بعد مرور ثلاثة أشهر.. مايو 2001..
تنفس....
ثم ابتسم بإقتضاب لا يدري حزنا أم راحة وهو يتذكر ما حدث منذ ثلاثة أشهر لوفاء ومواجهته الأخيرة معها بعد أن وفى أخيه الصغير بوعده له بأن جعل أشرف بطريق غير مباشر أن يدرك أن وفاء تسرقه ليس إلا وأن العقود مزورة ولم توقع معهم شيء بل وصدقه على الفور في ثوان وكأنما كان ينتظر أي دليلا على إدانتها ولم يتوانى ليأخذ ما تبقا لديها من أموال بل ورفع قضية عليها لتسوء أحوالها.. ابتسم بدر الدين وهو يشعر وكأنما بات لديه ظهرا جديدا قويا يستطيع الإستناد عليه بعد ما فعله زياد ولا يُصدق أن ذلك الصغير قد أصبح حتى أفضل منه..
"جبتيني ليه؟ عايزة مني ايه؟ رجالتك سابوكي دلوقتي؟" صاح سائلا اياها وهي راقدة على سرير المشفى لتنظر له بجبروتها المعهود
"عشان أنا أمك.. عشان المفروض أنت اللي تصرف عليا!"
"أمي؟! فجأة كده أكتشفتي إنك أمي؟!" ابتسم بسخرية ولكنه تمزق آلما بداخله
"بأمارة ايه؟! علمتيني مثلا؟ حنيتي عليا في يوم؟ طب لاعبتيني مرة واحدة في حياتك؟ ولا يمكن أخدتيني في حضنك وأنا مش واخد بالي؟ عمرك طبطبتي عليا؟ طيب فكريني أنتي كده بأي حاجة عملتيها تثبت إنك أمي؟ للأسف عمرك ما هتلاقي"
ابتسم لتنهمر أحدى دموعه على وجنه ولكنه جففها سريعاً وهو ينظر لها لا يدري بتشفي وفرحة أم لوما وشجنا
"ايه أشرف ضربك وبهدلك لغاية ما صعبت عليكي نفسك ووقعتي مفرفرة وجالك جلطة وجاية دلوقتي بتدوري على ابنك اللي مش راجل؟ ابنك الجبان الخايف اللي مبيقدرش يواجهك عايزاه يساعدك دلوقتي؟ بعد ما فلوسك خلصت جاية تدوري عليا؟" هز رأسه في انكار مبتسمًا بسخرية
"بدر يا حبيبي أنا.." صاحت وهي تتصنع الحنان ليضحك هو بهستيرية مما سمعه لتوقفها ضحكاته عن الإسترسال في الحديث
"يااااه يا وفاء.. عارفة إن دي أول مرة تقوليلي يا حبيبي.." ضحك مجددا ودموعه تنهمر أمامها لتنظر له بإنزعاج
"تعرفي استنيت اسمع الكلمة دي بقالي قد ايه؟! اربعة وتلاتين سنة بحالهم.. جاية تقوليها دلوقتي!! جاية تقوليها وأنتي بتموتي!! طب عارفة إنك من ساعة ما ابويا الله يرحمه ما مات لو كنتي بس اتغيرتي كنتي هتلاقيني أحن واحد عليكي في الدنيا؟ تعرفي إني كان نفسي اخدك في حضني مرة واحدة بس؟ تعرفي إني فكرت وقولت يمكن كرامتها وجعتها من إن أبويا اتجوز عليها ويوم ما يموت هتقرب مني؟ بس بردو تعرفي إني مرتاح أوي يا وفاء وأنا شايفك بتتحايلي عليا وعايزاني ادفعلك فلوس متكملش حق شوية جزم بلبسها في رجلي وأنتي مش لاقياها!! إلا صحيح فين أشرف؟ خلاهم يحجزوا على أملاكك وخد باقي الفلوس منك مش كده؟!"
أنت تقرأ
ثلاثية دجى الليل
Romanceثلاثية دُجى الليل منقولة أحداث هذه الرواية استندت على أكثر من قصة واقعية محتوى المُشكلات الإجتماعية بهذه الثلاثية لا يُصرح به سوى للبالغين فوق سن ١٨ عام لا يُسمح بالنقل أو النشر.. بقلم الكاتبة : بتول
