جراحة عالجت قلبي { كاملة }

#جراحة_عالجت_قلبي [ part 3 ]

ورد خلصت شغلها في المستشفى و روحت كانت الساعة ٨ بليل و كانت راجعة هلكانة رجعت و دخلت اوضتها لما لقت باباها و ماماتها نايمين باعدين رهف دخلت عليها
رهف : حمدالله عالسلامة يا وردة
ورد بتعب : الله يسلمك
رهف : مالك بس
ورد : يوم مهلك بشكل متتخيليهوش يا بت يا رهف الا قوليلي جبتي الاندومي ؟
رهف : عيب عليكي يا باشا طبعا جبته
ورد : و اتقفشتي ؟
رهف : عيب عليكي يا باشا تاني ابوكي دافع عني
ورد : والله طول عمري بقول الحج ده عسل
رهف : اه والله لو مكنش ابويا كنت اتجوزته والله
ورد : طب روحي ياختي اعملي الاندومي انا هموت من الجوع
رهف : بس كدا احلى اندومي هيبقى عندك يا باشا شوفي انا مخلصة ازاي مأكلتش علشان مستنياكي ناكل مع بعض عشان عارفة انك مش بتحبي تاكلي لوحدك
ورد بتمثيل : ترا تأثرت ثواني ابكي اهئ اهئ
رهف : يا بت يا فصيلة
ورد : روحي يا ولية اعملي الاندومي عقبال ما اغير هدومي روحي اكسبي فيا ثواب يا بنتي
رهف : اختي بقت ست الحجة يا حلاوة
راحت رهف تعمل الاندومي و ورد غيرت هدومها و قعدوا ياكلوا مع بعض في الأوضة
رهف : عملتي ايه في المستشفى بقى
ورد : جاتلي حالة كدا ربنا يكون في عون جوزها
رهف : ليه بس ايه اللي حصل ؟
حكت ورد اللي حصل معاها في المستشفى لرهف
ورد : بس يا بت يا رهف صعبوا عليا اوي
رهف : و هي اول مرة تجيلك حالة زي دي
ورد : مش اول مرة لكن لما جوزها و أخوها طلعوا سمعتهم و هما بيتكلموا و عرفت انهم متجوزين قاديلهم سنتين و ربنا مرزقهمش و البنت دي اسمها مرام كانت كل شوية تسأل جوزها ممكن يسيبها لو هي مبتخلفش مثلا و يوم ما تبقى حامل و كانت هتقوله عملوا حادثة
رهف : يا لهوي لا فعلا والله صعبوا عليا اوي
ورد : جوزها يا رهف لو شوفتي حالته قلبك هيتقطع بيحبها بجد مش فارق معاه انها سقطت كل اللي فارق معاه ردة فعلها لما تعرف و حالتها و قاعد حزين و عمال يعيط و كل شوية يطلب مني انه يدخلها لحد ما نقلناها أوضة عادية و دخل بات معاها
رهف : هو في كدا دلوقتي
ورد : مع ان حالهم صعبان عليا بس خلوني احس ان الدنيا لسة بخير والله و ان في حد مخلص لمراته و بيحبها فعلا و بيقلق عليها بالطريقة دي
رهف : بت يا ورد انا اكتأبت كفاية ايه ياختي الشغلانة المنيلة دي
ورد بضحك : على رأيك انتي عاملة ايه في الكلية
رهف : خنقة كدة والله الواحد زهق عايزة اتخرج بقى
ورد : إن مكنتيش في تمريض ٤ سنين بس اومال لو كنتي في طب ٧ سنين بحالهم كنتي عملتي ايه
رهف : والله يا اوختشي انا لو عليا اقعد في البيت استنى زوجي قرة عيني البت اصلا مالهاش الا بيت جوزها بلا جامعة بلا قرف يا شيخة
ورد : يخربيييتك يا بت نفسي اعرف طالعة لمين في العيلة دي
رهف : انا مميزة مش طالعة لحد طالعة لنفسي
ورد : عارفة اللي بيقولك متخافش من الهبلة خاف من خلفتها انا خايفة بقى من خلفتك اللي هتيجي دي
رهف : هيطلعوا قمر زي امهم ياختي
رهف لاحظت كيس ورد جايباه معاها
رهف : ايه يا بت اللي انتي جايباه معاكي ده ؟
ورد : قومي افتحيه و شوفي
رهف أكلت معلقة من الاندومي و قامت فتحت الكيس لقت بوكيه الورد
رهف : انتي نويتي تتجوزي و هتروحي تتقدميله ولا ايه
ورد : لا يا ظريفة الورد ده جالي انهردة معرفش من مين
رهف : و ايه اللي مكتوب في الكارت ده بقى
رهف قرأت الكلام اللي في الكارت و راحت قعدت على السرير جنب ورد و هي سرحانة
رهف : يا لهوي مين القمر اللي كاتب القمر ده
ورد اخدت منها الورد و الكارت و ضربتها على دماغها
ورد : ده ليا انا يا حيوانة
رهف : منا عارفة انه ليكي بس الكلام والله يدوخ
ورد : من ناحية انه يدوخ فده يتوه مش يدوخ
رهف : بس هيطلع مين ده اللي بعتلك الورد بالكلام ده ؟
ورد : والله ماعرف بس عارفة يا رهف
رهف : عرفيني
ورد : كنت دايما بتمنى يجيلي ورد و يبقى في كلام حلو مكتوب في الكارت زي كدا
رهف : ايه الفكرة بقى ؟
ورد : رهف انا عارفة انك عبيطة و هبلة بس مش للدرجادي يا ماما
رهف : منا مش فاهمة
ورد : مش فاهمة ايه ؟
رهف : بصي من الاخر فاهمة انتي تقصدي ايه بس بستعبط عليكي علشان تتكلمي انتي علشان انا بحب اتكلم معاكي في الحوارات اللي زي دي و بيبقى ليكي احساس و سينس كدا و انتي بتتكلمي
ورد : طب ما تقولي كدا من الاول
رهف : الميكروفون مع حضرتك
ورد : عشان اتكلم على روقان بقى كدا قومي اعمليلي كيسين اندومي اللي باقيين علشان التلاتة دول خلصوا
رهف : فوريرة
رهف قامت عملت الاندومي و رجعت لورد تاني
رهف : احلى اندومي لأحلى ورد فيكي يا منطقااااا
ورد : ششششش يخربيتك امك هتصحى تروقنا
رهف : اه صح سوري اندمجت يلا احكي ياختي
ورد : بصي يا ستي مش انتوا دايما بتسألوني انا ليه كل ما يجيلي عريس ارفضه ؟
رهف : اه
ورد : لأنهم بيبقوا جايين و هما مش حابين الموضوع اللي تلاقيه جاي من زن امه عليه و انها عايزة تشوف عياله و اللي تلاقي اصلا ابوه و امه ضاغطين عليه انه ييجي انما ملاقتش ولا واحد جاي علشان هو نفسه عايز يتجوز حاجة يا بت زي اللي بنقرأها في الروايات كدا يبقى شايفني حاجة غالية و يحافظ عليا فعلا ابقى متأكدة ان مهما حصل بينا و احنا متجوزين انه عمره ما هيروح لحد غيري ان عمره ما يمد ايده عليا يبقى بيقدر يسيطر على نفسه و على غضبه يبقى عارف ازاي يصالحني لو زعلانة انا عايزة واحد لما اتعب يقعد جنبي و ياخد باله مني مش عشان ده واجب عليه لا علشان هو خايف عليا مش يبقى متضايق و يختنق علشان مش قادرة اقوم اعمل غدا علشان تعبانة و اهم من ده كله يبقى عارف ربنا كويس يبقى بيصلي و بيقرأ قرآن و بيعمل زي ما الرسول وصى و أمرنا بيه مجرد ما تلاقي واحد قريب من ربنا و فاهم دينه كويس مش يبصلي و بيصوم و بيقرأ قرآن منظر بس لا يبقى فاهم دينه هيبقى هو ده الزوج الصالح نقي زوج ياخد بايدك للجنة نقي اب صالح لعيالك اللي هييجوا نقي شخص حنين عليكي و صبور و يعاملك بما يرضي الله زي ما الرسول كان بيعامل زوجاته بس كدا
رهف : بس صعب تلاقي حد بالمواصفات دي دلوقتي يا ورد الشباب بقوا بيرتبطوا علشان يتسلوا مش علشان يخطبوا و يتجوزوا مبيبقوش مستعدين انهم يشيلوا مسؤولية و للأسف بقى نادر لما تلاقي شاب قريب من ربنا بالطريقة دي زي ما بتقولي دلوقتي بقوا على طول يسمعوا اغاني و يشتموا بعض و يقولوا ده هزار بينا عادي بقوا بيشجعوا بعض على السوء بدل ما يروحوا يصلوا في الجامع بقوا يفضلوا نايمين و ميقوموش يصلوا الفجر بيبقوا سهرانين و يسمعوا أذان الفجر و يصلوا في البيت بدل ما يصلوا في الجامع ده لو كانوا بيكلفوا نفسهم و يقوموا يصلوا اصلا احنا في زمن وحش اوي يا ورد و صعب تلاقي حد بالمواصفات دي
ورد : هو صعب بس مش مستحيل اتمني انتي بس من ربنا اللي انتي عايزاه و هيتحقق اتمني الزوج الصالح هتلاقيه عندك بيخبط على بابك و يقولك انا اهو جاي اتجوزك و اصونك زي ما اتمنيتي اهو جاي اخليكي اميرة في مملكتك كل حاجة بتعوزيها بتجيلك انتي تأمري و انا انفذ عشان انا الراجل و ده واجبي عليكي
رهف : عندك حق والله يارب ارزقنا بالراجل اللي يصونا و يكون زوج صالح لينا و اب صالح لعياله
ورد : يا رب
رهف : خلصي و قومي نصلي العشا جماعة و ننام بقى عشان انهردة كان يوم مرهق
ورد : فعلا يلا روحي اتوضي
صلوا العشا و ناموا و قبل أذان الفجر بساعة قاموا و صحوا سعاد و ابراهيم و صلوا قيام الليل و قعدوا يقرأوا قرآن و صلوا الفجر و ناموا تاني
الصبح
ورد كانت نايمة في امان الله لقت رهف جاية عليها بسرعة و بتهزها و بتنادي عليها جامد
رهف : ورد ورد اصحي يا ورد اصحاااااي
ورد بفزع و وقفت على السرير : ايه ايه في ايه البيت بيولع ؟
رهف استخبت ورا ورد
رهف : ماما شافت أكياس الاندومي و بتجري ورايا
ورد و بتحاول تستوعب عشان لسة نايمة : ايه ؟
سعاد دخلت عليهم و هي ماسكة في ايد فردة شبشب و الايد التانية فيها أكياس الاندومي الفاضية
سعاد : ايه دول يا هوانم بيعملوا ايه في زبالة المطبخ
ورد : و هو انتي ماسكاهم كدا و هما كانوا في الزبالة
سعاد جرت عليهم علشان تضرب ورد قامت ورد و رهف جروا بسرعة و راحوا وقفوا على السرير التاني
ورد و بتحاول تهدي سعاد : اهدي بس يا سوسو و هنفهمك كل حاجة
سعاد : اديني هديت اهو فهموني
ورد بصت في الساعة المتعلقة على الحيطة لاقتها ٧ الصبح
ورد : ثواني بس هجيب حاجة من الدولاب عشان افهمك كويس
ورد مسكت رهف و راحت عند الدولاب مسكت هدوم ليها هي و رهف من غير ما سعاد تاخد بالها
ورد و هي بتجري برا الأوضة : عندي شغل و لازم انزل بسرعة سلام يا سوسو
ورد خرجت برا الأوضة هي و رهف و قفلت الباب بسرعة
سعاد : إن ما وريتكوا يا شوية حيوانات مبقاش انا امكوا سعاد افتحي يا بت منك ليها الباب
رهف : اهدي بس يا سوسو ده سوء تفاهم بس
سعاد بصوت عالي : بلا سوء تفاهم بلا زفت افتحي يا كلبة منك ليها خلوني اربيكوا
ابراهيم و هو طالع من الأوضة : ايه ايه في ايه ؟ ايه الصوت العالي ده ايه اللي بيحصل هنا
رهف شدت ابراهيم و وقفته على الباب
رهف : و حياة عيالك يا شيخ خليك واقف على الباب و ماتفتحوش غير لما ننزل
سعاد : بتتأمروا انتوا و ابوكوا عليا يا كلاب
ابراهيم : الله في ايه يا سعاد عاملة للعيال رعب كدا ليه
سعاد من ورا الباب : عيالك يا اخويا قمت عشان احضر الفطار لاقيت ٨ أكياس زفت اندومي في الزبالة
ورد : استأذن انا بقى يا جماعة عشان انا صغيرة على الرفد يلا غدا القاكم
و لسة هتروح ناحية الحمام لقت اللي بيمسكها من قفاها
ابراهيم : تعالي هنا بس متخافيش مش هنأخرك
و مسك رهف برضه و فتح باب الأوضة و دخلهم جوا و قفل عليهم الباب هما التلاتة
ابراهيم : استلقوا وعدكوا من امكوا بقى
طبعا ورد و رهف بقوا عاملين زي الفيران في الأوضة و عمالين يجروا من سعاد و هي بتجري وراهم بالشبشب و اخدوا علقة ربنا يا يوريهالكوا 🙂
و بعد ربع ساعة من المطاردة في الأوضة فتحت سعاد الباب بثقة و خرجت
سعاد : ١٠ دقايق و تبقى الأوضة اللي بهدلتوها دي زي الفل عقبال ما احضرلكوا الفطار
طبعا مش محتاجين نوصف منظر الأوضة ولا منظر ورد و رهف اللي كانوا راقدين على الأرض و بياخدوا نفسهم من الجري او احم من العلقة 🙂
سعاد عملت الفطار و ورد و رهف روقوا الأوضة و لبسوا و طلعوا علشان يفطروا
رهف : على فكرة انت اب مش جدع
ابراهيم بضحك : تستاهلوا عشان تبقوا تجيبوا اندومي تاني
ورد : بقى كدا يا بابا هان عليك تسيبنا مع الست دي في الأوضة دي كانت بتاكلنا يا بابا
سعاد كانت لسة هتتكلم اقطعها ابراهيم : بس يا بت امك دي اللي محلية البيت اصلا و ليها حق تعمل فيكوا كدا و اكتر كمان
سعاد : تسلم يا حبيبي انت اللي مهون عليا العيشة دي والله
رهف و هي بتاكل : اجيبلكوا اتنين لمون ؟
إبراهيم : مفسدة اللحظات السعيدة
ورد و هي بتغمز : جرا ايه يا حج انتوا مش بتكبروا على الحركات دي بقى ولا ايه
سعاد : بس يا بت احنا لسة شباب زي ماحنا قال بتكبروا قال
رهف : لا كدا الموضوع خرج عن السيطرة بقى راعوا ان احنا سناجل بائسين حسوا بينا يحس بيكوا ربنا
ابراهيم : يلا يا بت منك ليها كل واحدة على مصالحها يلا
ورد و رهف و بيضبروا تعظيم سلام : تمام يا فندم
و خرجوا من البيت

يتبع.....
#جراحة_عالجت_قلبي
#Part_3