ضمادة للروح

٢٤

مرااااام.......
يوسف: شفت ناس وقحين لكن زي وقاحتك ماشفت
مرام : ماخليتك قلبك قاسي كده
يوسف : البركه فيك
مرام : عارفه اني غلطت في حقك كتير ....بس اسمعني
يوسف : دا مكان شغل
مرام : نتقابل برا طيب
يوسف : ياخ ما عايز معاك كلام ...احمدي ربك اني قاعد اتكلم معاك ساي يعني لو ضربتك ولا قتلتك حتى مافي زول بلومني
مرام :حرام عليك والله ........لا بترد على ورسايلي وطوالي تحظرني بحاول اتواصل معاك لي مده
يوسف : افتكر يومتا في الحفله قلت ليك ماعايز معاك كلام جايه الشركه ليه
مرام : عايزه فرصه تانيه .....ارجوك انا بحبك والله ......وقعدت تبكي.
يوسف : والمفروض دموع التماسيح دي تأثر فيني
مرام : انا كنت صغيره و جاهله وماعارفه مصلحتي وين ...بعدين كنت على علاقه معاو قبل ما اعرفك وهو استغلني والشيطان شاطر
يوسف : ولما تشرحي لي هسي حستفيد شنو
مرام : اتعذبت من بعدك كتير منير اخوي عاملني معامله قاسيه و زوجني راجل اكبر من ابوي بقيت ليو ممرضه ...وهسي مات ....ماعندي غيرك يوسف ارجع لي واعيش خدامتك طول العمر
قعد يضحك بسخريه .....بالله...ما انا الاهبل الخدعتيه زمان وعايزه تخدعي تاني .... خلي عندك كرامه بعد دا و ما تهيني نفسك اكتر من كده لانك بقيتي واحده مثيره للاشمئزاز أكتر من زمان .................وعلى فكرة انا واحد متزوج يعني ماينفع تضربي لي ......أنا ما خاين زيك .........ويلا المقابله أنتهت ..................يارجاء ...وصلي المدام دي للباب وخلي ناس السكيورتي يحفظو شكلها عشان مايغلطو تاني ويدخلوها.

في الجامعه كانت تالين مع صحباتها في القاعه بشرحو لبعض.......
جات نهله وقفت قدامها وبتأشر بصباعها بحركه أستفزازيه ....اذا كان عاجبك منظر الرجال المتلمين حوليك وكل يوم عامله مشكله في الجامعه ...دا شي بخصك ...بس تتعدي على خصوصياتي مابرحمك
تسنيم : أتكلمي زي الناس أحنا مافي شارع
تالين : مافهمت قصدك عايزه شنو
نهله : ابعدي عن هشام
تالين : كلامك دا وجهيه ليو لأنو هو البضايقني
نهله : عرفت مخططكم وما حتتهنو و تنفذوه
تالين : برضو ماعارفاك بتتكلمي عن شنو وأكررها ليك تاني كلامك معاو ما معاي ....... يلا يابنات نكمل الشرح ...وصلنا وين.................... اتغاظت وطلعت

لما جات نهايه اليوم يوسف ضرب ليها قال ليها اطلعي انا قربت عليك وهي ماشه في بت وقفتها .....يأخت ممكن تلفونك دقيقه اعمل رساله لأخوي اتاخر تلفوني قفل .....ادتها التلفون رسلت منو ورجعتو ليها........... الاء وتسنيم من بعيد شايفين البت معاها ... الاء قالت لتسنيم ...البت المع تالين دي مش مروه الساكنه مع نهله في الداخليه ....
تسنيم : اي والله هي زاتها .....عايزه منها شنو
الاء : مامطمنه للموضوع دا البنات ديل خبيثات .
تسنيم : دقيقه اضرب لتالين اعرف الحصل
الاء : لا نضرب ليها بعدين هسي بتكون في العربيه جنب يوسف مانقوم نعمل ليها مشكله

في الطريق تالين قالت ليه ماشه المرسم لان المعرض قرب وعندها شغل كتير ماخلصتو قال ليها خلاص نمشي نتغدا بالاول بعدين اوصلك ........وهم في المطعم بتغدو تلفون يوسف بضرب وهو يكنسل ....ضرب كم مره لما زهج وقفل تلفونو .....
خلصو اكل و وصلها المرسم ...... قال ليها ممكن اجيك متأخر عندي شغل مهم..... نزلت ......لقت واحده شغاله معاهم .....سلمت عليها ...
_شكلك حتشتغلى لوحدك الليله انا راجعه البيت عندنا مناسبه
_ استاذ شادي مافي
_ضرب قبيل وقال ما جاي ......يلا سلام