ضمادة للروح

٦

كانت قاعده في غرفتها فاتحه صور ابوها في الايباد تعاين ليهم وتبكي بحرقه ....جاتها سعاد متسنده بعكازها وبتمشي براحه ظهرها محني وظاهر عليها التعب ..... قعدت في السرير جنبها وقالت ليها..... يابتي كده ماصح ....انتي مامسلمه ......انا وانتي وجعنا واحد ...لازم نصبر بعض...انا فقدت امي وابوي وراجلي وربنا ماقسم لي اولاد ..عشت براي عمري كلو..ولما اخوي رجع قلت يونسني قبل ما اموت مشى هو وخلاني براي تاني ...قامت تالين ختت راسها في رجلين عمتها وقعدت تبكي ....سعاد بقت تمسح ليها في راسها وترفع ليها شعرها من وشها .........قومي اتوضي صلي واقري شويه قران ... البكى مابنفع وعدم الاكل مابرجع ميت ..... حأكلمهم يجهزو لينا صينيه ونقعد ناكل سوا .....يلا قومي غسلي وشك دا ......سمعت كلام عمتها أكلت معاها .....صلت وقعدت تقرا قران....
مر شهر على وفاة دكتور شهاب الدين......... كانت تالين في غرفتها بتبكي فجأه اتذكرت كلام ابوها استغفرت وقامت اتوضت وصلت ....قعدت في المصلايه مسافه تاني اتنفضت وطلعت بسرعه حتى اسدال الصلاة ماطلعتو .....مشت لمحجوب كان قاعد في الحوش ...
تالين: عمو عايزاك في موضوع ضروري
محجوب : مالك في شنو
تالين: خلاص عايزه ارجع لندن الجامعه بدت ليها شهر
محجوب: ترجعي كيف انتي جنيتي ....زمان ابوك معاك ....هسي تمشي براك كيف
تالين: انا بدرس هناك لكن
محجوب :كلمتي واحده مافي سفر
تالين : والجامعه ؟؟؟
جات سعاد ماشه محجوب ناداها ...تعالي ياحجه احضرينا
سعاد: خير مالكم
محجوب : البت دي قالت راجعه بلدهم تاني
تالين : اهو انت قلت بلدهم ....يعني ما ماشه في غربه انا هنا في غربه
سعاد: لالا يابتي وانا البقول عليك عاقله و رزينه ......كيفن ترجعي تقعدي براك ....بناتنا مابطلعن من ديارهن الا لبيوتهن ولا للقبر .....
محجوب : تمشي تعقدي مع منو ...و وين اصلا ...... ومنو الحيصرف عليك ...انتي قايله الشغلانيه لعبه
تالين : انا ماشه بريطانيا ...مش دوله عاديه ....اوووف ماحتفهمو علي ....خلوني امشي وبتصرف ...وتانيا ماشايفه جوازي
محجوب صر وشو و فع صوتو عليها .....جواز شنو يابت ماتخلي دمي يفور.....اسكتي وادخلي جوا

رجعت غرفتها زعلانه وبتبكي للصباح ....وفي اليوم التاني نادت منار وطلبت منها تلفون .......المسكينه تلفونها مافيو شريحه ولا عندها جنيه واحد حتى .....منار شالت تلفون امها وجاتها .....قفلت الباب بالمفتاح وشالت التلفون ضربت لصاحب ابوها د/ صديق تجاني ...تلفونو طلع مغلق حاولت كم مره قالت ممكن من الشبكه برضو التلفون بديها مغلق .....حاولت تضرب للسفارة البريطانيه في الخرطوم ...الرقم العندها ..غير صحيح ......الدنيا ضلمت في وشها وقعدت تبكي ....
وعدت ايام وهي بتحاول تقنع عمتها ومحجوب بس هم لسا رافضين موضوع السفر .....لما فقدت الامل وحست ان نهايتا حتكون في القريه الصغيره دي .....
لكن في يوم جا محجوب داخل غرفتها لقاها بتصلي قعد في الكرسي لحد ماخلصت .....قال ليها داير اتكلم معاك
تالين: نعم .... اتفضل
محجوب : مش انتي عايزه تسافري
ابتسمت وقالت لنفسها الفرج جا .......yes sure اقصد اكيد
محجوب : يلا احنا ماعندنا بت تسافر براها لكن كان عرستي تقدري تمشي عادي
اتخلعت ونططت عيونها .......what شنو
محجوب : ماسمعتي يعني ......اعقد عليك ولما تبقي مرتي مافي زول يفتح خشمو ...بسفرك طوالي
قامت على حيلها .....عمو لوسمحت اطلع برا من غرفتي ....لاحظ انا بقول ليك عمو تقول لي اتزوجك .......قاطعها .... يابت عقد شكلي بس قدام عمتك والناس عشان مايقولو اولاد الحاج رسلو بتهم براها بلاد برا
تالين: ارجوك عمو اطلع خليني في حالي ..... وقعدت تبكي

كان طالع لقى ناديه جنب الباب وسمعت الكلام كلو ..قالت ليو تعال غرفتي عايزاك دخلو غرفتهم وقفلت الباب ....
ناديه: اسمعني كويس ... استحملت منك كتير .....وانا شايفه البتعمل فيو من اول يوم البت دي جات هنا .....بتدور تعرس عرس...لكن و رب الكعبه تعرس البت دي بالذات راس مالك صبغه في جبنه ساعه وتتمدد فطيس واجدعك في الخلا دفن زي المسلمين مابدفنك .
نطط عيونو بلع ريقو وبقى يتمتم ........يييييعني اااخليها تسافر براها....ماشايفه سعاد هايجه كيف
ناديه: وأحنا مالنا ....وسعاد عرفت متين كمان .....البت كانت عايشه هناك وديك بلدها تقعد في انفاسنا ليه
طلع زهجان وقال ليها خلاص ماتصدعينا....

ناديه مشت لتالين لقتها بتبكي دخلت وقفلت الباب ...
ناديه : انتي مش دايره تسافري
رفعت راسها ..وقالت ليها اكيد
ناديه: خلاص بطلي نواح واسمعي ....انا بكلم ليك محجوب وسعاد وبقفل الموضوع دا في ايام ...بشرط تجي تحكي لي اي حاجه يقولها ليك محجوب ........فرحت وقالت ليها حاضر ...بس الجواز ماعندي .......انا بتصرف ......وطلعت خلتها .
بعد يومين جاتها منار قالت ليها جدو عايزك في الديوان ......لبست عبايه وطلعت ليو ..قال ليها اقعدي
محجوب: اها فكرتي في كلامي
تالين : اي كلام
محجوب: يابت انتي بتلعبي بي ...العرس طبعا
تالين: عمو بليييز انسى الموضوع دا
محجوب: براحتك .....تاني مااسمعك تقولي دايره تسافري ....وطلع برا
رجعت غرفتها لقت ناديه منتظراها ومربعه يدينها .....قال ليك شنو؟
تالين : فتح موضوع الزواج تاني
ناديه قامت وقالت الليله الا تطير......

في اليوم التاني تالين طلبت من منار تلفون امها واتصلت على د/صديق وبرضو تلفونو مغلق ...........
ناديه عملت قهوة ظابطه وبخور وشالت الصينيه مشت الديوان لمحجوب.
ناديه: تعال انفعك بدل ما حاير بيك الدليل
محجوب : عندك شنو قولي
ناديه: عارفاك عينك من العيون الخدر والشعر الاشقر .....لكن النسوان كلهن واحد .....داير العرس ابشر بكره ادخلك على بت خمستاشر سنه
محجوب : والفرق شنو ماكلو عرس
ناديه : بتعرف الفرق ...بت الخواجيه العرسها شهاب الدين لا يامحجوب كلمتك بقتلك
محجوب: انتي لسا بتهددي
ناديه : خليني اتم كلامي ....البت دي بترث في ابوها صح
محجوب: اي
ناديه اكتبها ليك ورثتها كلها ..واديك نص العندي الارض والمعصره ..واعرس ليك قلت شنو
تكا راسو في السرير و مسك دقنو مسافه وسرح ...طبعا ناديه عاجنه وخابزه .. عارفه نقطه ضعفو القروش والنسوان ...وهو اصلا ضيع نصيبو في السكر ومع النسوان ، ونصيب تالين كبير لان ارض جدها اكبر ارض ...... وهو متأكد ان ناديه لو وعدت بتوفي ......دي تقلع اللقمه من خشم الاسد ........

(يتيم الأم يفقد الحب ......ويتيم الأب يفقد الأمان .......كان الله في عون من فقد الحب والأمان)
لنا لقاء أخر......