ضمادة للروح

٨

اتحرك حاج أحمد و ولدو بالعربيه ....وفي الطريق ...
يوسف : هسي ياحاج متعب نفسك ومسافر ليه...ماكان نرسل للزول دا قروشو وخلاص
حاج أحمد : ماصح مننا الكلام دا ...احنا حجزنا محصول السمسم من بدايه السنه وما اديناه عربون حتى ....اها بعد حاج صالح اتوفى واولادو فضو الشراكه البينا ....نقول ليو مادايرين
يوسف : حنشتري المحصول نعمل بيو شنو.....اصلا من البدايه المشروع دا مادخل راسي ....احنا كل شغلنا في الالات والمعدات الثقيله مالينا علاقه بالزراعه
حاج أحمد : ما انت عارف دي رغبه حاج صالح لانو من المنطقه دي .... وبعدين ابراهيم اتفق مع المصنع خلاص نورد ليهم المحصول ونكون حلينا للراجل مشكلتو وبعد بكرة الشحن
يوسف : مدام الامور واضحه احنا ماشين ليه
حاج أحمد : مش كاتبين عقد 5 سنوات معاو ...نفض القعد وندفع تمن المحصول ونعتذر منو
يوسف : خير ياحاج

محجوب في الهول بكورك بأعلى صوتو.....ناديه ورجاء جو طالعين ...
ناديه : في شنو ياراجل
محجوب : من امبارح مش قلت ليكم عندي ضيوف جايين ....ماجهزتو الديوان والاوضه الجنبو ليه ......الراجل الجاي دا زول مهم
رجاء : ان شالله يا ابوي ساعه ونجهز كل شي
محجوب : بسرعه الناس دي حتصل بالليل ودايرين ياكلو وينومو..
في المسا وصل حاج أحمد و ولدو ....تعبانين من طول الطريق ...ضيفوهم ونامو ......بالصباح محجوب كان ضابح والبيت مليان ناس .....منار جات لتالين غرفتها...
تالين: في شنو الليله البيت مليان كده
منار : جدي عندو ضيوف وضابح ليهم ....لو شفتي العربيه الجو بيها لاندكروزر جديده لنج بإكياسها زي حقه الوالي البجي بيها ....حاجه تخلع
ابتسمت وقالت ليها ......بحسدك ياخ بالك رايق ......وقعدو يضحكو ..

وفي اليوم التاني محجوب ساق الضيوف يشوفو الارض والحواشات ....ويتونس مع حاج أحمد لكن يوسف مشغول طول الوقت بالتلفون كل شويه يضرب للمهندس كمال عشان الشغل المهم السافر وخلاه.
حاج أحمد : بلدكم ترد الروح وجوها جميل
محجوب : الحمدلله هوا طبيعي ...قايلو ملوث زي هواكم .....
وأثناء مايوسف بتكلم بالتلفون جا طفل عمر 5 سنوات ..و وقف جنبو...يعاين ليو ويتبسم ....خلص مكالمتو وقعد يتونس معاه ....الولد ظريف ودمو خفيف يونس فيو و داك يضحك باعلى صوت في النهايه قال ليو انا ماشي ابوي هناك بناديني ....يوسف طلع 200 جنيه واداها ليو ...في البدايه الولد رفض ...قال ليو اعتبرها عيديه امسكها لما يجي العيد طلعها وسلم عليو ومشى ...... محجوب وحاج احمد كانو متابعين الحصل ....
محجوب : اتذكرت اولادك ولا شنو....وقعد يضحك
حاج أحمد : الولد دا مامتزوج ياابو راشد
محجوب : والناقصك شنو ياولدي العمر بفوت وعرس الصغره سمح
حاج أحمد : كلمو احنا ريقنا نشف
يوسف بعاين ليهم ومتضايق من الحوار دا
محجوب : عندنا الولد من يتم العشرين بعقلو ليو بت عمو طوالي .....وبناتنا ماشالله ...راقدات
حاج احمد : يعني عندكم ليو عروس
محجوب : يشاور بس ونعقد طوالي
تلفون يوسف ضرب ...... محمد أول مره افرح بصوتك ........يامان مالك ........ياخ معط زي المعط الله يعدي الاسبوع دا سريع ......بركه المشيت انت انا زول حساس ومابستحمل المعط هههههههه.........