(مش مسامحه أي وحده تقرا وماتتفاعلش)
#طوبى "أقحوان وفلة وياسمينه"
#جمان_فريد
#الجزء_الرابع_والثلاثين" بداية قصه"
لو فاتتكم صلاة او خش عليكم وقت صلاة صلوا قبل بعدين اقروا...الصلاة قبل كل شي وكل شي يجي بعدها
وصلوا على الحبيب🌼
☕☕☕☕☕☕☕☕☕☕☕☕☕☕☕☕☕
ضيقت عيونها وقالت:حاسه روحي نعرفك من قبل
عبد الرؤوف ابتسم بثقه وقال:مزبوط..ومن زمان هلبه..كان ناسيه تو نفكرك..
غرفه وهي تحاول تذكر قعدت تشبحله وتسمعله بإنتباه..
وهو كان يتكلم بإيديه ويقول:من زمان..من قبل ماتخلق هالدنيا مش ربك خلق سيدنا ادم..بعدين مسح ع ظهره طلعوا ذريته كلهم من ظهره اللي هما حني..هونا غادي حني تلاقينا وشفتك وشفتيني..والباين ها الباين ربك كاتبنا لبعض..عرفتي كيف..
ضحكت غرفه ونزلت راسها لوطا..
هو شبحلها بحده..بعدين بدل نظرته بإبتسامه وقال:ماتشرفتش بشوفة الفله اللي قدامي كان في هداكا اليوم اللي جيت فيه هني ع خاطر ولد عمك..
غرفه قلبه طاير وكلامه يذوب فيه شبحتله بإبتسامه وقالت:اها معناها مشبهه عليك..
عبد الرؤوف:لامعليشي سامحيني فيها هادي في ليبيا كلها..وقد يحرك في يده كلها وهو رافع السبابه حركة دائريه ويقول..مافيش الا عبروف واحد بس..حط يده ع صدره وقال بإبتسامه عريضه..محسوبك..
غرفه قريب تهبل عليه وع حركاته وكلامه وطول الوقت تضحك وهي متحشمه منه..
هو قعد مركز ع نظرات عيونها اللي كانوا يحكوا بروحهم..
فيهم لمعه حلوه..ماشفهاش قبل لما تعرف عليها زمان..
كانت نظرة عيونها عاديه مافيهاش مشاعر بس هو من حبه ليها ماركزش ع الحاجه هادي..
ضم ايديه لبعض وقال؛هاه ياغرفه...شن عندك من اسئله..اسألي وماتتحشميش..تجرئي ومادوري شي..
غرفه:امم..اول شي انت علاش سيبت الكتيبه؟
عبد الرؤوف:ع خاطرك..
غرفه بضحكه؛نسأل بجديات..
عبد الرؤوف:واني نجاوب جديات ع خاطرك..اصلا جيت سكنت هني ع خاطرك..وسيبت الكتيبه بش وين نجي نخطبك بوك مايردنيش..
غرفه قعدت تشبحله وهي مصدومه..
ضحك نص ضحكه وقال؛خيرك!
غرفه بلعت ريقها وقالت وهي تحاول تخفي ارتباكها:لاشي..باهي..يومها جيت كلية الهندسه وشقتك واقف ع وحده من هي هادي..
ابتسم وقال:عارفك شفتيني..ياستي هادي اخت ولد شارعنا شادينه في مكان اني نعرفه وكنت نطمن فيها عليه..
غرفه:بصراحه..ماحبيتش اللقطه..
هو رفع حاجبه اليسار وسألها بحركة الراس والكلام:وعلاش ماحبتيش اللقطه!!؟
هي ابتسمت خجلا وماقدرتش ترد..
ابتسم برفعة حاجب وفرد ظهره وقال:حتى من هالناحيه مادوري شي..ماعنديش في العوج..
غرفه بإبتسامه:كويس..باهي انت شن شهادتك؟
عبد الرؤوف شد لحيته وقعد يمسح عليها:ثانويه..
غرفه:اها..
نزل يده وقال؛شن اها هادي مش عاجبك!؟
غرفه بضحكه؛لاابدا..بس نبي نعرف انت ع شن معتمد توا..
عبد الرؤوف:عندي صفة محلات في ****** ملابس واحذيه واكسسوارات وهكي..اسمها BK80..
غرفه بدهشه؛محلات BK80ليك انت!؟
عبد الرؤوف:يس..وشفتك خديتي منهم فهداكا اليوم السعيد..يوم حظي..
غرفه بضحكه؛سبحان الله..
شويه دق الباب..
ضحك وقال:طولتي..ع العموم اني نعرف عنك كل شي حتى مقاس كندرتك..اطلعي قولي موافقه لأن الامور عندي تمت خلاص..
وابتسم ابتسامه حلو وهو رافع حاجبه اليمين شويه وقعد يساوي في جاكيته..
وهي ناضت والضحكه مافارقتش وجهها وقالت:السلام عليكم..
وهو قعد بعيونه معاها لين طلعت وفيسع تبدلت ملامح الابتسامه لملامح حقد وازدراء.
وتبدلت تاني لإبتسامة احترام لما خش عليه لطفي مرة تانيه..
~~~~~~~~
غرفه وهي حاضنه طوبى:ياربي!طوبى! فرحانه بنطير بنطير طوبى..
بعدت عنها وقالت..نبي نغني ونرقص طوبى من فرحتي..
وقعدت تغني وترقص وطوبى تضحك عليها..
بعدين وقفت وقالت وهي مش مصدقه..قالي اني سكنت هني ع خاطرك تصدقي! قالي سيبت الكتيبه بش بوك مايرفضنيش..طوبى اني مش مستوعبه والله..طلع يموت فيا واني اللي نحسابه مش مدروني..
طوبى:ماهو كنتي تقولي معجب بيا!
غرفه بضحكه:قدامكم بس!
ضحكت طوبى وقالت؛هبله..
غرفه:ااه ياربي شن هالفرحه بس..فرحه عمري ماحستيها ان شاء الله تجربيها بش تفهمي عليا..واااك..قريب نطلع نقول موافقه خلاص معاش نبي نستنى..
طوبى:بلا هبال ارزني يشوفوك هكي يقولول خفيفه..
غرفه:يهبل ياطوبى يهبل..اسلوبه كلامه ابتسامته ضحكته..ولازينه ياكبدي اني..تعرفي والله خايفه يطلع حلم..
طوبى وهي مبتسمه:علم ياهبله علم..
ضحكت غرفه وجت لطوبى ضمتها بقوة..
طوبى وهي معصورة في حضن غرفه:قتلتيني يانهاري..!
انفتح الباب وخشوا سدرة ومطيره..
تباعدت غرفه عن طوبى وقالت:روحت حماتي!؟
فنصت طوبى بضحكه..
ومطيرة وسدرة قالوا:حماتك..
ضحكت غرفه وطلعت لسانها..
مطيرة بضحكه:شكلها موافقه وفات الفوت..
سدرة:ارتحتيله؟
غرفه:هلبه هلبه هلبه..
سدرة:قولي الحق في بيناتكم شي!؟
غرفه:لاوالله العظيم لا..اصلا ماكنتش نحسابه مفكر فيا..
سدرة:يعني خلاص انتي موافقه..
غرفه بإبتسامه:ايه..
تنهدت سدرة وقالت:ربي يقدم اللي فيه الخير..
كلهم قالوا:آمين..
وغرفه مش قاعده ع الأرض من فرحتها...
☘☘☘☘☘☘
" يعني عجباتك البنت"
عبد الرؤوف:مصلحه نبيله شبحتله شويه بعدين قالت:كيف يعني نكملوا في الموضوع ولانوقفوا ولاشني..
عبد الرؤوف:تي كملي ياودي كملي..الحق اني العيله عاجبتني ونبي ناسبهم..
نبيله بإبتسامه:تمام ع بركة الله...الله واخيرا بنشوفك عريس ونفرح بيك..
ابتسم ع جنب ومشي لداره...
وهي تنهدت بفرحه وقالت؛واخيرا..ومشت حتى هي لدارها..
☘☘☘☘☘
"منك جد ياعمي بتعطيها لواحد زي هدا"
لطفي:وخيره الراجل..محترم واخلاقه عاليه ماريتش منه غلط..
حسين؛عمي هدا كان من جماعة الميلشيات..
لطفي:قلتها بروحك كان..
علي:الحق حتى اني الراجل خاش خاطري وماغير توكل ع الله واعطي يالطفي..
حسين:والله براحتك ياعمي في النهايه هي بنتك وانت حر وان شاء الله ماتندمش بعدين..
لطفي؛ربي مايجيب ندم ان شاء الله...شن يوسف معاش يبي يروح..
علي:يخش الحوش نقص رجليه..
لطفي:خود بخاطر امه يابوي..
حسين:امي طايرتلها منه اكثر من جدي..
علي:مرتين وهو يدير في نفس الحركه يحساب بنات الناس لعبه مش خايف ع اخته مش خايفه ع بنات عمه عشم بنات الناس يولي عليهم! خله يقعد دايح برا لين يعرف ان الله حق..
حسين:عنده حق جدي..هو توا قريب يخش الاربعين تصرفاته مش تصرفات راجل راشد بكل وغلطنا من البدايه اللي سايرناه..
علي:مزبوط...
لطفي تنهد وقال:ربي يصلحه ويهديه...
☘☘☘☘☘☘
دقت باب الدار وقالت..
مغليه؛جالي انزل تعشى..
"مانبيش"
فتحت الباب لقاته لاهي بالبوكسينج قالت:هفت وهني روحك لاك متغدي ولا واكل حاجه..
وقف والتفت وشبح لأمه بعدين قال..يام..
مغليه:نعم..
الجالي:قداش تعزيني؟
ضحكت وقالت:نهاري وليدي نحبك ونعزك انت بالذات مكانتك في قلبي بروحها..ولدي المرضي اللي عمره ماعارضني كان في حاجه وحده حكاية السكنه..
ابتسم وقال:باهي كان جيت بناخد كيف تتمني مرتي تكون..
مغليه بإبتسامه:زينها توزعها ومازال يبد..بنت عيله متسميه ومحترمه ومتربيه وتشم ايديها تشبع..ونبيها ليك انت بالذات صغيره..
هو بدت تخف ابتسامته..
مغليه:انت بالذات لازم تاخد وحده مازيها زي..دون عن خوتك لأن الناس وين تحكي عليكم يقولوا ولاد شنيبه كلهم كويسين بس خيرتهم الجالي وياقداش قداش يتمنوك تناسبهم..
الكلام كان مفروض يعجبه ويفرح بيه.
بس اللي صار العكس ضايقه هلبه..لأنه عكس رغبته الداخليه..
مغليه:ها شني شكلك نويت!؟
ابتسم بالغصب وقال:قاعد نفكر..
مغليه:سقد روحك سلم ولدي نبي نفرح بيكم انت وعمر مع بعض..
بلع ريقه وقال:ان شاء الله..
مغليه:هي انزل تعشى سلم ولدي..
هز راسه وقال:حاضر..
مغليه؛سلم ولدي سلم ولدي ياربي نفرح بيك قريب يارب ونشوف صغويرتك..
ومشت طلعت من الدار..
وهو مشي سكر بعدها الباب وكان محبط ومعصب ع الاخر..
التفت ورجع من جديد للبوكسينج يضرب بكل قوته..
☘وهي..
كانت مع ولدها تساعد فيه يكتب الواجب..
وبعد كمل قالت:هي خلاص ماما نوض اغسل ايدك بش تتعشى..
حمزة:حاضر..
لم ولدها ادواته ومشي لداره...
وهي ناضت لدار النوم تقول؛جوري ماما سيبي العابك واغسلي ايديك بنتعشوا..
جوري:حاضر ماما..
ومشت تجري للحمام..
اما هي خشت لدار النوم بتشوف ولدها الصغير..
"معاذ"
وين طبست عليه لقت وجهه ازرق..قرب ماتت..
قاماته وقعدت تقول:حي عليا حي ولدي..
تشوف فيه يتنفس ولالا ماحستش بالنفس..
معاش عرفت شن دير..
مشت تجري للتليفون والعيل في يدها وهي ترعش.
حطت ع رقم صابرين واتصلت طول....
ينادي ومايرد حد..
نجاه بعياط:ولدي مات ولدي مات.
جوها الصغار يجروا..
بتتصل تاني من كثر ماترجف طاح منها التليفون..
عيطت ع طول حسها..
والتليفون وهو طايح قعد يرن..
جاه حمزة يجري خداه ورد طول..
حمزة:الو..خوي بيموت..
"شن تقول ياحمزة"
وصوت عياط نجاة قالب الدنيا..
المتصل طول سكر..
وهي ماراجتش اكثر خدت وشاح حاطاته ع راسها حط..
وطلعت تجري بشبشب حوش..
نزلت تجري..
وطلعت من العمارة وهي تعيط وتنادي ..
لين وصلها واحد من الجيران لأقرب مستشفى..
بعد ربع ساعه..
كانت سيارة الجالي مدرسه قدام العماره..
درسها ونزل يجري وخشلها طول..
ركب يجري وصل في الشقه..
قعد يدق في الباب بقوة..
فتحله حمزة..
خش وقال وهو مفجوع :شن صار ياحمزة..
حمزة وهو يبكي؛معاذ مات وماما طلعت بيه تجري وتعيط من الحوش..
الجالي قعد مصدوم ومفجوع ومش عارف شن يدير..
مش عارف نجاه وين مشت وخلت الصغار بروحهم..
جت جوري بالتليفون اللي يرن وهي تبكي..
هو عرفه تليفون نجاه خداه طول وشاف المتصل كانت صابرين..
طول رد عليها..
الجالي:ايوه صابرين.
"نعم من معاي!؟"
غمض عيونه وقال:الجالي الجالي..فتحهم وقال..كلماتك نجاه!؟
"لاماكلمتنيش شن يدير تليفونها عندك حي عليا اختي شن درتلها"
الجالي:اهدي بالله عليك واسمعي..
وقعد يحكيلها في اللي صار كله..
وهي ترعش وتبكي قالت..
"اسمع انتي نتوقع انها مشت لاقرب مستشفى ماعندها وين تمشي"
الجالي:اوكي حطيت في بالي الشي هدا بس نبيك تجي تقعدي مع الصغار واني نمشي ندورها..
"توا طالعين مسافة الطريق"
سكر الجالي وجي لحمزة وجوري رفعهم الزوز في حضنه وقال:ماتخافوش مافي شي..
وخش قعمز بيهم في الصاله وفتحهم في تليفونه رسوم متحركه ع اليوتيوب..
وقعد متكي يشوفلهم ويراجي في صابرين وفي يده تليفون نجاه..
فجأة رن..
شبحله لقي رقم غريب يتصل..
طول رد .
الجالي:ايوه..
"الو...معليشي غلطت في الرقم"
ناض وقف وقال:لاماغلطتيش نجاه اني الجالي..
"تليفوني شن يدير عندك..انت في الشقه!؟"
الجالي:فوتي الاسئله هادي وقولي انتي وين؟
"اني في مصحة*****"
الجالي:تمام قوليلي معاذ خيره..
"الولد شارق قاعد في داخل حاجات..يعني كيف بنشرحلك تعالى بروحك اسأل تو تعرف"
الجالي:باهي هو وضعه كويس..
"الدكاترة قالولي ماتخافيش وصلتي بيه في الوقت المناسب"
الجالي:الحمد لله..
رن جرس الشقه..
الجالي:خلاص سكري..وسكر عليها..
ومشي فتح الباب لقي قدامه صابرين وراجلها..
الجالي:خشوا للصغار اني ماشي للمصحه.
صابرين ببكي:عرفته وينها..
الجالي بإستعجال:ايه خشوا خشوا...ومشي طلع من حداهم...
صابرين لحقاته وقالت:طمنونا..
الجالي وهو نازل؛حاضر..
مراد؛هي تعالي خشي..
صابرين وهي ترشف خشت للشقه ومراد خش وراها وسكر الباب...
☘اما الجالي بأقصى سرعه توجه للمصحه..
وصل فيها..
ونزل بسرعه خش داخل..سأل عن الحاله وقالوله هي وين..
ومشي طول وين مادلوه..
وصل في الممر..
لقي نجاه مقعمزة وحاطه راسها بين ايديها...
جاها وهو يقول:نجاه!
نزلت ايديها ورفعت راسها وشبحتله بنظرة الم وكسرة وخوف وشعور تاني وصل للجالي بسرعه..
كان شعور احتياج..
هو قعمز ع رووس صوابعه قدامها وقال:شن صار فيه توا..
نجاه وهي تشوفله:الحمد لله نقدوه..بس الرعشه قاعده فيا لتوا...
الجالي:خديتي حاجه..؟
حركت راسها بالنفي..
ناض وقف وقال:شويه وجاي..
ومشي كم خطوة وهي تشوفله..
بعدين وقف..والتفت..
لقاها تشبحله..
رجعلها..
وقف قدامها ...مد يد ايديه ودخل شعرها ولبسها وشاحها كويس وقال؛معاش ترخيه..
بعدين مشي وخلاها وهي مش عارفه روحها شن قاعده تحس..
كعادته نساها نفسها بتصرفاته..
قعدت تبع فيه بعيونها لين درق من قدامهم وطول دموعها نزلوا...
شويه وجاها وفي يده شيشتين عصير وميه..
وصل فيه قعمز جنبها بمسافه وقال:جو مانبيش وماعنديش نيه مايمشيش معاي..
وفتح الشيشه ومدهاله وقال:تشربيها توا..
هي يدوب ابتسمت وخدت منه وقعدت تشرب..
الجالي:خيرك تتهربي مني؟
شبحتله وهي مصدومه في السؤال..
الجالي:غلطت فيك..شفتي مني شي واجعك؟ لو ع طبعي واسلوبي مافي شي جديد عليك اني هكي مع الكل..ولو ع معاملتك ليك في الخدمه..القصد منها اني نشجعك ع الخدمه ونخليك تخشي جوها طول..ع العموم اسف لو شفتي مني شي واجعك..
كان يعزف اوتار قلبها الحساسه عزف متقن بس قاعده يتسببلها في فوضى رهيبه داخليا مش قادرة تتحكم فيها.
غيرت عيونها عنه وشربت من االعصير مرة تانيه من غير ماترد..
اساسا مش عارفه شن تقول...
هو ابتسم ومدلها تليفونها وقال:كلمي اختك طمنيها..
هي فزت وقالت:صغاري!
الجالي:اطمني اختك وراجلها معاهم..
هي تنفست براحه بعدين خدت التليفون..
واتصلت بصابرين طمن فيها..
وهو يشبحلها ومركزة عليها..
☘ومن مشاعر قاعده تخرج عن السيطره ومش لاقيه اي رادع يردعها..
لمشاعر مدفونه حياءا صاحبها وتربيته مانعينه انه يفصح عنها..
حسين..
اللي كان فوق السطح واقف يفكر في عرض جاه وحاس روحه مجبور يوافق عليه..
قطع تفكيره صوت المحبوبه..
وهي تكلم في قطاطيسها..
طوبى:هي امتى عاد نبدوا نعطوكم حليب تشربوا بروحكم امكم مش عارفه خيرها معاكم بدت تسيب فيكم هلبه برغم اني مش منقصه عليها شي..يارب ماتصير فيكم حاجه يارب..
ناضت عنهم ومشت خشت داخل وخلتهم..
وهو يشوفلها بإبتسامه حب..
حب خلاه ياخد قرار فيه تنازل عن مبدأ ياما تمسك بيه بكل قوته...
🍀🍀🍀🍀🍀🍀
بعد يومين..
في حوش الحاج شنيبه..
محمد:سلامته كبيره نذبح ع خاطرها ونوزع صدقه..
نجاه بإبتسامه؛ربي يطول في عمرك ياعمي سادنا دعاك..
محمد:ربي يحفظك يابنتي..
مغليه؛ان شاء الله معاش تشوفي فيهم سو..
نجاة؛آمين يارب العالمين..
عائشه؛برغم انك جبتي في عياده معروفه مش عارفه كيف يغلطوا غلطه زي هادي ومايطلعوش الوسخ من العيل..
نسرين؛هو الطبيعي يقعد شويه..بس يعني لو وصل لهالدرجه اكيد كان يبان عليه نجاة..
نجاة:ايه صح يدهش شويه ومشت عاينته قالوا طبيعي..
خديجه؛طب عيني للي في ليبيا هدا..
محمد شنيبه:في عياده نعرفها كويس وقريبه ع العمارة اللي تسكني فيها عياده ممتازة اي حاجه تصير مع الصغار ارفعيهم غادي ومادخلكش في الفلوس..
خديجه؛هادم صغارنا حبيبتي مانستخسروا فيهم شي ارفعيهم طول ومادخلكش بشي..
نجاة وهي مبتسمه لخديجه مجامله:حاضر..
☘وفي حوش الواعر..
كانوا الكل ملتمين يحكوا في تفاصيل فضانية غرفه والتلبيسه..
اما طوبى حطت ع راسها وشاح وطلعت للجنان تتفقد في قطاطيسها..
وهي طالعه..شافت القطوسه الكبيره تجري..
طوبى:وين ماشيه!
لحقتها..لحقتها طلعت من باب الحوش اللي كان مردود..
وصلت في الباب شافتها قاصه الطريق وماشيه لحوش شنيبه..
باب حوشهم حتى هما كان مفتوح طول خشتلها..
طوبى:يانهاري منك!
ومشت تجري خشت داخل ..
وهما داخل لاهييت يهدرزوا..خدت العبايه من ع الشماعه لبستها كويس وطلعت تجري من الحوش..
قصت الطريق ومشت لحوش شنيبه ونضال يتبع فيها بعيونه..
هي جت بدق الباب اللي كان مردود..
انفتح ع وسعه وطلع في وجهها الجالي كان ناوي يطلع..
الجالي:طوبى!
طوبى:معليشي قطوستي هربت وجت هني بنخش ندور عليها ممكن!
وسع وهو مبتسم بعقدة حواجب وقال:ممكن..
وخشت..
لاقتها سدرة المهدي طالعه بتجيب لعبه ليها ملوحه برا..
سدرة:ابله طوبى !
طوبى وهي ماشيه دور؛سوسو ماشفتيش قطوسه سمينه لونها ابيض فيها مسحه رصاصيه ع ظهرها!؟
سدرة:ايه خشت تجري هكي..
طوبى مشت من وين ماقالتلها..
والجالي ضحك..ورفع كمامه ومشي من الجهة التانيه..
وطوبى دور وتنادي:بينكا...بينكا..وينك يابنتي وين مشيتي..
ع طلعة خديجه من الكوجينه شافت طوبى تفاجئت وقالت؛طوبى!
طوبى بقلق؛كيف حالك ابله خديجه..سامحيني جايه ندور ع قطوستي هربت هني..
خديجه؛اها قطوستك اللي جايبه المده اللي فاتت..
الجالي جاهم وهو يقول بضحكه:كلكم سامعين بيها شكلها دارتلها لمة..
ضحكت خديجه..
وطوبى قالت وهي نوع ما معصبه؛ياريت دور معاي..راهي ام وصغارها يناري ينادوا عليها لو تسمعهم يقطعوا قلبك هي مش عارفه خيرها تهرب منهم..
خديجه؛تبيهم يعتمدوا ع انفسهم..
طوبى:مازال صغار وضعاف ياناري يقطعوا القلب..
هي تتكلم بشفقه وهما مركزين معاها لدرجه ملامح وجوههم تفاعلت مع ملامح وجهه..
سدرة؛عمو عمو اهيا..
الجالي شبح وين ماتأشر سدرة شافها مشالها طول..
وطوبى لحقاته ومعاهم خديجه وهي تضحك..
حصل الجالي ع القطوسه وشدها ورفعها بطريقه عنيفه.
طوبى بصدمه؛نهارك ازرق شن هكي حرام عليك قيمها كويس..
الجالي؛تشبح فيها لابس يااختي تبيني نضبطها!
طوبى تنرفزت؛يكون في علمك قطوستي انظف من النظافه ونرفع فيها ديما تعاين عند البيطري..وغير هكي الرسول قال من الطوافين عليكم كان يتوضى من الميه اللي تشرب منها..
الجالي وهو يضحك.:هاه..وضم القطوسه وقال..تريحتي..
وخديجه وسدرة المهدي يضحكوا..
جاته وقالت: جيب جاي جيب خافت منك..
مدها لطوبى وهو يضحك بعد خدتها قال..ايه بنقولك بخصوص حالتها كيف مسيبه صغارها يعني مرات يكون جاها اكتئاب بعد الولاده...
قلبت طوبى عيونها ومشت بالقطوسه..
الجالي وراها؛في بيطري نفسي نعرفه نعطيك رقمه تسأليه..
وخديجه تضحك..
ااجالي:ولانقولك سفريها تغير جو..
وصلت في الباب التفتت لخديجه وقالت؛بالسلامه ابله خديجه سلمي ع الكل..
الجالي؛تو نوصل معاها هلبه عليها توصل السلامات هادم كلهم..
شبحتله من فوف لتحت وهي شاده ضحكتها ومشت طلعت..
خديجه بضحكه:بطل صماته..
الجالي بضحكه؛فيها جو لما تتكنطى ووجهها مش عارف كيف يولي..
وخديجه تضحك بعدين قالت؛طالع..
الجالي بإبتسامه؛ايه تبي شي..
خديجه؛هادي وصفه فيها فيتامينات ناخد فيهم تجيبهم ع طريقك..
خداها منها وقال؛حاضر..
خديجه؛بتتعشى هني ولاتفوت..
هو شبح للحوش شويه بعدين قال:بنتعشى برا..
ومشي طلع من الحوش..
خديجه؛وين تجي هي هو يسيب الحوش كيف بيدير هالخمسه ايام بس...الله يرحمك ويسامحك ياطاهر..
☘☘☘☘☘
وفي حوش الواعر..
ردت طوبى القطوسه في مكانها وهي تكلم فيها بعدين جت بتخش داخل..
سمعت اسمها سكتت..
مطيره:طوبى بالذات ماتنجبر ع شي..
صفيه؛غير من اللي بيجبرها يامطيرة بس نبوا نفتحوا معاها الموضوع ونقنعوها..بتلقى خير من ولد عمها سترها وغطاها..
مطيره؛طوبى حاسبه حسين خوها ياصفيه..
صفيه؛ماهوش خوها هدا ولد عمها ويحبها وراغبها ووالله ماحتلقى بنادم في الدنيا يحبها زي حسين..وبعدين بيني وبينك يامطيره مش لما تتزوج طوبى سدرة حتشوف حالها حتى هي..
مطيره:طوبى مش واقفه في طريق اختها بالعلامه قبل كانت بتتزوج..
صفيه:ايه وشرطت ع الراجل حوش في شارع القهوة الشرط اللي طفشت بيه الناس اللي جوها بعده..لو نولوا بالسنين لتالي حنلقوا للي خلا سدرة ترد المهدي هي طوبى نفسها..
مطيره سكتت وهي مضايقه..
صفيه؛يامطيره خلو لطفي يتهنى ع بناته..اهي غرفه جاها نصيبها وفردوس رغم اللي صايرلها سماها عندها صغار ولقتهم..لكن سدرة عمرها قاعد يجري بعدين عامين تانيات حكاية الجياب هادي تنساها بكل..
مطيرة تنهدت وقالت؛باهي باهي تو نشوفوها ياصفيه..
صفيه؛مدابيك بسرعه يامطيره خلي نديروه عرس واحد..
مطيرة؛ان شاء الله..ان شاء الله..هي خل نطلعوا..
ومشوا طلعوا الزوز..
وطوبى برا واقفه دمع وهي تقول؛ومع هدا كله حسين مستحيل نتزوجه..
مسحت دموعها ومشت خشت داخل..
☘واختها سدرة اللي ديما تحس ان حياتها مش ملكها وهبه للناس اللي تحبهم..
مشت لحوش فايزة بش تهدرز ع صفاء..
وصلت في دار صفاء..
دقت الباب.
سمعت الاذن بالدخول..
فتحت الباب وخشت..
لما شافتها صفاء كانت قدامها مذكرة تكتب فيها طول سكرتها بخوف..
ركزت سدرة بدون ماتبين وقالت بإبتسامه:شن جو صفو.
صفاء بجفاف؛تمام..
سدرة:عادي نقعمز..
صفاء:اسفه عندي قرايه ومش فاضيه..
استغربت اسلوبها بس مابتش دقق وقالت:مش ديما قرايه حبيبتي اطلعي شمي هوا فرهدي ع روحك تتعب نفسيتك هكي
صفاء:نفسيتي كويسه ومرتاحه اخر راحه..
سدرة شبحتلها شويه وقالت؛تمام شجو المدرسه..
صفاء :عادي..
سدرة :وانتي شن جوك شن جديدك..
قربت منها واتكت ع الطاوله وقالت؛لينا هلبه ماهدرزناش..
صفاء:ماعندي شي نهدرز فيه معاك..
سدرة:اكيد مش خايفه مني صح!
صفاء:وعلاش بنخاف منك مش دايرة غلط اني..
سدرة:ومن قال انك دايرة غلط!؟
صفاء:معليشي لشن تبي توصلي!؟
سدرة بإستغراب؛صفاء حبيبتي خيرك تكلمي فيا هكي مزعلاتك في شي.
صفاء:لا وماتقدريش..
سدرة:مانقدرش!؟
قعدت صفاء تشبحلها بنظرات حاده فيهم قلة احترام لسدرة اللي في عمر امها..
سدرة هزت راسها وقالت؛تمام...ع العموم اني جيت نهدرز عليك لأني حاسبه روحك امك ونقدر ناخد راحتي معاك..
قاطعتها وقالت؛مانكش امي ولو كنتي تبي يكون عندك بنات علاش ماتزوجتيش من زمان وجبتي بنات!
صعقها كلام صفاء..
صدمها هلبه...مش كلام بنت عمرها 15 سنه..
مش كلام صفاء اللي ربتها وياما ليالي رقدت فيهم في حضنها..
سدرة معاش قدرت تتفهوه بحرف..
حدها سحبت نفسها ومشت طلعت من حداها ودمعتها في عينها..
اما صفاء مشت سكرت الباب بقوة..
وجت لمذكرتها وفتحتها..
وقعدت تشبح لإسم إياد اللي كان يتوسط قلب كبير..
وكاتبه فوقه..اهواك بلا امل...ودموعها قعدوا ينزلوا..
☘☘☘☘☘
الساعه 11:00ليلا..
في دار البنات..
كانوا ملتمات كلهم...
طوبى واريج والاء واميمه وغرفه...
كانت اميمه واخده سطل جيلاطي فاضي ودربك عليه..
واريج تغني..وغرفه ترقص في نص..
اريج..
عيني ياعيني هيا نرحلوا
عيني ياعيني هيا نرحلوا..
عيني ياعيني هيا نرحلوا..
نزوروا محمد وعليه نصلوا...
وقعدوا يردوا وراها في نفس المقطع...
آلاء..
سواق تيوتا وانا مانبيه..
سواق تيوتا وانا مانبيه..
سواق تيوتا يروح نص الليل..
يضرب في خوته وانا مانبيه..
ضحكوا..ورددوا...
عيني ياعيني هيا نرحلوا
نزوروا محمد وعليه نصلوا..
غرفه وهي ترقص..
سواق هوانديا هدا اللي نبيه..
سواق هوانديا هدا اللي نبيه..
سواق هوندايا يروح نص الليل..
يهدرز بحدايا وهدا اللي نبيه..
طوبى:ايوه..
ضحكت غرفه..
وهما يرددوا..
عيني ياعيني هيا نرحلوا
نزوروا محمد وعليه نصلوا..
اريج
اسمر سمراوي هدا اللي نبيه..
اسمر سمرواي هدا اللي نبيه.
اسمر سمرواي هدا اللي تبيه..
يجرح ويداوي هدا اللي نبيه..
طوبى:ركزوا هاه اسمر سمراوي..
الاء:يجرح ويداوي..
واميمه تضحك..
اريج:شن تخترفوا؟
الزوز قالوا؛سلامتك..
اريج:متخلفات.
غرفه بضحكه؛هيا اميمه..
ولت اميمه دربك وهما يغنوا..
عيني ياعيني هيا نرحلوا
نزوروا محمد وعليه نصلوا
اميمه..
كابتن طيار هدا اللي نبيه..
ابتسموا البنات..
وهي كملت بإبتسامه..
كابتن طيار هدا اللي نبيه..
كابتن طيار يروح نص الليل..
جايب دولار وهدا اللي نبيه..
ضحكوا وهي ضحكت معاهم..
بعدين كملوا..
عيني ياعيني هيا نرحلوا
نزوروا محمد وعليه نصلوا
طوبى..
كامل صفاته هدا اللي نبيه..
كامل صفاته هدا اللب نبيه..
كامل صفاته يروح نص الليل..
يصلي في صلاته وهدا اللي نبيه..
ابتسموا البنات ورددوا..
عيني ياعيني هيا نرحلوا
نزوروا محمد وعليه نصلو
أريج..
سواق الكيا وهدا اللي نبيه..
سواق الكيا هدا اللي نبيه..
سواق الكيا يروح نص اليوم..
يدهور بيا وهدا اللي نبيه..
طوبى فنصت وقال:حي كيا!
الاء:ايه والله حق..
ناضتلهم وفي يدها مخده
وطاحت فيهم ضرب وهما ميتات بالضحك ويناشبوا فيها..
"سواق كيا اها...اسمر سمرواي صار"
اريج؛ياحقيرات زهق كبودكم ياربي..
وهي تخبط فيهم واميمه وغرفه يضحكوا عليهم..
🍀🍀🍀🍀🍀🍀
ويمروا يومين تانيين..
والامتحانات قربت..
واريج بدت تجيب في طلبه اعدادي وابتدائي للحوش تقري فيهم في الايام اللي ماعندهاش فيها عياده..
وهي ماتلحقش تقرا محاضراتها الا في الليل..
وماتحصلش كان في ساعه ترقدها قبل الفجر..
بعدين تنوض تصلي ودير في كل شي جري جري ورا بعضه..
ترفع في خوها ع طريقهم هي واختها.
وين توصل للجامعه كل وحده فيهم تمشي لكليتها..
يومين عندها في الاسبوع في الجامعه هادوا كانوا اثقل يومين ع قلبها لأن فيهم الماده اللي يعطي فيها نضال..
وكانت ناويه دير معاه هدنه بش يتم السمستر ع خير..
جي وقت محاضرته..
خش وسلم عادي..
كالعاده حدف كم نكته بعدين خش في الجد وبدي يشرح..
والطلبه منسجمين..
وفي نص الشرح..
جو عيونه ع اريج.
لقاها وهي متكيه بمرفقها ع الطاوله حاطه يدها تحت خدها وراقده..
هو قال سخرية؛الاميرة النائمه..
شبحوا وين مايشبح..
وصاحبتها شبحتلها فنصت نخصتها..
فاقت وهي معصبه وقالت؛هي ياسفتوله هيي ماتشبحيش فيا راقده!
:اريج فيقي حني في الكليه..
اريج استاقظت شبحت قدامها وهي معصبه جو عيونها في عيونه..
نضال؛نجيبلك بطانيه ومخده ونفرشلك في الوسعايه!
اريج تنحنحت وقالت وهي عاقده حواجبها؛اسفه..
نضال؛جاية تقري انتي!؟
شبحت للطلبه لقتهم كلهم يشبحولها انحرجت وقالت؛اكيد..
نضال؛لا واضح هلبه مرة نخش نلقاك تضحكي وتتسهوكي ومرة راقده..وبعدين دوري من ينجحك بالدف..
اريج؛عمري مانجحت بالدف..
نضال:لا واضح هلبه..نوضي تسقدي..
هي ولا اهتمت لمت حاجاتها وناضت طلعت وهي تثاوب وطلعت من القاعه..
هو في داخله كان يضحك بس شد روحه وحافظ ع برستيجه قدام طلابه..
بس بعد تمت المحاضرة..
طلعوا الطلبه..وصاحبة اريج مشتله..
:عفوا استاذ نضال..
نضال بإبتسامه؛تفضلي..
؛استاذ بالنسبه لأريج هي والله لامستهتره ولاشي وشاده في قرايتها هلبه..بس ظروفها متعبتها..يعني تصور اني في عمرها نروح نرقد للمغرب..لكن هي تروح من هني وتمشي للعياده اللي تخدم فيها ممرضه وتقعد لقبل المغرب وتروح تلقى طلبه يراجوا فيها فالحوش تعطيهم حصة تقويه وماتحصلش فرصه للقرايه الا في نص في الليل هدا غير مشاوير الحوش اللي كلهم ع راسها..يعني بجديات اريج تعاني غير مش باين عليها..
هو بإبتسامه؛علاش تحكيلي في هدا كله..
:خفت تنقصلها درجات ولامعاش دخلها..اصلا هي بروحها توا اكيد قاعده في تركينه تبكي عايشه في ضغط نفسي مش عادي..
نضال ضحك وقال؛اني مش مسموم وقلبي كبير حتى كان صاحبتك وحده شمطاء..
ضحكت البنت وقالت؛شكرا استاذ.
ومشت طلعت وهو وراها..
وهما ماشيين..
شافوا اريج شاده في يدها شاورها وفي جنبها وحده تهدرز معاها وفجأة تضحك اريج...
صاحبتها بصدمه قالت:رزيني فيك طلعتيني كذابه..
نضال بضحكه؛صار شاده تركينه وتبكي!
البنت قريب تبخر..
مشي نضال وهو يضحك..
وصاحبة اريج مشتلها ضربتها ع راسها وقالت؛سمسام..
اريج؛اي ياتافهه خير دعوتك..
قعمزت جنبها وقالت؛اني نحايل في الاستاذ بس ماينقصلك درجات ونقوله اكيده تبكي توا يطلع يلقاك تاكلي وتضحكي..
اريج؛مش معبراته هدا اللي ماشيه تتحايلي عليه ع خاطري تعبت روحك ياعبيطه..
؛الحق فيا..
مدتلها الشاورما وقالت؛تاخدي نتشه..
خدت منها صاحبتها وقالت؛هاتي نوريك النتشه شن شكلها..
اريج ضربتها وقالت؛هاتي ياهايشه هاتي..
:الا لين نخليك تبكي حق..
وقعدت تتعارك مع صاحبتها..
صاحبتها اللي مالاحظتش اثار الدموع في عيونها لأنها كانت بارعه في إخفاء حزنها...
☘زي صاحبتها وخالتها...
طوبى...ممكن تعلموا هالشي من بعض لأنهم تحملوا هلبه اعباء اكبر من سنهم ع صغر..
في حوش الجد علي...
كانوا يجهزوا لفضانية غرفه اللي حتندار في حوشه..
اما التلبيسه في حوش بوها...
طوبى وهي تساعد في خواتها وعمتها ومرت عمها..
تسمع فيهم يهدرزوا عن زواج وحده من بنات الجيران..
مطيره؛شوفوا سبحان الله بعد هدا كتبت لولد خالها..
صفيه؛جربت البراني وشافت شن دارلها..القريب تعرفيه ويعرفك ومتربي قدامك..
سدرة تسمع فيهم وماتبيش تعلق عارفه ع شني يلمحوا..
بس طوبى كفت ووفت وردت عن نفسها:الحق اني ضد زواج الاقارب..
شبحولها مطيره وصفيه..
وخواتها شبحوا لبعض..
صفيه ضيقت عيونها وقالت:علاش!؟
طوبى؛ماتجيش من وراه الا المشاكل..يعني لو الزوز تعاركوا او وصلت بيناتهم للطلاق حتما العيلتين حيتفارقوا وتصير قطيعه ممكن لأخر العمر ناهيك عن المشاكل الصحيه متاع الانجاب بعدين..
صفيه:كان هكي راهو مافيش صغار عم ولاخال تزوجوا بكل!
طوبى ابتسمت وقالت؛هدا رأيي الشخصي اني ضده وبقوة والحمد لله ماصارش بينا الشي هدا بش نقعدوا محافظين ع هاللمه..
كلهم قعدوا يشبحولها..
وهي تشبح للمفروم اللي كانت تخلط فيه..اهم شي عندها تكون رسالتها وصلت..
صفيه شبحت لمطيره..
مطيرة رفعت حواجبها ونزلتهم..
وفردوس قعدت تشبح لطوبى..
اما سدرة فكانت لاهيه باللي دير فيه وهي مبتسمه كلام طوبى جي زي ماتبي..
لانها ماتبيش حسين..
☘ومن بداية شارع القهوة..
خشت صفاء بروحها وهي مروحه من المدرسه..
كانت تمشي وتشبح حواليها لين وصلت في سيارة اياد..
لوحت في وسطها ظرف رساله..
وكملت طريقها بسرعه..
لحظات..
وطلع اياد بيركب سيارته ماشي للمستشفى..
سلم ع صاحب المحل اللي مقابله وركب..
حط جاكيته ع الكرسي اللي جنبه شاف الظرف..
عقد حواجبه بإستغراب..
خداه..لفه من الجهتين مالقي شي..
فتح الظرف وطلع الورقه..فتحها وبدي يقرا..
(ياريت نقدر نقولك قداش نحبك..ياريت تكون عندي الجرأة والشجاعه اللي تخليني نوقف قدامك ونقولك انك الراجل اللي نحلم بيه..راهو مافيش وحده حتحبك زيي اني مافيش بكل...ياأحلى دكتور واحلى راجل نشوفه في حياتي...
اهواك بلاأمل)
الخط كان جميل مايبانش خط بنت في الاعدادي..
هو ضحكه الكلام ورد الورقه في مكانها وحط الظرف في درج السيارة..
وتحرك طول..
حط في باله ان الرساله ممكن تكون من بنت من بنات الشارع لإن عنده هلبه معجبات..
بس لايمكن عقله يجيبله انها من طفله هي عنده بمكانة بنته!
☘وللأسف شغل فايزة اللي بعدها عن بناتها كبر الفراغ الكبير اللي خلاه احمد في قلب صفاء البنت الحساسه العاطفيه..
بس مافيش في يد فايزة غير انها تخدم وتكد عليهم بش مايحتاجوا لحد ولا تجيهم عطايا صدقه من حد..
تبي تكفيهم ماديا..لكن ع حساب ماهو اهم من الماده..
العاطفه والقرب....
#بداية_قصة
#طوبى
...يتبع....
ओह! यह छवि हमारे सामग्री दिशानिर्देशों का पालन नहीं करती है। प्रकाशन जारी रखने के लिए, कृपया इसे हटा दें या कोई भिन्न छवि अपलोड करें।
