(مش مسامحه أي وحده تقرا وماتتفاعلش)
#طوبى "أقحوان وفلة وياسمينه"
#جمان_فريد
#الجزء_الحادي_والأربعين"تحدي2"
لو فاتتكم صلاة او خش عليكم وقت صلاة صلوا قبل بعدين اقروا...الصلاة قبل كل شي وكل شي يجي بعدها
وصلوا على الحبيب🌼
#تاج_الذكر
لاإله إله إلا الله وحده لاشريك له له الملك وله الحمد بيده الخير وهو على كل شيء قدير🌸
☕☕☕☕☕☕☕☕☕☕☕☕☕☕☕☕☕
"لالالاطوبى لاخديجه لا"
خديجه:توقعت ردة فعلك هادي..
نسرين بصدمه؛انتي اصلا كيف تفكري فيها هي!! مافكرتيش في العواقب مرات القدام تصير مذبحه في الشارع!
خديجه تهكما:مذبحة!
نسرين هزت راسها اصرارا وقالت؛ايه..مذبحه..هادي بنت الواعر كانك ناسيه قسما بالله ياكلونا ماكله ع خاطر طوبى بالذات..
خديجه؛حسستيني ان الجالي مدمن وتاجر مخدرات ولاقاتل.!مشاكل خوك عاديه وتنحل...ياما منهم مروا بحالته وانشفوا ايدين نساوينهم لما زوجوهم..الدكتور قال ان الجالي مش حيشفى شفاء تام الا انحاط بجو ينسيه اللي عاشه وطوبى حتنسي الجالي كل شي عاشه..حتنسيه نجاة ومايجي منها..
نسرين؛بنت الناس لو عرفت حقيقة خوك مش حتكمل معاه..
خديجه؛بالعكس حتكمل وترضى..اول شي لأنها طيبه هلبه وع نياتها ومتربيه تتحمل المسؤوليه..تاني شي لأنك تشوفي بروحك في حال خواتها مش حتزيد بوها هم ع همه..
نسرين:من قالك!؟
خديجه:واضح البنت تحب بوها وحسيت انها من النوع المضحي زي سدرة..غير الفرق بينها وبين سدرة..ان سدرة واعره..لكن طوبى هاديه وع نياتها..
مغليه تسمع في كلامهم اللي كان مخليها متردده..
مرة تجي مع نسرين ومرة تجي مع خديجه..
نسرين؛لالالا ياخديجه حولي طوبى من راسك..
خديجه بحده:انتي من الاهم عندك خوك ولاطوبى..كلنا شاهدين ع اللي صار للجالي بعد حبسته في 2012...خوك مش واجعك بكل يانسرين شاب زي الورده خلوه يعاني مشاكل نفسيه..مايقدرش يعيش طبيعي من غير الدوا..نسيتي شن شاف نسيتي اللي مر بيه!
طاحوا دموع نسرين..
ومغليه قعدت تتفكر في هديكا الأيام ودموعها سيل..
خديجه بدموع؛لو نخلوه لوحده زي نجاه حتكرهه في عيشته حدمره نهائي زي مادارت للطاهر الله يرحمه..انتي بروحك مرة قلتيلي خوي مش مرتاح في حياته ياخديجه وكلنا كنا ملاحظين التوتر اللي كان بينه وبينها..الجالي لو خليناه يدير مافي راسه ينهي نفسه.
شدت مغليه يد نسرين وهي تقول ببكي وتوسل:بالله عليك يابنتي ماتوقفي فيها بالله عليك..تقتليني اني يانسرين راهو..
نسرين حست روحت بين نارين...
نار ضميرها ..ونار حبها لعيلتها..
خديجه مسحت دموعها وقالت:صدقيني يانسرين طوبى حتقلب حياة خوك جنه والبنت نفسها حتحبه وحتقبل اللي هو فيه ومش حتخليه..طوبى بنت تربت تصبر وتتحمل وتعطي وماتاخدش..مش حتخلي راجلها لما تعرف اللي فيه..
وبعدين..مررت نظرها عليهم وقالت..لو عرفت مش لازم نخلوها تزبط ان حني عارفين..حني مانعرفوا شي ولانندروا ع شي..ولو ع مرضه نقولوها عين وغيره اي شي...
مافي شي صعب والله مافي..انتم صغروها تصغر سهلوها تسهل..
شدت مغليه ع يد بنتها نسرين بقوة..
ونسرين نزلت راسها بأسف وبدت تبكي..
انجبرت تستسلم...أكيد خوها حيكون اغلى واهم من أي حد عندها مهما كان حجم محبته..
☘بس في اللي حبه الاخوي صافي وخالي من الانانيه..
نبيله برغم الموقف اللي واخداته من غرفه..
اختارت تخفيه داخلها ع خاطر خوها وع خاطر بنت الناس بش ماتعيش الطلاق وهي مازال تبي راجلها تبي تكمل باقي عمرها معاه..
اكيد اللي زيه الطلاق حيكسرها بالذات في ظروف زي ظروفها..
بسبب جيتها لغرفه..
غرفه تشجعت تبادر وتبدا ع عبد الرؤوف..
بس بأسلوب الحركشه ع قولت الشوام..
وع قولتنا...مناشبه...
☘مقعمزة في الجنان..
تصور في سفرة لوح قنينه معبيه شكولاته ومنثور في جنبها ورد الفل..
بعدين نزلتها ستوري وكتبت...
"ياأحلى مافي العمرA" وجنبه رمز القلب...
خدت طرف شكولاته وبدت تاكل وهي تراجي في رده...
جتها رساله..
طول ع خشت ع الماسنجر شافتها وكانت منه..
ضحكت وفتحتها طول.
(بطلي كذب توبي ع الكذب بش تخشي الجنه)
قعدت تضحك..
بعدين بعتت..
(عفوا!!)
رد عليها..
(سلامتك ياكذابه)
ضحكت تاني وردت عليه..
(معليشي اني مش فاهمه انت شن تقصد بس نحاول نوضحلك كان فهمت صح نقصد جدي اني)
☘هو كان في واحد من محلاته..
شاف الرساله الاخيرة قال بصوت منخفض:وحده بلعوطه..
معاش بعتلها شي..
وقعد يشوف في حركة الزباين في المحل..
جاته رساله..
قام تليفونه طول وشافها.
(ايه سنو..من راجلي قتله خاطري ميلكا جابلي الانواع متاعها كلهم )
شد ضحكته وهو يشوف للرساله برفعة حاجب..
شويه جاته رساله تانيه..
(اسفه بنبعتها لصاحبتي جاتك انت)
هو بعتله علامة.."اللايك"
ونزل التليفون وقعد يحرك في راسه يمين ويسار وهو يدوب مبتسم..
جاته رساله تانيه..
غمض عيونه وضحك نص ضحكه..
بعدين فتحهم وقام التليفون وشافها..
كان ملصق لرسمه شاده عبارة
(ILove you)
ضم شواربه لداخل وهو مبتسم وقلبه يدق بقوة..
بعتتلها بعدها طول..
(قبل بنبعتها لبنت اختي جاتك بالغلط اسفه)
بعتلها..
(والرساله اللي بتجيني بالغلط بعدها لمن بتعبتيها)
ردت عليه وقالت..
(مش عارفه..تبي نبعتلك انت)
رد وقال..
(شكر الله سعيك مانبي منك شي فوتيني وخليني نخدم ع حالي)
ردت تقول..
(تمام..بس حبيت نذكرك انت اللي خشيت عليا خاص..باي)
قعد يضحك..
وهي قعدت تضحك وتاكل في الشكولاته..
وطوبى تشوفلها من روشن الكوجينه وهي مبتسمه بتفاؤل حاسه ان الامور بيناتهم حتتحسن عن قريب...
☘☘☘☘☘
الساعه 12:30منتصف الليل..
خش للحوش فهالوقت..
لأنه عارف ان خواته في الحوش اليوم واكيد بايتات خلاهم يرقدوا بعدين روح..
ركب الدروج..
لين وصل في داره..
فتح الباب وخش..
وقف جامد في مكانه لما شاف من قاعد يستنى فيه فيها..
الجالي بربكه؛امي!..
مغليه بملامح وجه متجهمه قالت:سكر الباب وتعالى اوقف قدامي..
هو نزل راسه يحاول يكون هادي وعادي..
والتفت للباب وسكره..
بعدين مشي حط شنطة اللاب توب متاعه مكانه..
وجي لأمه وقف قدامها..
مغليه رفعت عيونها وقالت وهي عاقده حواجبها بغضب:شن في بينك وبين نجاة؟
الجالي بإستغباء:كانت مرت خوي وام صغاره..
مغليه:ماتلفش ودور يالجالي عرفت كل شي..
الجالي:شن عرفتي!؟
مغليه؛عرفت اللي كسرلي ظهرلي وخيب املي فيك..الجالي ولدي الباهي يدير هكي..يحط عينه ع ارمله خوه ويقول يبيها وهي اكبر منه وعندها صغار! خيرك ياكبدي شن ناقصك بش تاخد وحده زيها!!
الجالي قعد ساكت ماباش يتكلم..
وقفت قدامه وشدت كتفه بيدها بقوة وهي تقول؛والله والله..لو سكرت راسك وخديت وحده زيها..مش بس نعطيك قلة السماح..لا...والله نقلبها عليك وعليها..والله نسلط بوك عليك ونخليك معاد تكسب خمسة قروش مصديه ووريني كان قبلت بيك نجاة بعدها..
الجالي:توا نجاة طلعت ماتنفعش يام!؟ وانتي كنتي تشكري فيها وتفضلي فيها ع عيشه مرت المهدي!؟ شن غيرك تو..؟.
مغليه؛كويسه ونعزها لكن بعيده عن ولادي..بعيده عنكم انتم..قاعده ندير فيها في خير ونخلي فيها تخش لحوشي ماتخلنيش نقطع رجلها من هني ونخلي بوك يحطلها حد..
هو خاف ع نجاة وفهم من كلام امه ان خديجه ماقالتش انه واخدها...
كذب عليها وقال؛لالالا يام ماتظلميش بنت الناس اني اللي نبيها ونجري في جرتها هي مش مدورتني بكل..
امه قعدت تشبحله وهي تفكر في كلامه وتتفكر في كلام خديجه..ماقالتش خلال حديثها ان في بيناتهم شي..
اللي كان واضح من كلامها ان الجالي هو اللي يبيها..
شبه اقتنعت بكلامه وقالت:خلاص معناها ماضيعش المراة في جرتك وحولها من راسك بكل..وحط في راسك اللي اني نبيه يالجالي..
عقد حواجبه وقال:بتخطبولي!
مغليه:ايه..معارضه..تسكير راس عناد مافيش..تعرفني يالجالي لو حطيت حد في راسي ونويته...خليتك ع راحتك هلبه..وثقت في عقلك وقلت الجالي حيجيبلي احسن كنة لكن ياخسارة ظني فيك خيبته..
الجالي هز راسه وقال:تمام تمام..نجاة تو نحولها من راسي..وانتي حولي فكرة الخطوبه هادي من راسك مرفوضه بالنسبه ليا..
مغليه نزلوا دموعها وقالت؛والله والله يالجالي واني مراة حاجة بيت الله ومانحلف بالله ونحنث كان مادرت اللي قلت عليه نغضبك عليك لأخر يوم في عمري يالجالي..وحليبي اللي رضعتهولك حرام.
الجالي امه نقطة ضعفه مهما حاول يعارضها لو سكرت راسه ع شي معاش يقدر يخالفها...
مسح دموعها وهو يقول:خلاص يام خلاص..خدي يدها وباسها بعدين قال..خلاص اللي تبيه نديره اني تحت امرك يام عمري كله ليك ياغاليه..وباس راسها وحضنها..
هي ضمانه وقعدت تقول وهي تبكي:هادي ولدي الباهي سمية جدي الله يرحمه... راضي والديك...زين في افعالك وخصايلك..ومهما يصير معاك تقعد زينة التريس وليدي...
والجالي يضم فيها وهو مغمض عيونه وحاس بخوف وشدة احتياج ليها..لأنها مصدر هدوئه وراحته والحضن اللي يلجأله لما ينهار ويكون في أضعف حالاته...
🍀🍀🍀🍀🍀
وقعد الجالي في هديكا الايام اللي سبقت رمضان..
منعزل عن الجميع..حتى الخدمه خدي منها اجازة..
وعزلتخ قضاها في الخمس..
قدام بحرها...صوت موجه هو بس اللي يسمع فيه وهو غارق في تفكيره..
ومخلي نجاة غارقه في الحيرة والخوف..
وامه وخواته عايشات حالة ترقب..
مغليه وخديجه يدعوا ربي ان يوفق..
ونسرين تدعي ربي انه يرفض طوبى لما بيعرضوها عليه..
☘☘☘☘☘
ويخش شهر رمضان...
اول يوم فيه ذبح الحاج علي زوز خرفان واحد صدقه وواحد العيله..
ولطفي ولده دار نفس الشي...
ومحمد شنيبه ولت عنده عاده...يشري لحم وبضاعه ويوزع ع سكان الشارع المحتاجين اللي زادوا بسبب الظروف اللي تمر بيها البلاد...
☘رمضان هدا كان اول رمضان لفراس التونسي في شارع القهوة..
بدي يرتاح للشارع وناسه بس مازال ماخشش فيهم قاعد تعامله معاهم رسمي..
لكن عيلة الواعر كانوا يحاولوا يكسروا هالحاجز اللي بانيه فراس...
☘قبل المغرب بربع ساعه..
فراس بإحراج؛والله ماليه لزوم ياعمي لطفي نحب نعمل حاجتي بإيدي مانبي نتعب حد معاي..
لطفي:تعب شني ياراجل كان تشوف خالتك مطيره وهي توتيلك فيه تقول توتي فيه لولدها..
فراس:ربي يطول في عمرها..
لطفي:آمين..ولدي حول الرسميات راك وليت منا وفينا..
ابتسم فراس بود وهز راسه وهو ساكت..
لطفي بإبتسامه؛باهي..صح شريبتك مقدما..
فراس بضحكه:صح فطورك..
ضحك لطفي وقال:السلام عليكم..
فراس:وعليكم السلام..
ومشي لطفي طلع من عندي التونسي..
وخدي حافظات يوسا النجيري ومشاله بيهم..
يوسا كان مسيحي صح..بس الحركه هادي اللي ماسيبوهاش سكان شارع القهوة بالذات حوش لطفي في رمضان كان تفرح فيه..
لما عرى ع الماكله وشاف كل الاصناف اللذيذه..
ضحك وهو متفاجئ لما شاف صحن الكاستردا مكتوب عليه بالقرفه باللغه الفرنسيه..
"يوسا رمضان مبارك"
يوسا بضحكه:توبا توبا...كم انت جميل..
فجأة..
آذن المغرب.
وقعد يسمع فيه يوسا لأول مرة بإحساس مختلف..
وهالإحساس كان يزيح في رداء الغشاوة شيئا فشيئا..
☘☘☘☘☘☘
في أول ليله..
بعد التروايح..
جي يوسف بمرته لحوش اهله..
صفيه مابتش تطلع من الدار كانت مسكرتها عليها تصلي وتقرا قرآن..
واللي استقبل العروس..
اميمه وعمتها مطيرة وبنات عمها..
غرفه؛وبتبدي تخدمي هني؟
ريمه؛ان شاء الله يوسف حصلي خدمه في مصحه قريبه..
سدرة؛شن اسمها..
ريمه:المسرة..
طوبى:كويسه المسرة...
ريمه بإبتسامه:ايه هلبه شكرولي فيها..
ع جية مطيرة بسفرة مليانه..
عسله وزلابيه وحلويات شرقيه وفطيرة وقهوة وشاهي اخضر..
غرفه:راجو نصور قبل..
مطيره:صوري ياهمي صوري..
ضحكت ريمه..
وصوروا طوبى وغرفه مع بعض..
وسدرة تشبحلهم بإمتعاض بعد كملوا قالت ساخره؛نقدروا نبدوا عادي..
طوبى؛ايه ابدي خلاص..
سدرة:فضلتوا علينا...
وريمه تضحك بس..
مطيره:هدا حالهم بنات خوي صور ونزل...هي خودي شن تبي رويمه..
ريمه:شاهي اخضر وفطيره خاطري فيهم..
مطيره:خاطرك فيهم..بالك حامل..
وجهها تغير وابتسمت مجامله وهي تقول:لالا مافيش حمل لتوا..
سدرة:ربي يرزقكم قريب ان شاء الله..
ريمه:آمين..وخدت طاسة شاهي..ومطيره مدتلها سبات الفطيرة خدت منه.
وغرفه تشوف للستوري اللي نزلاته وكتبت عليه..
"لمتنا في حوش عمي" وحطت رمز الهلال في الاخير...
وكيف جت بتاخد فنجان قهوة..
رن تليفونه..
شافاته..فتحت عيونها ع وسعهم وقلبها قريب طلع من مكانه..
ناضت وهي ترجف قالت؛شويه وجايه..
وهما لاحظوا لون وجهها كيف انقلب للأحمر..
طلعت من الحوش للجنان وردت..
غرفه بصوت فيه رجفه:آلو..
"روحي لحوشكم"
غرفه؛رؤوف حسين مش في البلاد بكل عارفه مسافر..
"معاش تقولي اسمه..ومعاش تدوي عليه ومكان هو فيه او يعنيله حاجه مانبيكش تكوني فيه"
غرفه:رؤوف..
قاطعها وقال..
"انتي طالق لو قعدتي غادي"
وسكر عليها.
وهي قعدت جامده ومصدومه في مكانها..
"عرف انك عندنا"
غرفه نزلت التليفون وهي مصدومه قالت؛قالي انتي طالق لو قعدتي غادي..
جتها اميمه بسرعه..
شدتها ومشت بيها تجري..
فتحت الباب وطلعتها..
غرفه وقفت قدامها وهي حاطه يدها ع قلبها قالت بخوف؛مش مطلقه ولا!؟
اميمه:لامش مطلقه لأنه قال لو قعدتي غادي ولا؟
غرفه:ايه.
اميمه:خلاص وانتي ماقعدتيش..لكن شعفيه ع الحركه هادي ماتخليشي يستسهل كلمة انتي طالق..
غرفه فهمت عليها وقالت؛تمام..ابتسمت وقالت..شكرا ميمو..
اميمه بإبتسامه؛تمام بري روحي.
غرفه بضحكه:باهي وانتي تلزي..
ولفت ومشت..
واميمه وهي تضحك حركت راسها يمين ويسار وسكرت الباب..
غرفه وصلت للحوش وفتحت الباب وخشت وهي تقول:قاعده نرعش!
رن تليفونها..
انفجعت بزياده وشافاته لقاته هو..شبحت للشاشه شويه وقالت:تو نرعشك كيف مارعشتني..
فتحت الخط بدون ماترد..
"قاعده غادي"
غرفه؛ايه ومش طالعه كان انت سبله ودور فيها خلاص..
"غرفه ندوي جديات قاعده غادي"
غرفه:قتلك ايه قاعده غادي وبعدين ياريت تسكر ومعاش تكلمني انت توا معاش راجلي..
وسكرت في وجهه..
وقعدت تضحك..
هو ماعاودش.
مشت خشت الصاله وقعمزت وقعدت تراجي يعاود ماعاودش..
خافت وقعدت تقول؛حي عليك ياغرفه ياحمارة كان تكبر القصة توا..
طول اتصلت بيه..عطاها مشغول..
غرفه:حي زعمه يتصل!
سكرت طول وقعدت تراجي ماجاش اتصال..
غرفه:حي عليا يانهاري اني الحمارة اللي سمعت كلام العبيطه..وووه ياربي!..
وناضت وقعدت تمشي وتجي في الحوش وهي خايفه..
فجأة..
سمعت باب الحوش الخارجي يدق..
خافت ومابتش تطلع..
غرفه بخوف:هدا مني اللي جاي توا؟
شويه جتها رساله..
رفعت التليفون وفتحتها..
كانت من هو..
(البسي ملايتك واطلعي)
هي عرفاته هو فم الباب..
ضحكت ومشت طول وقفت ورا الباب وقالت:مني..
عبد الرؤوف من قدام الباب قال بغضب:ياعن....وسكت بعدين قال...استغفر الله العظيم..بطلعني من المله المخلوقه هادي..
وبدي يكتب في رساله..
جتها..
(اطلعي)
بعتتله..
(جيب شيخ وراجي بوي يروح)
بعتلها..
(حمارة اقسم بالله حمارة افتحي باب حوشكم اللي واقفه وراه ياحمارة)
غرفه استاقظت..
غمضت عيونها بشده وقعدت تخبط بكف يدها ع جبهتها..
دق الباب تاني..
هي فتحت عيونها وخدت نفس بعدين فتحت الباب ..
هو خش داخل..
شبحتله..وهو قعد يشبحلها..
نظرات العيون كانت غير..
غرفه حستها غير هالمرة خاليه من اي مشاعر تانيه غير الشوق..
وهو لاحظ في عيونها نفس نظرة الشوق بس فيها لمعة حزن وشي من الخوف.
عقد حواجبه وقال:خشي البسي ملايتك وتعالي..
غرفه؛وين؟
عبد الرؤوف:لحوشك يعني وين؟
هي في نفسها قالت"حوشي!"
هو قال:تحركي هيا..
غرفه؛مش بالساهل هكي لازم تاخدني وبوي حاضر..
عبد الرؤوف:مانراجيش فيك تعلميني كلمته وخديت اذنه..تحركي هيا ماضيعيش وقتي..
غرفه:كان بابا قال باهي ماعندي مانقول..
عكرش وجهه وشبحلها من فوق لتحت..
وهي مشت من قدامه وهي شادة ضحكتها لين خشت داخل..
☘في الدار..
لبست ملايتها..بعدين مشت خدت صورته من الدولاب وحطتها في كمها..
ومشت طلعت..
وين وصلت برا مالقتاش..
فتحت الباب وشافت برا لقت السيارة مطفيه ومافي حد حداها..
استغربت..خشت وسكرت الباب..
وقالت؛وين مشي؟
بعدين التفتت...
لقاته واقف من بعيد ع شجرة الفل...
ابتسمت ومشتله وهي تقول:شن رايك نزرعوا وحده زيها في البالكونه متاع الشقه..
شبحلها وقال:مش حتجي زي هادي..
غرفه بإبتسامه؛صح..
عبد الرؤوف:حتى الياسمين عندكم..
غرفه؛والورد الجوري..
هو رد يقول؛حوشكم ماريتش خوه..
غرفه بضحكه:افخم من القصور والفلل..
شبحلها وقال:ديما نظرتك سطحيه للأمور..حوشكم فيه راحه في حاجه حلوة تحبب فيه اللي يخشله..نظامه جو..
الحاجات اللي فيه..اني لو عندي حوش زي هدا ويشروه بوزنه ذهب مانبيعه..
غرفه؛صح..حسيت بقيمته لما طلعت منه..ع فخامة حوشكم والاثاث الغالي اللي فيه ماحسيتش في يوم انه يعنيني ولما روحت هني لقيت روحي قاعده هني وهدا..
هو كان يشبحلها ويسمع فيها وهو ساكت..
غرفه بضحكه:ماتستغربش مش سطحية هلبه اني..
عبد الرؤوف؛باهي تحركي قدامي..
غرفه بإبتسامه؛حاضر..
ولفت ومشت وهو وراها..
طلعوا برا..
عبد الرؤوف؛هي اركبي شن تراجي..
فتحت الباب وركبت..
وهو ركب....
شغل السيارة..وقص بيها الطريق ودرس قدام حوشهم..
عبد الرؤوف؛انزلي يعني لين نقول..
غرفه،معاش نبي نتحرك حركه من غير اوامر..
شبحلها ع جنب ونزل..
وهي نزلت تضحك ع ردة فعله..
جت حداه..
فتح باب الحوش وخشوا مع بعض..
☘ونبيله داخل تتفرج ع التلفزيون وهي تاكل في المكسرات..
سمعت صوت الباب انفتح وتسكر..
بآستغراب قالت؛غريبه!..
شويه..وخشوا عليها هما الزوز..
لما شافتهم شهقت بصوت عالي من الفرحه..
ضحكت غرفه..وهو ملامح وجهه قاعده متجهمه..
حطت صحن المكسرات وناضت وهي تقول:كان مش عيب راني زغرطت..
وجت لغرفه سلمت عليها بالأحضان وقالت؛نورتي حوشك ياعروسه..
عبد الرؤوف:باهي خلاص فهمنا..انتي حولي عبايتك وخشي مع نبيله وديروا دلاع وعنب نركب ندوش ننزل نلقى كل شي قدامي..
نبيله:شن مالا بنزرعوه ونراجوه ينوض..
عطي اخته نظرة امتعاض ومشي بإتجاه الباب الفاصل..
ضحكت غرفه..
شدت يدها نبيله وقالت؛تعالي احكيلي شن صار..
"غرفه"
جبدتها غرفه ومشت بيها للكوجينه وقالت؛نحكيلك غادي..
🍀ولت غرفه لحوشها صح..
لكن علاقتها بعبد الرؤوف قاعده زي ماهي..
برغم تغير معاملته معاها ولت بعض الشي لينه..
وهي قاعده ماشيه بنفس اسلوبها..وقاعده تقرا في البقرة اللي لاحظت انها بعد لزمتها حياتها باديه تتغير للأحسن...
🍀بعد مرور 15يوم بالزبط...
روح الجالي من الخمس لطرابلس..
مرواحته ماقال عليها لحد..حتى انه اختار يروح الصبح بعيد عن العيون..ماكانتش عنده قدرة للأخد والعطى وهو صايم..
ونجاة كانت بتنجن وتعرف اخباره وشن صار معاه...
وقبل مغرب نفس اليوم..
بعتلها انه جايها في الليل...
وهي ماصدقت..خططت تخلي الصغار فايقين بش وين يجي الليل يرقدوا طول..
وبدت تجهز في نفسها لجية راجلها...
☘☘☘☘☘☘
وقت التروايح...
محمد شنيبه وولاده واحفاده مشوا للجامع وقعد بس الجالي مع امه ع انفراد..
بش يحكوا في نفس الموضوع اللي يراجو في قراره بخصوصه..
"موافق"
مغليه:الله يرضى عليك دنيا وآخره ويريح قلبك وليدي كيف ماريحت قلبي..
الجالي بضيق؛لكن انتم اختاروها يام اني مادخلي بشي حتى نظرة شرعيه مانبيش..
مغليه وهي مبتسمه؛مش لازمه النظرة الشرعيه بكل شايفها كويس وتعرفها زين..
الجالي بإستغراب شديد؛من هي هادي؟.
مغليه؛طوبى ..
الجالي:من طوبى!؟
مغليه؛وهو في غيرها طوبى في البلاد كلها!
الجالي بصدمه؛طوبى الواعر!!..يام معقوله طوبى!! البنت صغيره هلبه يام!
مغليه؛عمرها 20سنه معاش صغيره خلاص..
الجالي:واني 33يام!
مغليه؛هادي احسن فرق في العمر بين المراة والراجل..
الجالي:امي شوفي غيرها بالله عليك البنيه زي اختي الصغيره..تي قاعد نشوف فيها طفله!
مغليه لاهي اختك..ولاهي صغيره..ولاهي طفله..اني البنت هادي خاشه خاطري وحابتها هلبه ونبيها كنتي..
الجالي:خليها لنضال..
مغليه:نضال مش ليها بكل هادي تبي واحد زيك انت وليدي..انت اللي تنفع بيها وهي اللي تنفع بيك..
الجالي بضيق شديد:والله حرام يام..
مغليه؛جالي ولدي انتي طاوعني وبس وصدقيني بعدين حتجيني فرحان بطير وانت تقول..ربي يعطيك الصحه يام ع هالموازة..
غير عيونه عنها وهو مضايق بيتفجر بعدين ناض وقال:ديروا اللي تبوه..السلام عليكم ...
ومشي طلع من حداها..
وهي معاه بعيونها لين طلع بكل وقالت:تو نشوفوك بعدين...
☘☘☘☘☘
يشربوا في القهوة في الصالون مع بعض
وحده منسجمه مع التلفزيون..
والتانيه سرحانه وتفكر..
نبيله:الله لايورينا ياربي...السرطان وشن يدير في البنادم
لكن هي محنتها خلتها تعرف اللي معاها واللي عليها...
وغرفه مش معاها بكل..
التفتت نبيله وشبحتلها بعدين قالت؛مش معاي بكل..غرفه..غرفه..
استاقظت وشبحتلها وقالت:نعم..
نبيله غمضت عيونها وفتحتهم بعدين قالت:اسمعي كان تفكري في كلام مبروك بكري اني نقولك ماتعدليش عليه هو يستفز فيك بس..
غرفه بضيق:لكن عنده حق..هو يبي يعزم صحابه زيه زيهم..
نبيله:والله صحابه كان يبوا يتسحروا مكرونه ع الحطب يديروها هما مش انتي..
غرفه:بس اهي مرت صاحبه دارتلهم مكرونه وبيتزا ع الحطب ليلة الموسم والدنيا نو..
نبيله:والله كان هديكا مهبوله انتي عاقله..
غرفه:نبيله..اني نبي رؤوف يصدقني..لو حاولت ندير ع خاطره حاجات تفرحه اكيد حيبدا يحس بيا ويصدق شعوري ناحيته..
نبيله:بس مش ع حساب صحتك..صيام..وحمو..وتطييب ع حطب مش باهي بكل ياغرفه..
غرفه؛لاعادي يانبيله ايام كان الغاز ناقص ياما طيبوا خواتي وعمتي ع الحطب وفي جو زي هدا..
نبيله تنهدت وقالت:انتي مصره..
غرفه:هلبه ونبيك تساعدني شويه بس..
نبيله بإستسلام:باهي..غير قوليله قبل..
ابتسمت غرفه وقالت:باهي...
وناضت بتجيب تليفونها من ع الطاوله..
خداته وحطت ع رقمه واتصلت بيه..
نادى تلاته مرات بعدين فتح..
"هاه"
غرفه؛شن جو..
"شن تبي"
ابتسمت وقالت:جيب صحابك يستحروا الليله بنديروا اني ونبيله مكرونه ع الحطب الجو يجنن برا..
"نبيله!"
غرفه بإرتباك:بس هي بتساعدني..
"اسمعي فكيني من لعب الصغار غير بتحشميني قدام جماعه"
غرفه بضيق:لاوالله لا انت غير جرب وشوف بس مش حتندم..
"بتجيبي اختك الصغيره طيب معناها"
غرفه شبحت لنبيله ودموعها عبوا عيونها بعدين قالت:لا اني اني وبس والله العظيم..نحلف قاعده يارؤوف..
"ربي يسترنا وخلاص..اني بنجيبهم بس وربي ياغرفه تحشميني قدامهم ندمك ع اللحظه اللي فكرتي فيها تخليني نعزمهم"
غرفه:لالا مش حتندم وتو تشوف..
سكر عليها من غير مايقول كلمه..
هي نزلت التليفون وقالت لنبيله؛هيا معاي..
ناضت نبيله وقالت؛هيا..
☘☘☘☘☘
"هاك زيد حبيبي"
الجالي:لاخلاص حبيبي بطنيFull
نجاة بإبتسامه؛صحتين...
الجالي:ع قلبك قلبي..
حطت طرف الكباب في الصونيه ومسحت يدها بكلينكس بعدين شبحتله لقاته يشبحلها.
ضحكت وقالت:خيرك!
تنهد وقال:نجاة..اليوم قلت قراري لأمي..
اختفت ضحكتها وعيونها تعبوا دموع..
الجالي بضيق:مجبورين حبيبي مافيش قدامنا غير هكي..
بلعت ريقها اللي كان اشبه بمية النار تنزل في زورها وقالت:بتتزوج..
الجالي:للأسف..
دموعها طاحوا..
هو مسحهم طول وقال:لويزوجوني غيرك ميه اني مش حنكون غير ليك انتي..البنت اللي بيخطبوهالي هي اللي حالها يوجع..
نجاه:من توا بادي تصخف عليها..
الجالي:لأنها مسكينه صغيره ماتعرف شي..وفي نفس الوقت نقول هكي خير..ناخد وحده ساذجه ع نياتها خير ماناخد وحده حرفه ملهط مايفوتها شي..
نجاة عقدت حواجبها وقالت:شكلك تعرفها من هي هادي؟
تنهد وقال:بنت جيرانا مش عارف كان تزبطيها بنت حوش الواعر..طوبى..
انصعقت نجاة...شدت يده بقوة وهي تفنص فيه وقالت:هادي بالذات لا..
هو استغرب ردة فعلها وقال:علاش!؟
نجاة في اخر لحظه راجعت نفسها لو رفضتها بقوة هكي ممكن تغير نظرة الجالي وتخليه عنده فضول يعرف شن اللي خلاها تغير من طوبى لهالدرجه..هدت نفسها ورخت شدتها وقالت..
نجاة بشي من الارتباك؛اسفه..مش عارفه..بس يعني صغيره عليك هلبه..
الجالي:صح..صغيره..وعقلها زي الاطفال تحسيها ماتعرف شي في حياتها غير اللعب مع الصغار والحيوانات والوقوف في الكوجينه..اللي زيها مش حنتعب معاها ساهل ترضى بأي شي..وتصدق اللي ينقاللها بسرعه ومش حتلاحظ ولاتحس بحاجه.. طيبه هلبه لين موليه ساذجة طوبى..
نجاة ماكانتش تشوف في طوبى هكي نهائي..بس شبه اقتنعت بكلامه..لأنها فكرت انها اختيار خديجه وخديجه ماختارتها لخوها فوق علته وزواجها السري الا وانها شايفه طوبى زي ماشايفها الجالي...وهما جيران من سنين وادرى بيها منها..
هو مسح ع شعرها وقال؛عمري بإذن الله حيجي اليوم اللي حيكون فيه زواجنا علني..ونخلي كل يباركه واولهم طوبى لما نفسها لما تعرف ان نيتي نربي صغار خوي...
بوي مش حيعارض امي حتستسلم للأمر الواقع تزوجت بنت زي مايبوا شن يبوا مني زياده خلاص..
نجاة:واني حنساعدك ونسهل عليك..
الجالي:اكبر مساعده ليا فالوقت الحالي انك تردي بالك من تصرفاتك قدام الكل بالذات خديجه يانجاة خلينا نتحركوا من تحت لتحت بهدوء بالله عليك حكمي عقلك ديما وماتخليش عواطفك تمشيك بش ماتخربيش عليك وعليا..
نجاه هزت راسها وهي مبتسمه وقالت:حاضر..
وفي داخلها قلبها تاكل فيه النار...
☘☘☘☘☘
وغرفه تلفح فيها نار الحطب وهي طيب برا..
والجو ماكانش لطيف نهائي..
البنت تتصبب عرق.
تخش وتطلع ع الكوجينه اللي كان يخشلها هواء المكيف المصقع..
تفتح وتسكر في الفريز والتلاجه والهواء البارد يجي ع وجهها..
تمشي تخش داخل قاصده نبيله تسأل فيها ع كذا حاجه..
حالفه عليها ماتعاونها في حاجه ع قد ماحاولت معاها..
ونبيله كانت خايفه عليها هلبه وفي نفس الوقت حست ان غرفه صادقه في شعورها اتجاه خوها وتبي تكسب قلبه بأي وسيله كانت حتى ع حساب نفسها..
وغرفه ماكانت تفكر في شي غير ردة فعل عبد الرؤوف لما يشوف شن دارت..
غرفه اللي كانت ماتحبش تقيم قشة في حوشهم..
قاعده طيب ع حطب في جو ساخن بش ترضي انسان تحبه..
غرفه وهي مبتسمه؛ وهادوا الحبيقات ع قولة بيبو..
حطتهم وحركت الطنجره وقالت...الله ع الريحه..
رن تليفونها..
غطت الطنجره..
ومشت خدت كلينكس كان ع الكرسي مسحت وجهها وقامت التليفون وردت..
غرفه؛خلاص طابت..
"خشينا الشارع"
وسكر عليها..
هي مشت تجري خشت داخل لنبيله وقالت بإستعجال:جو جو بالله عاونيني نوتوا الصفر...
طول ناضت نبيله وقالت:هيا هي..
ومشت تعاون فيها وقعدوا يوتوا ع السريع...
حطوا جنبها صفيحه فصلت من الفطور مع ليم حامض ومشروب..
وفي نفس الوقت..
وصل عبد الرؤوف بصحابه للحوش ودخلهم للمربوعه..
بعدين خش للحوش..
ومشي للكوجينه..
شاف كل شي واتي رفع حواجبه تعجبا وهز راسه وجي للسفره وقال:ماجاكم حد يابلبله..
نبيله:لابكل..
غرفه بضحكه؛والله ماجانا واحد..
تجاهلها وقال لنبيله:شن درتي في هدا؟
نبيله؛وربي شاهد ماحطيت ايدي في حاجه اخطى هالصفيحه اللي درتها للفطور..
هز راسه ورفع السفرة وطلع..
غرفه بحماس وتوتر؛يارب تعجبه وتعجبهم يارب..
نبيله؛بنتها زي العسل ياكلوا الصونيه معاها..
ضحكت غرفه.
نبيله؛قعمزي استريحي شويه..بعدين اركبي لشقتك دوشي وردي بالك تفتحي المكيفات..
غرفه قعمزت وقالت:حاضر..
ونبيله بدت ضم في الكوجينه...
☘والجماعه ياكلوا في المربوعه ومنسجمين...
فجأه..واحد منهم قام كشيك مكرونه انجبدت معاها شعره طويله....كلهم شافوها..حتى من عبد الرؤوف اللي جمد في مكانه..
صاحبه انحرج معاش عرف شن يدير..
رد الكاشيك في مكانه وخدي حكة مشروب وقال:المهم لما مشينا غادي لقيناهم كلهم يستنوا..
وباقي الجماعه اللي هدا حط كاشيكه ودارو زيه..
وعبد الرؤوف مرر نظره عليهم وهو محرج ع الاخر..كان يلقى الارض تنشق وتبلعه..
حط كاشيكه حتى هو وقعد داير روحه يسمع في صاحبه
شن يحكي..وهو كان يلقى يطلع لغرفه حالا يمسح بيها الأرض...
ماهناك ماطولوا صحابه اللي هدا مشي يروح بش يلحق ع السحور في حوش...
وهو بعد سقدهم..
مشي للمربوعه رفع السفرة وهو في قمة الغضب .
ومشي خش للحوش..
وين وصل في الكوجينه لقاها قاعده مقعمزة مع نبيله يهدرزوا..
حط السفرة بقوة ع الطاوله..
هما الزوز انتفضوا من الفجعه
عبد الرؤوف بغضب شديد؛ مفروض نصبها ع راسك نحرقك بيها حرق..
غرفه قعدت تشبحله وهي مصدومه ومش قادره تنطق..
نبيله بصدمه:خيرك والله زي العسل..
عبد الرؤوف بعصبيه خدي كاشيك وقعد يقلب في المكرونه وهما يشبحوله..وغرفه ترعش مع بعضها..
لقي الشعره قامها وقال:شوفي العفن شوفي..شوفي..عفن هدا من عسل..وجهي تقشر قدامهم حطتني في موقف اوسخ منه مافيش....
غرفه دموعها طاحوا وقالت:والله ماانتبهت..
لوح الشعره وقال:ع شن منتبهه انتي غير الدوة الفارغه...اقسم بالله اقسم بالله لولا بوك عطيتك طريحه خليتك مراة صح..لكن ماينفع في البايد ترقيع من الاول ماتربتيش صح..
وصلت عندها حدها وناضت وهي تقول بغضب ودموعها ينزلوا:الزم حدك احسنلك سكتلك وفوتتلك هلبه وصلت فيا هلبه ومشيتلك..لكن ماليا وتربيتي لا يارؤوف..
نبيله بقلق:خلاص امشي اطلع انت..
عبد الرؤوف بغضب؛وليك عين تقيميها فيا وتتكلمي يافاشله ياللي ماك نافعه ولاحتنفعي في حاجه عمرك كله..غير حظي...خبط بيده ع صدره وهويقول..الاسود..جابك في طريقي..
ومشي طلع وهو يقول:حسبي الله ونعم الوكيل..
نبيله قعدت تشبح لغرفه كيف تشبح للجهة اللي مشي منها وهي مصدومه ودموعها ينزلوا...
نبيله:خلاص بري اركبي لشقتك دوشي وارقدي..
غرفه بدت تبكي وهي تقول؛مانبيش نركب نبي نقعد هني..
نبيله وهي مضايقه ع خاطرها هزت راسها وقالت:باهي بري للحمام واني تو نركب نجيبلك دبش..
غرفه شبحت لصونية المكرونه وقالت بنبرة ألم:والله درتها من قلبي..مش عارفه علاش صار هكي..
نبيله وجعها قلبها وقالت؛معليشي حبيبتي ياما صارت..مرة تانيه لما تلبسي حطي ع راسك غطا وخلاص...
غرفه هزت راسها وهي تبكي بصمت..بعدين مشت طلعت من الكوجينه..
نبيله حركت راسها يمين ويسار وقالت بأسف:لاحول ولاقوة إلا بالله..
☘وغرفه اول ماخشت الحمام بكت لين طاب مافي خاطرها..
وحتى بعد ماطلعت من الحمام قعدت تبكي بصمت...
رفعتها نبيله للدار وهي تقول:خلاص حبيبتي هدي روحك وانسي..
غرفه بنبرة باكيه:مش قادره..
وصلت للسرير وخشتله وقعدت نبيله تنشف في شعرها وتقول؛ياما يصير حبيبتي ياما يصير اني كان نحكيلك ع اللي نسمع فيه ويحكولي فيه الموكلين تقول ماصارلي شي قدامهم..
غرفه؛حاسه اخرتنا زيهم للطلاق..
نبيله حولت الفوطه وقالت:ارقدي حبيبتي ومعاش تفكري في الحاجات هادي يومين وينسى كل شي خوي ونعرفه..
رقدت غرفه بدون ماترد ع نبيله وعطتها بالظهر وقعدت تبكي..
مسحت نبيله ع شعرها وهي تشوفلها بأسف..
بعدين مشت طلعت...
☘☘☘☘
ضمت نبيله الكوجينه والحوش كله..
وبعد السحور قعمزت تقرا في القرآن لين آذن الفجر..
صلت صلاتها...وقعدت مقعمزة برا تراجي فيه امتى يروح...
وروح....وخش عليها..
لقاها مقعمزه وباين انها تراجي فيه.
حاول يهرب لما قال:تصبحي ع خير..
نبيله؛خليك في مكانك..
وقف وع وجهه باديه ملامح الملل..
ناضتله وجاته وقفت قدامه وقالت بحزم:والله ياعبدالرؤوف لو بتستمر تعامل المراة بالطريقه هادي..اني نطلقها منك..
عبد الرؤوف:نبيله فكيني من هبالك ع الصبح..
نبيله؛ندوي مني جد يامبروك..قسما بالله نرفعلها دعوى طلاق ونخليها تطلق منك من اول جلسه...
هو قعد يشبحلها وحواجبه معقوده بضيق..
نبيله:مش طايقها مش قادر تحبها ماتبيش تعيش معاها سرحها بإحسان غير من هالعيشه اللي لاترضي الله ولاخلقه..
غير عيونه بدون مايرد..
نبيله؛غلطت وكلت ع راسها لين سدت وتعلمت درسها كويس..اني عشت معاها قبل لنعرف من تكون وبعد وشفتها كيف..البنيه كويسه ونظيفه من داخل..وتحبك وقاعده ع قد ماتقدر تحاول تكسب رضاك ومانبيش نقول قلبك لأن عندها من زمان..
شبح لأخته بطرف عينه وهو ساكتت..
نبيله:عندك واحد من هالزوز يامبروك..ياتخليها وتعاملها بالحسنى اقل شي لوجه الله..ياطلقها...
ومشت وخلاته واقف يشبحلها وفي عيونه لمعة الدموع..
قعد يفكر في كلامها اللي مايله وشبه مقتنع بيه..
بس مشكلة الثقه...الثقه معدومه..
وحب مافيشي ثقه..اساسه ضعيف وحينهار بسرعه...
تنهد بضيق....ولف بيمشي للباب الفاصل..
"مبروك"
وقف والتفت طول .
شاف نبيله جايه تجري وهي تقول بخوف:المراة حرارتها راقيه هلبه وتهتري..
هو بصدمه:خيرها!؟
نبيله بخوف:عرفتها من بكري تطلع برا للنار والحمو وتخش داخل والمكيفات متاع الحوش كلهم مفتوحات.
هو فات اخته ومشالها يجري..
ونبيله مشت وراه بسرعه..
خش عليها للدار وجاها..
شافها كيف راقده ووجهها احمر وتهتري ..
كل الواضح من كلامها...
"ماما..ماما..عطيني منها"
حط يده ع جبهتها فتح عيونه ع وسعهم وتعبوا دموع وقال:نار يانبيله نار...
حول الشرشاف ورفعها ومشي بيها للحمام..
نبيله:شن بدير..
عبد الرؤوف وهو يرعش:بنفتح عليها الميه المصقعه..اطلعي..اطلعي بسرعه طلعيلها حوايج باهيات تلبسهم بنرفعها..
نبيله بخوف:حاضر حاضر..
ومشت تجري..
وهو خش بيها للحمام..
حطها في الجاكوزي..وفتح عليها الميه المصقعه..
وهي مازال تهتري وتقول:ماما..عطيني حتى اني"
هو قلبه تقطع..
قعد يمسح ع راسها بإيديه ويساعد في الميه بش توصل جسمها..وهو نفسه وصلتله الميه..
بدون مايقصد راسها انضرب حافه الجاكوزي..
شده بإيديه الزوز وقعد يقول:اسف اسف سامحيني ياروحي..وباس راسها وقال..اسف...والله اسف..ودموعه في عيونه..
☘وشويه وطلعها من الحمام..
لبسوها حوايج جافه..وحجاب..بعدين خداها في طلع بيها للسيارة ونبيله معاه....
#تحدي
#طوبى
....يتبع....
Oops! This image does not follow our content guidelines. To continue publishing, please remove it or upload a different image.
