ضمادة للروح

٣

في صباح اليوم الاول في القريه ، تالين كانت نايمه في غرفه براها ..صحت مشت على الشباك و عاينت برا كان في مطره خفيفه صابه... وريحه الدعاش ترد الروح ... كان الجو خراافي جدا .... فجاة الباب دق ودخلت بت صغيره حلاتها عمرها12 سنه قالت ليها حمدلله على السلامه...امبارح انتظرتكم لكن شكلي نمت قبل ماتجو ...... ايوا اتاخرنا في الطريق ...... اسمك تالين صح ..... هزت راسها وابتسمت .... ايوا وانتي .....انا منار بت رجاء .. قالوا لي اصحيك عشان تشربي الشاي مع جدو شهاب وحبوبه سعاد ......تمام بس عايزه اغسل وشي واستحمى وريني المكان ......حاضر ..على فكره انتي حلوه شديد اول مرة اشوف واحده عيونها وشعرها لونهم كده .....تالين ابتسمت وقالت ليها انتي الحلوة ...سكره بس ...وباستها في خدها .
بعد ما غيرت ملابسها مشت الحوش لقت ابوها وعمتها قاعدين في سراير تحت شجرة بشربو في الشاي وبتونسو.......
تالين: good morning dad اقصد صباح الخير
شهاب : ههههههه صباح النور ...... رايك شنو في الجو والقعده دي
تالين : wow حاجه مبالغه dad ..... زي جو لندن في الربيع بس نسمه الهوا مختلفه
شهاب: دي ريحه تراب الوطن يابتي
تالين : عمتو كيفك
سعاد: من شفت الغالي بقيت تمام ورجعت عشرين سنه ..... زمان انا وابوك مابنفترق ابدا لكن الدنيا بعدتنا
شهاب: الله لا يجيب فراق
وهم قاعدين جا محجوب وقعد في سرير مقاصد تالين .....اوووو الخواجات كيفنكم ...رد شهاب الدين الحمدلله نعمه ورضى ....عاين لتالين ....اكيد حياتنا البدائيه دي ماعجبتك ...
تالين: ليه ماتعجبني ...بالعكس انا مبسوطه خالص ودي في النهايه بلدي ولا شنو dad
شهاب: اكيد طبعا
محجوب كان بعاين ليها بطريقه غريبه و بتبسم إبتسامات خبيثه .... قال ليها اديني شاي ياحلوه ...قامت وكبت الشاي وقالت ليو كم ملعقه سكر .....سكر اكتر من كده يودوني الحوادث انا ...وكان بتبسم وبرفع حواجبينو ....استغربت كلامو جابت ليو الكبايه في الطربيزه الجنبو ....قال ليها ناوليني صحن البسكويت معاك جات تختو في الطربيزه رفع يدو نظام يمسكو منها ومسك يدها مسافه ...زحت يدها بسرعه وبقت مرتبكه وهو لسا بعاين ليها ... قعدت مكانها وبرضو ماشال عينو منها.
الحصل دا كلو ابوها وعمتها ما انتبهو ليو كانو مندمجين في الونسه مع بعض ....بس طوالي قامت وقالت ليهم عن اذنكم داخله جوا ....كانت بترجف وماشه بسرعه لما جات داخله على البيت خبطت ناديه .....بسم الله ..مابتشوفي ......sorry ....شنو؟ ..... اسفه ما انتبهت ...... تنتبهي كيف عاد مازي ابوك ماشايف في الدنيا دي غير نفسو .......what?!!!.....امشي ساي عليك الله ماترطني لي ......ok طيب ......
دخلت غرفتها وفي راسها مليون سؤال محجوب ليه بتصرف كده وناديه دي لي بتعاملها كده........... شويه كده وجات منار داخله
منار : ممكن اقعد معاك
تالين: اكيد
و قعدو يتونسو ويتعرفو على بعض....
تالين : عايزه اشوف البلد ممكن نطلع
منار : اي نطلع هسع قبل الفطور بس ماتمرقي بالبنطلون البسي ليك توب
تالين : طبعا ما حطلع كده
لبست عبايه واستأذنت ابوها وطلعو ..وهم طالعين تالين وقفت مستغربه
تالين : منار what are those اقصد ديل شنو ؟!!
منار : ديل ازيار اول مره تشوفيهن وقعدت تضحك عليها
تالين عاينت جوا ولسا علامات الدهشه مرسومه في وشها ..!!!!.its water
منار: يابت دي التلاجه المحليه ... دقيقه نضوقك ليها .......شالت الكوز و دخلتو وناولتو ليها ...... شربت ولسا مستغربه ننطت عيونها تاني .....its cold ........ منار ميته من الضحك وقالت ليها شكلي حبرمج بيك مع الزهج الحاصل دا اصلي براي في البيت الباقين ياكبار زي ناس حبوبه وامي ياصغار زي اخواني و اولاد خالي
تالين : ليه ماعندك صحبات
منار : عندي لكن المدرسه قافله مابنشوف بعض كتير
وطلعو يتمشو .....المكان غالب عليه اللون الاخضر والبيوت بسيطه ومن طين ... الاطفال بلعبو في الشارع .. وفي نسوان مبلمات بتيابهم ماشين ويعاينو ليها بإستغراب ...... كان في شباب قاعدين في الشارع ... قعدو يكوركو يابت محمد جادين سمعنا عمكم الخواجي جا... اها الغزال المعاك دي صاحبتو ولا بتو ....واحد قال ليو هسي بالله دي بت والعندنا بنات ...رد عليو واحد تاني دي ملاك منزل دي بت ياماعندك نظر ......... تالين اتضايقت منهم وقالت لمنار يلا نرجع ....رجعو طوالي لقو البيت مليان ضيوف ..... كل مره يجو ناس يسلمو ويعرفوها بنفسهم ... واستمر الوضع دا لحد بالليل ....لما خلاص البيت فضى ، دخلت غرفتها ترتاح ، جا ابوها ...
شهاب: اها شنو انطباعك الاول عن البلد
تالين: البلد حلوه واهلها طيبين بس كميه الناس السلمت عليهم اليوم اكتر من كميه الناس القابلتهم طول حياتي ....وقعدت تضحك
شهاب : عشان تشوفي اهلك كيف... يسدو عين الشمس
تالين: dad هو عمو محجوب ليه كده
شهاب: كده كيف
تالين : i dont know what exactly
شهاب: فهمتك ...قصدك كلامو ...هو كده من يومو ماتشغلي بالك ...ويلا تصبحي على خير
تالين: good night
نامت وهي لسا محتاره ماعارفه توصل لابوها الحصل ..و بتقنع في نفسها انها مجرد اوهام ........مرت الايام ولسا الناس داخله طالعه عليهم وابوها مافاضي اليوم كلو في الديوان مع الضيوف .....كانت بتقضي وقتها مع منار ياقعدو اتونسو في الغرفه يا طلعو يتمشو في البلد..طبعا الاتنين من عالم مختلف فكل واحده عايزه تعرف عن حياة التانيه .
اما ناديه كانت طوالي زهجانه وصاره وشها ، ولسا محجوب في حركاتو ونظراتو الماطبيعيه ...لكن تالين كانت بتحاول تتجنبو قدر الامكان .
و في يوم ناديه كانت في المطبخ مع الهام ورجاء ......جا محجوب داخل وطقش ليو كبايه كسرها .... ناديه قعدت تكورك وتجوط فيو .... اعمى ..مابتشوف ..الجابك هنا شنو اصلا....واحنا خلاص تعبنا من الخدمه والضبايح كل يوم..... متين يسافرو عشان نرتاح ..... رجاء قالت ليها امي ادخلي جوا ارتاحي شكلك تعبتي من الشغل احنا بنكمل الطبيخ .....محجوب قال ليها ...امك تعبانه من قلبها مامن الشغل ..........ناديه زي الصبت فيها مطره مشت طوالي غرفتها وقفلت الباب ........ وفي الليل جا محجوب لقاها صاحيه وعيونها حمر شكلها زي الباكيه ..... بس استلمت ليك محجوب .....ياراجل يامابتخجل دا كلام تقولو قدام بناتك شنو قلبها ماقلبها قايلني بت سبعتاشر سنه
محجوب: هسي عيني في عينك كده قلبك ماحنا لدكتور القلوب
ناديه : انا مرتك يامجنون
محجوب : مرتي اي... لكن طول عمرك قليبك في حته تانيه
ناديه: يعني انت المكسر فيني ....عاين الحكايه دي فات عليها سنين ...مافي داعي تفتح القديم
محجوب: القديم جا وفتح نفسو براو و فضحك .....طول عمرك بعيده مني ومحتقراني قايلاني ماعارف السبب
ناديه: ياراجل اختشي انا حبوبه وانت جد........عارف انا مشكلتي معاك شنو ...انت فاضحني في البلد ومخليني ونسه للنسوان طوالي سكران.. ومابتتعولق الا في الشارع والعجب كان في عرس والنسوان قامو يلعبن المردوم تشاغل فيهن زي الاولاد الصغار مامحترم سنك ولا مركزك ...كل يوم والتاني معرس ليك واحده شكل وياريت كان بتعمر معاهن شهر شهرين تطلقها وترجع لي .....تقابض في البنات البشتغلو في الحواشات لما في واحده يومتا ادتك كف قايل الكلام مابصلني ...كلو فايت اضاني وساكته ..............سكت مسافه وقال ليها ما انتي عارفه ..انا عرستك جبر خواطر ....... عشان كده قفل خشمك واطلع....بدور انوم .

( ثمه جراح لا نستطيع أن نشفى يوما منها ........... ثمه جراح يؤلمك أن تثرثر عنها بقدر مايؤلمك أن تزعم نسيانها .............. ثمه جراح تخط النصال خطها البياني على قلبك ...... يفنى القلب ويبقى أثر الجرح كوشم من جمر لا ينطفيء) غادة السمان

لنا لقاء أخر.....