تنهيدة قلب ... الجزء الثاني من أسطورتي ..

البارت السابع

أولاً هقول حاجة ..
أبطال الجزء الأول خلاص قصصهم عدت والجزء ده بقى فيه أبطال جديدة وقصص جديدة يعني هنركز على أبطالنا الجدد أما القدامى هيبقوا شخصيات ثاانوية ..
ف سيبولي محبتكم للقديمين وتعلقوا بالجدد بقاا🙈😍

_____________________

‏كان طموحه أن يُصبح ساعي بريد، لسببٍ واحد، حتى يتمكن من رؤيتها وهي تفتح رسائله 💜

________________________________

التاريخ يُعيد نفسه .. هذا ما دار في رأس أمير وهو ينظر للثلاثة الذين يجلسون مُقابلاً له في منزل موسى يُحدّقون به بعيون متحمّسة مترقبة ..

نهض ببطء من مكانه هاتفاً: معلش عيدوا تاني مسمعتش كويس عايزين إيه ؟

هتف زين بحماس: عايزين نستلف بنتك روما علشان عايزنها في حاجة خاصة كده حضرتك ملكش فيها ..

احتدّت نظرات أمير بغضب لتنهض أخته تغريد هاتفة بسرعة: أهدا يا أمير عشان خاطري ..

التفت الثلاثة لبعضهم بدهشة وهتف عمار: حضرتك كويس يا عمو ؟

صرخ أمير مقترباً منهم ليجذب زين بقبضته وعمار في القبضة الأخرى يُنهضهم عن جلستهم بقوة: أنتوا عايزين تجننوني أنا عملت إييييه بس ياربي علشان تعاقبني كده ..

قفز وسام عن جلسته هاتفاً: أهدا يا عمو وصلي ع النبي في إيه بس فهمنا ..

جذبهم أمير خارج المنزل ليفتح الباب ويدفعهم خارجه بغضب صارخاً: بصوا بقا أنا جبت آخري منكم ومن عيلتكم كلهااا البيت ده متعتبهوش تاااني وأنسوا خالص أنكم تعرفوا حد أسمه أمير ..

أمسك وسام الذي يقف قربه بقلق ليدفعه للخارج صارخاً: بررا أنت التاااني ..

نهض زين عن الأرض ينفض ثيابه وهتف بضيق: في إيه ياعمو يعني عندك ضغوط شغل مااشي إحنا مقدّرين بس مش تتفشش فينا كده ميصحش يا عمو وأنت سيد العارفين ..

صرخ أمير بحنق: بقولك إيه يا واد أنت أنت بالذاااات مش عايز أسمع صوتك ولا أشوف خلقتك قدامي لا أنت ولا أبووك بررررا ..

صفع الباب بوجههم بغضب وعاد ليفتحه هاتفاً: وبنتي محدش يقرب منها فاااهمييين ..

عاد ليصفعه بوجههم بقوة والتفت يتنفّس بغضب ليهتف موسى: على فكرة البيت اللي بتطردهم منه ده بيتي ..

أمير بغضب: والله واللي جايين يستلفوها دي تبقى بنتيييي ..

تغريد: طب إهدا شوية عشان خاطري متتعصّبش .. أنت جاي من سفر وتعبان أطلع ارتاح في أوضتك ..

رمقهم أمير بغضب وهتف: الحمدلله أني جيت النهاردة دول كلاب محدش قادر يقفلهم ..

تركهم صاعداً درجات السلم بغضب لتنزل بعدها فتاة في بداية العشرين من عمرها بخصلات بنية طويلة ووجه ناعم بعيون عسلية نظرت حولها بحذر وهتفت: هو في إيه يا عمتو إحم زين وعمار ووسام عايزني في إيه ؟