The Sweetest Escape

Twenty-nine

Hannah

"Sa maling realidad ata ako nagising."

Humalinghing ang kasama ko bilang sagot.

Hila-hila ko si Shasta gamit ang lubid na ipinantali sa kanya ni Barney kanina. Si Migs dapat ang mag-aasikaso sa kanya ngayon kaso bigla siyang pinatawag sa clinic kaya ako na ang umako ng gawain niya.

Nanibago nga ako kasi medyo maamo si Shasta sa akin ngayon. Walang temper tantrums nang ilabas ko siya sa kulungan. Napaganda ata ang gising.

Iyon din ang masasabi ko sa Lolo ko. Sa maling side ng kama ata bumangon at ang mellow ng pakikitungo sa akin kanina. Pagbaba ko, nasa hapag-kainan siya na tila hinihintay ako. Tapos kinumusta niya ang gising ko. Tinaasan ko pa siya ng kilay bago ako sumagot.

Madaldal siya habang kumakain kami. Nagkukwento siya tungkol sa rancho at kung paano niya ito namana sa mga magulang niya. Ikinuwento niya si Lola na hindi ko nakilala. Nabanggit niya sandali si Mama pero agad siyang tumahimik. Doon natapos ang kadaldalan niya.

"Nakalimutan sigurong saksakan ni Manang Lita ng insulin," dagdag ko.

Tumigil ako sa ilalim ng puno ng mangga at tumingin sa kalawakan ng lupang sakop ng rancho. Sobrang berde ng lahat. Malinis pa. Ano kayang magiging hitsura kapag naiguhit ko sa papel mula sa point of view na ito?

Makabalik sa bahay mamaya para makuha yung sketchbook ko.

Binalik ko ang atensyon ko kay Shasta. Itinali ng mahigpit ang lubid para hindi siya makalayo. Kumuha ako ng curry comb at lumapit sa kanya. Umatras naman siya at nagtaas-baba ng ulo para balaan ako sa paglapit ko.

Pinanlisikan ko siya ng mata saka ako lumapit ng isa pang hakbang. Umatras uli si Shasta.

Nagpakawala ako ng isang malalim na hininga. Nagtungo ako sa harap niya at nakipagtitigan. "Look, alam kong may issue ka sa mga lumalapit sa'yo pero kailangan mo nang malinisan kasi walang ibang makapagtiyagang maglinis sa 'yo kakaiwas mo sa kanila."

Ibinalik ni Shasta sa akin ang titig ko. Tila ba sinasabi niya na, Ikaw pa talagang nagsabi niyan?

Natameme naman ako. Napatulala sa damuhan. I've summed up everything Migs was trying to do for me in one conversation. Mas harsh nga lang yung pagkakasabi ko pero pareho pa rin ng ideya.

"Sinusubukan ko naman, okay?" pagdepensa ko. "Mahirap. Pero sinusubukan ko. 'Wag mo kong tingnan ng ganyan! Swear, walang halong lokohan sa sinasabi ko. I. Am. Really. Trying. Kaya gayahin mo na ako, subukan mo nang magpatuloy. Please." Inilahad ko ang palad ko.

Pumadyak si Shasta at iniwas ang mukha niya sa akin. Ibababa ko na dapat ang kamay ko nang bigla siyang lumapit at sinagi ang kamay ko gamit ang nguso niya.

Hinaplos ko ang kahabaan ng nguso niya bago ko inilapit ang katawan ko sa kanya. "Kung ganito lang pala ako kadaling kumbinsihin."

Muling humalinghing si Shasta at naramdaman ko ang init ng hininga niya sa kamay ko.

Sinimulan ko rin ang pag-groom kay Shasta. Sinabi dati ni Migs na kailangan kong kausapin siya habang naglilinis para aware siya sa bawat kilos ko kaya dinaldal ko naman siya. Kinuwento ko sa kanya ang dalawang araw na pananatili namin sa studio ni Michelle. Light pa noong umpisa pero nagawa kong sabihin sa kanya yung mga pagdadalawang-isip ko kay Migs.

Naka-squat ako sa likod ni Shasta at kakatapos ko lang tanggalan ng putik ang ilalim ng horseshoe niya. "Sabi niya sa akin nagawa niya akong mahalin sa kabila ng pagiging isang malaking disaster ko. Alam mo ba kung anong una kong naramdaman? Natakot ako. Kasi sa tuwing may nagsasabi sa akin noon, lagi kong tinatapos yung relasyon. Pero natakot ako na layuan si Migs. Kaso hindi niya ako binigyan ng chance para gawin iyon."