(مش مسامحه أي وحده تقرا وماتتفاعلش) #طوبى "أقحوان وفلة وياسمينه" #جمان_فريد #الجزء_الخامس_والأربعين"اهرجو1" لو فاتتكم صلاة او خش عليكم وقت صلاة صلوا قبل بعدين اقروا...الصلاة قبل كل شي وكل شي يجي بعدها وصلوا على الحبيب🌼 #تاج_الذكر لاإله إله إلا الله وحده لاشريك له له الملك وله الحمد بيده الخير وهو على كل شيء قدير🌸 🚫🚫ملاحظه🚫🚫 اي تعليق عنصري حيتم حظر صاحبه.. اي تعليق فيه سخريه ع ثقافه الطوارق حيتم حظر صاحبه واني هني نكتب في الحوارات باللغه الامازيغيه التارقيه لأعزائي التوارق مش لغيرهم احتراما ليهم وحبا لثقافتهم نتمنى تكونوا قريتوا هالملاحظه كويس..وشكرا ع تعاونكم مسبق🌸 ☕☕☕☕☕☕☕☕☕☕☕☕☕☕☕☕☕ ركب الدروج وهو يتفحص فيه بنظره.. كان نظيف نوعا ما... وصل في الشقه اللي بيقعد فيها.. حط المفتاح في بابها..ولف اللفته طول انفتح معاه.. خش... وطلعت عليه ريحة الغبرة والتراب.. عكرش وجهه وقعد يمشي داخل الشقه بالبوت متاعه... وعيونه يدوروا فيها... هي مفروشه..بس معبيه فوضى.. صناديق..ع نايلوات..ع شيش ميه فاضيه... كانت الشقه اشبه بالمكب.. انصدم هلبه من اللي شافه... قبل سكن في السكن الطلابي كان نظيف ومرتب اكثر من هكي.. اجر شقه من واحد في بنغازي...ماكانتش حالتها مزريه بالشكل هدا..! عقله قاله في هداكا الوقت ان هالشي مقصود.. لأن اللي يعرفه عن الناس في طرابلس انهم متعاليين ويتعاملوا مع اللي زيه هو بفوقيه وكأنه مواطن درجه تانيه... وياما شاف ومر عليه بسبب هويته.. 🍃والعنصريه متغلغله في مجتمعنا ومسيطرة عليه الا القليل ممن رحمهم الله🍃 عقد حواجبه بغضب.. ولف ومشي طلع من الشقه وهو عازم انه مش حيوليلها مرة تانيه.. سكر الباب وجبد المفتاح ونزل بسرعه.. طلع برا الحوش ومشي للمطحن.. وقف قدامه واشر لمحمود.. طول طلعله... ☘فهاللحظه.. كانت سيارة المهدي خاشه لشارع القهوة.. وصل بيها قدام المطحن . شاف شاب اسمراني طويل وعريض وفيده شنطة عرفه طول نفسه الراجل اللي كلمه عليه لطفي قبل.. نزل من السيارة ومشي جيهتهم.. عقد حواجبه لما سمعه قال.. عبد القيوم:الباين صاحبها مايبيني فيها...السلام عليكم.. ولف بيمشي.. المهدي:ياخوي.. وقف عبد القيوم وشبحله.. ومحمود وهو واقف شاد المفتاح كان يشبحلهم.. عبد القيوم:نعم.. قدمله المهدي وقال:انت عبد القيوم التارقي.. عقد حواجبه وهز راسه بإيجاب.. ابتسم المهدي ومد يده وهو يقول؛اهلا وسهلا.. صافحه عبد القيوم بدون مايقول كلمه.. المهدي بإبتسامه؛معاك المهدي شنيبه صاحب الشقه اللي قلت مايبيكش فيها.. جبد ع القيوم يده وابتسم وهو يقول:اها ماتبيني فيها..لو تبيني فيها كنت حقيت هالشي وين خشتيلها.. انا لو كنت مكانك وعارف اني بنأجر شقه لواحد جاي من مكان بعيد ومتغرب كنت هيئهتها له ونظفتها وخليتها مكان يصلح يسكنوا فيه بشر.. المهدي رفع حواجبه وقال: كأن كلامك واعر شويه! عبدالقيوم بإبتسامه:والله ندوي معاك وانا نختار في كلامي زين بيش مايكونش واعر...المشكله اني جاي بمعرفة هنا وجي بنسكن هنا وندفع الفلوس يعني لهي صدقه منك ولاهبه..ضحك وقال..حتى لو كان صدقه مفروض تعطي احسن ماعندك راجل!.. المهدي حط ايديه ورا ظهره وقال بإبتسامه؛شكلنا زعلنا ضيفنا هلبه وهادي عمرها ماصارت قبل..وصدقني والله ماهي مقصوده..بس زي ماتشوف عندنا مناسبه والبنادم يلهى وينسى..مع هذا اني راكبني حق...ولازم ندير مايخليك راضي.. الليله بإذن الله تبات عندنا وغدوة بإذن الله نجيب شركة تنظف الشقه وتخليها جديده وتولي لايقه بحبيبنا التارقي.. مصمص عبد القيوم شواربه وهو مبتسم ومضيق عيونه بعدين قال:بارك الله فيك..خل نعدي ندورلي فندق نبات فيه لين تقعد الشقه واتيه.. المهدي؛والله العظيم ماك بايت في مكان تاني غير حوش شنيبه.. عبد القيوم؛ماعندك ليش تحلف حقي وصلني وخلاص.. المهدي:اني مازال نبيك ترضى..هي تفضل معاي.. عبد القيوم وكأنه انحرج شويه وقال:لاوالله ماليها داعي..عندكم مناسبه واني نقعد معاكم فيها بصحة الوجه لاني معزوم ولاقريب!.. المهدي:اني عزمتك ياسيدي..هي تفضل خش وماتشيطش ريقي عاد.! ضحك عبد القيوم وقال:الحق احرجتني واجد..ع العموم ياسيدي انا اسف ع الاسلوب اللي حكيت معاك بيه كان راقيلي من المنظر اللي شفته راني راجل عندي وسواس النظافه والنظام..ومنظر الشقه خلا عقلي يوقف بكل.. المهدي بإبتسامه؛سامحني مرة تانيه وحقك على راسي من فوق.. عبد القيوم بإبتسامه؛خلاص ولايهمك نسيت.. المهدي:باهي بتجي معاي ولا كيف توا!.. ضحك وقال:معاك.. ابتسم المهدي وقال؛تفضل.. عبد القيوم:يزيد فضلك... ومشي مع المهدي خشوا باب تاني غير الرئيسي.. ورفع المهدي عبد القيوم للمربوعه الخارجيه وقعدوا فيها هو وياه.. 🍃وفي الصاله.. كانوا حيطلعوا طوبى والجالي.. سدرة وهي تلبس في طوبى الكاب قالت:جالي.. الجالي بإبتسامه :نعم.. شبحتله ودموعها في عيونها:اسمع يالجالي طوبى أمانه في رقبتك من اليوم الله لايسامحك ولايربحك كان في يوم وجعتها ولابكيتها.. طوبى كانت تسمع في سدرة وهي شادة دموعها بقوة... الجالي من داخل خوفاته دعوة سدرة بس ظاهريا ودار روحه عادي وهو يقول:ماتخافيش ياسدرة كوني هانيه طوبى في عيوني.. سدرة مسحت دمعه نزلت منها وقالت؛خود مرتك خود..ربي يهنيكم ويسعدكم.. جي الجالي لطوبى خداها وهويقول:آمين... مشت طوبى مع راجلها بدون ماتنطق بكلمه عارفه روحها بتبكي لو تكلمت... وسدرة تشبحلهم بنظرات حزن ودموعها ينزلوا.. حاسه وكأن الجالي خدي روحها منها.. وللحظه ندمت انها عطت طوبى من الأساس.. ع جية سالمين اللي كانت متأثرة وباكيه حتى هي قالت:توا بس تريحت مينتها في قبرها.. شبحت سدرة لسالمين بحزن ودموعها مابطلوش نزول... ☘ركب الجالي طوبى للسيارة.. وركب هو وقال؛جميلتي.. طوبى بنبرة باكيه:نعم! الجالي:لاياحلوتي لا كله الا هكي الليله نبيك فرحانه وتضحكي بس.. طوبى؛اسفه بس تعرف انت شنو سدرة عندي.. الجالي:نعرف ياحلو نعرف..وبعدين مش حتقعدي بعيده عليها ديما..لما نولي للخدمه يوميا حتكوني في شارع القهوة.. هي قعدت ساكته ماردتش.. الجالي:طوبى...ياعسل انتي..ياسكر.. ضحكت طوبى . ابتسم وقال:اضحكي اضحكي..وربي لما تضحكي نحس في الدنيا كلها تضحك.. طوبى ابتسمت وقعدت ساكته.. وهو شغل المسجل ع أغنيه لفنانه المفضل.. وقعد يغني معاه..وطوبى تسمعله وهي حاسه بشعور حلو ع الآخر... ☘☘☘☘☘ "كيف خليت بنغازي" عبد القيوم:خليتها في حال مش خير من حالكم هنا.. المهدي:الحرب خلفت دمار كبير؟ عبد القيوم:لاالحق مش كبير واجد مناطق محدده.. المهدي هز راسه وقعد ساكت.. فجأة رن تليفونه..شافه بعدين ناض وقال:شويه وجاي.. عبد القيوم:خود راحتك.. مشي طلع المهدي.. وعبد القيوم يشبح للباب وهو يقول:عليك مواقف نحط فروحي فيهن..تو شن يقولوا عليا شن صحيح الوجه اللي جاي لفرح من غير عزومه...!؟. شويه ورن تليفونه.. طلعه من جيب كبوطه وشاف المتصل رد طول.. ☘والمهدي داخل مع عائشه يوصي فيها.. المهدي:بطانيه خفيفه ومخده مريحه.. عائشه:حاضر تو نركب نجيبهم.. المهدي:باهي وين العشي.. عائشه:هي شويه بس.. ومشت خشت للكوجينه وهو قعد واقف يراجي فيها.. شويه وجاته بسفرة مشكله.. خداها وقال:عطيك الصحه.. عائشه:سلمك.. ومشي المهدي بالسفرة للمربوعه.. وهو ماشي سمع اصوات كلاكسات السيارات عرف ان خوته وعرايسهم وصلوا.. خش لعبد القيوم في المربوعه.. حط قدامه سفرة العشي وقال:تفضل.. عبد القيوم بشي من الاحراج:تي غير ليش متعبين ارواحكم بس.. المهدي:مافي شي من قدرك..تو بنستأذنك بنطلع وانت خود راحتك... عبد القيوم بإبتسامه:اذنك معاك..وان شاء الله بالبركه.. المهدي ابتسم وقال:بارك الله فيك.. ومشي طول طلع من حداه.. عبد القيوم تنهد بعدين شبح لسفرة العشي.. خدي كاشيك وقال:والله نعمة الفرح ماتتفوت.. وقعد ياكل.. شويه وعقد حواجبه وهو يسمع بتركيز قال:كأن المطر تصب! ☘وفعلا.. المطر حضرت في هديكا الليله.. خلت النساوين يخشوا مع العرايس داخل ويسيبوا الخيمه... اللي جي مع طوبى واميمه.. سدرة ومطيره وفردوس وفايزة وغرفه وسالمين مرت جبريل.. وبدت الشتاوات عليهم من اهلهم واهل العرسان... مبروك العرسه ياريمه...وسعة بال ويد سقيمه.. ....... يامبروك عليه وخيي..ان شاء الله يدير عويله زيي.. ....... هي زينه والزين سلاسل..ياسعد اللي بيها استاصل.. وطوبى واميمه يشبحولهم وهما مبتسمات بفرح.. ☘وعبد القيوم في المربوعه يسمع فيهم وهو مبتسم.. ابياتهم اللي يرددوا فيها عجباته...وابتهج معاهم... 🍃وعيون حسين برا وهو في سيارته تحت المطر.. تراقب في الجالي اللي كان واقف مع عمر تحت مظلة باب حوشهم وحواليهم الاصحاب وخوهم نضال يهدرزوا عليهم ومرة مرة يضحكوا.. الجالي يضحك... وكل مايشوفه يضحك ينقهر قهر..وقلبه يكاد يولي رماد.. ☘ربيع بضحكه:منظر خوتك يسهفك للزواج.. المهدي:وتزوج من شادك.. ربيع:نبي ندير عرس نهيج فيه بس راهو! المهدي ضحك نص ضحكه وقال:تافه.. وربيع يضحك.. ع جية لطفي ومعاه صاحبة الشرقاوي جبريل.. الزوز قالوا:السلام عليكم.. ردوا عليهم ربيع والمهدي:وعليكم السلام.. لطفي:بالله يامهدي قولي عبد القيوم جي؟ المهدي بإبتسامه؛ايه..جي..ومقعمز في المربوعه يتعشا.. جبريل:بالله ناديه.. المهدي:حاضر.. ومشي خش داخل... لطفي بإبتسامه:هاه شنو ياربيع امتى بنفرحوا بيك حتى انت؟ ربيع بضحكه:والله اني فرحان بروحي هكي تبوا تفرحوا معاي هكي باهي كان هدا دوروا ضحيه غيري تغرروا بيه.. ضحكوا لطفي وجبريل.. ع جية عبد الرؤوف وهو يقول:تقنعوا فيه يتزوج...ننصحكم ماتشجعوشي وتحطوا في رقبتكم بنت ناس مالهاش ذنب.. جبريل:انقانك في هذي صدقت.. ربيع :ربي يخليلك هالنسيب ياعمي لطفي.. عبد الرؤوف:اللهم امين.. وجبريل ولطفي يشبحولهم ويضحكوا.. ع طلعة المهدي ومعاه عبد القيوم.. جبريل:تارقي..حمد لله ع السلامه ياسي.. سلم عليه عبد القيوم بالأحضان وقال:الله يسلمك ياعمي جبريل..شنوحالك وحال خالتي سالمين والعويل. جبريل:الحمد لله كلنا بخير..خالتك سالمين جت معاي.. تباعدوا عن بعض وجبريل وقال:وهضا عمك لطفي الواعر. شبحله عبد القيوم بإبتسامه ومد يده بيصافحه وهو يقول:حكي عليك عمي جبريل واجد خشيت الخاطر قبل لنحقك.. صافحه لطفي وقال:والله نفس الشي صار معاي من كلام جبريل عنك ومدحه في اخلاقك والتزامك في الخدمه بالذات.. عبد القيوم؛بارك الله فيك وفيه..برغم ان خدمتنا ماتجيبلنا غير الدعاوي لكن معليش.. ضحكوا جبريل ولطفي.. لطفي بضحكه:الحمد لله تقاعدت بكري بكري.. عبد القيوم:ربحت راحتك.. ربيع:لامؤاخذه الغالي شن يخدم؟ شبحله عبد القيوم وقال بإبتسامه:مهندس كهرباء ياغالي.. عبد الرؤوف:وجاي تخدم هني تبع شركة الكهرباء؟ عبد القيوم بإبتسامه؛بإذن الله.. عبد الرؤوف ابتسم ومد يده وهو يقول:عبدالرؤوف بن موسى..نسيب الحاج لطفي وجارك هني.. صافحه عبد القيوم وقال؛فرصة سعيده ياعبدالرؤوف. ربيع:ربيع الباني ..صاحب المطعم اللي يجي تحت شقتك بالزبط وحتى اني جارك هني.. تصافحوا هو وعبد القيوم وقال:فرصة سعيده ياربيع ومرة مرة بناخدوا منك غدا ولاعشا بلاش..محسوبك عزابي ماعندي من يشقى بوكالي.. لطفي:الشارع كله يشقى بيك.. المهدي:بإذن الله عشاك وغداك كل مرة ع حوش.. عبد القيوم قعد يضحك بصدمه وهو يقول:وحق المولى بصارة ياجماعه صحيح عزابي بس نعرف نطيب راهو واهو حتى انشدوا عمي جبريل.. لطفي:كان انت تبصر حني ماعندناش بصارة في الامور هادي.. عبد القيوم مرر نظره عليهم وهو مبتسم بإحراج وقال:ماتحرجوناش معاكم ياجماعة الخير.. المهدي:مافيش احراج دامك بتقعد هني معناها وليت منا وفينا واللي بينا بيك.. لطفي:ايه قولي ياعبد القيوم عجباتك الشقه.. المهدي قعد يشوفله وهو يراجي في اجابته.. عبد القيوم:اها واسعه ومريحه وكنت بنبات فيها الليله بس الأمير هضا شد فيا وحلف نبات عنده اول ليله لطفي:من يومه صاحب واجب المهدي.. المهدي وهو مبتسم ابتسامه جانبيه قال:بارك الله فيك عمي لطفي.. وبعيد عنهم شويه.. كان الحاج علي مع الشيخ جويده ومحمد شنيبه وجار تاني ليهم يهدرزوا ع وضع البلاد والنقاش بينهم محتدم.. عمر:ليالي الحلميه مايبيش يهني روحه عارفه.. نضال وهو يضحك؛يبي يفركشها بأي طريق.. محمد المهدي:ماتخافش جدي باله واسع وعنده قدرة عجيبه ع المسايرة.. نضال:انت شوف ليالي الحلميه كيف يتكلم ويحرك في عكوزه مش بعيد يخبط بيه جدك ع راسه كان ماقدرش يستفز.. عمر:تعرف شكلي بنمشي نوقف معاهم.. نضال:ايوه بش اول مايشوفك يهبدك بيه فرصه ويراجي فيها.. ومحمد المهدي يسمع في نضال شن يقول ويشوف في تعابير وجه عمر ويضحك.. ☘جنبهم بمسافه.. حكيم:رد بالك ياجالي راهو وضعك توا ولى صعب.. الجالي:بالله عليك ماتنكدش عليا الليله بالذات تربح.. حكيم بإبتسامه؛باهي..لكن في بالي سؤال خاطري نعرف اجابته.. الجالي:اسأل ياحشري.. حكيم بضحكه:جديات جالي جديات..انت شن تحس اتجاه مرتك التانيه.. الجالي:اول شي قول مرتك بس خيرلك..تاني شي هالشي يخصني مفروض مانطلعه لحد.. ابتسم حكيم بثقه وقال:وصلتني الاجابه.. الجالي غير عيونه عنه وقعد يشوف لسيارته وهو مبتسم.. ☘داخل.. والناس منشغلين بالعرايس المقعمزات حدا بعض في الصاله.. كانت نجاة في جناحها ومعاها اختها.. نجاة ودموعها تنزل:نبي نروح توا ياصابرين مش حنتحمل اكثر..والله كان قعدت زياده بنعيط ع طول رقبتي ونقلب عرسهم عزي.. صابرين بقلق؛حاضر حاضر وتي حوايجك وحوايج الصغار.. نجاة ودموعها تنزل:عاونيني.. صابرين:حاضر.. وقعدوا الزوز يلموا في الدبش.. بعدي ماكملوا لبسوا الصغار كويس عن الصقع.. وصابرين كلمت راجلها يجي.. وهو كان قريب ووصل بسرعه.. طلعوا الزوز مع الصغار بدون مايعطوا خبر.. لكن وين وصلوا في الجنان حدا الخيمه.. "راجو شويه تاخدوا حصتكم من البكلاوة" وقفوا الزوز والتفتوا وهما يشبحولها.. جتهم وهي تمشي ورافعه قفطانها شويه وطقطق بكعب الكندره.. وصلت فيهم مدتلهم باكوات البكلاوة:تفضلوا.. نجاة وهي تشوفلها بحده جبدت منها الباكوات الزوز ولوحتهم لوطا وقعدت تمرس فيهم برجليها.. خديجه تهكما:لاحرام عليك نعمه ربي والطرف الواحد منها بهداكا الحساب.. صابرين شدت اختها وقالت؛هي بري نجاه.. مشوا ومعاهم الصغار.. وخديجه نقول استفزازا:نتلاقوا فالفرح ديما ان شاء الله.. مشوا طلعوا برا بكل من باب تاني بعيد عن الزحمه وهما يسمعوا في ضحكها المستفز بغيظ. ركبوا كلهم سيارة راجل صابرين.. وهو تحرك طول.. ونجاه من الروشن شافت الجالي كيف واقف يهدرز مع صاحبه وهو يضحك وجوه حلو. حست بروحها مخنوقه ومش قادره تتنفس..حست بالموت بدون مايجيها.. ☘☘☘☘ عشرة دقايق تانيه.. والجالي كلموا خواته يطلعوا مرته بش يمشوا للفندق اللي بيقعدوا فيه اول ليله.. ☘طلعوا طوبى وهما يغنولها.. بري مربوحه يازينه اللي عمرك ماوجعتينا... ........ ياجالي راك تزعلها..بنيتنا دلوعة هلها.. ........... وخدي الجالي مرته ركبها السيارة.. بعدين ركب هو.. وسدرة واقفه تشبحلهم ومعاها فردوس.. طلع الجالي بالسياره وعيون سدرة معاهم.. شويه بان عليها المهدي.. شبحلها..وهي قعدت تشبحله بحزن.. حس وكأنه تكلم فيه بعيونها وتشكيله شن قاعده تحس في هاللحظه.. هو غمض عيونه وفتحهم وابتسم ابتسامه خفيفه وكأنه يطمن فيها.. وهي تنهدت بعدين قالت؛تعالي نخشوا نسلموا وبعدين نطلعوا.. فردوس:ايه ماعندنا علاش قاعدين حتى اميمه ركبت لشقتها.. ومشوا الزوز خشوا داخل.. والمهدي غير عيونه عن الباب وعقله وقلبه مع سدرة.. ☘وفي الطريق.. رجعت صبت المطر مرة تانيه.. وزادت رومانسية الاجواء بين طوبى والجالي.. طوبى اللي كانت غارقه في عسل كلام الجالي واسلوبه الساحر في الكلام.. كانت سعيده هلبه.. ومتلهفه بش تعرف كيف حتكون قصة حبهم اللي في نظرها حتبدا من الليله.. 🌸وصلوا لكورونتيا.. وخش الجالي بعروسته للفندق... ☘في جناحهم... حولت طوبى الكاب وقالت:صراحة جالي تمنيت نكونوا في حوشنا اول ليله.. الجالي بإبتسامه:اني قصدت تكون اول ليله هني.. شدها من يدها وقال:تعالي معاي وتو تعرفي علاش.. مشت معاها وهي مبتسمه بحماس.. لما خشوا لداخل.. وقفوا.. وطوبى تمرر في نظرها بدهشه ع المكان.. كان كله مزين بالفل... ماعدا السرير مزين بورق الورد الجوري اللي كان مكتوب بيها.. "وإني أحبك" طوبى لما شافتها اجتاحتها مشاعر حلوة بالمرة.. شبحتله وقالت وهي متفاجئه وفرحانه:كل مالي نكتشف فيك هلبه حاجات ونتفاجئ بيك..انت حلو هلبه جالي.. هو شد ايديها وقعد يتأمل في عيونها ويقول:اخترت تكون ليله لينا برا حوشنا..بش لو صار يوم وتزاعلنا..نخطفك ونجيبك هني ونفكرك بالله هادي ونتراضوا بسرعه.. طوبى وهي مبتسمه بود:مش قتلك انت حلو هلبه.. الجالي:والله مافي غيرك الحلو في حياتي كلها.. وقرب منها وقبل جبينها.. طوبى:بجديات جالي اني احلى حاجه في حياتك.. بعد وقعد يشوف في عيونها وشد ع ايديها بقوة وقال:عمري ماقلت اصدق من هالكلمه في حياتي..وبعدين انتي عندك شك في انك احلى حاجه كسبتها في حياتي..شوفي لعيوني ركزي فيهم وتو تعرفي بروحك.. قعدت تتأمل في عيونه بصمت.. وهو غارق في عيونها الحلوات... شويه وبدي يغني.. هل عندك شك انك احلى واغلى امرأة في الدنيا.. واهم امرأة في الدنيا..هل عندك شك.. هل عندك شك ان دخولك في قلبي اعظم يوم في التاريخ واجمل خبر في الدنيا.. 🌸وهي تسمعله وع وجهها ابتسامه حلوة ومنسجمه مع صوته ع الآخر.. في الوقت اللي كان فيه حسين.. مدرس بسيارته قدام البحر.. يسمع في صوت موجه..ويشم في ريحته.. ودموعه من عيونه تنزل بحريه دون قيود.. دموع خيبة امل..وحرمان...وقهر... ☘ياقمر يطلع كل مساء من نافذة الكلمات ياأخر وطن اولد فيه وادفن فيه وانشر فيه كتاباتي.. والقمر غايب عن ليل عبد القيوم من سنين طويله.. عبد القيوم اللي كان راقد في مربوعة حوش شنيبه.. راقد ومش راقد..النوم ماباش يجيه هو من نوعيه الناس اللي لما يتغير عليهم المكان مايعرفوش يرقدوا ولايعرفلهم النوم الطريق... عبد القيوم حب بنغازي وتعود عليها وماكانش يبي يسيبها لولا قلبه اللي تعلق ببنيه ماشافهاش الا مرتين بس.. ولايعرف عنها شي حتى اسمها ودار المستحيل بش يستقر في طرابلس ويدور عليها..وهو متأمل انه يلقاها وتكون من نصيبه.. ضرب من الجنون...بل الجنون بذاته... لأن البنيه اللي قلبه تعلق بيها بدون مايعرف عنها اي شي.. تزوجت في اليوم اللي وصل فيه لبلادها. وقاعدة توا تسمع في صوت راجلها اللي كان يغنيلها وهي هايمه معاها بمشاعرها... غاليتي انتي غاليتي لاأدري كيف رماني الموج ع قدميك.. لاأدري كيف مشيتي إلي وكيف مشيت اليك... من يوم طرقتي الباب عليا... ابتدأ العمر...ابتدأ العمر.. هل عندك شك!؟ طوبى ضحكت وقالت:الصراحه لالا.. ضحك وضمها لقلبه...اللي كانت نبضاته عنيفه.. وهي تسمع فيهم...وكل مالها تزيد تحس اتجاه بإنجذاب غير عادي... ☘والعرسان... اميمه وعمر عاشوا ليلة العمر المباركه من فوق سبع سماوات.. والحب الطاهر والشوق المباح عنوانها... 🌸اما الجالي وطوبى.. فكانت هي وياه يستعدوا بش يصلوا الركعتين.. هي غيرت الفيلو..وتوضت.. ولبست ملاية الصلاة.. ومشت طلعت من شنطتها زوز شيش مية زمزم.. ع خشة راجلها عليها بعد ماكان يبدل برا.. وشرب من شيشه الميه المرقيه بورق السدر اللي دسها طول بعد مااستعملها... حط الشنطه والبدله تركينه وقال لطوبى:هيا.. طوبى جاته وهي مبتسمه وقال:هادي ميه زمزم مرقيه اني قريت عليها..خود اشرب.. هو ابتسم وخداها منها فتحها وشرب.. وهي شربت معاه.. بعدكملوا.. الجالي:هي نصلوا.. طوبى ابتسمت وقالت:هيا... ☘☘☘☘☘ "استغفر الله العظيم..خيرك شن جاك كنتي كويسه مافيك شي!؟" غرفه وهي طالعه من الحمام وعبد الرؤوف شادها قعدت تقول بتعب:مش عارفه حاسه روحي كليت شي مسمم ولا شربت مصقع بطني بتقتلني من المغص.. عبد الرؤوف بقلق؛مافيهاش كيف لازم نرفعك توا.. غرفه:لالا فكنا من طلوع الليل..توا نطبخ شويه نعناع ونشربهم ونولي كويسه.. هو خداها ودخلها للدار وهو يقول:انتي ارقدي هني انتي تو ننزل لنبيله نشوف بالك عندها حاجه تمشي مع حالتك عندها دوا لكل شي.. ومشي بسرعه طلع من حداها.. وهي حطت يدها ع بطنها وقاعده تتألم من المغص ☘☘☘☘☘☘ "باهي من احلى طوبى ولاأميمه" سدرة المهدي ؛الزوز كانوا حلوات نسرين بضحكه:باهي من الاحلى فيهم!؟ سدرة المهدي:كل وحده حلوة بشكل عمتو.. خديجه؛وحيده هادي ماتقدريش تاخدي منها لاحق ولاباطل.. سدرة:نقولك حاجه عمتو..انتي احلا منهم كلهم.. نسرين قعدت تضحك.. وخديجه قالت:تعاليلي وهاتي بوسه ياملسنه. جتها سدره وباستها عمتها من خدودها.. فرح بنت نسرين:بس اني عندي اميمه احلى من طوبى...طوبى طلعت عاديه.. راما:انا عجبني طوبى اكثر زي عرايس الاجانب.. نسرين:صح.. خديجه؛بس حتى اني مع فروحه طوبى طلعت عاديه ماكأنهاش عروسه كل شي بسيط..بنت عبد المطلب الشلافطيه طلعت احلى منها.. نسرين:ايااه باديه اول ليله عمتنا خديج.. خديجه:من الاول مش طايقتها بس خوك ذوقه مضروب خالص.. نسرين:ربي يعينهم عليك مسكينات.. خديجه تجاهلت كلام اختها وضمت سدرة ليها وهي تقول؛يانجي سدورتي... ☘☘☘☘☘ الساعه3:00ليلا.. يتأمل فيها وهي غارقه في النوم.. في نومتها كانت تبان زي الطفله كلها براءة... وهو لتوا مازال مش مصدق انه ولت مرته وليه هو بس... بس اللحظه الحلوة اللي كان عايشها مادامتش هلبه .. رن تليفونه.. عكرش وجهه وقال:اييييه نسيت نسكره الزفت.. وناض قعمز خداه من ع الكامدينو.. شاف المتصل... "أحمد حميدا" غمض عيونه بنفاد صبر بعدين فتحهم وصمت الصوت... فصلت المكالمه.. كيف جاي بيديره صامت جت رساله.. فتحها.. (اني من بعد الليله معاش نقدر نعيش ياعمري الموت خيرلي) فتح عيونه ع وسعهم بصدمه وهو يقرا في الرساله .. عارف نجاة مجنونه...ديرها وتجرم في حق نفسها.. اتصل بيها طول..مافيش رد.. عاود اتصل مرة تانيه..كذلك مافيش رد.. خاف هلبه..التفت ع طوبى وقعد يشبحلها للحظات.. بعدين ناض طول.. مشي خدي شنطته طلع منه حوايج وغير.. وطلع طول من الجناح.. ☘وصل تحت ومشي للإستعلامات.. الجالي بإستعجال:المدام في الحجره رقم **** امانه عندكم كان تصير فيها ندير مشكله كبيره.. :مايصيرلها شي ياأستاذ كون هاني.. الجالي:صارتلي حاجه مستعجله مش معطل حدها ساعه ونولي.. ومشي بسرعه طلع من الفندق.. جابوله سيارته ركبها وتحرك بسرعه بإتجاة المنطقه اللي تسكن فيها نجاه.. وصل غادي.. وخش للعماره.. ونزل من السيارة يجري.. ركب العماره..ووصل في الشقه وقعد يدق ع الباب بقوة.. كان حينجن من الخوف مش حيتحمل عذاب الضمير لو صارت فيها حاجه بسببه.. من كثر مادق ومافيش استجابه مالقاش قدامه غير يكسر الباب.. وخر كم خطوة... انفتح الباب... شافها قدامه في حالة مزريه.. قاعده بلبس الحفله..بس منظرها كان مخيف بعد فسد مكياجها من البكي.. تنفس براحه وجاها.. خش وسكر الباب وقال:قريب وقف قلبي.. خداها ليه وهي شدت فيه وانهارت بالبكي.. تنهد بضيق ومشي خش بيها داخل.. انضم لما شاف موس كبير ع الطاوله.. طلقها ومشي بسرعه خداه وهو يقول:وحده مهبوله..مهبوله.. ومشي بيه طول للكوجينه... وهي مشت قعمزت وقعدت تبكي.. طلعلها شافها كيف تبكي..وجعاته.. جاها قعمز جنبها وحط يده ع راسها وقال:نوجا حبيبة قلبي.. شبحتله وقالت بنبرة باكيه:حقه حبيبة قلبك! الجالي:وروحي وعقلي..تعرفي الليله بالذات تأكدت ان قلبي مستحيل يحب غيرك.. نجاة:علاش!؟ الجالي:لأنك غير..تفرقي هلبه يانجاة تفرقي عنهم كلهم.. نجاة:يعني انت ماحبيتهاش.. ضحك وقال:شن بنحب فيها يانجاة قوليلي..نجاة اللي تشوفي فيه مني نديرلها فيه هدا كله بش نسكت خديجه وامي..بش يخلوك في حالك بش يحولونا من رووسهم.. لكن انتي ماتبيش تفهمي يانجاة ع قد ماحاولت نفهمك.. نجاة بنبرة باكيه:مش مني حبيبي مش مني حط روحك مكاني لو تشوفني مع غير شن يصير فيك.. خداه ليه وهو يقول..نقتله ونقتلك.. قالتله:انت كلام ماتحملتاش كيف تبيني اني اللي نشوف بعيوني نتحمل.. الجالي:الله غالب ياعمري الله غالب..امر واقع وانحطينا فيه لكن مش حيطول صدقيني..انتي بس تحملي معاي ارجوك تحملي...بش يصير كل شي زي مانبوا.. هي قالت:تحبني جالي.. الجالي:نموت فيك.. هي شدت فيه بقوة وقعدت تبكي.. وهو يطبطب عليها وع وجهه باديه ملامح الضيق.. وقلبه وعقله مشغولين ع طوبى.. خاف لو فاقت ومالقتاش شن يصير فيها...اكيد حتخاف هلبه.. بعد عنها وقال:سامحيني حبيبي لازم نمشي قاعده بروحها في الفندق كانت فاقت ومالقتنيش تصير مشكله.. شداته نجاة بقوة وقالت:لامش حتتحرك من هني لين نقولك اني امشي.. هو بلع ريقه وضحك بخوف وهو يشوفلها.. ☘☘☘☘☘ وطوبى قاعده غارقه في النوم...وغارقه في الغفله... ماتندري ع شي... عدت الساعات... لين طلع الصبح... هي بدت تفتح في عيونها...فاقت... مرت نظرها فوق ع السقف..وكأنها بدت توعى وتسترجع في ذاكرتها.. تفكرت انها تزوجت.. ابتسمت ابتسامه حلوة..بعدين شبحت جنبها ملقاتاش.. عقدت حواجبها بإستغراب وهي مازال محافظه ع ابتسامتها.. ناضت قعمزت وهي تقول:وينه؟ حولت الغطا ونزلت من السرير ..لبست شبشب في رجليها وقعدت تمشي ودور فيه وتقول؛جالي...جالي... وين طلعت برا.. شافته حوايجه محطوطات ع الكنبه وجنبهم شنطته مفتوحه.. تسائلت؛زعما نزل لوطا؟ مررت نظرها ع المكان بعدين ولت من جديد للدار.. خدت تليفونها من ع الكامدينو..فتحاته.. واستنت شويه بعدين خشت ع سجل المكالمات واتصلت بيه.. ☘هو كان واقف ع مراية دار النوم يمشط في شعره.. رن التليفون.. طلعه طول من جيبه وشافها هي تتصل.. طلع بسرعه من الدار ورد عليها.. الجالي:صباح الورد جميلتي.. "صباح الخير جالي لوطا انت" الجالي:لاحلوة صارت قصة طويله عريضه.. "ان شاء الله خير شن صار!" الجالي:ماتخافيش عسولتي تو لما نوصل فيك نحكيلك اني جايك توا..وتي روحك بش بنفطروا ونطلعوا لحوش بوي.. "حاضر نراجي فيك حسك شغلتني" الجالي:ماتنشغليش مافي شي يخوف حلوتي.. "تمام تمام...ردبالك ع روحك" الجالي:حاضر ياقمر...سلام.. "سلام".. سكرت..وهو نزل التليفون ومشي طول بيطلع.. "وين ماشي!؟" وقف والتفتلها.. نجاة:افطر معاي قبل.. الجالي:نجاه ماتزوديهاش عاد ساد بتت معاك امس وخليتها بروحها.. نجاة ضحكت وقالت؛باهي برا ياسيدي برا..نتلاقوا في حوشكم بعدين.. تنهد وهز راسه ومشي من حداها.. هي سمعت الباب انفتح وتسكر.. بدت تغني وترقص بروحها.. يما يما انا غزالي وين نمشي بيه.. غزالي نحطه في عيوني ونسكر الهدوب عليه... ☘☘☘☘☘ وغزالها في الطريق قاعد يألف في قصة بش يحكيها لطوبى ويبرر فيها سبب غيابه.. وصل في الفندق.. وركبلها طول.. وصل في الجناح متاعهم.. حط البطاقه في مكانها المخصص..انفتح الباب وخش.. لقي شنطته وحوايجه مهناش.. نادى...طوبى... هي شويه وطلعت... لما طلت عليه نظرات عيونه تبدلت لنظرات انبهار ممزوجه بالهويام... كانت بكامل اناقتها..لابسه لبسة سروال انيقه وحلوة.. وضافره شعرها"سبوله" وحطاته ع كتفها.. وحاطه مكياج عرايس ناعم وحلو بالمرة جاته وع وجهها باديه ملامح القلق:ان شاء الله خير جالي شن صاير!؟ الجالي حط يده ع راسها وهو يشوفلها بنفس النظرات:واحد..واحد..من صحابي امس دار حادث.. حطت يده ع فهما وقالت؛وشن صار فيه مسكين! خداها ليه وقال:والله اني المسكين بالله.. طوبى وهي متعجبه:جالي! الجالي:ياعيون الجالي... ضحكت وبعدت عنه وهي تشوفله قالت؛معناها صاحبك حاله باهي.. الجالي:وخير من حالي بهبله.. قعدت تضحك عليه طوبى..وهو يتأمل في ضحكتها وقلبه ماباش يهدا... ☘وبعيد عنهم... في حوش محمد شنيبه... تحديدا في المربوعه الخارجيه... كان المهدي مقعمز فيها.. ونضال واقف عليه ويتكلموا بهمس.. المهدي مد فلوس لنضال وقال:برا للحي الاسلامي تلقاهم فاتحين.. نضال:اصبحنا واصبح الملك لله...خدي الفلوس ومشي طلع.. والمهدي شبح لعبد القيوم اللي كان راقد وعاطي بالظهر.. "والله ماني عارف نخليه راقد براحته ولانوضه.." ناض ومشي طلع من المربوعه... لقاه بوه وقال:ضيفك قاعد راقد.. المهدي:شكله تعب من سفر امس.. محمد؛خليه ع راحته الرجاله اللي بيجوا بعدين ندخلوهم داخل وخلاص..خل بنمشي ناخد شنطة دواي من غادي.. المهدي:واني طالع نشوف حماعى الخيمه كملوا ولالا.. مشي المهدي.. ومحمد خش للمربوعه وقعد يتحرك فيها بهدوء شديد.. وعبد القيوم اللي ماقدرش يرقد غمضه كان حاس بيه وهو يقول في نفسه.. "عليك احراجات...اني اللي جبته لروحي نستاهل" طلع من حداه محمد شنيبه ورد المربوعه.. هو التفت وشبح للباب.. بعدين خدي تليفونه من ع المسند وكتب رساله وبعتها لجبريل... 🌸اللي كان في مربوعه حوش الواعر يفطر مع الرجاله.. سمع صوت نغمة الرساله.. طلع تليفونه من جيب سرواله وفتحها.. (صباح الخير عمي جبريل..اسمع دبر كيف طلعني من حوش شنيبه بأي طريقه راني مزلط ومنحرج وصايره فيا حاله ليا 10ساعات داير روحي راقد) قعد يضحك جبريل.. شبحوله ولطفي قال بإبتسامه:يدومها. جبريل بضحكه قال:هضا عبد القيوم دازلي رساله ضحك..هاك امسك اقرا . خدي لطفي التليفون وقري الرساله وقعد يضحك حتى هو بعدين قال:عنده الحق حوش فيه عرس وناس خاشه طالعه اللي بيشوفه يقول هدا منو.. علي الواعر:اعزمه يتغدا هني.. جبريل:والله جيت بنقولك تعزمه يقعد مع ناس تعرفه خير.. يوسف بضحكه؛تخاف يقول حتى حوشهم فيه فرح.. علي:ماعندناش زحمه زي حوش شنيبه ضجيجهم هلبه هدوكا.. لطفي بضحكه:عطيني رقمه ترا.. جبريل:خش عليه من الرساله.. لطفي شبح للتليفون وقال:ايه صح.. ☘فهالوقت.. كان عبد القيوم يتكلم بالتليفون.. عمته اتصلت بيه تسأل عنه.. عبد القيوم: ايوه اخمادغ مسينغ ايوضغد... "ايه الحمد لله وصلت.." كلا كلا وريجي اسميض هولان... "لالا الجو عادي مش مصقع واجد.." ايوه ايوه..."حاضر حاضر"....تهولتنين امدان..... "سلمي ع الجميع.." سكر من هني..اتصل لطفي من هني.. جاه رقم غريب رد عليه طول وقال.. عبد القيوم وهو مضيق عيونه:السلام عليكم.. "وعليكم السلام صباح الخير ياعبد القيوم" عبد القيوم:صباح الخير..معليش من معاي.. "عمك لطفي الواعر" بدت ع وجهه ملامح الفرح وقعمز كويس وهويقول:مرحبا عمي لطفي شنو حالك اليوم.. ع خشة المهدي عليه المربوعه.. "الحمد لله الحمد لله شن حالك انت" عبد القيوم؛بخير ونعمه والحمد لله.. ☘لطفي:كيف كانت اول ليله ليك في طرابلس..وغمز بعينه لجبريل اللي كان يضحك.. رد عبد القيوم وهو يشوف للمهدي:والله الحمد لله كانت ليله سمحه ومريحه.. "باهي الحمد لله..اسمع" عبد القيوم:نعم.. "غداك عندنا راهو بنذوقوك بازينا" عبد القيوم طار من الفرحه المهم عنده يطلع من حوش شنيبه لأنه ماأرتاحش فيه بس طبعا ثقل روحه شويه وهو يقول:بارك الله فيك ياعمي لطفي مانبي تعب حد معاي تو نعدي تغدا في اي مكان يفتح الجمعه.. المهدي قعد يشبحله وهو عاقد حواجبه.. "تي شن تقول انت مكان شني هدا اللي بتتغدا فيه وحياش شارع القهوة كلها مفتوحه قدامك..والله مانك متغدي كان عندنا.." عبد القيوم ابتسم وقال:مرة تانيه نحلف قبلكم وخلاص.. "تفضل توا نراجو فيك" عبد القيوم؛ان شاء الله..بارك الله فيك عمي لطفي.. "فيك بارك الله واجبنا ولدي هدا مش جميل" عبد القيوم:تسلم ربي يحفظك.. "ويحفظك..هي السلام عليكم" عبد القيوم:وعليكم السلام.. سكر عبد القيوم.. والمهدي قال؛صباح الخير.. عبد القيوم شبحله وابتسم وهو يقول:صباح النور.. المهدي:ان شاء الله ارتحت في نومك.. عبد القيوم:الحمد لله. المهدي بإبتسامه؛سامحنا كان قلقنا نومك حوش فيه مناسبه عارف وضعه كيف بيكون.. عبد القيوم؛لاولايهمك ماتفكر في شي عادي.بس معليش نبي الحمام بنلحق نصلي قبل ليزيد يريح الوقت حتى الفجر راح عليا.. المهدي ناض وقال:جيت بنوضك بس لما شفتك رايح في النوم قلت خليه يالمهدي الراجل جاي من سفر وتاعب.. ناض عبد القيوم وقال؛هذي صلاة ياأمير مافيهاش اعذار تنقبل كان الموت.. ابتسم المهدي وقال:عندك حق..هي تعال معاي.. مشي وعبد القيوم مشي وراه... خش للحمام.. بعدين طلع صلى في المربوعه.. وهو يصلي المهدي جابله سفرة الفطور ... وقعمز سايره عليها وقعدوا يهدرزوا.. المهدي خش خاطره عبد القيوم وعجبه... لكن عبد القيوم قاعد متحفظ معاه لأن الموقف متاع الشقه مازال مش قادر يعديه... ☘وفي الفندق.. كانوا في المطعم متاعه يفطروا الجالي وطوبى... وهما يهدرزوا ويضحكوا وجوهم حلو بالمرة.. اللي يشوفهم يعرف انهم عرسان باين عليهم هلبه.. بان حتى على... مختار اللي كان مقعمز بعيد عنهم ويشوف لطوبى كيف تبان سعيده...وقعد يحدث في نفسه ويقول.. "فيك شي هلبه من امي..روحها ضحكتها..طبيتها اللي تبان ع وجهها..والله لولا خوفي من العواقب راني مشيتلك توا وخديتك في حضني..مش غير انتي بس..حتى فردوس وغرفه...بس مافيش في اليد حيله..اني اللي درتها بيدي" فجأة رن تليفون.. قامه وفتح الخط ورد وعيونه ع طوبى:ايوه.. "الرحله تطلع بعد ساعه" مختار:تمام...وسكر... بعدين ناض وهو يشوف لطوبى..ابتسم بأسف.. وبعدها مشي طلع من المطعم....
#اهرجو #طوبى
....يتبع....
Oops! This image does not follow our content guidelines. To continue publishing, please remove it or upload a different image.
