جاري واحد من الناس اللي عندهم هوس بالشهرة ، هو إختار اليوتيوب كوسيلة سريعة لتحقيق شهرته لكنه كان مزعج جدًا
علي مدار سنتين شفت منه حاجات كتير غريبة
مرة بلع معلقة قرفة كبيرة و رجع كل اللي في بطنه
مرة قلع هدومه بالكامل في عز الشتا و إستحمي بمية ساقعة وسط الطريق
في يوم خبط علي بابي ، قالي إنه رايح مشوار مهم و خطوة فارقة جدًا في مشواره كيوتيوبر ، طلب مني أدعيله بالتوفيق و آخد بالي من بيته لحد ما يرجع
كان بيعتذرلي و هو ميعرفش إن دي أسعد حاجة سمعتها في حياتي ، هتخلص منه لفترة من الوقت ، الحمد لله
خلال أول يومين الموضوع كان بسيط و الأمور عادية جدًا ، شوية رسايل و شوية فواتير و كام مجلة ، كل يوم كنت بلم البريد من الصندوق بتاعه و أدخله البيت عندي
في اليوم التالت لقيت صندوق كبير جدًا أدام باب بيته ، صندوق ضخم و ورقه المقوي سميك أوي لدرجة إنه مخليه ضخم جدًا ، لما رحت لقيت ملزوق عليه عنوان بيت صاحبي بس ، مفيش أي بيانات تانية
أنا قوي و بنيتي الجسمانية قوية لكن برغم كده لقيت صعوبة في إني أشيل الصندوق ، الصندوق كان تقيل فعلًا ، مقدرتش أشيله ، حاولت أجره لحد بيتي في الممر اللي بين البيتين لكن كان تقيل جدًا ، الصندوق كان أضخم من إني أدخله من باب البيت فمكانش أدامي غير إني أحطه في الجراج ، و دي كانت مشكلة !
باب الجراج بتاعي بايظ وأنا مكسل أصلحه ، كنت بركن العربية أدام باب البيت عشان مضطرش أفتح الباب ، لكن دلوقت ، ما باليد حيلة ، لازم أقاوم العند بتاع الباب و قرفه و أفتحه ، فتحت باب الجراج لنصه بعد كام ضربة و كام محاولة
رفعت الصندوق عشان أدخله جوا الجراح و فجأة باب الجراج إتحرك و كان هيقع عليا ، بحاول أسنده الصندوق وقع من إيدي و سمعت صوت حاجة بتتكسر !!
يا رب بس أكون مكسرتش حاجة مهمة ، لكن حتي لو جاري زعل أوإتضايق هكذب عليه و أقوله إنه جاي مكسور من الشحن ، شلت الصندوق و دخلته الجراج و قفلت باب الجراج الخارجي و نسيت الموضوع تمامًا
الريحة !
مش عارف كان عدي كام يوم لما بدأت الريحة تبقي مقرفة و مزعجة ، فيه ريحة وحشة جاية من الجراج و قالبة ريحة البيت عندي ، ريحة مقززة جدًا
كنت عارف إن الريحة القذرة دي جاية من الجراج ، في الأول فكرت إن دا ممكن يكون طرد لحمة من عند جزار هو مشترك معاه بيبعتله كل شهر لحمة ، و إن اللحمة لما إتسابت برا التلاجة عفنت و ريحتها طلعت !
الريحة كانت فعلًا ريحة لحمة معفنة !
دخلت الجراج و أنا لابس كمامة و سادد مناخيري ، قلت هفتح الصندوق و لو لقيت لحمة معفنة هضطر أستحمل و أنقلها للزبالة و أمري لله
كنت مفكر إن الريحة مش ممكن تبقي أسوأ لكن لما فتحت الصندوق إكتشفت أد إيه أنا كنت مخطئ !!
أول ما فتحت الصندوق هاجمتني مجموعة روايح مقرفة ، ريحة عرق ... ريحة بول ... ريحة براز ... ريحة عفن !!
قبل ما أبص إيه اللي جوا الصندوق بعدت عنه من كتر القرف و رجعت !
رجعت علي هدومي كلها ، إضطريت أروح أغسل وشي و بقي الأول قبل ما أجي أشوف إيه الشيء المقرف اللي جوا الصندوق ده ، لما رحت للصندوق و بصيت علي اللي جواه شفت منظر مش هنساه طول حياتي ، منظر هيطاردني في كوابيسي طول العمر ، منظر هعيش مرعوب منه كل لحظة هعيش فيها !
جوا الصندوق كانت جثة جاري !!!!!
بلغت الشرطة و بطبيعة الحال خدوني معاهم عشان يستجوبوني ، أمر روتيني و طبيعي ، كل الأدلة بتشير ليا و كل الشكوك بتحوم حواليا ، حاجة واحدة بس أثبتت برائتي ... كاميرا الفيديو بتاعته و اللي كانت معاه جوا الصندوق !
الكاميرا كان فيها مجموعة فيديوهات سمحولي أشوفها مرة واحدة بس بعد إلحاح مني
الفيديو الأول : جاري و هو بيقبل تحدي حد من متابعينه إنه يشحن نفسه من ولاية تانية لحد باب بيته
الفيديو التاني : جاري قاعد جوا الصندوق الضخم و بيقول إنه جهز نفسه خلاص ، معاه أكل و شرب يكفوه لمدة أسبوع ... أزايز فاضية للتبول ، علب فاضية للتبرز ، الصندوق كان ضخم و واسع و يعطيه حرية حركة و هو قاعد جواه
الفيديو التالت : بيشرح فيه إن معاه حد من إصحابه هيقفل عليه الصندوق و يوديه شركة الشحن في الولاية التانية دي
الفيديو الرابع : جاري بيضحك من جوا الصندوق و بيقول إنه حاسس إنهم شحنوه في الشاحنة بتاعة الطرود و حاسس بيها بتتحرك
الفيديو الخامس : جاري بيضحك و بيقول إن الجو هنا دافي ، معاه أكل و شرب كتير و لسه مكمل التحدي لآخره
الفيديو السادس : جاري و هو بيقول إنه مش عارف هو فين ، الصندوق كان بيتهز و هو بيصور ، صوت مزعج بيحصل و فجأة الكاميرا بتتهز و بتقع من إيده و بتفضل تصور نفس المنظر لحد ما بطاريتها بتخلص
قالولي إن رقبته إتكسرت في اللحظة دي و ماتت ، مش عارفين لحد دلوقت السبب في موته ، محدش يعرف السبب في موته إلا أنا !
الصوت اللي كان في آخر الفيديو ده صوت باب الجراج بتاعي أنا !!