رواية فتاتى المشاغبة بقلم أميرة السمدونى كاملة

الفصل الثانى

فى السيدة زينب

دخلنا محل غريب ،ريحته سيئة جداً ،بصراحة مكنتش حابب أقعد جوه من الكتمة،والريحة النفاذة ،قعدنا بره على طرابيزة مدورة ،صقفت بإيديها بحماس كده،وهي بتنادي بعلو صوتها وكأن راجل مش بنت ،مفيش رقة ولا أنوثة وهي بتقول:_
_ أنت يا واد ....هات لي طلبية كل مرة ..بس دبلرها بقى على 2...ويلا فى السريع

حسيت إني عايز أرجع وقرفان جداً ،رغم إننا بره على الطريق العمومي ،قدام "المسمط"،مقدرتش أستحمل قومت من مكاني ووشي كله منكمش بإشمئزاز ،مش عارف إزاي جاي لها نفس تأكل فى المنطقة دى،نفخت بضيق ،وخلاص نفسي متاخد ،روحت العربية رشيت برفان ورجعت لها عشان أقلها مليش نفس أكل وهمشي وتبقى تحصلني على الشركة"،إلا إنها أول ما شمت ريحة المعطر الجذاب ،شهقت بإستغراب كده وهي بتقولي:_
_ إيه ده...!،حد يضيع البركة يا بيه ..هتتفتح نفسك إزاي على المومبار ال جاي فى السكة دلوقتي...!

تنحت لها بإندهاش ،والصبي بتاع المحل بيحط الاطباق وبيقولي:_
_ اتفضل يا باشا..مفيش أي أوامر تانية...؟

قبل ما أرد بحرف واحد ،قالت وهي ماسكة"مومابارية " وبتأكل فيها بعزمها وبشهية :_
_ 2 شاي فى الخمسينة ،نحبس بيهم ...أقعد يا بيه أنت مكسوف ولا أيه...؟

طبعاً لا أعرف مومبار ولا أكل من البيئة ده ،لأني عشت مع والدتي ووالدي قبل وفاته بره مصر ،تحديداً فى أمريكا كتير ،عمري ما سمعت ولا شوفت ولا هشوف زي  ده أبداً،قولت لها وأنا بسحب مفاتيح العربية :_
_ لا ....عموماً مخنوق شوية..هحصلك على العربية ولما تخلصي وتغسلي أديك من القذورات دي أبقي حصليني ..ولا أقولك أبقى تعالى فى تاكسي،مش هقدر أخدك فى الحالة دي سلام

ضحكت بصوت عالى والروج وبقايا الاكل على بوقها وسنانها اللولي ظاهرة ما بين المومبار ،ومسكت عضمة مرة واحدة وهي بتقول:_
_ قذو...إيه...؟ دي أكلة الخواجات أيش فهمك أنت....ده الكوراع لوحدها فيها شفاء للناس

سألتها بإستغراب:_
_ ليه هي عسل

تشبثت بالعضمة جامد وهي وهي بتبص فيها ومغمضة عين ومفتحة عين وبتقول:_
_ أكثر....دي أكلة العمد،أستهدى بالله أنت بس على لحم بطنك من الصبح،خود لك ماسورة مزمز فيها على ما الطاجن يجي..!!....

بصيت لها بنظرة فيها نوع من الامر،وتخويف كده:_
_ قومي...يا أنسة توحة ....لو سمحتي ..ومتقلقيش هغديكي فى مطعم خدمة 7 نجوم ..بس لو سمحتي أتفضلي قدامي

حطت معلقتها فى الطاجن وهي بتأكل بشراهة ،وبتقول لي:_
_ كان على عيني والله..بس مقدرش أسيب الأكل طعم أوي ومفيد ..جرب مش يمكن يعجبك...؟

رديت وأنا حاطط صابعي على أرنبة أنفي كده :_
_ يعجبني أيه بس ...ده اسم المحل لوحده يسد شهيتي سنتين قدام ..فى محل فى الدنيا اسمه زيزو عفانة...؟