ضمادة للروح

٢٠

اعتقد انك مديونه لي بعصير......... نعم .............طيب خلاص انا عازمك........ عن اذنك .......لينا يوم ياعسل ......
مشت خلتو وهي متضايقه .....لقت الاء وتسنيم جايين عليها
الاء: خير مالك صاره وشك
تالين: الولد الدمو تقيل داك
تسنيم : مصعب الزفت .... عمل ليك شنو
تالين: لا بس ماحبيت كلامو
الاء اعملي حسابك منو ..

انتهى السميستر الاول على خير..... استاذ هشام كان بحاول يتكلم معاها بأي طريقه وكانت طوالي بتصدو ....نهله متابعه الحاصل وبقت في مشاكل شبه يوميه مع هشام حتى مرات صوتهم بتسمع برا المكتب ....تالين نجحت ودرجاتها كانت عاليه .... الاء وتسنيم برضو نجحو بتفوق .....مصعب مواصل في مضايقاتو بس مافي زول معبرو .اما ريم باقي ليها شهور بسيطه وتتخرج بقت مافاضيه خالص وزياده عليها كمان بتجهز للعرس ....
و نزلو السميستر التاني بعد اجازه بسيطه ......
وفي يوم كانت في غرفتها بتدرس تلفونها ضرب وكان رقم غريب
الو ...... مرحب .......مين معاي ............ماعرفتي صوتي يعني .........لو ماقلت اسمك حقفل الخط ....... معاك هشام ........استاذ!! .......جاده شديد في التلفون طلعتي ......ممكن اعرف لقيت رقمي كيف .....البسال مابتوه ......طيب عايز شنو .....احترمت رغبتك انك ماعايزه تتكلمي معاي في الجامعه قدام الطلبه ضربت ليك عشان محتاج اتكلم معاك ........استاذ لسا مافاهمه عايز شنو........عايز تحسي بي
......عفوا .......انتي ليه بتعامليني كده ......سبق وخبرتك اني متزوجه ........عقد بس صح يعني ممكن تفركشي .........ارجوك استاذ ماتتصل تاني وانا حعمل ليك بلوك حالا وشكرا ......

سمعت صوت يوسف بناديها طلعت ليو
يوسف: اقعدي عايزك في موضوع
تالين : اتفضل
يوسف: عندي صاحبي فنان تشكيلي مشهور وبعمل معارض للهواه والمبتدئين بصوره دوريه وانا رشحتك تشاركي معاه
تالين : انا !!!!
يوسف : وليه لا ....شفت رسوماتك قبل كده وعجبتي شديد
تالين: بس الدراسه
يوسف : عادي بتقدري توفقي
تالين : عمري مافكرت اعرض رسوماتي انا ماخده الموضوع تسليه ما اكتر
يوسف: لانك مستهينه بقدراتك
تالين: بس.....
يوسف : ماعندك اي عذر ...وفي الاخير انتي ماخسرانه شي
تالين: طيب موافقه
يوسف: ممتاز....بكره لما ارجعك من الجامعه نمشي نقابل شادي ...وجيبي معاك نماذج من شغلك
تالين : والله ماعارفه اشكرك على شنو البتعملو معاي كتير
يوسف: لو عايزه تزعليني قولي الكلام دا تاني ....... وعلى فكرة انا المفروض اشكرك .. المعرض دا برعايه مجموعتنا اذا نجح وكميه الزوار كانت كبيره احنا بنستفيد دعايه مجانيه .
تالين : اذا الحاجه دي بتخدم شغلك يشرفني اساعدك
يوسف : طلب اخير ....خففي من الرسومات الكئيبه ولوني لوحاتك حبه واذا ماعندك الوان بشتري ليك
تالين : لوحاتي already اتلونت بألوانك ....من لما ظهرت في حياتي .... ابتسمت ومشت خلتو مشتت الافكار .

في اليوم التاني في الجامعه ...كانت قاعده تتونس مع تسنيم ...جات الاء وشكلها مبسوطه.....
الاء : باركو لي ........اخيرا ابو الهول نطق
تسنيم : ماتقولي مازن
الاء: اي السجم ..... خلاص قال لي بحبك
تالين : بالجد ......وااااو .....مبروك
تسنيم : اها والعرس
الاء: عرس شنو كمان خلينا نتعمق في المشاعر بالاول
تالين: ايوا صح... لما تحسو نفسكم انتو الاتنين وصلتو اقصى درجات الحب بعدين يجي موضوع الزواج
تسنيم : درجات دي عند الخواجات ....هنا الناس بتعرس طوالي وبعد الولادة حتى يفكرو في الحب ..الزمن دا الرجال كملو ياختي ولا انتي عشان عندك راجل
الاء: اسكتي ...فصلتيني ياخ ...... احكي لي تالين كلامك دا كلام زول غرقان في العسل ..وكمل درجات الحب كلها و وصل القمه ....بعدين يوسف شكلو رومانسي احكي لي بقول ليك شنو....خليني اتعلم
ابتسمت ....ونزلت راسها ........الاء جاتها رساله من مازن ...كلام يذوب الصخر قعدت تقرا وتتضاحك براها ......تسنيم خطفت منها التلفون وبقت تقرا الرساله وتحاكي صوت الاء وتضحك ......وديك بتصارعها دايره تشيل التلفون ......وتالين بتضحك فيهم ...واثناء ماهم بضحكو .....جا مصعب وقف جنبهم وبقى يضحك ويقلد حركاتهم يعني اقحم نفسو في الجو بدون استاذان ......
تسنيم: انت واحد سخيف وما محترم
مصعب: لما اكون جاي عشانك اتكلمي
الاء: يلا نمشي يابنات الجو اتلوث
جا وقف قدام تالين وقال ليها ........ التقل صنعه ...وتعالي اعلمك اصل الصنعه ...
ابتسم ومشى خلاهم فايرات
الاء: شفت اولاد حقيرين ....زي المخلوق دا ماشفت
تسنيم : لازم يتوقف عند حدو
تالين تلفونها ضرب .......الو ......خلصتي ......ايوا ......يلا اطلعي انا برا
طلعت وركبت العربيه .....
يوسف : شادي منتظرنا في المرسم بتاعو
تالين: ضروري نمشي اليوم
يوسف : طبعا ...مش عارفه كده من امبارح
تالين: اوك
يوسف : مالك ماعلى بعضك
تالين : لا بس تعب الجامعه
يوسف: ما تخافي ماحنتأخر ...ونجيب معانا حاجه ناكلها ....ظابط
تالين : اوك

وصلو المرسم وكان شادي في استقبالهم ......
شادي : اوووو باش مهندس
يوسف : اعرفك فريدا حقتنا
شادي : اهلين مدام .... نورتينا
تالين : مرحبا
شادي : جايبه معاك اسكتشات ....صح
تالين : ايوا اتفضل
شادي : بصراحه يوسف مدح لي رسوماتك كتير..... بس ابدا ما اتوقعتهم بالروعه دي
تالين : شكرا
شادي : دارسه فنون جميله صح
تالين : ابدا
شادي : على حد علمي كنتي في بريطانيا ..... معقول مادعمتي موهبتك بالدراسه
تالين : كنت مركزه على الجانب الاكاديمي ....بعدين لحد امبارح بس بعتبر الموضوع دا للتسليه بس
شادي : ياستي احنا اعتمدناك معانا .....والمعرض بعد شهر ....شدي حيلك

وبدات تجهز لوحاتها للمعرض ويومها مقسم بين الجامعه والرسم ....
بس في يوم كانت في غرفتها بترسم ....سمعت صوت يوسف دخل البيت ...استغربت انو رجع بدري ....بعد شويه سمعت صوتو بكورك تاني سمعت صوت قزاز اتكسر .....ماقدرت تمسك نفسها اكتر ومشت دقت باب غرفتو .....فتح ..ويدو كانت مجروحه والدم سايل ..
تالين : دا شنو !!
يوسف: تالين امشي بالله عليك وخليني في حالي
تالين : ما بخليك...تعال اعقم ليك الجرح
يوسف : قلت ليك امشي
تالين: تطلع برا ولا ادخل غرفتك اعقم جرحك و مابهمني تعمل فيني شنو
يوسف: اللهم طولك يارووووح ....خلاص جاي
مشت جابت معقم وشاش نضفت الجرح وربطتو ......رفعت راسها وعاينت ليو .... أيا كانت مشكلتك ما بتتحل لو عصبت وكسرت الحاجات ...في النهايه ما حتتعب الا نفسك ... ماشه اعمل ليك عصير ليمون تروق أعصابك ....... مسك يدها وهي قايمه قال ليها .......خليك ........... رفع راسو وسندو على الكرسي وأخد تنهيده طوووويله .....وقال ليها متضايق شويه..
تالين : من عرفتك وانت متضايق طول الوقت....... اتلفت وبقى يعاين فيها
قالت ليو ... انت واقف عند نقطه معينه ...وماعايز تمشي بحياتك لقدام
يوسف : انا اكتفيت بالفات
تالين : وليه ماتبدى حياه جديده
يوسف : خليني كده مشتري دماغي ومرتاح
تالين : لا ما مرتاح ... وبدليل حاله الغضب الملازماك طوالي... انت لو مرتاح كنت اتخطيت المرحله دي وقابلت اي موقف مشابهه بطريقه مختلفه و إيجابيه ...الانت فيو حاليا هي المشاعر المكبوته الماعايز تطلعها من جواك عشان ترتاح ........ببساطه ....let it go ....
يوسف : اممممم وتاني ..
تالين : حياتك فارغه ....انت محتاج شخص يملاء حياتك
يوسف : اطمني قابلت كتيرات ...و زادو الطين بله.... لحد ماوصلت لقناعه ان كلهم بتشابهو ....مع احترامي ليك طبعا...
تالين : اشكرك ........ اولا فكرة التعميم فكرة خاطئه ...اكيد في استثناءات ....تانيا مشكلتك انك لسا ما لقيت الانسان الصح .... كن على ثقه ان الانسان الصح بجي بدون ماتفتش عنو ...بجيك لما تحس ان الدنيا ظلمت وضاقت بيك ...بطلعك من حزنك من غير ماتشعر ...بنسيك الماضي و أوجاعو وبزرع الفرحه في قلبك من جديد ...بجي زي البرق سريع ...ساطع... وخاطف ....بخطف قلبك💥 just like that ....

لما انتبهت لقتو بعاين ليها بطريقه غريبه .....اول مره يعاين ليها كده .......ارتبكت واتلخبطت ....وبقت تلخبط في الكلام ......قالت ليو أمشي اجيب ليك العصير...... ومشت المطبخ و هو لسا بعاين فيها ..... .........

قال في نفسو ...خلاص وصل الانسان الصح .......وقلبي صابو البرق .....

( ونسيت دائي حين جاء دوائي .........من ذا يقاوم نظرة السمراء ........ صادت فؤادي والفؤاد ضعيف ..........الآه أصل الآه من حواء.......)

لنا لقاء أخر.....