قيد من ذهب

مناقشه

بنزل دايما مناقشات علي الجورب واتمنيت تشاركوني

خلينا متفقين أننا مختلفين سواء بطبعنا أو باختلاف الظروف حوالينا .... بنتغير وهنتغير مع كل موقف أو انسان يدخل أو يخرج من حياتنا وعشان كدة في نماذج مختلفه من الشخصيات في الروايه ....جاسر شوفت تعليقاتكم عنه واللي أغلبها طبعا وفقا لمواقفه وشخصيته .....جاسر اناني ومتحكم وعصبي ومع ذلك طيب وحنين وراجل مفيش اختلاف أنه بيحب ماس جدا وبيحبها بدون تفكير وخائف عليها الخ ....ماس بتحبه ولكنها عقلانيه في حبها تعرف امتي تلغي عقلها وامتي تلغي قلبها هو عامل زي طفل كان عندها صبر وقناعه التعامل معاه عكسه هو تماما ...في كل موقف بينهم يحصل صدام مش هنختلف أنه ليحاول يراضيها علي طريقته عكسها بتكون عاوزة تفاهم ....الفكره أن ده واقع حياه كتير مننا واولهم انا بنحس اننا بندور في دورة مغلقه مش قادرين نحكم مين الكويس ومين الوحش لان فعلا ولا ماس وحشه ولا جاسر وحش في الاجمال ....لو بتسمعي من وجهه نظر جاسر هتحسي أن عنده حق ولو من وجهه نظر ماس عندها حق وعشان كدة في حوار بينهم ماس اعترفت انها لو مش عايشه الموقف معاه كانت هتشوفه علي حق وده بيخليني اوضح نقطه أن جاسر مش بيكون قاصد ابدا يراوغ معاها أو أنه خبيث بالعكس هو بيتصرف بطبيعته اللي هو مقتنع أنها صح وده اول الغلط ...محدش بيتغير عشان حد التغير بيكون لما احنا نفسنا نحس اننا محتاجين نتغير وجاسر لغايه ما يحس أنه محتاج يتغير هيفضل مقتنع أنه بيعمل الصح ....نيجي النقطه ايه بالضبط اللي هو محتاج يغيره في نفسه ...أنه مش بيسمع صوت تفكيرها العالي ....علي فكره ده مش عيب أو مقدرش اقول ان كل راجل هيسمع مراته وتفكيرها عشان هنكون مش واقعين ولكن اكبر مشكله عندهم أن ماس تفكيرها زايد يعني لو واحده غيرها كانت هنشوف جاسر رجل الاحلام ....بس استاذ جاسر حب واحده بدماغها وتفكيرها وعشان كده كان لازم يحس باحيتاجتياها الفكريه ويحاول يتواصل معاها
بحاول اطرح معاكم مشاكل يوميه مش كلها بتنتهي بالنقاش بين الازواج ولكن بالتفاهم مع نفسنا الاول امتي نقدر نتجاوز ونتنازل وستظل المشكله الابديه بين الازواج هي عدم التفاهم ...
بخصوص شخصيه تانيه زي صالح ده كدة باختصار زي ما شخصيه مي موجوده حوالينا ففي شخصيات زي صالح اللي بتقول عليه حظه نحس وده فعلا ...مهما يحاول تلاقي الدنيا خربانه معاه
الضغوط عليه قويه ومش معني أنه يحاول أنه فاشل بس لازم نقتنع أن اوقات فعلا الظروف بتكون اقوي مننا ويصرف النظر عن سير الأحداث ولكن فعلا الناس دي بتكون الدنيا معاكسه معاها بصورة غير طبيعيه مهما حاولوا
مهران هاديء جدا وده عن نفسي القناعه اللي وصلت ليها بعد سنين من العصبيه لقيت أن الحل في أخذ الدنيا ببساطه وان مش كل موقف نهايه العالم واهم نقطه اتعلمتها هي اني احط نفسي مكان اللي قدامي هلاقي تبرير لكل تصرفاتهم حتي الغيرة ....والنقطه التانيه هي وضع كل موقف في مكانه الصح يعني ولا نكبر المواضيع ولا نصغرها هنحس بهدوء نفسي زي بتاع مهران ..... مي بقي دي شخصيه فعلا متسلطه علي نفسها ومفتكرش اي حلول تنفع معاها لأنها عايشه حوالينا علي الكلام علي الناس و التركيز في حياتهم بعيدا عن حياتها ...لو شافت حياه ماس هتختار حياتها بالتأكيد بس نقول ايه ..لازم اتعرض لشخصيه زيها لعل نكون سبب أن واحده زيها تتغير ...مش لازم تنطلق ولا جوزها يتجوز غيرها لأن في الواقع هتلاقيها عكس صالح الدنيا ماشيه معاها زي الفل
بخصوص اخر اقتباس مننكرش اننا جاين علي جاسر ولكن في الفصل هيبان الموقف وده ميبررش ابدا خطأ مي في نقل الكلام عارفين المثل بتاع المسمار أضاع الحدوه والخطوة إضاعت الحصان والحصان أضاع الفارس هو نفس اللي حصل هي لمجرد التسليه ونقل الكلام عملت ازمه كبيرة ومبقتش عارفه تصلحها وجاسر اللي هيدفع التمن ومش عيب أنه يحاول ينقذ أخته ولكن العيب علي أخته من الاول وعشان كدة لازم ناخد بالنا اوي من اي كلمه نقولها سمعناها لأنها بتعمل مشاكل كتير ومش بتنتهي بمجرد نطقها. ....زيدان وهويدا من الشخصيات الجميله عارفين ليه لان وجودهم في حياتنا أما ساب ذكري حلوة أو علي الاقل لم يترك سيئه وعشان كدة ياريت يكون وجودنا في الحياه كده يا نسيت حاجه حلوة أو علي الاقل لا نترك ضرر ....في معادله بسيطه ليومنا أن ما نسببه من ضرر أقل بكثير من النفع وده المطلوب من كل انسان وأقل ما يمكن أن نفعله هو أن نلتزم الصمت أن لم تستطيع تقديم كلمه جيده ...... 
مستنيه رايكم ومناقشتكم ....دمتم سالمين