*#بين_عالمين🚶🏼♀️❤️.*
*بقلمي: meme mohammed*
*اباء بتحكي*
دخلت البيت وانا سامعه الكواريك بتاعت الشفع والجوطه بتاعت النسوان سلمت عليهم وسلمت على حبوبتي سلام سمحح وطوالي مشيت غرفتي استحميت وصليت صلواتي الفاتتني ومشيت المطبخ اشوف اكل شنو قبل ادخل سمعت امي بتتكلم مع حبوبه وبتقول!
امي: والله يا يمه م بعرف البت دي هتكون كدا معاي لمتين؟
حبوبه:يابتي اصبري المرت بيهو ولا المريتي بيهو لا ساهل لا شويه
امي: اعمل شنو يمه بقيت بس بعاين ليها ساي ولا بسألها ولا حسستني اني امها ولا شي
حبوبه:انتي واختك غايتو عذبتوني ربنا يرحمها غايتو في تربتها هسي لو م اخو راجلك دا ظهر نحن م كنا هنكون في المشكله دي
انا طبعاً استغربت اي واحد من اعمامي واصلا لو واحد من اعمامي مالهم ومالي ومال امي اصلاً؟ طوالي رجعت غرفتي قعدت شويه عشان م يلاحظو لي ورجعت تاني دخلت عادي زي كأنو م حاصل شي ولا سمعتهم سخنت الاكل وطوالي طلعت الحوش وبقيت اكل بمزاج .....
*جهاد بتحكي*
جيت داخله لاخوي لقيتو قاعد وسرحان وغيداء جنبو انا م عارفه لمتين غيداء دي هتكون متلصقه فيهو كدا؟ كلمناها وقلنا ليها تبعد بس براها اختارت العذاب بيدها اخوي لا جايب خبرها لا غيرو ...
انا: غيداء كيف خالتي سوسن
غيداء :والله كويسه الحمدلله كان نفسها تجي بس عارفه التعب والعليها م شويه؟
انا ابتسمت ليها وقلت :ايوااا م مشكله خير ان شاء الله
غيداء طوالي قامت وقالت لسموؤل:يلا يا سمو انا ماشه بعد دا بكره بجيك ان شاء الله هاتصل عليك قبل انوم اوك؟ *"قلت في سري سم اليقتلك😂💔"*
سموؤل رد ليها: طيب تمام مع السلامه
طلعت وانا التفت عليه قلت ليه: هااا الحاصل شنو يا اخوي؟ الخلاك تضايق شنو؟
رد لي : والله يا جهاد العرفتو م قدرت استحملو ولا شي انا لازم اسبق خطيبها دا وامشي اتزوجها انا !
رديت بخلعه: خطيبها؟ طلعت مخطوبه هي؟ ولا كيف يعني تتزوجها انت يمكن بتحبو هتحرمها من البتحبو؟
رد علي بعد اخد نفس : لا م بتحبو انا متأكد💔.
عاينت ليه باستغراب بس م قلت شي اما امرك عجيب يا اخوي ياود امي وابوي🙂....
*في جانب احمد*
صحيت بتكاسل على صوت امي طبعا عامله زعلانه! عاينت ليها بعد مسحت وشي بيدي طوالي قعدت
امي: اها قررت هتختار منو انا ولا هي؟
قلت ليها: يا امي والله كدا م ينفع يعني عايزه تحرمي ولدك من سعادتو ؟
امي: وانا م هاضحي بولدي عشان يقتلوهو لي !
انا رديت ليها باستغراب: امي! كيف انتي بتقولي كدا الحاجه دي قضاء وقدر يا امي قولي بسم الله ناف كلام زي دا وهي م هتقتلني ولا شي !
ختت يدها في كتفي وضغطت عليه وقالت : كلمتك يا ولد هوووي خيرتك يا انا يا هي !
بقيت اعاين ليها مخلوع كيف اختار بين امي وبين البت البحبها! حتى لو م عايزاني! والقرار الانا اخدتو اني م هاتخلى عن حبيبتي! كيف دا كلو اتقلب في وشي ! وامي دي لي بتتصرف معاي كدا ! هسي انا اعمل شنو ! اكيد هاعمل العايزاه م عندي حل غير كدا فوضت امري ليك ياربنا وعسى ولعل يكون لخير 💔
بست راسها وقلت ليها والدموع في عيوني : امي كيفن اعيش بدونك يا انتي وهي يا خلاص م ينفع غيرك ضمتني عليها وكل م تضمني زياده كل م قلبي يتألم زياده خلاص يعني كل تعبي داك في اني اتحصل عليها راح في ملي ثانيه؟...
*عند اباء*
بعد اكلت لميت الصحانه وجيت قعدت مع حبوبه وبقت تحكي لي الحاصل شنو في البلد وم بمل من حكاويها نهائي اثناء م نحن قاعدين جا مؤيد داخل "ولد خالي الجا مع حبوبه" جا سلم علي وانا اصلا من صغيره م بريدو وابا يتبلع لي نهائي سلم علينا وقعد طوالي حسيت الجو كاتم عديييل مشيت قمت مشيت غرفتي وبقيت بقرا بسسس لحدي م سمعت صوت امي وبتقول : وبعليييييييييي بتي اناااااا يرفضوهااا! .......
*ميامن بتحكي*
وصلت البيت انا قلبي في يدي سموؤل دا قصتوو شنو؟ ليه اتضايق كدا معقوله عشان عمليه القلب العملها؟ لا واصلا ليه بيعمل كل دا هو بيحب اباء دي من متين وكيف بيحبها قدر دا؟ اثناء م انا بفكر اتصل علي سموؤل اتخلعت طبعاً ع اساس بفكر في قصتو فجأه القاه بيتصل !😂😂😂💔 رديت وصوتي ظاهر فيهو الخلعه قال لي: ميامن!
قلت ليه : اهلين كيف امسيت؟
سموؤل: والله عافيه الحمدلله بكره ان شاء الله بطلع بس وريني اباء دي عرسها متين!
رديت بتوتر خايفه تحصل ليهو شي تاني قلت : بعد نخلص امتحانات يعني شهرين كدا😅
سموؤل:ايواااا طيب تمام تشكري
م لحقت ارد طوالي قفل الخط في وشي؟ احي يا دا؟ بيتصل وبيسأل وكمان بيقل ادبو ياما شفنا والله😂😂😂💔...
*ليلى بتحكي*
بعد ديل طلعو بقيت افكر في احمد دا هيعمل شنو مع امو؟ هل خالتو هتوافق بعد دا كلو؟ جات امي داخله سلمت علي وقعدت جبت ليها كوز مويه وبقينا نتونس اثناء ونستنا قالت لي : نوال مره ابوك كيفها امبارح اتصلت مالها؟😏
رديت:م عندها شي بس الضغط ارتفع شويه بسبب نقاش مع احمد وبعدين يا امي م نفسك ترجعو زي زمان لمن ابوي كان حي؟
امي قالت لي :ربنا يرحمو والحي ابقى من الميت وبعدين مره ابوك دي بعد ابوك اتوفى ظهررت على حقيقتها لوو م اخو ابوك هسي كنا هنترمي في الشارع دا كلو عشان عندها الولد عجايب غايتو؟😏
ضحكت بصوتي قلت ليها: اجي يا امي لسه انتي في تفكيرك داك؟
امي ضربتني في ضهري وبعدها قالت: ماهو دي الحقيقه ابوك اللع يرحمو م قصر غايتو..الله يرحمو الغالي فات لربو وارتاح ❤️...
#يتبع.......
