندي بإبتسامه؛في مصيف****** حني وياكم العيلتين هي قالت نجيبلها حصة من الحوت ديرله نظامها مش عارف شن بدير..
ضحك لطفي وقالت؛فهمت فهمت..
الفاندي:اهم شي العزومه مقبوله..
لطفي هز راسه بإبتسامه وقال؛اكيد..ان شاء الله..
الفاندي :ان شاء الله..نتلاقوا بعد العصر ان شاء الله...
لطفي بإبتسامه:ان شاء الله..
الفاندي:السلام عليكم..
لطفي؛وعليكم السلام..
راجاه لين ركب سيارته ومشي..
بعدين رفع القابيه وسكر الباب برجله وقال:تلخبط مسكين..
سدرة بضحكه؛بالذات وين قالك ماقالتلكش السدرة عازمكم اليوم ع الغدي!؟
لطفي وهو يضحك بعقدة حواجب:واني نقوله وين!؟
سدرة قعدت تضحك..
بعدين قالت:هات عندك بوي خل نلحق تتبله بش نشوي منه طريفات لفايزة وبناتها..
مدلها بوها القابيه وقال؛حتى عمتك جاية؟
سدرة:ايه هو قالي اعزميها..وخدت منه القابيه وخشت..
وهو مشي..
حطت القابيه ع الطاوله وقعدت تتفرج ع الحوت من كثر ماهو طازج لين يتنطر تنطير في القابيه..
شويه وجتها رساله ع الهاتف..
ضحكت وقامت التليفون وفتحتها..
(تو تندمي)
هي ضحكت وبدت تكتب بعدين بعتت..
(رد واحد ع العشرين مقلب اللي درتهم فيا)
بعتلها..
(مش زي هدا والله بردعهم كلهم موقف محرج).
قعدت تضحك سدرة بعدين بعتتله..
(عادي عادي تصير في ارقى العائلات)
هو رد عليها برمز القلب..
هي ابتسمت...
شويه وبعتلها..
(نبي نتجكتر بيك اليوم قيمي القدر)
بعتتله..
(ماتوصيش حريص..هي سلام توا خليني نخدم ع راسي)
بعتلها..
(ربي يعاونك قلبي)
ابتسمت بعدين مشت حطت التليفون في الدولاب...
والتفتت ع الحوت وبدت شغلها...
☘☘☘☘☘☘
خشت العيادة وهي مش طايقه روحها من حرارة جو..
مشت لحجرة خاصة بالممرضات. لبست البالطو متاعها ومشت تشوف شن عندها من خدمه..
:الصدريه قسم الرجال الحجرة رقم عشرة في مريض عنده جرعة مضاد بعد خمسة دقايق بالزبط لازم ياخدها..
وهادي وصفته..
صابرين خدت الوصفه ومشت طلعت من سكات.
:مركها ومرزن دمها...
☘وهي ماشيه في الممر..
اتصلت بيها نجاه ردت طول..
صابرين:بسرعه بسرعه نجاة وراي خدمه..
"قصدك من الجامعه طول للعيادة؟"
صابرين؛ايه..
"تمام لما تفضي اتصلي بيا..
صابرين؛تمام..
"دقيقة اليوم عندك عيادة بس. "
صابرين:ايه من توا لبعد المغرب..
"اها تمام..سلام"
سكرت صابرين ومشت تجري تجهز في الدوا اللي بتعطيه للمريض..
بعد كملت مشت تجري لحجرته..
وصلت فيها وفتحت الباب وخشت وهي تقول:السلام عليكم..
المهدي وهو حاط ذراعه ع عيونه:وعليكم السلام..
قربت منه وقالت بلطف:لاباس ان شاء الله!
هو حول ذراع عن عيونه وقال:الشعب الهوائيه ملتهبه...
ماسمعش منها تعليق..شبحلها..
لقاها تشبحله وخلاص.
المهدي وهو عاقد حواجبه:خير ياأبله في حاجه!؟
صابرين:المهدي!
هو تفاجئ وقال:نعم!
صابرين ضحكت وهي مصدومه بعدين قالت:انت المهدي خو طاهر..
هو زاد استغرب وقال:معليشي من تكوني!؟
صابرين بضحكه وعيونها تلمع:اني صابرين اخت نجاة خطيبة طاهر..
المهدي رفع حواجبه وغير عيونه عنها وقال:اها..اهلا..
هي ابتسمت وقالت:هي خل نعطوك دواك..
وعلقتله المضاد وضربت ابرة منه في كيسة تغديه وهي تقول:بسم الله الشافي المعافي..
اللهم شفاءا لايغادر سقما..
وهو يسمع فيها بدون مايشوفلها..
صابرين:شكلك ياتشرب في المصقع يالبسك خفيف ياتحب التكييف بزيادة..
ابتسم المهدي ع جنب وقال:كلهم..
ضحكت وقال:لا ماعندهاش تلتهب..
ضحك نص ضحكه..
كملت صابرين وقالت:يللا ربي يشفيك ويعافيك..طهورا..
المهدي:بارك الله فيك..
مشت صابرين وطلعت من الدار...
وقلبت ماتطلع شبحتله لقت يشبح للأكياس المعلقه..
ابتسمت وسكرت الباب..
بعدين مشت وهي بطير من الفرحة واتصلت طول بنجاة..
صابرين؛تي ردي ياشلاكه..
"شلاكه انتي يامعفنه"
ضحكت صابرين وقالت؛كان نقولك من شفت كان نقولك من راقد هني في العيادة وكنت معاه ونهدرزوا مع بعض.
"تي قولي ياباردة منو"
☘☘☘☘☘☘☘
الساعه 3:00بعد الظهر..
طلعت صفاء بنت فايزة من الصاله ماشية بتفتح الباب..
فتحاته..
سدرة وهي رافعه في يدها حافظه فوقها طاجين:شن جو صفو..وخشت..
سكرت صفاء الباب وهي تقول:الحمد لله..ماما خالتي سدرة..
شويه وجت فايزة وهي تقول:سدرة كيف الحال..
وسلمت عليها بالخد..
سدرة:الحمد لله شن حالك انتي.
بعدت عنها فايزة وقالت بإبتسامه باهته:الحمد لله ع كل حال..
سدرة:الحمد لله..
فايزة:خشي..
سدرة:لا والله مستعجله شراده خودي .
خدت منها فايزة وهي تقول:ريحة حوت؟
سدرة بإبتسامه:ايه وراثه مشويه وتحتها حافظه فيها بيتزا وكفته...هدا كله من هوبا..
فايزة بإبتسامه:الله يخلف عليه يارب..
صفاء:قوليله شكرا..
ابتسمت فايزة..
سدرة قرصتها من خدها وقال:يوصل...طلقتها وقالت..سامحيني فايزة معاش انشغلت بالخدمه امتحانات ومراقبة وطوبى وامتحاناتها حتى هي..قصرت معاك هلبه..
فايزة:عمرك ماقصرتي ياسدرة ومعذورة في كل وقت..
سلمت عليها سدرة بالخد وهي تقول:نجيها ياربي..
هي بالسلامه توا..
فايزة:ايه حقه نسرين بتجي العشية بتبات عندي ومعاها صغارها..
سدرة:حلو بكل...
فايزة بإبتسامه؛ايه هي بري بري..مانعطلكش..
ضحكت سدرة وقالت:بالسلامه..
فايزة؛بالسلامه..
وطلعت سدرة من الشقه..
ونزلت تجري...وطلعت من العمارة لسيارتها..
ركبتها وتحركت بسرعه لحوشهم...
☘☘☘☘☘☘
وين وصلت غادي..
وتت باقي الحاجات وخواتها معاه.
آذن عليهم العصر وهما مكملين..
بعدماصلوا العصر وتوا رواحهم وقعدوا يراجو في بوهم امتى يروح من الجامع..
شويه وروح...طلعوا الحاجات وحطوهم في السيارة وتحركوا طول للمصيف...
☘تلاقوا غادي مع اهل مع ايهاب وكانت اجواء اللقاء حلوة بالمرة..
بعدين لحقت عليهم مطيرة..وانقلبت الخيمه اللي هما فيها لضحك وهدرزة حلوة..
زادت عالة الشاهي اللي مقعمزة عليها ام ايهاب الجمعه حلاوة..
شربوا شاهي وكلوا حلاوات وفطيرة وسفنز..
وبعد ماغربت الشمس..
وجي وقت اذان المغرب..
صلوا صلاتهم..
بعدين طلعوا النساوين وقعدوا يتمشوا ع البحر..
والرجاله يشووا في الحوت..
الفاندي كانوا عيونه ع سدرة يبي يحصل معاها فرصه..
ولطفي كان ملاحظه...
لطفي؛بري ولدي هدرز ع مرتك شويه...
الفاندي شبحله وهو متفاجئ ومحرج في نفس الوقت..
لطفي بإبتسامه:برا اني والجماعه نشدوا عليك الشوا..
ناض الفاندي وهو مبتسم بإحراج ومشي ناحية سدرة..
اللي كانت واقفه مع عمتها ع الشط وهما يتفرجوا ع اختها غرفه وحمواتها كيف يعوموا..
اما طوبى فكانت مقعمزة بروحها وفي يده كراسه رسم كبيرة وترسم..
سدرة:نخمم فيها ليل مع نهار كيف بيصير فيها شن بدير..
مطيرة:تفي ع خوتها خوة العازة والقهرة حاشى من قدامي..والله مايجوا رجاله..حتى ذكورة ماتنقالش عليهم..
سدرة:الله يسامحها عمتي مشتده ربايتها فيهم هي السبب فرحانه بيهم ولاد دللتهم وفضلتهم ع بنتها الوحيده..وياريتها في الاخير حصلت منهم حاجه..
مطيرة:نذكرها لما جابت فايزة المراة تقول جابتها بالحرام استغفر الله..نساوين الشارع كلهم زبطوها انها مش فرحانه بيها..تي يخي كانت تقول اللي يجيب بنت مايربح..ياما صار بيني وبينها ع خاطر دوتها هادي..
سدرة؛لاحول ولاقوة إلا بالله!..وشن ربحت من ولادها تي قالتلي فايزة ولدها الكبير في حوش واحد يقعد بالايام مايندريش عليها ومخليها لمرته تعامل فيها اسوأ معامله..لما جت من عندهم وقعدت عند فايزة كانت رايحه زي التل وصحتها بالهون..وعند فايزة ولت زي البرميل وصحتها خير من صحتي..
مطيرة تنهدت وقالت:عقليات يابنتي عقليات..
"السلام عليكم"
التفتوا الزوز وشبحوا للفاندي..
سدرة ضحكت..
ومطيرة قالت:اوو شاميه شن جو؟
الفاندي بضحكه:تمام ياعمتي ويولي تمام التمام كان تبطليها شاميه هادي..
مطيرة:لا..وهاه..شن امورك شاميه..شن داير شاميه..صحيت ع زريدة ع الشاميه وسعت خاطري..
وسدرة والفاندي يضحكوا..
مطيرة:هو في احلى من الشاميه ياراس القومبالي..
سدرة وهي تفنص:عمتي!
مطيرة:ماتفنصيش ايهاب وليدي مايزعلش مني واني زي امه..
الفاندي بضحكه:والله حق..ربي يحفظك..
مطيرة بإبتسامه:تسلم يارب..هي نخليكم ياجوز الحمام مع بعضيكم..رفعت يدها وقالت..الى اللقاء..ومشت من حداهم..
وهما يشبحولها ويضحكوا..
الفاندي:ربي يحفظها جوها يعجب هلبه..
سدرة:يهبل..
شبحلها الفاندي شويه وقال:انتي تهبلي اكثر..
شبحتله وابتسمت بخجل..
الفاندي:تعالي جاي تعالي يامتاعة المقالب انتي..
وسدرة تضحك...
وعيون طوبى عليها وهي مبتسمه..
تنهدت بعدين غيرتهم عنها وشبحت للبحر وقعدت تتأمل فيها..
وفي يدها كراسة رسم..رسمت فيها منظر البحر في الليل رسمه حلوة ع الآخر...
☘☘☘☘☘☘
"مهتمين بيك هني"
المهدي:ايه...حقه..اخت خطيبتك تخدم؟
طاهر:ايه واخدة شهادة تمريض وتخدم بيها علاش تسأل؟
المهدي: ماهو تخدم هني ماشاء الله عليها تخدم بضمير..واسلوبها كويس..
طاهر وهو متفاجىء:نعرف انها تخدم في عيادة لكن مانحسبهاش هادي..
المهدي:لكن ياراجل تحسها صغيره في عمر نضال ولاعمر..
طاهر:ايه هي في الاصل تقرا في الجامعه كلية التقنيه الطبيه..وخدت شهادة التمريض بش تخدم بيها وتصرف ع روحها..
المهدي:سامحني طاهر..هما حالتهم الماديه تعبانه لهالدرجه!
طاهر:بنات خلاهم بوهم من غير مايضمن مستقبلهم باهي اللي خلالهم وين يدكوا روسهم.
المهدي:ع حسب علمي عندهم خوت ولاد..
طاهر:من المراة التانيه مازال اصغر منهم لكن ياراجل لامدورين خواتهم ولايندوا عليهم مرت بوهم قاطعتهم عن خواتهم..
المهدي:لا حول ولاقوة الابالله..
طاهر:وبعدين صياع ضياع ماظني ينفعوا حتى بعدين..
المهدي:شن بنقولك..ع قد ماوجعني حالهم ع قد مااحترمتهم..الحق عرفت تختار..
طاهر ابتسم وقال:الحمد لله.
شويه دق الباب ..
المهدي:خش.
انفتح وخشت صابرين..
شبحت طاهر ضحكت وقالت؛اهلا..
طاهر:طلعتي تخدمي هني؟
صابرين سلمت عليه باليد وقالت:ماقالتلكش نجاة.
طاهر:نعرف انك تخدمي في عيادة لكن مانعرفش اما هي..
مشت تعلق في المضاد للمهدي وهي تقول:هاه كيف الحال يالمهدي توا؟
المهدي قعد يسعل وهي تشوفله بضيق..
وقف وقال:الكحه مابتش تخف..
ابتسمت صابرين وقالت:توا تخف ان شاء الله مع الايام رغم انها تبي وقت..اصبر بس..
المهدي:هانا صابرين..
ضحكت وقالت:كيف عرفت اسمي؟
ابتسم وقال:اسمك صابرين..
صابرين بإبتسامه:ايه..خدت يده وقعدت تغير في الكانيولا وهي تقول..اسم على مسمى.
المهدي شبح لطاهر..
وطاهر هز راسه بأسف..
صابرين:بسم الله الشافي المعافي..اللهم شفاءا لايغادر سقما..
ابتسم طاهر..
صابرين؛طهورا ان شاء الله..هي نستأذن اني توا تم دوامي تو يكملوا معاك زملائي..
المهدي:بارك الله فيك..
صابرين بإبتسامه؛واجبي..
طاهر ناض وقال؛طالع وراك..
صابرين؛مش لازم خليك مع خوك..
المهدي:لا مايجيش تروحي في تاكسي بروحك خليه يتبعك هكي خير.
صابرين بإبتسامه:تمام..تصبح ع خير..
ومشت طلعت وقلبها بيطير طيران..
طاهر:ان شاء الله لاباس..موليلك غدوة بإذن الله..تصبح ع خير..
المهدي:قدامك كل خير...
~~~~~~~~~
"يهبل يانجوته يهبل عليك راجل محترم واسلوبه راقي لين خلاص"
نجاة وهي تحدد في حوايجها؛جاتك ع الطبطاب..لكن زي ماقتلك خليك ماشيه هكي تحكمي في روحك الجو هداكا فوتيه...المهدي مايحبش جو التسهويك والنحنحه..
صابرين:لالا شادة روحي مستعده ندين ع خاطره..
نجاة حطت المكواة ع جهة وقالت:شن هدا!!؟لالالا ماتوليش هكي صابرين لازم ترزني وتكوني قويه...كان صار وجبتي المهدي للطريق وخلتيه ياخدك مش بس حتواجهي مرته..حتواجهي خديجه الشومه وحتى نسرين اللي حتولي في صف صاحبتها..حطي في راسك انك حتولي مرت المهدي كبير خوته اللي كل شي تحت يده وهو بوه في العيله راس واحد..لازم تكوني قويه وقد روحك بش تثبتي وجودك..
صابرين:كلامك صح..بس يعني تتوقعي يصير..
نجاة:خليك متخيله ديما انه صار وحيصير..وبعدين علاش مايصير في حد يقدر يقاوم بنيه صغيرة وحلوة ودمها زيك..خصوصا ان اللي واخدها دمها رزين مبردها مش عارفه كيف متحملها
صابرين:ايه دايرة روحها شيخة وديما مكزمه والله ماتستاهل ظفره..
ولت نجاة تحدد وهي تقول:حظ القبايح في السمي لايح..
صابرين اشرت ع روحها هي واختها وكلمت تقول..وحد الملايح في الوطى طايح...
☘☘☘☘☘
ومن الاخوات نجاة وصابرين...
لنجاح وعواطف..
كانت نجاح راقدة ع جنبها وتشبخ لعواطف كيف سرحانه وتشبح للسقف..
نجاح:يابنت انتي وراك قصه كبيرة..
شبحتلها عواطف..
نجاح:احكيلي معاش بديتي تحكيلي في شي بكل ودسي عليا..
هي جت بتحكيلها بس قالت في نفسها..
"مرات تحسدني وتخرب عليا نجاح محسديه هلبه"
عواطف:مافي شي نحكيه..وهي تصبحي ع خير..
وعطتها بالظهر ..
نجاح:سيورك تجيني زي الهوهو وتحكيلي..
عواطف مابتش تعدل عليها...
عصبت نجاح وعطتها بالظهر....
🌻🌻🌻🌻🌻🌻
اما في حوش الجيران..
اللي كيف روحوا من زردتهم..
سدرة:والله ياريتك تباتي..
مطيرة:حتى اني خاطري لكن خو جاي صاحب عمك الشامس ومعاه اخته من الزاويه يبوا غدي ..
سدرة:باهي تعالي الخميس والله مستاحشاتك هلبه نادوا حتى ع فردوس تجي..
مطيرة بإبتسامه:ايه نمشوا نهدرزوا ع فيزة ونتعشوا عندها ..
سدرة :خلاص راهو اتفاق..
مطيرة بضحكه:خلاص..هي تصبحوا ع خير..تصبحوا ع خير ياطوبى ياغرفه..
طلعوا الزوز من دارهم يجروا وقالوا مع بعض:مش بايته!؟
مطيرة:تجي الخميس ان شاء الله ونبات..
طوبى:نراجو فيك خلاص عطله بنكسدوا..
مطيرة بضحكه:باهي..هي تصبحوا على خير عمكم الشامس من بكري يراجي ياحليلي..وطلعت تجري..
وهما يضحكوا..
وصلت برا لقت خوها واقف ع سيارة راجلها ويهدرزوا.
ركبت السيارة..
لطفي؛تو نتلاقوا مرة تانيه ونزيدوا نهدرزوا في الموضوع..
الشامس:ان شاء الله..
وخر لطفي عن السيارة وقال:هي تصبحوا ع خير..
مطيرة والشامس؛قدامك كل خير..
وتحرك الشامس بالسيارة..
مطيرة:اكدلك صاحبك ع جيه..
الشامس:ايه..
مطيرة؛الحق استاحشت ناديه هلبه واستاحشت هدرزتها..
هو قعد ساكت وماعلقش..
مطيره:زعمه غدوة شن ندير غدي..نقول هكي ندير رز بالبصله ومحشي وطاجين..
الشامس:نجيبلك فلفل وسلق وباذنجال..
مطيره:ايه حقه ناديه تحب محشي البذنجال..باهي باهي جيب..جيب...
🌻🌻🌻🌻🌻
تاني يوم..
الساعه الواحده ظهرا..
بالأحضان تسلم عليها وهي تقول:مرحبتين مرحبتين..
ناديه؛رحب بيك..شن حالك يامطيره..
مطيرة:الحمدلله في خيار الخير..
قعدت ناديه تمشي وتوزع في نظرها ع الحوش:ماشاء الله صينتي وجددتي اثاث..
مطيرة:هدا الشامس ياحنه يحب يفتلك..
رفعت ناديه حاجبها وقالت:اها الشامس..
مطيره؛قعمزي قعمزي..
قعمزت ناديه ع الجلسه وهي تتفحص فيها بعيونها..
مطيرة؛قهوة ولاشاهي..
ناديه بإبتسامه؛قهوة حبيبتي..
مطيرة؛خلاص ندير قهيوه لينا حني والتريس..قهوة جنه..
ناديه:من لما فتح خوك الفرع غادي وحني ماشيين عليه جايين..
مطيرة:ايه هو يحب يمشي لفرع الزاويه قال زباينه هلبه..هي خل نخش ندير القهيوه..
ومشت طول للكوجينه..
وناديه راجتها لين مشت بعدين قامت تليفونها وكتبت رساله بعدين بعتتها...
🍀🍀🍀🍀🍀🍀🍀
وتمر ايام شهر الماء "5"
وعمر مختفي تماما عن اميمه معاش جي لكلية الطب نهائي..
واميمه برغم انها كانت مضايقه بس كانت شايفه انها هكي زادت تأكدت ان عمر مش صادق معاها وان رفضها ليه خلاه يحولها من راسه..
وعمر..ماكانش يجي لحوشهم الاوقت النوم..
ولى بعيد عن خوته هلبه ماعدا طاهر اللي كانوا يتلاقى هو وياه هلبه برا الحوش ويهدرزوا...
وامه تاخد وتدعي ع عيلة الواعر كلهم اللي تسببوا في عذاب ولادها...
زي كبيرهم..اللي كان طول وقت قعاده في العياده مانع مرته او اي حد غيرها من النساوين يجيه ويتواصل معاهم بس في التليفون..
اخت خطيبته كانت مهتمه بيه هلبه..وحتى الماكله هي اللي تجيبله فيها..وكانوا يهدرزوا مع بعض..
بس كلام مقتضب لأن المهدي كلمه وقص..
وهي كانت تحاول ع قد ماتقدر تظاهر انها بنت عاقله ورزينه...
فكرت تطلب منه الرقم قبل ليطلع بس نجاح خلتها توخر لما قالتلها..
"لو درتيها كل اللي بنتيه فهالايام ينهد في دقيقه"
وطلع المهدي في المستشفى بعد ماقعد مده لاباس بيها..
حال تحسن بس مازال السعال ملازمه ع خفيف..
وعائشه لاحظت ان وجهه ناير ارتاح قلبها واطمن عليه...
من جهة تانيه..
مراد تقرب هلبه من عواطف وماتعبش هلبه بش خلاها طيح في شباكه.
عواطف اللي مش قادرة تصدق ان في شاب بمواصفات مراد معجب بيها..وعايشه معاه مشاعر حلوة عمرها ماعاشتها في حياتها..
وع قد ماحاولت نجاح تعرف منها شي..لكن هي كانت متكتمه بقوة..
اما خوهم..فكان عايش في عذاب..
صابرين فاتاته بكل وغيرت رقمها مرة وحده..
وحتى المستشفى اللي كانت تخدم فيها سيبتها..
وهو صايرة فيه حاله..الراجل حبها بجديات..لدرجة انه سيب كل شي وقعد في جرتها يدور عليها..
وهالوضع اكيده مامرش ع خديجه مرور الكرام..وبدت تشك ودور حتى هي..
اما عن فايزة..
فكانت قاعده عايشه حالة الهدوء الحذر الى جانب حزنها..
تسكيت اهل احمد كان مخوفها هلبه.
في نفس الوقت..نسرين او نقولوا حامد راجلها ماخلاهمش ديما يجيب في نسرين ومايخلي مايكرر..
ونسرين كانت تتبلد وتتجاهل قصدا ماتبيش تخسر راجلها ع خاطر راجل مايسواش..
وخوها..حتى هو كان يومين في الاسبوع ياخد في البنات مع صغار خوته ويطلع فيهم كل مرة في مكانه..
وكذا واحد من جيران شارع القهوة لاحظوه..
منهم من قعد يبجل فيه..ومنهم من قال..انه مايديرش هكي بلاش اكيد حاط عينه ع فايزة.
وهالاشاعه بدت تنتشر لين وصلت لمغليه..
☘مغليه:حق انت حاط العين عليها..
الجالي بضحكه:نعم!! فايزة اختي الكبيرة راهو زيها زي عيشه وزي سدرة بالزبط..من البهايم اللي قالوا الكلام هدا.
مغليه:مش مهم توا من قال..المهم سلم ولدي تتقي الشبهات وتفكنا من الدوة..راك ياولدي حاجه كبيرة عند الناس في الشارع وكلهم يعزوك ماتخليش صورتك تهتز في نظرهم..
الجالي وهو يفكر في كلامها قال:حاضر..
مغليه:ديمل نقول فيها انت خيرة ماجبت وحتى بوك يقول فيها..عمره ماتعبني بعقله ورزانته فايت خوه المهدي...
الجالي ابتسم وقال:ماتخافيش يام صورتي في نظركم ونظر الناس حتقعد زي ماهي..
مغليه:ربي يرضى عنك دنيا وآخره..
وقعد الجالي يشوفلها بإيتسامه وهو يطربق في ايديه..
☘☘☘☘☘
وفي نفس اليوم..
مغليه مشت مع نضال لشقة فايزة...
☘مشتده:كيف حال محمد والولاد والبنات وعويلتهم..
مغليه:الحمد لله..غير تعالي يافايزة يابنتي مش جايه بش نشرب شي..جايتك انتي اني نبيك في موضوع يابنتي..
انتاب مشتده القلق..
وفايزة طلعت بالقهوة لمغليه:تفضلي خالتي..
خدت مغليه الفنجان وقالت:والله ماني رداته عليك..
حطت فايزة السفرة وقعمزت..
ومغليه حطت الفنجان ع الارض وقالت:والله ماني كيف جيت باللي جاية بيه بس اني رسول وعليا البلاغ يابنتي..
قلب فايزة انقبض..
تنهدت مغليه وقالت؛يومها جتني فتحيه ومعاها خالتك نجمه وخالتك فطيمه..وقالت..نبيك يامغليه ع خاطر انتي كبيرة هالشارع..توصلي لفايزة انها هي وبناتها وولادها بإعتبارهم ورثه يبوا حقهم في ورث خوهم..الشقه والسوبر ماركت..
مشتده غمضت عيونها بألم..
وفايزة كانت زي قطعه المرش اللي تصدعت وجي حد عفس عليها حولها لتراب..
مغليه:والله يابنتي هالكلام ليه قريب عشرين يوم واني قتلهم حل يسكر الراجل شهر متوفي بعدين نحكي مع المراة في موضوع زي هدا!؟
طاحوا دموع فايزة وهي تقول:ونتشردوا اني وبناتهم عادي!.؟
سكتت مغليه...
فايزة بدموع:باهي ياخدوا سوبر ماركت ويخلوا الشقه..
مغليه:والله نفس الكلام قلته..وهما شي مسكرين روسهم..قالت ولادي يبوا يبنوا ويتزوجوا ويشوفوا مستقبلهم..
فايزة حست بتعب وقتها وعجز حتى عن الكلام تسمع في مغليه تتكلم بس عقلها قاعد يرسملها في مشهد خروجهم مو الشقه..والمرمده اللي حتعيش فيها مع بناتها...
اللي شبه توا هي وبناتها..قعدوا في الشارع...
#استغلال_فرص2
#طوبى
....يتبع...
