ضمادة للروح

١٢

بعد ما خلصت العزومه وعدا اليوم داك ......جا اليوم البعدو ....بالظهر كده ريم طلعت ليها تونسها شويه ....وكانو قاعدين في غرفتها .....شالت الايباد وأستاذنت منها تشوف الصور .......
ريم : مبالغه ياخ ....شوفي التلج دا كيف ........صورك حلوه ياخ .....وكمان واقفه جنب البيغ بين .....
تالين : دي ايام لندن
ريم : دا ابوك صح الله يرحمو ... كان وجيه ....عرفتك طالعه لمنو ...
تالين : بالعكس انا بشبه ماما كتير ....واكيد بابا وجيه ...كان مكسر الدكتورات كلهم ب شخصيتو وهيبتو ....بس ماكان شغال بيهم كان بحب ماما كتير وفضل مخلص ليها لحد ما اتوفى ......................قعدت تبكي غصبا عنها ...
ريم : مش قلنا تاني مافي بكى ....خلاص قفلت الصور .....دقيقه اظبط ليك الواي فاي وشايفه عندك ايفون
تالين : بس ماعندي sim card
ريم : بعدين طالعه بجيب ليك معاي .....ماعندك فيس
تالين : عندي ...وكمان تويتر و إنستغرام ....بس اصدقائي كلهم افتراضين
ريم : ماعندك اصحاب !!!!!
تالين : المنطقه الساكنين فيها ما منطقه عرب .....حتى في المدرسه الطلاب العرب اتنين او تلاته وعلاقتي بزميلاتي البريطانيات سطحيه .....تانيا بابا كان بخاف علي شديد كنا مختصرين علاقاتنا خالص ....كان هو ابوي وصاحبي وكل حاجه وانا ضايعه بدونو هسي ....
ريم : من اللحظه دي انا صحبتك ....اتفقنا ....وابتسمت ليها .....شكلو عزيز عليك
تالين : بتقصدي شنو؟
ريم : سلسل الفراشه الطوالي لابسه ..... لاحظت ليك لما تتكلمي عن اهلك بتمسكيه
تالين : دي الذكرى الوحيده من اهلي ......بابا جابو هديه لماما لما اتولدت ....وكان بنادينا فراشاتي .....قبل ماتتوفى لبستني ليه ...ومن يومها ماطلعتو .....لما امسكو بحس بيهم وبحس بالامان....
طلعت منها و رجعت ليها المغرب ومعاها شريحه ...حسجل ليك ارقامنا .....وضربت..... مرحب .....ابو الشباب كيفك ....مين معاي ....معقول مابتعرف صوت ريم ست الحريم ....على العموم دا رقم تالين سيفو عنك سلام.........وبكده رقمك بقى عند يوسف و دا رقمو سيفتو ليك ....

و مر اسبوع .....كانت طول الوقت محبوسه في غرفتها ...يجوها ناس البيت تفرق معاهم شويه وترجع تاني غرفتها .... وكل يوم تضرب ل د/صديق على امل يفتح تلفونو بس طوالي بكون مغلق .......يوسف بطلع من الصباح مابجي الا اخر الليل ومابشوفو بعض نهائي .......لكن في يوم رجع بالليل ...سمعتو بصرخ في غرفتو ....شكلو كان بتكلم بالتلفون .......انا مش قلت الحاجات دي تطلع من بيتي ...... انتو مابتفهمو ......وطاااخ صوت حاجه اتكسرت ......خافت شديد لما مشت تتأكد من باب غرفتها مقفول بالمفتاح ....وفي الصباح ماطلعت إلا لما سمعتو طلع .....
في المغرب جات البت الحبشيه شايله ملابس ......ديل هدوم يوسف ناس المغسله جابوها .......طيب دخليهم .......لا انتي دخليهم احنا ممنوع ندخل غرفتو...... شالت الملابس وفتحت غرفتو ....اول مره تشوفها .....ختت الملابس في السرير وهي طالعه شافت ورق مقطع في الارض .....رفعتهم وقعدت تعاين بدهشه....شكلهم صور عرس... هم مقطعات بس ظاهر يوسف بالبدله وتاني بجلابيه الجرتق....بس صورة العروس ماظاهره .......مستغربه وبقول لنفسها ...هو متزوج!!!! ......لي مافي حد قال لي !!...... طيب مرتو وين؟؟ ......فجاه يوسف جا داخل ....اول ماشافتو رمت الصور من يدها وبقت ترجف .......مسكها من يدها بقوة وجراها طلعها .....انتي الدخلك شنو .......مين سمح ليك تدخلي غرفتي .....و بتفتشي حاجاتي كمان ........قعدت تبكي ومن الخوف ماقادره تتكلم .....أأأنا جبت الملابس ......
.....ماتجيبي حاجه ......ماتدخلي ....فاهمه ...إياني وإياك اشوفك حايمه في غرفتي ....كان بكورك بصوت عالي ولسا ماسكها من يدها بقوة....فكاها ودخل قفل الباب بأقوى ماعندو ..... رجعت غرفتها دموعها نازله ويدها واجعاها قعدت تبكي للصباح ...
جاتها ريم لقت عيونها مورمه ويدها مزرقه ....سألتها وحكت ليها الحصل .......طيبت خاطرها وقالت ليها .....شوفي اخوي صعب شويه .....ومن زمان مابحب حد يدخل غرفتو او يمسك حاجاتو ...خليك بعيده منو ....هسي قومي البسي طالعين نفطر انا وصحباتي ..
تالين : زهجانه ماعندي نفس
ريم : والله تمشي انا حلفت
تالين : مابقدر افهميني
ريم : ياخ من جيتي ماشفتي الشارع .....ماتكسفيني ....بضرب ليوسف استأذنو
وبعد ماحاولات كتيره اقنعتها و يوسف سمح ليهم لبسو ومشو سولتير ......
ريم : زفوتاتي ...اشتقت ليكم
_ لا ماتقولي البت الكساااره دي مره اخوك
ريم : ديل سمر وصفاء صحبات السوء
سمر : اخوك عرس لكن
صفاء : بصراحه كلنا منبرشين في راجلك اعملي حسابك مننا
تالين: يعني شنو منبرشين ؟!!!
سمر : واااي عسل لكن هههههههههه
ريم : الزوله دي مستوردة ياجماعه خفو عليها شويه.......
قعدو يتونسو ويضحكو .....ريم وصحباتها مجنونات وظريفات ..خلوها تضحك وطلعوها من جو الكأبه الكانت فيو....ونست الحصل امبارح .....شالو رقمها وضافوها معاهم في قروب الواتساب .......وهم راجعين ....ريم قالت ليها ...اتذكرت بكره ماشين لحبوبه من الصباح ......هي ساكنه جنبكم ..........لا في منطقتنا على بعد ساعتين من الخرطوم ...قدر ما بابا حاول يجيبها تقعد معانا رفضت تخلي بيتها ..اها احنا شهريا في اول جمعه بنشيل حاجاتنا ونمشي نقضي اليوم معاها .....

بالصباح تالين لبست فستان حرير بخصر لونو بيج فيو ورود تحت بالموف عندو حزام جلد رفيع موف ...طرحه ساده وجزمه كعب عالي وشنطه كلهم موف طبعا.....رفعت شعرها لفت طرحتها وعملت ميك اب بسيط ...... جاتها ريم قالت ليه ...قوووومر والله ..يلا اتاخرنا ناس البيت ركبو العربات......نزلو تحت لقوهم جايطين ....يوسف كان واقف جنب عربيتو لابس جلابيه بيضاء تسوي كدي ..... رفع راسو عاين ليها من فوق لتحت وركب العربيه ...... راويه ساقتها من يدها وركبتها معاو قدام .... ريم عايزه تركب معاهم راويه جرتها ....واتحركو كلهم ورا بعض ......
في الطريق كانو الاتنين ساكتين ........كانت لافه راسها ناحيه الشباك وبتعاين .....وهو سجارة ورا سجارة شراب الزول الغضبان ....لما العربيه بقت ضباب ........اتخنقت وبقت تكح ....عاين ليها بطرف عينو و ناولها قزازة مويه .......ولا فكر يطفي سجارتو حتى
بعد شويه تلفونو ضرب ......ايوه .....في شنو.....متين حصل الكلام دا ..والمهندس وين ....يعني شنو اليوم جمعه مش في ورديات ....قبل كده مش قلت المصنع مايخلى من مهندس على الاقل ......صوتو علا زياده .....إي الاهمال دا ....ساعه و بضرب القى الطاقم الهندسي كلو هناك ومشكله المولدات اتحلت وإلا اعتبروا روحكم مفصولين ..

تالين بتتكلم مع نفسها ...هو البني آدم دا طوالي معصب وبصرخ في الناس ...قلبو قاسي وماعندو رحمه...و بتعامل مع الموظفين بطريقه ماحلوه......الله يرحمك بابا ..مافي راجل في الدنيا بطيبه قلبك وحنيتك ...الرجال القابلتهم بعدك إما خسيس زي محجوب أو قاسي زي يوسف ...

بعد ساعتين وصلو ناس حبوبه ...البلد حلوه بس البيئه صحراويه شويه مازي بلدها ...
دخلو البيت حبوبتهم كانت قاعده في السرير والناس بتسلم عليها ..لما جا دور تالين بقت تقول ليها.....يوسف دا قطعه من روحي والدنيا ظلمتو ابقى عليو عشرة .....طوالي راويه غيرت الموضوع ....خلت تالين في حيره وفي راسها كميه من الاستفهامات ...
تمو يومهم داك ضبايح و ونسات ...الاطفال كانو مبسوطين وبلعبو ....وحبوبه وناسه وبتاعه قصص وحكاوي قعدت تونس فيهم لحد مارجعو ....

لنا لقاء أخر.....