The Poor Female Lead Can't Take Anymore!(Realm-5)[Myanmar Translation]

Chapter - 89

[Unicode]

{ညီမက သူခိုးလို့ထင်လိုက်တာ}

ဝမ်ရူဟွားက နာကျင်စွာအော်ဟစ်လေသည်။ အေးစက်စက်ထိုအရာက သူ့ခန္ဓာကိုယ်ထဲကို ပိုပြီးနက်နက်ရှိုင်းရှိုင်းတိုးဝင်လာသည်ကို ခံစားမိသည်၌ သူက ပို၍ပင်ကျယ်လောင်စွာအော်ဟစ်လာ၏။

"မမလေး၊ ဘာ-ဘာဖြစ်တာလဲ?"

ယွဲ့လန် နိုးလာသည်။ နဉ်ရှုက အေးစက်စွာဆို၏။

"မီးထွန်းလိုက်။"

ဝမ်ရူဟွားသည်ကား ကြမ်းပေါ်၌ ပုံလျက်သားကလေးလဲကျနေကာ ညည်းညူလျက်ရှိ၏။ သူ ကြောက်နေသည်။ နဉ်ရှုအသံကိုကြားသည်၌ သူက အားပျော့စွာအော်၏။

"ဝမ်းကွဲညီမ၊ အစ်ကိုပါ။ အစ်ကို့ကို ကယ်ပါဦး။"

နဉ်ရှုက ဝမ်ရူဟွားရဲ့အသံကို မကြားချင်ယောင်ဆောင်ကာ ယွဲ့လန် မီးထွန်းလိုက်ပြီးတဲ့အခါမှသာ ဝမ်ရူဟွားကို သတိထားမိဟန်ဆောင်၏။ ထိုအချိန်တွင် ဝမ်ရူဟွားမှာ သွေးအိုင်ထဲလဲနေပြီဖြစ်ကာ သူ့မျက်နှာသည်တော့ မြင်မကောင်းလောက်အောင် ဖြူဖျော့နေ၏။

"အားးး!"

နဉ်ရှုက သူမအော်နိုင်သမျှ စူးစူးဝါးဝါးအော်လိုက်သည်မို့ သူမရဲ့အသံက ည၏တိတ်ဆိတ်နေမှုကို ချက်ချင်းပင် ဖြိုခွင်းသွားချေ၏။ ရွာထဲက‌ခွေးတွေကလည်း ဟောင်လာကြသည်မို့ တိတ်ဆိတ်နေသောညမှာ ဆူညံကာအသက်ဝင်လာတော့သည်။

"ဝမ်းကွဲအစ်ကို၊ ဘာလို့ အစ်ကိုဖြစ်နေတာလဲ? ဘာတွေဖြစ်နေတာလဲ? ကျေးဇူးပြုပြီး ညီမကို မခြောက်ပါနဲ့။"

နဉ်ရှုက ဝမ်ရူဟွားကိုထိဖို့ အင်မတန်ကိုမှကြောက်ရွံ့နေဟန်ဆောင်ရင်း မျက်ရည်နှစ်စက်ကို အတင်းညှစ်ထုတ်လိုက်သည်။ သူမ တကယ်ပင် ကြောက်နေခဲ့ပါသည်— သူမရဲ့လက်ကလေး သွေးတွေနဲ့ညစ်ပေသွားမှာကိုပေါ့။

"ဝမ်းကွဲအစ်ကို၊ ညီမ တောင်းပန်ပါတယ်၊ ညီမက သူခိုးလို့ထင်လိုက်တာ။ ညီမ ဘာလုပ်ရမလဲ?"

နဉ်ရှုပုံစံက လုံးဝပျာယာခတ်နေပုံပေါ်သည်။

ဝမ်ရူဟွားမှာ ကြောက်လန့်သွားသလို ဒေါသလည်းထွက်သွားရ၏။ သူ့အသက်က သွေးတွေနဲ့အတူ စီးဆင်းသွားနေသလို သူခံစားနေရသည်။ အဓိကတရားခံက အဲ့နေရာမှာပဲရပ်နေပြီး လုံးဝမလှုပ်ဘဲ စကားပဲပြောနေတာကိုကြားတဲ့အခါ သူ့မှာ ဒေါသထွက်ရလွန်း၍ အသက်ပင် မနည်းရှူနေရသည်။