# طوبى "شارع القهوة"
#جمان_فريد
#الجزء_الثامن_والعشرين" قبل العاصفه2"
لو فاتتكم صلاة او خش عليكم وقت صلاة صلوا قبل بعدين اقروا...الصلاة قبل كل شي وكل شي يجي بعدها
وصلوا على الحبيب🌼
☕☕☕☕☕☕☕☕☕☕☕☕☕☕☕☕☕
وخش شهر رمضان..
اللي كان بادي السنين الاخيره يجي في عز النو والرطوبه..
بس باهي لهداكا الوقت ماكنا حاسين بشي الكهرباء وضعها مستقر والحياة ماشيه تمام
☘وبغض النظر عن كل شي..الا ان الانسان يبدا عايش حياة غارق في نعم ربي فيها النعم اللي متعود عليها ومش حاس بقيمتها ولما يفقدها يحس وقتها بالقيمه متاعها .
انقال بالحمد دوم النعم وكلنا غارقين في نعم مش حاسين بيها واولها صحه اللي لوفقدها بن آدم معاش في شي يعوضه عنها...اللسان لازم ديما يلهج بالحمد لله..بش دوم النعم اللي عنده وتزيد...¤ولئن شكرتم لأزيدنكم¤☘
كانت اول ايام رمضان ماشيه عادي بروتينه الحلو الجميل..
وان غاب فرد من عيلة شنيبه هالعام..
السكايب كان مداير حل..وشبه يوميا يكلم فيهم ويطمن في امه ع اكله وشربه في الصيام ويوريلها فيهم..
واميمه كانت عايشه اجواء العمره مع جدها خدوا فيها اخر اسبوع في شعبان وتلاته اسابيع من رمضان..
🌻يوم الخامس عشر من شهر رمضان..
"لااطمن عمي كله تمام"
"شن تحسابني عززت ولاخرفت قاعد خير منك "
ضحك لطفي وقال:لا من قال..ربي يحفظك ياكابو ويديم شبابك..
عبد المطلب:ردي بالك ع جدك يابنت..
"حاضر"
"والله كان خايف عليا راك جيت معانا"
عبد المطلب:اذن العصر..هي السلام عليكم..وحياهم بيده وطلع..
"ايه اهرب اهرب ياجلدة"
ضحكوا اميمه ولطفي وخوتها اللي كانوا يكلموا فيها عن طريق السكايب..
🌻وفي الحوش اللي في جنبهم...
فايزة؛هي ماما غطي الطاجين هداكا بالسلفر..
صفاء:حاضر ماما..
مروة:قوليلهم اني درت الكيكه وزيناها مع بعض..
فايزة بضحكه:حاضر..هي ماما تاله كان كملتي ماكله جيبي الصونيه...وانتي صفو ماما كان حسيتي روحك معاش تقدري افطري حبيبتي..
صفاء:لا ماما اني حالفه نصيمه كله..
ابتسمت فايزة وقالت؛باهي بري ارفعي الحافظات هدوكا الزوز لحوش عمك إياد..
ابتسمت صفاء بفرح وقالت:حاضر..
مروة:نمشي معاها ماما..
فايزة بإبتسامه؛باهي بري معاها وروحوا ع حوش جدو لطفي..
الزوز قالوا:حاضر..
فايزة:ماما صفاء غيري الشورت والبسي سروال
صفاء:حاضر..
ومشت طلعت تجري للدار بش تبدل واختها تراجي فيها..
☘☘☘☘☘
فهالوقت ..
المهدي كان في المطحن يخدم مع العمال ..
وولاده محمد ويزن يلعبوا في الكورة برا مع الولاد..
وهو مرة مرة يراقب فيهم..
شويه رن تليفونه..
قامه وشاف المتصل طلع برا بش يرد..
المهدي:ايوه..
"قول للولاد يخشوا ياسرهم"
المهدي:خليهم يلعبوا برا ترتاحوا من دوشتهم..
"لا مهدي خيرك! محمد صايم راهو"
هو ابتسم ع جنب وقال:والله ماشاء الله عليه زي الجن يلعب ومافيه شي
"مهدي دخلهم لوسمحت"
المهدي:باهي استني اسمعي بروحك...محمد
وقف محمد لعب وقدم لبوه:نعم
المهدي:امك قالت خش داخل..
"تي لا ماتقولاش امك!"
محمد؛قوللها ماتخافش عليه ولدك حديد..
ورجع يلعب..
"مهدي اااه منك يامهدي"
رفع حاجبه اليسار وقال:علاش شن علاقتي اني !؟
"ربي يهديك وخلاص"
المهدي؛بري شوفي العصبان ..
"طايب قداش ليه"
المهدي:باهي ديريلي هديكا المثلجه..
"حاضر وانت ماعندكش الروح مع المثلج..ردبالك ع الولاد."
المهدي:ترا طلعيلي بنت بوها..
"برا اخدم ع راسك"..
وسكرت والمهدي يضحك..
بعدين هدا ضحك ورجع خش للمطحن للمرة تانيه..
🌻ع طلعة صفاء ومروة من حوشهم ماشيين لحوش اياد..
شافوا الولاد يلعبوا.
صفاء:محمد..
التفت شبحلهم..
صفاء:صايم؟
هز راسه بآيجاب..
مروة حطت ايديها ع خدودها وقالت؛حي عليك دوخ!
ضحك محمد ورجع لهي باللعب.
مروة:هدا واحد مهبول..
صفاء ضحكت..
وقعدوا يمشوا لين وصلوا في حوش إياد..
دقت مروة الباب..
شويه وفتح اياد..
لما شافاته صفاء ابتسمت من قلبها..
اياد بضحكه:اووووو البنات الحلوات..
صفاء:كيف حالك عمو..
اياد:دايخ ياعمو دايخ كيف روحت من المستشفى..
صفاء:سلامتك عمو..تفضل..
اياد:بارك الله فيكم ديما متعبين الوالده..
وخدي منهم الحافظات وقال...الله ع الريحه زادت دوختني..
صفاء؛درت الطاجين اني..
اياد؛ماشاء الله ماشاء الله ع بنتي الحلوة ماشاء الله..
مروة :واني درت كيكه وزينتها مع ماما..
اياد؛ايااه كبيرة كبيرة..تعرفوا اني ومهند محظوظين حني بس في الشارع اللي ناكلوا من ايدين الشيفات مروة وصفاء.
ضحكوا.
وهو ابتسم وقال:راجو شويه بناتي..
خش داخل..
مروة؛نحبه هلبه عمو اياد..
صفاء وعيونها معبيات دموع وهي مبتسمه:حتى اني..
شويه وطلعلهم وفي يده سفرة حلو مغلفه وقال..هي خودوا..
صفاء:شكرا عمو..وخدتها..
اياد:اني اللي نقول شكرا هني مش انتم..
صفاء:عفوا عمو..هي مع السلامه..
اياد يإبتسامه:مع السلامه ربي يحفظكم..
مشوا الزوز وهو طلع برا وقعد يشوفلهم بش يطمن عليهم شاف الجالي موقفهم في الطريق..
اياد بإبتسامه:ماشاء الله عليه الشاب هدا مختلف اختلاف جذري عن حوشهم كله..
🌻صفاء:الحمد لله عمو..
الجالي:من فيكم صايمه..
صفاء: اني عمو..
مروة:اني صمت شويه..
الجالي بضحكه:الله يبارك..وحط الصندوق اللي في يده لوطا..
وعطاهم شكارة معبيه عسلة وزلابيه ووحده تانيه فيها حافظات جيلاطي..هي تفضلوا..
كل وحده فيهم خدت كيسه وقالت:شكرا عمو..
الجالي:العفو ياحلوات..
وقام الصندوق ومشي كمل طريقه..
وهما مشوا لحوش لطفي الواعر..
☘اياد:علاش جيلاطي وعسله؟
الجالي:اكثر حاجتين نحبهم ..
اياد بإبتسامه:بارك الله فيك..
الجالي:صحة فطورك مسبقا..
ومشي يوزع ع باقي الجيران..
اياد؛سلمك..وخش للحوش..
🌻🌻🌻🌻🌻🌻
سدرة:الله شرقيات..
صفاء:هادي من عمو اياد..
مطيرة؛والعسله والجيلاطي..
مروة؛من عمو الجالي..
سدرة:عادته متاع كل سنه نص رمضان لازم يصدق اكثر حاجه يحبها..
ع خشة غرفه:مت عطش اني خلاص..
سدرة:طوبى وين خل تجي دير عصير طبيعي لبوي..
غرفه:الشيخه تقرا في القران..
مطيرة بإبتسامه:بكري قالت قريب نختم..
سدرة:ايه من بداية رمضان قالتهالي نبي نختم ختمتين العام هدا..
فايزة وهي تساوي في الحاجات:الله يبارك عليها هدا علاش ربي موفقها في كل شي..
وغرفه تسمع وتحس ان رقبتها قاعده تنكسر ماتحملتش طلعت من حداهم...
☘☘☘☘☘☘
بعد آذان المغرب..
في الصاله..
مغليه؛بنشد في العزومه المرة هادي المراة حامل وتتعب بروحها في شقتها
نسرين:تعرفي يومها مشيتلهم فجأة توقعت نلقاها راقده والحوش يضرب يقلب وخوي ياكل من برا..
صدمتني وين لقيتها تلمع في الارضيات مخليه الحوش زي الطاسه وهداكا اليوم مدايرة كذا صنف..بعتت حتى لعزوزتها واني مروحه بعتت معاي بايروكس معبيه..
مغليه:ماشاء الله عليك كنه طاحت فيها فتحيه..
عائشه اللي كانت تسمع بصمت قعدت توكل في بنتها بس ومعاش بت تاكل عارفه انها حتسمع دوة..
نسرين؛صدقتي يام رغم انها مش قابلتها راهو لكن هي دايرة واجبها وزياده..
شبحت لنسرين اللي كان واضح عليها انها تلقح..
وخديجه بش تزيدها عليها مش حبا في نجاة:بخوت العزوز الباهيه واللي طفطف تجيها كنه مسمه..والعزوو الحرفه تجيها كنه باهيه..
مغليه قعدت تاكل وهي ساكته متهنيه بكلام بناويتها..
وعائشه مجبورة تسكت لأن المهدي بدي متحسس من ناحية اهله بسبب كذا موقف مش حلو شافه منها اتجاههم..
بعد كمل عشاهم..مدوا رجليهم وقعدوا يهدرزوا..
وهي رفعت السفره ومشت بيها الكوجينه وخلت بنتها حداهم..
الكوجينه..لقتها معبيه ماعين..هي اليوم اكثر من وقف فيها والباين حتكمل فيها بروحها..
قعدت تلم فيهم ع بعض وهي مضايقه ع الاخر وقعدت تفضفض بينها وبين روحها:نطيب ونغسل ونضم زي الخدامه وفي الاخير نطلع ماننفعش..
"عايشه"
غمضت عيونها بشده..
جاها وقال:اني مش قتلك قبل لو ماتبيش مع العيله اقعدي في شقتك!
فتحت عيونها وشبحتله وقالت:يامهدي مش قصدي بس تشبح فيا انت بروحي ع هدا كله..
المهدي؛وين المشكله..اكيد هما عند عيالهم يديروا في نفس الشي..
عائشه؛لا اختك خديجه قالت محي يعاون فيها..
المهدي ضحك وقال:لا محي حاله خاصه..
عائشه:ع فكرة الرسول كان يساعد اهل داره راهو حتى يعجن في العجينه..
ابتسم وقال:عليه الصلاة والسلام..باهي ياستي..
فتح ازرار اكمامه وقعد يرفع فيهم ويقول..وقولي المهدي ماينفعش.
هي بدهشة:شن بدير!.
المهدي:حولي هكي شويه..وخداها من يدها وبعدها ع الحوض ووقف مكانها وقال..انتي شوفي باقي الكوجينه..
عائشه:حي مهدي الله كان تشوفك امك تقيم عليا الحد..
المهدي قعد يصب في الصابون ويقول:تحركي من غير كثر كلام هيا
هي قعدت تشبحله كيف بدي يغسل وهي مبتسمه وقلبها يدق بقوة..
المهدي:تحركي
هي بضحكه:حاضر..
وبدت بالغاز قعدت تنظف فيه
المهدي:ترا شغلي الراديو..
عائشه:حاضر..ومشت شغلاته اشتغل ع قناه فيها الموشحات والمالوف..
المهدي:خليها..
عائشه ابتسمت:تمام ..تعرفه يحب اغاني المالوف..
وكان موشح "ليه ياغزالي نسيتني"
والمهدي يحبه هلبه وقعد يرد وراهم..
وعائشه تسمع فيه وحساته وكأنه يغني عن صاحبتها..
ع قد ماعجبها صوته..بس قلبها كان موجوع غيرة وحب..
فهالأثناء..
جو خاشات خديجه ونسرين يشربوا..
انصدموا باللي شافوه..
عيونهم قريب طلعوا من التفنيص..
بعدين خدت خديجه نسرين ومشوا..
خديجه:حيه ياحيه..والله لما نقول لأمي..
نسرين:لالا خديجه فكينا شن دخلك انتي هما احرار وبعدين مش راجلك يغسل في الماعين..
خديجه:تي غير شن جاب محي للمهدي بس! المهدي اللي ليه هيبته في شارع القهوة يوقف ويغسل ماعين في الكوجينه!!
وصلوا للصاله..
نسرين:خديجه فكينا من المشاكل..
فاتتها خديجه وخشت لأمها..
وفي الموضوع هدا مغليه ماعندهاش ياامي ارحميني..
لكن تصرفت بعقل..
مغليه وهي تسحن ع عائشه:خليه يكمل ويطلع للتراويح وهي تو نتفاهم معاها بروحي...
☘وكمل المهدي مع عائشه ضمان الكوجينه..
بعدين ركب شقته هو وولاده جهزوا أنفسهم لصلاة التروايح..ونزلوا ومشوا مع محمد وباقي الشباب للجامع..
وعايشه كانت ناويه تبخر الحوش بعدين تركب لشقتها..
بس وهي ماشيه تاخد سدرة من عزوزتها..
شدتها وقالت؛قعمزي..
قعمزت عائشه وقالت:وين البنات..
مغليه:في دارهم راقدين بصغارهم..اسمعي هني..انتي كيف تخلي راجلك يخش يغسل معاك الماعين..تعرفي اني اكره حاجه عندي راجل يخش يعول في الكوجينه..ولايضم ولايكنس..تريح هيبة الراجل هكي
عائشه:الرسول...
قاطعتها مغليه وهي متنرفزة قالت؛عليه الصلاة والسلام..ترا فكيني من فلسفتك الزايده واسمعي الكلام...اخر مرة نشبح ولدي دايرة حاجه زي هادي..وياويلك لوسمعت..اني ولادي مربيتهم رجاله ليهم هيبتهم وقفتهم في مكان رزقهم مش ورا حوض الغسيل...عمري ماخليت بوهم يقيم قشه..عمري ماخليته يمد يده ع حاجه..وبعدين يافالحه كان معاش تبي ترمضني معانا عندك شقه شديها ايوه..
عائشه ودموعها في عيونها:هو اللي بادر اني ماجبرتاش قتله اطلع هو ماباش..
مغليه:ماهو كان مش قعدتي تشكي ودرتي الطروح مادارش هكي..وبعدين تعالي جاي اللي يسمع يقول بوك وخوتك كانوا يعاونوا فيكم في الحوش تي خليني ساكته سلم بنتي مانبيش ندوي..المهم الكلام اللي قلته سمعتيه وهادي اخر مرة ياعيشه..وهاك بنتك واركبي..
ناضت عائشه خدت بنتها وهي شادة دموعها بالسيف..
مغليه:ان شاء الله نسمعك شاكيه للمهدي..قسما بالله نقلبها عليك ونركبك حق ونشوفوا من يصدق اني ولاانتي..
عائشه خافت هلبه وقالت:بالسلامه توا..
ومشت طلعت بسرعه ودموعها ينزلوا..
ومغليه تنهدت وناضت خدت الملايه لبستها وفرشت الصلايه
وبدت تصلي في التروايح...
☘☘☘☘☘☘
"من شر الوسواس الخناس○ الذي يوسوس في صدور الناس○ من الجنة والناس"
سكرت المصحف..وخدت نفس بعدين رفعت ايديها وبدت تدعي
تدعي لأمها برحمه والمغفرة والجنه..
تدعي لبوها بالصحه وطول العمر..
تدعي لاختها فردوس ربي يهدي سرها
تدعي لاختها غرفه بالهدايه..
تدعي لعمتها مطيرة بالجبر..
وتدعي لأختها سدرة بالعوض الجميل
ودعت لكل اللي تحبهم بكل خير...
وكملت دعاها ونست اهم حد لازم تدعيله نفسها..
نست وماتفكرتش بكل وكأنها ماتبي شي من الدنيا..
ردت المصحف لمكانه وحولت الملايه..
وخدت العبايه والوشاح ومشت طلعت من الدار..
طوبى وهي تلبس:عمتي بابا قاعد..
مطيرة:ايه قال لما تكمل قولولها يراجي فيك برا..
طوبى:هيا هي..
سدرة:كولي حلو واشربي كاكاو درتلك..
طوبى:لالا خلاص معاش في وقت..
ومشت طول لمرايه المدخل..ساوت وشاحها كويس..
بعدين طلعت لبوها..
لقاته في الجنان يشرب في القهوة..
كملها بسرعه وطلع بيها من الحوش..
🌻🌻🌻🌻🌻
وفي حوش الصيد..
كانت عواطف مقعمزة تتفرج ع التلفزيون..
ونجاح توتي في سفرة القهوة والحلو..
اما نجمه فدارها مسكرة عليها تصلي في التراويح..
ونجاح طالعه بالسفره..
خش واحد من خوتها يقول:في نساوين برا..
عواطف:نساوين منو؟
:اول مرة نشوفهم نوضي شوفي منو..
عواطف ناضت بسرعه وهي مستغربه..
طلعت شافتهم وعرفت وحده منهم...
كانت خالة مراد..
رحبت بيهم ترحيب حار ودخلتهم للحوش..
ونجاح خبرت امها ان في نساوين جو بعدين ولت للكوجينه تجهز في الضيافه..
طلعت نجمه للنساوين اللي كان عددهم تلاته..
وحتى هي عرفت فيهم خالة راجل بنتها..
رحبت بيهم..
وقعمزوا يهدرزوا..
ونجاح في الكوجينه..تجهز في الموالح والحلو..
والعصير والشكولاته..
شويه خدت سفرة العصير والشكولاته وطلعت بيهم..
وهي لابسه قونه طويله وبدي نص كم هكي لبسهم في الحوش هي وعواطف قليل مايلبسوا في قفاطين حوش.
خشت عليهم وهي تقول:السلام عليكم..
لما شافتها خالة مراد ابتسمت وركزوا فيها اللي معاها..
ونجاح عرفت خالة مراد..
حطت السفرة ع الطاوله وسلمت عليها سلام كويس..
وسلمت ع اللي معاها بعدين ضيفتهم وولت للكوجينه..
خالة مراد لحقتها بعيونها بعدين شبحت لأمها وقالت.
:سامحينا اللي جينا من غير موعد..
نجمه:لامافيش مشكله بكل تشرفوا في أي وقت..
:تسلمي يارب..الحق ياوخيتي حني جربناكم وعرفناكم ونعم الناس ويعلم الله قداش ارتحتلكم وقبل لنجي هني اختي شكرتلي فيكم وبالذات فعواطف...
ابتسمت عواطف..
:وزادت شجعتني نجي ومعاي حمواتي بش نخطب لولدي عبد الحفيظ..
عواطف اتفاجئت وقريب طارت من الفرحه..
ونجمه كذلك بس الزوز دارو روحهم عاديات..
:هاه شن قلتي يانجمه..
ابتسمت نجمه وقالت:انتي تعرفي في مواضيع زي هادي لازم نردوا الشيره ع البنت وبوها وخوتها..اما راي اني فيكم زي رايكم فينا ونتشرف ناسبكم مرة تانيه..
:تسلمي يارب وربي يقدم اللي فيه الخير..
ناضت من حداهم عواطف ومشت للكوجينه..
خشت لأختها وهي تقول:فرخه نجاح..
نجاح:خيرك ماجبتيش السفرة!؟
عواطف بضحكه:فوتيها السفرة توا وقوليلي مااستغربتيش جية خالة مراد
نجاح؛اكيد استغربت وهلبه..
عواطف:جايه تخطبك ياهبله..
فتحت نجاح عيونها ع وسعهم وقالت:اني!؟
عواطف:لا اني..اكيد انتي ياهبله..
نجاح قعدت ساكته وهي تفكر بعدين قالت؛وزعمه لمن بيخطبوني..
عواطف:حي ع الحمارة!! لعبد الحفيظ..
نجاح ضيقت عيونها وقالت:من عبد الحفيظ!؟
عواطف:نهارك نستيه!؟ ولد خالة مراد اللي دبرتيله الخدمه..
سكتت نجاح وهي متفاجئه بعدين قالت؛وشن عنده بش يخطب هو؟.
عواطف:الحق مش عارفه اني لما عرفت جيتك نجري بش نقول..هي بري خشي الدار واني نكمل الباقي..
نجاح قعدت تشبح لأختها كيف تعول وهي تفكر في المفاجأة الغير متوقعه..بس ماكانتش متحمسة ليها..لأنها تعرف حال عبد الحفيظ وحساته حيطلع استغلالي زي ولد خالته..
ايه هادي وجهة نظر نجاح في مراد بس ماقدرتش تنبه اختها ماتقدرش تقوللها شي..عواطف غارقه فيه وفي كل احلامها اللي تبي تحققها معاه..
حوش..صغار...استقرار...
حترفض تسمع من اي حد اي حاجه تفوقها من احلامها ع كابوس وممكن تعاديه..
☘مشت نجاح وخشت لدارهم ومازال تفكر في الموضوع...
~~~~~~~~~
نجمه:قالت عنده خدمه في الدوله وخش شراكه مع صاحبه في مكتب بيبدوا فيه الخدمه..واخد قرض وبادي يبني في حوشه وع العام الجاي ان شاء الله يكون تام..هاه شن رايك..وايه حقه اكبر منك بعامين..شن رايك..
نجاح:مش عارفه خليني نفكر شويه ونستخير ..
نجمه:ع راحتك..فكري كويس وماتستعجليش..
وناضت وهي تقول..واللي فيها الخيره يجيبها ربي..
ومشت طلعت من حداهم..
عواطف:خيرك حسيتك مشوبه!
نجاح:مش عارفه الموضوع جي فجأة يبي تفكير..
عواطف :العمر معاش يراجي يانجوحه راهو خلاص كبرنا وقريب تريح علينا..
نجاح:خليها تريح عليا ولانتزوج تحت الضغوط هادي..العمر وكلام الناس وغيره..ايه خاطري هلبه نتزوج بس نبيها زواجه صح ياعواطف نبيها تصيب وماتخبيش هدا عمر راهو..
عواطف:خليك في الفلسفه متاعك لين تلقي روحك قعدتي بروحك ومامعاك حد لاراجل ولاصغار
سكتت نجاح وهي مضايقه..كلام اختها اثر فيها..بس في نفس الوقت ماتبيش دير شي مش مقتنعه بيه تماما..
☘وفي حوش ام مراد..
ام مراد:مش مهم صغيره ولاكبيره المهم بمرتبها تتساعد هي وياه..
ام عبد الحفيظ:ع قولتك..ومرات ياخد قرض تاني وهي تكفله ونغيروا اثات الحوش ليه سنين وبنين ماتغير.
وهما يهدرزوا..
وورا الحوش في الجنان..
"هاه شوفي شن رايك"
:الله يجنن يجنن ياميرو وغالي هلبه..
مراد:مايغلاش عليك..
بضحكه قالت:قاعد تسحب من البنك متاعك..
مراد بضحكه:امتى ما نبي..
:باهي حبيبي امتى تم موضوعك معاها عييت اني الحق..
مراد:نبي الحوش يكمل قبل وبعدين نخلقلها مشكله من تحت الارض ونطيرها..
:ياريت يتم هالحوش بسرعه ونخلصوا كبدي درهت..
مراد:قريب حبيبتي ان شاء الله قريب..
☘☘☘☘☘
"طاهر"
طاهر وهو يحدد في حوايجه:عيونه..
نجاة:حبيبي اليوم كلمتني عمتي مغليه واصرت عليا نجي نفطر عندهم غدوة..
طاهر:هدا اللي جيت بنحكي معاك فيه..اصلا اني غدوة عندي مشيه لمصراته بعد العصر بنقعد ليله وبنروح..وزي ماتعرفي امي عند خوالي هالفترة مانقدرش نحطك عند حد غيرهم..
تنهدت نجاة وقعدت ساكته .
طاهر:خيرك سكتي؟
نجاة:تمام مدام الموضوع فيه خدمتك مانقدرش نقول لا..
طاهر:كان نعرف شن جاك عليهم..
نجاة:مش هكي ياطاهر بس اني في الشهور الاخيره من الحمل والحق متحشمه نمشيلهم ونجي بهالمنظر.
ضحك وقال:متحشمه من بوي وخوتي تي هادوا بوك وخوتك.
نجاة:عارفه..بس هكي تحسها ابصر كيف..
طاهر:لاابصر لاماابصرش معاش تعقدي روحك..خلاص جهزي نفسك من توا بنرفعك غادي من الصبح..
ناضت وهي تقول:حاضر .
ومن داخلها كانت خايفه ومضايقه هلبه ماتبيش تمشي تشوف خديجه..
☘☘☘☘☘☘
الساعه 7:00صباحا..
هدا وين كملت سدرة ضمان الحوش...بعدين خشت للدار وانطرحت ع السرير تحت المكيف وقعدت تسبح لين جاها النوم...
🌻فهالوقت..
وصل طاهر بنجاة لحوش بوه..
وصى بوه ومرته عليها هلبه..بعدين تسقد...
وهي بعد ماوصلت خلتها مغليه تخش جناحها بش ترقد..
رقدت نجاه وهي مضايقه...
☘وسدرة وهي راقده كانت باديه عليها ملامح الخوف..
تشوف في نفس المنام اللي شافاته بطوبى بنفس التفصيل..
وفي اخر حاجه صارت فيه..
ناضت وهي منتفضه في فراشها من الخوف..
قعمزت وشبحت جهة طوبى كانت راقدة ونومها عميق وكله راحه..
غمضت عيونها وتنهدت بخوف بعدين فتحتهم
وقعدت تفكر فهالحلم اللي لازم تلقاله تفسير
☘☘☘☘☘
الساعه9:00صباحا..
في الطريق..
المهدي:مادام جت مش لازم تنزلي بكري خليها تاخد حصتها
عائشه:لالابننزل مش حلوة قعدتي فوق وهي حامل حتتعب..
المهدي:نتفكر لما كنتي حامل ديري في كل شي..
سكتت عائشه وهي مضايقه وخايفه..
المهدي:انزلي بعد العصر..
عائشه:خلاص ندير حاجات في الشقه ونزلهم..
المهدي:ديري رايك..
••حطها قدام المدرسه...
مازال مابداش العام الدراسي بس لازم تحضر زي ماهو معروف عن دوام المعلمين يعطلوا شهر هانيبال8بس..
وهما توا ليهم فترة في شهر الفاتح...9...
☘وفي المدرسه..
سدرة ماصدقت شافت الابله المصريه خدتها ومشت وقفت معاها في مكان بعيد عن المدرسات والدوشه..
:ايه مالك ياسدرة وغوشتيني ياختي..
سدرة:اني نعرف انك تفسري احلام صح.
:اه امي درستوا دراسه وانا تعلمت منها وكله علم شرعي.
سدرة:تمام..اني بنحكيلك ع حلم ونبيك تفسريه..
وقعدت سدرة تحكي عن الحلم والمدرسه تسمع فيها..
بانت ع وجهها ملامح الخوف وكانت واضحه..
سدرة بقلق:شن تفسيره؟!
تنهدت وقالت:شوفي ياحبيبتي الحلم ده ماينفعش يتفسر عشان هو حلم وحش والاحلام اللي زي دي مفروض تحكيها في الحمام وتفي ع شمالك تلات مرات..بس انتي دلوقتي حكتيه..ماتتخضيش كده..اسمعيني وماتخافيش..
طلعي صدقه عن الحلم ده عشان ربنا يكفيها شره..وعند ي نصيحه..في المستقبل ان شاء الله لو تقدم لطوبى عرسان..خليها تختار راجل صح انتم تعرفوه كويس قوي جواه زي براه بالزبط راجل يتقي ربنا فيها..
سدرة:غير كان قلتيلي التفسير وريحتيني.
؛انسي التفسير خالص واعملي اللي قلتلك عليه..
ع جيه عائشه:السلام عليكم خيركم واقفات هني..
سدرة واللي معاها:وعليكم السلام..
سدرة بآبتسامه توتر؛هكي نهدرزوا ...
وقعد في بال سدرة الحلم تبي تفسيره بأي شكل..
اتصلت بوحده جارتهم خالتها تفسر في احلام عطتها الحلم وطلبت منها تفسره..
والبنت قالت"شويه ونرد عليك.."
بعدين اتصلت ببنت شيخ جامع بوها يفسر الاحلام..
تسكن في شارعهم حتى هي حكتلها الحلم كامل..
وهي قالتلها "اخطمي علينا بش نقولك شن قالي"
سكرت منها من هني..اتصلت البنت الاولى..
طول ردت..
"سدرة معاك خالتي"
سدرة:هاتيها...
وبعد السؤال عن الاحوال...
"سدرة الحلم مادوريش ع تفسيره ومعاش تحكيه لحد..وطلعي عنه صدقه بش ربي يدفع شره..وبنقولك بنتي..اختك لما يجيها نصيب بعدين ردي بالك تعطيها لأي حد لازم تعطيها لراجل تعرفيه كويس تقدري تأمنيه عليهت...راجل زي من برا زي من داخل كتاب مفتوح"
شكرتها..وسكرت منها وهي تقول:علاش ياربي مايبوش يفسروه لهالدرجه مش كويس!..
بعد كمل دوامها..
روحت وعقلها مع الحلم..
خطمت ع حوش الشيخ..طلعت بنته...
:اسمعي قالك بوي ماتحكيشي لحد..وطلعي عنه صدقه..
سدرة:وماقالك شي تاني؟
:قال اختك من عباد الله المحبوبين ماتخافيش عليها..
التفسير هدا ريح قلب سدرة وخلاها طول تمشي تحط مبلغ في صندوق صدقه موجود في الجامع متاع المنطقه..
وروحت للحوش وقلبها مرتاح..
🌻🌻🌻🌻🌻
"يابنتي قعمزي ربي يهديك"
نجاة:عمتي اني مانحبش نقعد راقده في الصيام نحب نشغل روحي بش يعدي الوقت..
مغليه:باهي ربي يعطيك الصحة ماتجهديش روحك هلبه..
نجاة:حاضر..
وقعدت تكنس في الحوش بالمكنسه الكهربائيه..
وبعد كملت خدت ملمع وفوطا وقعدت تلمع في الحوش..
شويه جتها مغليه:وواك ياربي عمك يبي يفتح المربوعه الخارجيه اشبح من بيجيه..بالله خشي جيبيلي مفتاحها من دار البنات تلقيه في دولابهم حطيته يومها ونسيته والحقيني بيه برا عمك يبي يهدرز عليك..
نجاه:حاضر..
مشت مغليه..
ونجاة حطت اللي في يدها ومشت خشت لدار البنات..
قعدت دور بعيونها لين شافت الدولاب..
مشت فتحاته وقعدت دور فيه وتقلب...
لين عترت ع حاجه...سحبتها بالشويه..وين بانت عليها فتحت عيونها ع وسعهم..
كان الظرف نفسه اللي فيه فضايح اختها..
نزلاته وفتحاته لقت الصور موجودات..
ارتسمت ع وجهها ابتسامه دهشه وعدم تصديق..
بعدين ضحكت وقال:الله ياربي!...
قعدت تشوفله وهي مش مصدقه انه طاح بين ايديها..
تفكرت شن يبوا منها..
رجعت دورت ع المفتاح لين لقاته..
رتبت كل شي كويس..
ومشت طلعت من الدار وسكرتها..
وخشت لجناحها حطت الظرف في دولابها ومشت طلعت بسرعه..
☘محمد:من يومها لسانها واعر زي المنشار..
نجاة ودموعها في عيونها وبملامح مثيرة للشفقه؛الحق نفسيتي تعبت من كلامها والحق حسيتها معاش تبيني نجي هني.
مغليه:هدا علاش قطعتينا..
نجاة:شن بندير مجبورة ندير مايرضيها هي في النهايه ام طاهر وزي امي ولازم نسايرها..والله ياخالتي لولا حلفانك عليا ماجيت..جيتكم واني خايفه..
محمد:مش من حقها تمنعك من شي تعالي امتى ماتبي وقت ماتبي..
مغليه؛وع موضوع الجياب خلي كل شي عليا..
نجاة بصدمه مصطنعه:لاياعمتي بالله عليك هكي تو تقول مادرتوشي انتم..
مغليه:وهي شن عرفها من بيقوللها..قدام الناس انتي وخواتك درتوا كل شي..
ابتسم محمد وهو يشوف لمغليه..
نجاة:مش عارفه حاستها رزينه..
محمد:لا هكي بتخليني نحرج منك يانجاة يابنتي انتي بنتنا راك...اللي بنديروه نديروه لولدنا والعيل اللي جاي في الطريق..
نجاة بآبتسامه:يطول في عمرك يابنتي..
مغليه:ايه مازال مافكرتوش في الاسم..
محمد:رد بالك تقولي محمد ساد ياسر..نقعد غير نضبح عليهم محمد المهدي..محمد الصيد..محمد حامد..لالا ماتسموش عليا..
نجاة بإبتسامه:باهي انت اختار الاسم..
ابتسمت مغليه وهي تشوف لنجاة..
محمد:والله اني نحب اسم حمزة سموه حمزة كان عجبكم..
نجاة بإبتسامه:خلاص حمزة حمزة.
مغليه؛سلم بنتي بري شوفي كان لحم داب تبليه..
محمد؛خليها ترتاح..
نجاه:لاعمي هادي راحتي..
وناضت خشت داخل..
محمد؛مسكينه يتيمه وماعندها وخاطرها مكسور..بالله يامغليه تحطي بالك عليها مانبي حد يوجعها..
مغليه:من غير ماتوصي..لكن هاللطفيه هادي اعوذ بالله منها شن هالسم اللي عندها..
محمد:خليها معاش تدوي عليها..
مغليه:وعلاش يابابا مش متحمل فيها!؟
ضحك محمد وقال:عليك مراة عقلها صغير..اني مانبيكش تحطي ذنوبها ع كتافك وتفسدي صيامك..
رفعت حاجبها وقالت تشكيكا:اممم..
وهو يضحك ويحرك في راسه يمين ويسار ويقول:ياالله عليك مغليه وخلاص...
☘☘☘☘☘
وقعدت نجاة في الكوجينه تطيب وتعول مع عزوزتها ومغليه عاجبتها ع الآخر..
شويه طلعت مغليه تشوف الجنان كان فيه حاجه تبي الضمان..
لقت الجالي خاش للحوش..
الجالي:السلام عليكم..
مغليه:وعليكم السلام..خش اركب طول لداركم مرت خوك في الكوجينه..
الجالي بضحكه استغراب:شن اول مرة وبعدين شن بندير بيها الكوجينه اني..
مغليه؛ماهو الكوجينه ساخنه شويه وهي مش لابسه حجاب..
الجالي ضحك وقال:تمام تمام..
ومشي خش داخل وطول للدروج ركب للدار ..
وع باله ان اللي تتكلم عليها أمه عائشه..
☘وعائشه فهالوقت نزلت من شقتها..
خشت لحوش العيله..تلقتها عزوزتها..
مغليه:شن سفيرة عزيزة مازال بكري علاش نزلتي توا؟
عائشه:كيف حالك عمتي..
مغليه؛من ربي باهيه..تعالي هني مانكش عارفه ان سلفتك جت اليوم..
عائشه:نعرف..
مغليه:اها هدا علاش شديتي شقتك ولا..
عائشه جت بتقوللها ان المهدي هو اللي قاللها تقعد وتنزل مع العصر بس خافت تفهمها مغليه غلط وتقول انها تعاود للمهدي شن يصير وتحرض فيه..
مغليه:مفروض تحشمتي ع وجهك ونزلتي المراة حامل والجو نو ورطوبه ويعلم الله بحالها مسكينه مابتش تقعمز بكل..
عائشه:وعلاش تجهد في روحها حامل مفروض تقعمز..
مغليه:لأنها تتحشم..وماديرش في الطروح اللي يديروا فيهم غيرها ع خاطر سمعت كلمتين ماعجبوها قلبت وجهها وشدت شقتها..وهي تاكل في الهزيبه من عزوزتها ومع هذا تمشيلها وتقوم بواجبها..فرق كبير فرق...
تعوذت عائشه من الشيطان في سرها وقالت:حاضر عمتي تو نخش نكمل عنها..
مغليه:بري قدامي..
مشت عائشه ومغليه لحقتها.
وين وصلوا في الكوجينه خشوا ورا بعض..
مغليه:نجاة بنتي اطلعي تريحي تو تكمل عنك عيشه..
نجاة بإبتسامه:كيف حالك عيشه؟
عائشه ابتسمت فوق من نفسها وقالت:الحمد لله شن حالك انتي
نجاة:الحمد لله...
مغليه:هي بنتي اغسلي ايديك وبري ارتاحي في جناحك من صبح ربي وانتي ع رجل وحده وصايمه فوقها..
نجاة:لامش لازم عمتي معاش قعد شي اصلا خل نكملوا مع بعض.
مغليه:بنتي راجلك وصاني عليك..اطلعي قدامي..
ابتسمت نجاة وقالت؛حاضر..
وقعدت تغسل في ايديها..
بعدين نشفتهم بالفوطه ومشت فاتت من جنب سلفتها وهي تقول؛سامحيني عيشه..
عائشه:لا على شني يعطيك الصحه..
مغليه:هيا بنتي هي..
نجاة:حاضر...
ومشت طلعت من الكوجينه للجناح..
ومغليه مشت بش تتوضا وتوتي روحها للعصر..
🕸خشت نجاة لجناحها..
وسكراته بالمفتاح..
وقعدت تمشي ع مهل لين وصلت في دولابها فتحاته وطلعت منه مظروف الصور .
سكراته..
ومشت للثلاجه اللي في الدار..
فتحتها وطلعت منها شيشة عصير سيزر وسكرتها..
بعدين خدت نقالها من ع الزيانه .
ومشت قعمزت ع السرير .
شافاته لقت مكالمات من طاهر..
اتصلت بيه...
هدرزت هي وياه شويه..بعدين حطت قدامها المظروف .
وفتحت شيشة العصير وقعدت تشرب وهي تشوفلها وتفكر..
شويه وحطت الشيشه ع الكامدينو..
واتصلت بأختها صابرين..
ردت صابرين طول...سألوا عن احوال بعض بعدين صابرين قالت..
"عيشة دره الكبد يانجاة والله حرام عليك اللي درتيه فيا"
نجاة؛مرات نخليك تروحي قريب..
"شن قصدك"
نجاة:قبلها الفرخه نجوى هادي نبيك تعطيني اسمها كامل..
"علاش!؟"
نجاة؛بعدين تعرفي..
"باهي..اسمها نجوى ابراهيم رمضان****"
نجاة:وين تسكن
"في******"
نجاة؛حلو سكري توا..
"نبي نعرف شن بديري"
نجاة:قتلك بعدين..سلام..
وسكرت عليها..
بعدين قعدت دور بعيونها ع شنطة اليد متاعها لين لقتها..
ناضت ومشت جابتها ورجعت قعمزت ع السرير..
فتحتها وطلعت منها مفكرة صغيره..
وقعدت دور فيها ع رقم..لين لقاته..
نجاة؛باهي اللي حفظته..
وطول سجلاته في تليفونها واتصلت..
شويه ورد عليها واحد..
"ايوه"
نجاه:كيف استاذ فضيل معاك االمهندسه نجاة المعلول..
"اهاا..اهلا اهلا اهلا باش مهندسه شن اخبارك شن امورك"
نجاة:الحمد لله..كيف حالك استاذي وشن اخبارك..
"الحمد لله بخير"
نجاة:دوم ان شاء الله..استاذي طلباتك في خدمه..
"ادللي يانجاة نراجي فيه اليوم اللي نردلك فيه الخدمه اللي درتيهالي"
ابتسمت نجاة ابتسامه جانبيه...
~~~~~~~
نجاة:هدا واحد واصل مشيتله زمان حاجه.. المهم توا ان صاحبتك هادي حتختفي من هني .
"ردي بالك يقتلها نجاة الا القتل"
نجاة:مع انها تستاهله لكن ماتخافيش ماصايرلها شي قرصة وذن بس تخليها تختفي ومعاش يوصل فيها حد
"باهي انتي شن دراك ان حماتك الشيطانه مش ناسخه الصور"
نجاه:لو ناسختهم ماجابتهمش ودستهم هني في الدغاريق..
غير اني ربي يحبني اللي طيحني فيهم..
"ويحبني حتى اني،ع هكي نقدر نولي خلاص"
نجاة:اصبري لعند يتم الموضوع بعدين اني نكلمك ونقولك تعالي..
"تمام.."
نجاة:لكن مرة تانيه تغلطي ياصابرين اني معاش ليا بيك علاقه اللي ديريه بإيديك حليه بسنونك..
"لالاخلاص شعفه والله معاد تتعاود..هي خلاص بنسكر خالتك دراه الكبد تنادي"
نجاة؛تمام..سلام..
"سلام"
سكرت نجاة وشبحت للمظروف قدامها..
ارتسمت ع وجهها ابتسامه نصر خفيفه ممزوجه بالمكر...
بعدين خدت شيشه العصير وكملت شرابها...
☘☘☘☘☘
"هانا باديين نلموا في التبرعات بش نشروا كسوة العيد لصغار العايلات اللي ضايق بيهم الحال في الشارع"
مطيره:ربي يعاونكم ويجعله في ميزان حسناتكم..
طوبى:بابا بنقولك حاجه..
غرفه شبحتلها..
طوبى:خل نطلعوا حني صدقة عن امي..
ابتسم بوها وقال:ديما نطلع عليها.
طوبى:باهي اني نبي نطلع عليها..شن اكثر شي كانت تحبه ماما..
غرفه؛تقلدي في الجالي..
طوبى:عجبتني فكرته..لاتنالوا البر حتى تنفقوا مما تحبون..
ابتسموا وهما يشبحولها ماعدا غرفه اللي وجهها ولى احمر وتنرفزت..
سدرة وعيونها معبيات دموع؛امي كانت تحب حاجتين هلبه..المشلتت والعنب..
مطيرة:الاخضر اكثر من الاسود..
لطفي:تحب الزبيب واللوز الخزايني ديما تاكل فيهم..
طوبى:حيلكم ياجماعه فلوسي مايسدوش لهدا كله.
ضحك بوها وقال:خلاص اني نصدق عنها اللوز والزبيب وانتي المشلتت والعنب تمام..
طوبى بإبتسامه:تمام...
سدرة قعدت تشوف لطوبى وهي تفكر في الحلم وتفسيره..
《 نصيحه..في المستقبل ان شاء الله لو تقدم لطوبى عرسان..خليها تختار راجل صح انتم تعرفوه كويس قوي جواه زي براه بالزبط راجل يتقي ربنا فيها..》
سدرة في نفسها قالت"ياريت لونخليها جنبي العمر كله وبلاش منه الزواج..احفظها بحفظك يارب"
☘☘☘☘☘☘
بعد المغرب..
كانت نجاه ضم في الصاله...
وعائشه لاهيه ببنتها سدرة تغيرلها..
ومغليه في الكوجينه توتي في الشاهي للضيوف قبل ليطلعوا للجامع..
خدت السفره وطلعت بيها وهي تقول:الكوجينه تضرب تقلب كملي لبنتك ونوضيلها..وانتي نجاة بالله مشي ع سواري الولاد بالحديد..
نجاة:حاضر عمتي..
ناضت عائشه ببنتها وهي معصبه وطلعت بيها..
نجاة شبحتلها من فوق لتحت بعدين ابتسمت تهكما..
والتفتت للصالون لقت عليه زوز سواري عربيه خدتهم...
ومشت بيهم لدار المعيشه بش تكويهم...
حددت سوريه نضال وحطتها ع تركينه.
بعدين خدت سورية الجالي وبدت فيها..
خش داخل بياخد السوريه متاعه..
مشي للصاله مالقهاش.
توقع امه قاعده تحدد فيهم في دار المعيشه زي ماتعود..
ماقبلتاش امه وهو خاش للحوش..
لانها عطت السفره لمحمد حفيدها يرفعها للرجاله ومشت خشت للحمام..
وصل في دار المعيشه..
انصدم وين شاف نجاة شاده سوريته..
هو عقله طول قاله انها واخدتها بديرله فيها حاجه..
ماعنداش فيها ذرة ثقه..ثار غضبه لدرجه انه ماركزش لاعلي طاوله ولاع مكواة...
وبإندفاع جاها جبدها منها..
هي انفجعت..
الجالي بحده:شن بديري بيها!؟
نجاة من الفجعه معاش عرفت تتكلم..
الجالي؛اقسم بالله مرة تانيه نلقاك حاطه يدك ع حاجه تخصني ندمك ع اليوم اللي خديتي فيه خوي..
ومشي طلع وهو معصب..
هي حست ان الموقف مهين هلبه..واللي قهرها انها ماقدرتش ترد عليه حتى بملامح وجهها..
وقعدت تسحن عليه من داخل ودمها محروق..
وشدت دموعها بقوة مابتش تبكي..
فكت مقبس المكواة..
وخدت سوريه نضال ومشت بيها للصاله وحطتها فيها..
بعدها مشت للكوجينه..
ماكانتش تبي تقعد فاضيه بش ماتفكرش في موقف الجالي اللي قهرها..
عائشه:ترا بالله اطلعي وفكيني من الدوة..
نجاة؛دوة شني!؟
عائشه؛عارفتيها دوة شني ماتستغبيش ايوه وياسرك طروح..
نجاة عقدت حواجبها وقدمت لعائشه وقالت:اسمعي جاي حبيبتي اني توا واصله عندي حدها ماتخلنيش نفش غلي فيك..
عائشه رفعت حواجبها وقالت؛والله شن بديري!؟
نجاة شبحتلها شويه بعدين فاتتها ومشت بضم الماعين..
وعائشه كانت منغاظه منها ع الاخر وقالت؛قولي قولي شن بديري..
نجاة مابتش تعدل عليها اساسا عقلها مشغول بموقف الجالي وتبي ترد عليه بأي طريقه..
وقعدت تسحن وتحرق وخلاص..
وعائشه طارتلها منها جتها لفتها ليها وقالت:شن بديرلي تكلمي شن تقدري ديري لمرت المهدي!؟
الكلمه هادي طاحت في وذن مغليه وهي واخده مصليتها وماشيه للصاله..
وصلت عندها لوين ووين..
مشت طول للكوجينه..
وع خشتها هي..
صرخت نجاة من الألم..
انصدمت عائشهوقالت: خيرك..!؟
ونجاه شاده بطنها وتقول بألم؛حي عليا ياربي..حي شن جاني ياربي..اااه..
مغليه بفجعه؛شن درتيلها تكلمي..
عائشه وهي مفجوعه وخايفه:والله مادرت حاجه..
نجاه بألم شديد:ووه عليا ووه عمتي الحقيني بنموت ياربي..اااه...
مغليه طلعت تجري تكلم ولادها..
ونجاة قعدت في الكوجينه تعيط من الألم الشديد..
جتها عائشه بش تساعدها تقعمز:تعالي معاي تعالي..
جبدت روحها منها..وشدت في الطاوله وقعمزت وهي تتألم وبدت تبكي..
وعائشه تشبحلها بخوف..
شويه وجت مغليه تجري خدتها من يدها وهي تقولي:نوضي معاي نوضي سلفك المهدي بيرفعنا..
هزت راسها وهي تتألم..وناضت مع عمتها وطلعت هي وياها من الكوجينه وماطلعتش مغليه الا بعد ماعطت عائشه نظرات وعيد وتهديد..
وعائشه خايفه هلبه من اللي بيصير بعدين..
#قبل_العاصفه2
#طوبى
....يتبع....
Oops! This image does not follow our content guidelines. To continue publishing, please remove it or upload a different image.
