ရွှီဟွေ့က အံ့အားသင့်သွားသည်။ လုမန်အိမ်မှာတုန်းက သူမချက်ပြုတ်နေတာကိုမြင်ပေမယ့် သူမအတွက် ချက်ပြုတ်နေခြင်းဟုပဲ သူ ထင်ခဲ့သည်။ သူတို့အတွက်ပါ ချက်ပြုတ်လိမ့်မည် ဟု မမျှော်လင့်ထားမိပေ။
“ ဒါဆို.. အားမနာတော့ဘူးနော် ကျေးဇူးပဲ ”
ကျိုးချန်နှင့် ရွှီဟွေ့မှာ နေ့လယ်စာဘူးတွေကို ယူလိုက်ကြသည်။
“ အရင်ကတော့ အစ်ကိုတို့ရှိနေမှန်း မသိလို့ ဘာမှမကျွေးရတာ..အခုကစပြီး နေ့လယ်စာနဲ့ ညစာကို ကျွန်မတာဝန်ထားလိုက်ပါနော်..”
လုမန်ပြုံး၍ ပြောလိုက်သည်။
စောစောက သူမအိမ်မှာတုန်းက လုမန်အချက်အပြုတ်ဘယ်လောက်ကောင်းကြောင်း ရွှီဟွေ့ သိခဲ့ရပြီး ဖြစ်ကာ မွေးပျံ့သင်းထွက်လာသည့် ဟင်းပွဲအနံ့တွေကြောင့် သူ တံတွေးပင် မျိုချမိသည်။
အိမ်ထမင်းအိမ်ဟင်းတွေသာ စားရမယ်ဆိုရင် ဘယ်သူက ပါဆယ်ဆွဲစားချင်တော့မှာလဲ?
သို့ပေမယ့် သူတို့မှာ အားနာစွာဖြင့် “ ဒုက္ခများတော့မှာပဲ ” ဟု ပြန်ပြောလိုက်ကြသေးသည်။
“ မများပါဘူး..ကိုယ်စားဖို့လည်း ချက်ရတာပဲလေ..လူနှစ်ယောက်စာအတွက် ပိုပြင်ရရုံလေးပဲ ရှိတာကို..တကယ်ဆို အစ်ကိုတို့တွေကိုတောင် ဒီက ကျေးဇူးတင်ရဦးမှာ ” လုမန်က ပြောရင်း သူတို့လက်ထဲက နေ့လယ်စာဘူးတွေကို ကြည့်လိုက်ကာ “ အထဲဝင်ပြီး အတူလာစားကြပါလား၊ အားနာစရာမလိုဘူးနော်၊ အစားအစာဆိုတာက ပူတုန်းလေးစားမှ ကောင်းတာ.. ”
ထို့ကြောင့် သူတို့လည်း ဟိတ်ဟန်ထုတ်မနေဘဲ လူနာဆောင်ထဲသို့ဝင်ကာ စားပွဲတွင် ဝင်ထိုင်ပြီး နေ့လယ်စာကို အသော့စားလိုက်ကြသည်။
ထိုအချိန်အတောအတွင်း လုမန်က ရှချင်းဝေကို ခိုစွပ်ပြုတ်တိုက်၏။
စားသောက်ပြီးကြတော့ နေ့လယ်စာဘူးတွေကို စုကာဆောင်းကာဖြင့် လုမန်က ဆေးရအောင် ထွက်သွားသည်။
ဒါကို အားနာစရာလို့ ထင်သည့် ကျိုးချန်နှင့် ရွှီဟွေ့ကတော့ စားပြီးလို့မှ ပန်းကန်ခွက်ယောက်တွေမဆေးရရင် ရိုင်းရာကျတယ်လို့ ဆိုကာ လုမန်ဘာပြောပြော သူတို့နေ့လယ်စာဘူးခွံတွေကို မပေးဘဲ ဆေးကြောပြီးမှ ပြန်လာပေးသွား၏။
YOU ARE READING
ထိုမှစခဲ့သော အချစ်များစွာသည်
RomanceTranslation of ❛ The Long-awaited Mr. Han『韩先生，情谋已久』❜ written by the author As If Dawn『恍若晨曦』. Story Cover is not mine. Full Credit to relevant Owners. " ခေါ်ထားပါနော် ဘာမဆိုလုပ်ပေးပါ့မယ် " သူမ၏ယခင်ဘဝမှာ သစ္စာဖောက်ကောင်နှင့် ညီမဖြစ်သူ၏ မတရားအမှုဆင်မှ...
