ضمادة للروح

٢٧

دخلت غرفتها ورمت نفسها في السرير وقعدت تبكي للصباح .......
يوسف صحى جهز نفسو للشغل ...عمل قهوة وقعد في الصاله ....منتظرها تطلع عشان يوصلها الجامعه....... بس هي كانت قافله غرفتها عليها وماطلعت ....... انتظرها مسااافه لما الوقت اتأخر......... دق ليها الباب ....بنتأخر بعد دا يلا اطلعي .........ردت عليه من جوا بدون ماتفتح الباب...... ما عايزه امشي .........طلع وخلاها مشى على شغلو

في المسا مشى لهشام في بيتو وأنتظرو جنب العماره لحد ماوصل .....و وقف ليه قدام وشو .........هشام أول ما شافو أتخلع ......
هشام : نعم يا أخ
يوسف : واضح أنك عرفتني
هشام : أبعد من طريقي طالع بيتي
يوسف : تمام كده متفقين كل زول يبعد من طريق التاني
هشام : مافاهمك ...عايز شنو ولا عايز افهم ....زح من طريقي ورفع يدو داير يزحو ...
يوسف مسكو من قميصو لزاهو على الحيطه ولصقو فيها ....بقى ماسكو من قميصو وخانقو ....وهشام بحاول يفك نفسو ويصرخ.....يازول فكني ....حبلغ الشرطه
يوسف : اسكت و اسمع الكلام دا كويس وختو حلقه في اذنك ...تبعد عن طريق تالين للابد لسانك ما يخاطب لسانها....لو شفتها في الشارع تغير أتجاهك ...أحترم مكانتك كأستاذ وألزم حدودك وإلا قسما بالله تشوف مني العمرك ماشتفو أتقي شري احسن ليك انت ماقدري ولا بتعرف ممكن اعمل فيك شنو مستعد اقلب حياتك جحيم واخليك تتمنى الموت و تترجاني ارحمك ومابرحمك وانا مازول كلام... اسال عني وبتعرف براك ....
فكاه و ركب عبيتو ومشى .......خلاه يتمتم من الخوف ....... ببببلغ الشرطه دا تتتهديد....... صلح قميصو وطلع شقتو زعلان وهايج ........اول مافتح الباب شاف نهله قاعده وخالفه رجلها كمان......
هشام : انتي الدخلك شنو.......وعايزه شنو
نهله : قاعده في بيتي
هشام : اقصري الشر وامشي .....ماناقصك
نهله : مابمشي الا اعرف متين حتجي تخطبني
هشام : اخطب مين انتي عويره
نهله : و الفي بطني
هشام : اتصرفي ماشغلتي
نهله : اتصرف كيف انت جنيت
هشام : اديني يومين اشوف ليك دكتور يعمل ليك العمليه ويخلصنا
نهله : مابنفع مشيت للدايه وقالت لي الجنين كبر
هشام : طيب اعمل ليك شنو
نهله : كيف تعمل لي شنو .....اتزوجني
هشام : قلت ليك مابقدر انتي عارفه ظروفي
نهله : خلاص عقد وطلقني ........امي لاحظت لبطني
هشام : عايني لو بقيتي اخر بت في العالم مابعرسك ....ارتحتي
نهله : نعم
هشام : زي ماسمعتي
نهله : انا وثقت فيك وسلمتك نفسي واخدت مني أعز ما أملك
هشام : زي ما استسلمتي لي بتستسلمي لغيري مابشرفني تكوني زوجتي
نهله : انا حبيتك ونفذت الكنت بتطلبو مني بدافع الحب ......انا ما عاهره
هشام : كل العاهرات بدأو طريقهم بدافع الحب برضو
انصدمت من كلامو وما اتوقعتو يبيعها بالساهل كده ونظرتو ليها كده .......بقت تصرخ وتضربو وخربشتو في وشو بأضافرها وتقول ليو .....ياحيوان ......ياجبان ........ياماراجل .........ياواطي.......زحاها منو واداها كف ......جات عليو وضربتوكف .......وبتصرخ بطريقه جنونيه ........تاني لزاها ........جرت عليو وبقت تضربو ........بقى يفك نفسو يزح منها .....تاني تجي عليو وتضربو .......واصواتهم علت شديد وكانت مسموعه عند الجيران لما طلعو من بيتوهم..
جات عليو وخنقتو ...فك نفسو منها ولزاها رماها على الارض وضربها برجلو في بطنها.... قعدت تصرخ ...ااااااه بطني اااااه........عاين ليها مرميه على الارض و تف عليها .....مشى داخل على المطبخ قامت بسرعه وشالت فازا رخام كانت في الطربيزه وضربتو في راسو من ورا بكل قوتها ......وقع على الارض اغمى عليه وكان بنزف ......هي شافت الدم وبقت تكورك بصوت عالي وبطريقه هستيريه هشام ماتموت ....هشام انا بحبك .......هشااااام ......انا قتلتو ......انا قتلتو .........الجيران كسروا الباب و شافو المنظر دا ......ضربو للشرطه طوالي ......