အာဏာရှင်ငရဲမင်းကြီးနှင့် သူ၏အချစ်ကလေး (၁)

29. The Immortal Body

"လူသား၊ မိစ္ဆာနဲ့ နတ်ဘုရားတွေအားလုံးက သေကြလိမ့်မယ်လို့ မင်းမပြောခဲ့ဖူးလား? ဘာလို့ ငါ့ခေါင်းဆောင်က မသေနိုင်ရတာလဲ?" ဖုန့်ရှီ လုံးဝနားမလည်နိုင် ဖြစ်နေတယ်။ သူ့မှာ စွမ်းအားအကြီးဆုံး ခေါင်းဆောင် ရှိတယ်ဆိုတာ သူ့အတွက် သတင်းကောင်း ပေမဲ့ အနာဂတ်မှာ သူ့ကို အဲ့လိုမေးခွန်း အခြားသူက မေးလာခဲ့သည်ရှိသော်ဆိုပြီး သူ အဖြေရှာထားဖို့ လိုတယ်။

ဒါပေမဲ့ မေးခွန်းကိုကြားလိုက်ရတော့ လူသေးလေးမျက်နှာမှာ မြောက်ကြွသွားတဲ့ပုံ ပေါ်လာတယ်။

"ကျွန်တော် ပြောပြနိုင်ပါတယ်၊ သခင်။ ဒါပေမဲ့ အဲ့တာကို အခြား ဘယ်သူ့ကိုမှ မပြောပါဘူးလို့ ကတိပေးရပါမယ်"

"ဘာလို့လဲ?" ဖုန့်ရှီ ဒီနေ့တော့ မေးခွန်းတွေ အများကြီး ရှိနေရတယ်။

"မင်းမေးတဲ့မေးခွန်းက ထိပ်တန်းလျို့ဝှက်ချက်မဟုတ်ပေမဲ့ ဘုံသုံးဘုံက လူအနည်းစုကပဲ ဒီအကြောင်းကို သိထားကြတာဖြစ်တယ်။ သိတဲ့သူ အနည်းစုကလည်း ဒီအကြောင်းကို ဘယ်တော့မှ ထုတ်ပြောမှာမဟုတ်ဘူးလို့ အားလုံး တစ်စိတ်တစ်ဝမ်းတည်း သဘောတူထားကြတာ ဖြစ်တယ်။"

"ကောင်းပြီ၊ ငါ့ ပြောသာပြောပြပါ။ တခြားဘယ်သူ့ကိုမှ ငါ့ခေါင်းဆောင်အကြောင်း မပြောပါဘူးလို့ ကတိပေးတယ်။" လျို့ဝှက်ချက် ဖြစ်တာကြောင့် ဖုန့်ရှီ ချက်ချင်း စိတ်ဝင်စားသွားရတယ်။ သူ့ခေါင်းဆောင်ရဲ့ လျို့ဝှက်ချက်ဟာ သူ့လျို့ဝှက်ချက်ဖြစ်တယ်။ သူက သူ့လျို့ဝှက်ချက်ကို ဘာလို့ သူများကို ထုတ်ပြောနိုင်ရမှာလဲ?

"မင်း ကျိန်ဆိုပေးရမယ်၊ သခင်" လူသေးလေးက ပတ်ဝန်းကျင်ကို ကြည့်လိုက်ပြီး စိတ်လှုပ်ရှားစွာ ပြောလိုက်တယ်။ သူတို့ပြောတာကို ဘယ်သူမှ ခိုးနားမထောင်ဘူးဆိုတာ သေချာတော့မှ၊ ဦးလေးဖြူလည်း မကြားနိုင်ဘူးဆိုတာ သေချာတော့မှ သူက အသံတိုးတိုးနဲ့ ပြောလိုက်တယ်၊ "တကယ်တော့ ငရဲမင်းကြီးမှာ စကြာဝဠာအနှံ့ ဖြန့်ကျက်ထားတဲ့ ကိုယ်ပွါးပေါင်း ထရီလီယမ်ကျော် ရှိတယ်။ ဒီလောကကြီးမှာ သူ့ကိုယ်ပွါး တစ်ခုကျန်နေသ၍ သူ ဖျက်ဆီးခြင်းမခံရဘူး၊ ပြောတာ နားလည်လား?"