فى المستشفى
عمي مقدرش يلحق مراته ال طارت بعربيتها وهي بتبكي ومجروحة ،وحاسة بالغدر صعبان عليها عشرة السنين دى كلها،أما عمي فقعد فى الإستقبال مع شكرية ال كانت مذهولة بعد ما عرفت مين هو والد توحة الحقيقي،كان محتار مش عارف يبدأ منين ،بس أهم حاجة عنده كانت أنها متعرفش أنها بنته على الأقل الفترة دى،لحد ما يكسب ثقتها وقلبها ،وبعدين يواجهها ولو أن المواجهة هتكون مٌدمرة جداًللطرفين ،المهم طلع سيجارته وهو متوتر وبيقولها :_
_عارف أنك متفاجئة ...والموضوع مكنش سهل عليكي أبداً ،،فما بالك توحة...أنا مش عاوازها تكرهني
ضحكت بمرارة كده ،وعنيها سرحانة فى الفراغ وبتقوله بعتاب :_
_ المشكلة الحقيقية أني مش هقدر أقولها ...هوية حضرتك مين...؟،إزاي همهد لها أنك الراجل ال بسببه كرهت صنف الرجالة كله
قلبه أنقبض ،وعلامات التأثر بانت عليه:_
_ من فضلك كفاية...ملوش لزوم الكلام...إن شاء الله هع...
واصلت وهي حاسة بشفقة على أختها:_
_ هت أيه..؟ هتعوضها...؟ عن كل مرة باتت دمعتها على خدها لما بابا قالها أنها بنت حرام..؟ ولا عن تحملها المسئولية من وأحنا عيال...؟ وتخليها عن التعليم عشان تصرف على ماما بعد ما بابا صبحي شال أيده من كل حاجة...؟،توحة بنت ب 100 راجل،شالت الحمل ومقلتش بم من وهى صغيرة،بس هي بتكرهك ومن قبل ما تشوفك..لأسباب كتير....منها مثلاً أن ماما حكت لها قد أيه كانت بتحبك وتثق فيك ده غير كمية الكلام المعسول ال بتقولهولها...ومش بس توحة ال عانت ماما قبل ما تتجوز بابا صبحي شافت المر
سألها بإستغراب :_
_ ليه..؟
أجابت وهي تقوس شفتيها بأسى ومتضايقة :_
_ عشان أتجوزت بابا وهي حامل.....وساومها تمضي على فدان عشان ينسب البنت ال جاية فى الطريق ليه ومحدش فى المنطقة ياخد خبر وتبقى فضيحة بجلاجل،فكرك لما هتقولها الحقيقة هتقابلك بالحضن وهتنسى...؟ توحة كل التعرفه عنك من ماما أنك عايش بره ورامي طوبتها...لو بتحبها بجد سيبها لحال سبيلها
شد نفس من السيجارة وهو بيضيق عنيه بغموض:_
_ أنا هعرف إزاي أخليها تحبني وأقربها مني...بس الاول حطي أيدك فى أيدي
إستغربت جداً وهي مش فاهمة المفروض تعمل أيه،فكمل بتوضيح وهو بيرمي السيجارة،وبيطلع شيك:_
_ تمضي لي على شيك ب 10 ألاف جنيه تمن عملية والدتك،ومتقلقيش مش هطالبك بيه،لأنه بنسبة لي فكة،لكن دي وسيلة ضغط ،عشان أجبرها مش بس تشتغل فى الشركة لا وكمان فى الفيلا وتبقى قدام عيني طول الوقت ها قولتي أيه...؟
سكت لدقايق كده قبل ما تقوله بحماس وإمتنان:_
_ أنا موافقة على أي حاجة هتكون سبب فى سعادة توحة ...أصل حضرتك متعرفش توحة دى جدعة معايا إزاي ..بعبترها أمي وأختي،هي ال فضلت ورايا وتوديني وتجيبني من الدروس ..وتدفع لي لما بابا شال أيده،أي حاجة مستعدة أعملها طالما فى مصلحتها
فى السيدة زينب
بعد حريقة غسيل الجيران،قعدت على كرسي خشب يتيم فى الصالة، بعد ما توحة لفت رجلها ،وباب الشقة مفتوحة على أخره، الجو كان بدأ يبرد فقمت أقفله ،لقتها بتحرك كفها فى الهوا وبتقولي بخوف :_
_لا...متقفلهوش ...
فسألتها:_
_ليه...؟
ردت ببساطة:_
_ أصله جايب طرواة ....لما لاقتني مش فاهم وضحت هواء يعني...ولو جيت للحق فميصحش راجل وست يتقفل عليهم باب شقة أبداً
رفعت حواجبي بإستغراب ،لأني مش هأذيها أكيد ،وأنا بطمنها:_
_ يا توحة أنا عمري ما همد أيدي عليكي ..ولا هضايقك..مش هأكلك يعني عشان تخافي كده
ردت وهي بتضحك بتريقة :_
_ تضرب مين ،ده أنا توحة والأجر على الله، ،ده أنا أقرقشك بسناني ،أنا قصدت بس عشان الجيران وكده يعني،ميقولوش وديت الولية المستشفى وجيت فتحتها كباريه ..وأنت فى الأخر راجل وغريب..أنت بس عشان عايش مع الخواجات فى بلاد بره مستغرب
سحبت فنجان القهوة المظبوطة وأنا بشربه بتركيز وإستمتاع ،بتيمة توحة يمكن هي بلدي أوي،بس تلقائية ،فقلت لها:_
_ هخليكي أحلى من مارلين مانرو بس تطاوعيني وهعمل منك موضة تتٌبع،كل بنت فى مصر والوطن العربي هتقلدها ،هخليهم يتمنوا يسلموا عليكي، بس أول حاجة محتاجة تتظبط عندك هي طريقة كلامك،يعني مثلاً متتكلميش بحواجبك ولا تحركي أيديكي فى الهوا ،حاولي تخلي إنفعالاتك أهدى ..وبنسبة للأكل فبلاش الحاجات ال فيها كوليسترول كتير...أنا عاوز أشوف رقة أنوثة ...هتعرفي تبقى رقيقة...؟
عدلت القميص وهي بتتريق وبتقول:_
_ أوكيييه يا بيبي
علقت بسخرية وأنا بنكشها:_
_بيبي دي معلوماتك عن الرقة ...؟
جاوبت وهي حاسة أن قلبها واجعها:_
_ قصدك السهوكة،أه سهوكة دي ليها ناسها يا ساعة البيه، متجيش لواحدة شقيانة وطافحة الكوتة،وتقولها أنوثة ورهفي صوتك،من صغري وأنا شبه الرجالة فى لبسهم وطريقة كلامهم،عشان الديابة كتير ،مكنش ينفع اتمايص ومعنديش الرفاهية الكافية ،فى أخر اليوم مبلاقيش لقمة حلوة مستنياني ..لو مطبختش ...وأختي الصغيرة وخايبة وأمي وراقدة زي ما أنت شايف ،يوم اللحمة بنسبة لي عيد ...بتعشى مع الملايكة عشان أوفر أغلب الأيام
فقولت لها بعطف وشفقة :_
_ من بكرة هجيب لك أكبر أخصائية تغذية فى البلد..عودها فرنساوى وهتظبطك بس تسمعي كلامها
كملت والدموع مترغرغة فى عنيها وصعبان عليها نفسها:_
_ ولما أمي تقولي كلي هي وأختي على الغدا ويلاحظوا أني قومت بسرعة ..عشان اسيب لهم ويشبعوا وعصافير بطني فضحاني،اقولها أصلي عاملة روجيم ،مع إني قربت أختفي ،عودي المسلوع ده مش بمزاجي ،دي إمكانياتي ودخلي والمسئوليات ال ورايا ال نحلت وبري
من دوا أمي ال بالع نصف مرتبي عند الميكانيكي ، وأختي ال عاوزة تتجوز وصبحي شايل أيده من كل حاجة وكأنه خيال مآتة،أقولك أيه ولا أيه،لو فعلاً عاوز تطلع بمودل دور بعيد عني،وأنت هتلاقي ال بيرطنوا إنجليزي كتير أوي وبلغات قلبك يحبها وسيبني فى موالى
مطيت بوقي بدهشة كبيرة ،وأنا بقولها :_
_ ميكانيكي ..؟ يعني الشحوم ال كانت على لبسك أول يوم جيتي بيه كانت من شغلك..؟
هزت رأسها وهي بتتظاهر بالفخر ووجواها نار قايدة:_
_ أيوة...صبي ميكانيكي...مع رجالة كان لازم أبقى راجل عشان أعرف أسد معاهم ...أنا بنت أه بس بنت بلد وجدعة ....وأعرف أجيب اللقمة من بوق الأسد أحسن من رجالة كتير على القهاوى قاعدين يندبوا حظهم
أستفسرت وأنا بنصحها:_
_يندبوا..؟ يا توحة أنا عمري ما كنت أوافق بيكي لأنك هتتعبيني ،هتحتاجي لتغيير جذري،لبس أكل،إتيكيت كان سهل أجيب واحدى جاهزة من مجاميعه،بس عمي أصر عشان ليكي رزق عندنا وهتاخديه
إنزعجت ووشها بهت وهي بتقول:_
_ ليه هو أنا جربة..؟ عموماً تسلم يا ذوق
صححت وأنا بشرب أخر شوية فى الفنجان:_
_ لا..بس محتاجة مش بس تأكلي بشوكة وسكينة ..لا تتكلمي كمان بشوكة وسكينة وكلامك يبقى موزون ومهندم ..مش وصلات الردح المتتالية فهماني...؟
عنيها وسعت وهي بتحسس على زورها:_
_ هههههههه ،يا عيني ده الراجل أتجنن شوكة وسكينة أيه ال هتكلم بيهم في أي حتة ،ياعم ده أنا مبعرفش اكل بيهم ولا أمسكهم لما هتكلم
نفخت بضيق من عدم فهمها:_
_ دي إستعارة مكن..
قاطعتني وهي بتقول بحسرة:_
_ وهي فين الإعارات دي يا ابني..أنا حيلتي فيزا ولا تأشيرة لما هسافر
لسه هعلق وأفهمها ،أتفأجأت بدخول ولاد عم صبحي وهما متعصبين جداً وشايطين،ومعاهم جركن كبير واحد فيهم ما سكه والتاني بيزقني عشان أبعد عن توحة وهو بيحذرني:_
_ لو باقي على عمرك أخلع
توحة حاولت تقوم وتهرب معرفتش رجلها مش سعفاها ،فوقفت قدامها بعناد وأنا بهدده:_
_ أبعد عن طريقها أحسن لك
رفع سكينة في وشي،فشهقت توحة بخوف وقلبها واجعها عليا وهي بتكافح عشان تقوم :_
_ يا نهارك مش فايت بترفع مطواة غزال في وشه،أنت مش عارف هو مين ده ممكن يقطعك هنا
بصيت لها وأنا متغاظ منها وبهمس:_
_ متصدقهاش دي هربانة من مستشفى المجانين ،هكون مين يعني مواطن عادي من المواطنين الشرفاء
أخوه لف من ورايا وهو بيشد توحة جامد وراه ومعاه مطواة وبيقلها:_
_ المطواة دي هتزغرط فى وشك دلوقتي،وهيبقى شوراع ،بس إيه أوز اللوز يا بنت رمزية
كنت واقف مذهول ومتكهرب من الموقف والتاني واقف ورايا،وهو بيصب الجركن على توحة وغرق لها هدومها ،مديت رجلي كعبلته وقع ،وشديت منه المطواة وأنا بحطها على رأسه،وبساوم التاني:_
_ هتنزل السلاح هنزل مش هتنزل ..
كملت توحة بحماس وهي بتصقف وبتدبسني :_
_ يبقى قول عليه يا رحمن يا رحيم
رمى السكينة على الأرض،توحة أدته كوع إنما أيه خرم بطنه وهو بيقول :_
_أأأأأأأأأأأأأأأأأأأأأأأأأأأأأأأأأأأأأأأأأأأأأأأأأأأأأأأه
رقعت توحة بالصوت وهي بتنادي على صاحبة البيت أم فاروق وبتقولها:_
_ يالهوتششششششى ..جايين يولعوا فى عمارتك يا أم فاوق مكفهمش الغسيل يا حبيبتشششى
مع جملتها الجيران أتلموا والجارة أم فاروق مصممة تعمل لهم محضر ،جيت اشيلها عشان نمشي مرضتش ،بصت لي بطرف عنيها كده وهي بتقولي:_
_ يستر عرضك يا أخويا فى النجار على الناصية ..أنزل هات لي منه كلون
سألتها بحيرة :_
_ ليه..؟
هتفت بعصبية :_
_ عشان أبوهم الجزمة ال معرفش يربي..والله ما هو بايت فيها...!!
جبت لها ال طلبته سندت عليا وهي بتركب قلب الباب ،وبتقولي وأنا واقف بصراحة معجب بتصرفها ودماغها ولو أنها مبتريحنيش فى حاجات كتير،كنت سرحت منها لقتها هزتني وهي بتقولي وفى مسمار فى بوقها:_
_ ناولني المفك الصليبة ده كده
وأنا بديه ليها فى مسمار وقع على الأرض،فجت توطي تجيبه فأتكسفت ،ووقع منها مسمار تاني فبقلها بتلقائية:_
_ رمتيه ليه ...؟
ردت بتريقة :_
_ عشان يجيب أخوه ال نزل،أكيد غصب عني ،انزل هاتهم لي بقى
بصيت لها وأنا بعبر لها أني مستاء :_
_ على فكرة البرستيج أتدمر ممسكاني شاكووش ..ومسمامير..ومفك من رجل أعمال لكهربائى
علقت وهي بتبص على سلم خشب :_
_ أه صح كان فى لمبة فى أخر الطرقة بايظة
قبل ما ناخد السلم الخشب ونروح لها لقينا خطيب شكرية جاي وعاوز شبكته ،وبعد ما توحة رفضت طلعنا على المستشفى
فى فيلا 6 أكتوبر
مرات عمي قفلت على نفسها باب أوضتها وهي بتعيط،ومُنهارة ،وبتقطع صورها معاه وبتشخبط عليها بكره وغل رهيب ،وهي بتصرخ وبتقول خاين،قيدت لك صوابعي العشرة شمع،وبتكلم نفسها ،جدى كان معدى من جنب الأوضة سمعها ،خبط فتحت له وهي بتنشف دموعها ووشها لونه أحمر لون الدم ،حكت له ال حصل ،جدي كان متضايق أضعاف مضاعفة عنها،لأن عمي خلف بوعده معاه،وأنه بيستغفله السنين دي كلها ،أما خالد فكان مع نهلة بره ،فبدأ جدي كلامه معاها:_
_ شويكار..عاوزك تتعملي مع الأمور بطريقة أبسط من كده،الست الذكية ال تكسب قلب جوزها
تنهدت بحزن وألم:_
_ البيه سهران بره لوش الفجر،طبعاً مش هيجي له نوم قبل ما يطمن عليها ..وإنها قامت بالسلامة ويجددوا الوصل والشوق..وأنا ..أنا أخر إهتمامته يا عمي..وتقولي كبري وأتعاملي بأبسط....؟
غمض عينه وفتحها وهو بيفكر هيقولها أيه لأن عمي حط نفسه فى موقف رخم جداً:_
_ نزوة،غلطة زي بتوع زمان المهم فى الأخر بيكون مع مين ،مين ال شايلة اسمه ومخلف منها وبيمشي يتباهى بيها،متبصيش للحاجات ال فى ضلمة،لأنها هتفضل طول عمرها كده
صرخت بحدة:_
_ ضلمة نور اسمها معاه ،وال كان زمان بيتعمل على إستحياء بكرة هيبقى عيني عينك،وأنا مش هقبل يكون لي درة أبداً
هدأها جدي وهو بيقولها:_
_ لو زياد كان عاوز يعملها كان عملها زمان ،مش هيعملها وابنه على وش جواز يعنى ،صدقيني أنتي فاهمة الأمور غلط،يمكن كانت مزنوقة فى قرشين وأستنجدت بيه
قطع عليهم كلامهم دخول خالد وهو حاطط أيده فىجيبه وبيغنى ،ولما لاقها زعلانة سألها:_
_ مين ال مزعل ست الكل..؟ قولي لي وأنا أدبحهولك
جففت دموعها هي بتقوله بصوت مبحوح:_
_ لا أبداً مفيش...أطلع أنت غير هدومك وتعالى نتعشى
شاور لها بأيده:_
_لا اتعشوا أنتوا أنا كلت لما أتنفخت مع نهلة بره،عن إذنكم
علقت مرات عمي وهي بتقوم بغموض:_
_ ماشي يا خالي ..انا هعرف أوجعه إزاي
ومع يوم جديد فى وشقة من الشقق الفاخرة المٌطلة على النيل
"يعني أيه..؟ ال 50 ألف راحوا علينا...؟"رجعتك أيد وراء وأيد قدام..؟"
عبارة قالت لها والدة المهندس أشهب وهو بيفطر،لما حكى لها عن رفض توحة أنها ترجع له حاجته، فعلق وهو بيبلع:_
_ والله أنا حاولت معاها ومرضتش ...بتقولي أنت ال سايب وفى العرف مش حقك
ردت والدته بإستهجان:_
_ يعني ايه مش حقك ...؟ هي الفلوس دى بنلاقيها بالساهل كده...؟ ده أبوك من صباحية ربنا بيشقى ويتعب عشانك،ده حتى أقساط الشقة ال قاعدين فيها لسه مخلصتش كانوا سدوا فى أي حاجة
رد وهو محتار:_
_ عملت ال عليا معاها...وبصراحة توحة دى غريبة جداً وفلجر"بيئة"،شايف إننا نستعوض ربنا بقى وخلاص
بصت له بإستياء كده من لا مبالاته وهي بتعاتبه:_
_ يا ابني أنت عاوز تجيب أجلي..نستعوض فى أيه 50 ألف شبكة...؟ ..طيب بص أنت تاخد بوكيه ورد ابن ناس وتروح لهم المستشفى ..وتأكل عقل شكرية بكلمتين وترجعوا صافي يا لبن
أتعصب وهو بيقولها:_
_ يوووه، وبعدين بقى معاكي يا ماما ،..بقولك مش مرتاح معاها أه دكتورة صيدلانية بس أنا مش لاقي في توحة خالة ولا فى والدتها جدة،أصل ده نسب فى النهاية
قاطعته وهي بتوضح:_
_ أنت عارف دي العروسة الكام بسبب ترددك ال تسيبها دي ال 5 ،مشكلتك مش عارف عايز أيه،وبعدين ما أنت هترجع لها وهتخلي الرفض يجي من عندها وهي ال تقول مش عوزاك عشان تاخد دهبك ..وتوبة تكرر تاني أبداً وأجيب شبكة قبل كتب الكتاب ،أسمع بس ال هقولك عليه
أما فى الشركة كان يوم كله حماس ،وحركة،بفتح باب مكتبي صدمتني توحة وهي....!