إتفضل
تالين: السلام عليكم
هشام: اتفضلي واقفه ليه
تالين : انت طلبتني استاذ
هشام : فاجئتيني صراحه.... ما اتعودت اشرح لشخص فاهم ...وجاني فضول اتعرف عليك
تالين : شكرا
هشام : درستي وين
تالين : كنت في بريطانيا
هشام: وجيتي تدرسي الجامعه هنا .....معقول
تالين : نصيب
هشام : لا دا من حظي حلو عشان تكوني طالبتي
تالين :شكرا ... ممكن استأذن استاذ
هشام : مستعجله ليه
تالين : صحباتي برا
هشام : اتشرفت بمعرفتك ..... ولو في اي حاجه غلبتك انا حاضر
تالين : شكرا
طلعت ومشت الكافتريا مع الاء وتسنيم وفي الطريق حكت ليهم الحوار الحصل بينهم .... تسنيم قالت ليها طلع بعرف يتونس زينا ..... مشو فطرو واتونسو شويه وتاني رجعو عندهم محاضره تانيه واخر اليوم تلفونها ضرب ..... الو .... هاي .....البرلومه كيف كان اول يوم ...... يعني شنو برلومه ........هههههه ماانتي برلومه حتعرفي كيف المهم خلصتي .....ايوا خلاص ......يلا جاي في الطريق .
الاء : وعندنا جكس ومظبطين الوضع
تالين : قصدك شنو
تسنيم : قصدها الضرب ليك وقعدتي تنعمي صوتك
تالين : دا زوجي
الاتنين بصوت واحد ......انتي متزوجه !!!!
تالين : ايوا
تسنيم : كذابه لا دبله لا حنه ...بتغشي منو
تالين ماعرفت تقول ليهم شنو .... هو ما زواج رسمي .....بس
الاء : يعني عاقدين عليك
تالين : ايوا
تسنيم : قولي كده
جا يوسف عشان يوصلها ونزل من العربيه سلم على صحباتها وعرفتو بيهم ....
تسنيم بصوت واطي قالت ليها .. تاني مايجي الجامعه بتشلب منك ماتقولي ماكلمتك ..
الاء قالت ليها ...الشهاده و العمل الصالح مالو عامل كده زي قطعه البسبوسه انا انبرشت والله ..... تسنيم همست ليها في اذنها احيي انا عريس فول اوبشن طول وهيبه و وسامه وكروزر كمان وربي كده اووفر .....قعدت تضحك فيهم ومشت ....
وفي الطريق كانت بتحكي ليه عن الجامعه وصحباتها والفرحه ما سايعاها ..
في اليوم التاني بعد المحاضره الاولى مشو الكافتريا ..... تالين كانت ماشه وشغاله بتلفونها ما منتبه صدمت واحد ...العصير الفي يدو وقع ........ oh am very sorry .....مامشكله فداك مليون عصير ....thanks ......
الاء من بعيد بتناديها ....تعالي بسرعه اتأخرنا ...... لما جات قالت ليها عند شنو مع مصعب ......
تالين : مين مصعب
الاء : الكنتي واقفه معاه
تالين : ضربتو بالغلط واعتذرت ليه
تسنيم : ولا تعتذري حتى ابعدي منو احسن ليك
تالين : مالو
الاء : دا ولد مسؤول كبير ...بتاع مشاكل وصايع بتاع بنات ....ابعدي منو
تالين : اصلا ماعندي حاجه معاه
مر اسبوعين وتالين مواظبه على الجامعه والدراسه ...شالت المحاضرات الفاتتها وبتقرا عشان تعوض الفاتها ..... مافي شي معكر صفاها قدر محاضره أستاذ هشام الكان طول الوقت عيونو عليها ...واتغير وبقى ظريف وبهظر اثناء المحاضره لما الطلبه بقو مشغلنها ليها.....وكانت بتتضايق من كلامهم بس صحباتها مامقصرين وموقفين اي زول عند حدو ...يوسف غرقان في الشغل كالعاده .بوصلها و يرجعها يوميا وبتحكي ليو عن الجامعه طوالي بس كان تلفونو طوالي بضرب ويكنسل المكالمه ...و بقى متضايق طول الوقت .... كانت حاسه بيه ...بس ما بتسألو .....
وفي يوم كانت بتدرس في غرفتها دق ليها الباب
يوسف : يسعد مساك ..... مشغوله
تالين : بدرس شويه
يوسف : اكيد تعبتي من القرايه .....رايك شنو نطلع نتعشي برا
تالين : اممممممم
يوسف : طيب ما اكذب عليك ..... انا زهجان وعايز اغير جو..... ما حتكسفيني صح
تالين : اكيد ... اديني نص ساعه بس
طلعو مطعم ظريف طلبو عشا وقعدو يتونسو .... بعد شويه جاتو رساله قراها واتغيرت ملامح وشو وسكت ....
تالين : اتكلم ... ولا حتزعل
يوسف : اتكلمي
تالين : شكلك ماحلو وانت زعلان
يوسف : بالله .... ولما اضحك
تالين : امممم ظريف
ضحك...... و رجع طبيعي
تالين : عندي كلمتين ممكن اقولهم
يوسف : اتفضلي ....سامعك
تالين : انا ماعارفه الحصل ليك في حياتك زمان ...ولا من حقي اسأل ...ولا عايزه اعرف ..كمان ممكن خبرتي في الحياة بسيطه ... بس ماعارفه ليه حاسه انو احنا واجهنا نفس الظروف ونفس الالم .. بس طريقه تعايشنا مع الوجع مختلفه ... أنا استسلمت للدموع ويأست من الحياة حتى ماكان عندي الشجاعه ان اسعى لحل مشكلتي ... اما انت فضلت تداري وجعك بالغضب والعصبيه وقاعد تضغط على نفسك عشان تظهر قوي ومتماسك قدام الناس.....
قبل يومين كنت بفكر في حالتي زمان وهسي .... جا في بالي بابا لما ماما اتوفت ....الوقت داك كان عمري 8 سنوات ولسا مافاهمه يعني شنو موت ... كنت بصحى نص الليل على امل القى ماما قاعدم برا ... بطلع من غرفتي افتش عليها كنت بسمع بابا ببكي بحرقه و وجع برجع سريري تاني من غير ما يشعر بي .... وفي الصباح كان بصحيني بأحلى ابتسامه في الكون وبجهز لي الفطور وهو بضحك ويوصلني المدرسه وطول الطريق بحكي لي عن المواقف الطريفه البتحصل معاه في المستشفى ... كنت بستغرب تصرفاته بس الاكتشفتو بعد السنين دي كلها انو بابا كان بفرغ الحزن الفي قلبو وكل الطاقه السلبيه عشان يقدر يتغلب على الالم ويكمل حياتو بشكل طبيعي ... بعتقد ان عندك كميه من الحزن في قلبك لسا مااتفرغت ودي مشكلتك الحقيقيه ...ابدا ماتفكر ان نهايه الاشياء هي نهايه العالم ، الكون مابس الحاجه البتشوفها بعيونك .
كان خاتي يدو على خدو وبسمع كلامها وعيونو بتلمع .... قالت ليو ... شكلك بتقول لنفسك مين دي القاعده تنصحني هي ناسيه نفسها ......... قال ليها..
ابدا...... كنت بقول لنفسي ان عيونك حلوه ..... ابتسمت بخجل ونزلت راسها ...
وفي الوقت الكانت فيه الاجواء اكتر من رائعه ....سمعو صوت واحده قاعده في الطربيزه الجنبهم بتشاكل في الجرسون .....
انت مابتفهم ..متخلف ..قلت ليك مويه بارده بدون تلج تجيب كبايه مليانه تلج ومويه حاره والعصير مافيو سكر خالص .......حضرتك طلبتي مويه باره جبتها ليك قلتي غيرها وجيبها سخنه جبتها قلتي سخنه شديد عايزه تلج والعصير قلتي عايزه سكر بسيط .... انت بترد علي وين المشغلك انا حطيرك من هنا الليله ماعارف ان الزبون دايما على حق ... ... يا اخت .... انا اكون اخت واحد زيك انت اهبل ولا شنو .... لوسمحتي بدون اساءه ...... اسيء ليك وللخلفوك حره وبقروشي ...... الجرسون اداها كف صاموتي رجع المكياج الفي وشها علبتو ..... شغل يهيني ويهين اهلي ماعايزو وشال العصير كباو في وشها طلع .....
كل الموجودين في المطعم انبسطو وبقو يضحكو بصوت عالي زعلت وطلعت طوالي .... يوسف طلع ورا الجرسون اداه الكرت بتاعو قال ليو اضرب لي بكره ضروري وظيفتك عندي .
رجعو وطول الطريق بتذكرو منظر البت وبضحكو ....وصلو البيت وطالعين في السلم ولسا بضحكو..... قابلو محمد نازل ....قال ليهم ناس راجعه من سهره مبسوطه وبتضحك وناس يصحوها من احلى نومه تجيب بامبرز .....يوسف قال ليه .... (ومن شر حاسد إذا حسد)..اها اسحرنا كمان .. ........رد عليه ....يومك قرب يا أصلي ، وقريب حيصحوك وغمز ليو بأبتسامه خبث .....
خلى تالين تخجل ودخلت البيت سريع .......
يوسف رجع غرفتو .....رقد في سريرو خت يدينو الاتنين تحت راسو وبتذكر كلام تالين ابتساماتها ...وضحكاتها.... ونظراتها........ سرح بعيييييييد ...وبقى يفكر فيها لحد ماغلبو النعاس ونام .......
( هي امرأه ، نصف ابتسامتها تربك فصول السنه وبسهوله قد تقلب ثوابت الطبيعه وتأسر قلبي....فما بال ضحكتها...؟ )
في الجامعه ..... كانو طالعين من محاضره ....لقو استاذ هشام في وشهم ...قال لتالين عايزك شويه في المكتب ....مشت معاه ....
هشام: اتفضلي ارتاحي
تالين : نعم استاذ
هشام: كيف مع القرايه
تالين : تمام
هشام : يعني قدرتي تفهمي الفاتك
تالين : ايوا
هشام : بس حاسس انك محتاجه مساعده وخجلانه مع اني عرضت عليك قبل كده
تالين : ابدا استاذ ...ولو في حاجه مافاهماها اكيد حسألك
هشام : انتي ليه بتهربي مني
تالين : عفوا
هشام: يعني ما حاسه
تالين : sorry استاذ وضح كلامك
هشام: معقول ماشايفه انا بتجهجه كيف في المحاضره ...مابكون قادر اشيل عيوني منك ...تالين انا معجب بيك شديد
وقفت على حيلها ..... معليش استاذ بس انا واحده متزوجه ..... وطلعت طوالي .... وهي طالعه في بت فتحت الباب وداخله ...ضربتها في كتفها لما رجعت ورا ....عاينت ليها بنظره افتراء..... وقالت ليها سوري ماشفتك
تالين طلعت لصحباتها زعلانه......
الاء: خير مالك .... وشك متغير
تالين : اتخيلي ...الاستاذ بقول لي معجب بيك وكلام فارغ تاني
الاء : مابصدق ... وانتي قلتي ليو شنو
تالين : قلت ليو انا متزوجه وطلعت
تسنيم : حركاتو طول المحاضره بتقول كده .....النصيحه
الاء: نهله قالت ليك شنو
تالين: مين نهله
الاء : شايفاها جات داخله
تالين: طلعت طوالي .....قصتها شنو
تسنيم: الجامعه كلها عارفه انهم بحبو بعض
تالين : طيب عايز بي شنو
الاء: جبنا سيره القط اهي جايه علينا ........
نهله جات معصبه وبتتكلم بصوت عالي..... اسمعي هنا الزيك انا بعرفهم كويس .... العبي بعيد مني ياشاطره ...
تالين : عفوا
تسنيم : انتي هيي احترمي نفسك
نهله: الكلام ما موجهه ليك
تسنيم: لو عندك مشكله حليها بعيد مننا مفهوم
نهله : بتكلم معاك انا ردي ......... كانت بتتكلم وبتأشر بصباعها
تالين : مابرد عليك لاني ما عارفاك عايزه شنو مني
نهله : بتعرفي المياعه والمياصه مش ....... كان مابتعرفي أنا منو أسألي عني وابعدي عن طريقي .... والفي راسك انسيه ...العبي مع القدرك ياماما .....انا ما بتشلب
الاء : شوفي كان على الردحي والصفقه اسهل منهم مافي بس لا مستوانا ولا بشبهونا .... امشي شوفي صاحبك الخفيف العامل زي شاي البكا .........يلا يامزز
مشو وخلوها بتغلي ......
تالين : انا ماجيت لمشاكل وكلام فارغ زي دا
الاء : انسيها
تسنيم : اوعك تسكتي ليها
تالين: يوسف لو عرف حتحصل مشكله
الاء: ماتقولي ليه خالص.....اي حاجه بقولوها للراجل انتي كمان
تسنيم : شكلنا حنعلمك كتير هههههههههه
وفي اليوم التاني كانت في الكافتريا منتظره صحباتها ......فجاه جا واحد وقعد معاها ...
اعتقد انك مديونه لي بعصير...!!!
لنا لقاء أخر.......