بالكلية تعرفت سوزان على ولد وياها بنفس المرحلة. ..اسمه حيدر. ..طويل وعيونه كبار وبشرته حنطية. ..وعنده لحية. ..حيدر من النوع اللي يلبس ويكشخ. .وخابص روحه...ما جنت ارتاحله ولا هو يرتاحلي. ..بس سوزان جانت تحبه كلش. ..وجانت تسمع كلامه وتأخذ رأيه بكلشي ..بصراحة اني ما جنت أثق بي ولا مرتاحة لهلعلاقة. ..بس سوزان حييل منجرفة بحبها إله لدرجة مخوفتني كلش..
روان: سوزان اني ما مرتاحة لهاي الشغلة أبد. ..ما اشوفج تدخلين محاضرات وما عندج صديقات كاضيتها ويه حيدر لو تتمشون لو كاعدين بالكافتيريا
شلون راح تنجحين. .ليش هيج هاملة دروسج تره محد يفيدج بس سمعتج وشهادتج. .واني حذرتج وانتي بعد بكيفج
سوزان: روونه حبيبتي ليش هالنظرة التشاؤمية لمستقبل اختج حبيبتج. .ليش انتي ما تكيفين من تشوفيني سعيدة ومرتاحة. ..لج روان حيدر معيشني بحلم وردي ما أريد اكعد منه. ..أول مرى بحياتي واحد يحبني لهلدرجة ويخاف عليه. ..لج يغار عليه حتى منج. ..يحبني حييييل. ..واني امووووت عليه
روان: اني خايفة عليج من هالحلم الوردي شلون اذا كعدتي منه. ..شراح تسوين؟. .سوزان اصحي كافي انتي ليش هيج تغيرتي اللي يشوفج بأول يوم كلية ويسمع كلامج عن المستقبل والطموح يكول هاي راح تطلع الأولى على قسمها. .مو عايفة محاضراتج ودتتسكعين ويه هذا التافه
سوزان: ما اسمحلج تكولين هيج على زوجي المستقبلي
يلا نامي دوختيني وخلي يفيدج زوجج المستقبلي.
تغيرت سوزان هواية. .وظلت تطلع حجج حتى تطلع من البيت مرى تريد تروح تجيب محاضرات ومرى تستنسخ. ..والاعذار على قدم وساق. ..وطبعا هذا كله بسبب حيدوري أفندي إلى كلب حياة اختي فوك تحت. ..جانت تتحجج للطلعة حتى تشوفه. ...هاي غير الصبح بالكلية كاضيتها كله وياه. ...اني كلش قلقة على اختي. ..وما اعرف شسوي. ..لو أنتم بمكاني شتسوون؟ ؟ ؟
فد يوم من الأيام جنت كاعده الصبح بالكافتيريا مالت الكلية انتظر وقت المحاضرة حتى اروح للقاعة. .جان تجي نوال صديقتي. .و وجهها مخطوف وتكلي ليش هيج روان...شنو هالكلام اللي داير بالكلية كلها. ..
روان: وكعتي كلبي شكو شصاير
نوال: ديكولون انو دكتور صالح لازم سوزان وحيدر بالقاعة بوضع غير أخلاقي. .
طبعا اني بهاللحظه صار وجهي أحمر وعيوني يردن يطفرن من وجهي. ..وأحس صوتي اختفى. .بلا شعور فقدت اعصابي على نوال. .وظليت اعيط عليها واكولها : نوال ما اسمحلج تكولين هيج على اختي. ..
أختي أشرف من كل واحد هنا. ..حرام عليكم تطلعون إشاعات. ..حسبي الله ونعم الوكيل. ..كلش فقدت واستمريت بالدفاع عن سوزان وإني بداخلي متأكده انو هالكلام صحيح. ..لأن اني نفسي فد مرى شفت سوزان دازة صورة بالموبايل لحيدر وهي لابسة فستان سهرة مخلع. .ميصير غريب يشوفها بي. ..
كمت بعصبية ومن غير ما ادري ودتني رجلية لحد حيدر اللي جان واكف يشتري جكاير من الحانوت. ..
وكتله: حيدر هاي انت شمسوي وشنو صاير وشنو هالفضيحة بالكلية وشنو موضوع دكتور صالح فهمني لا أكلب الدنيا عليك. ..هسه تكلي كلشي. ..طبعا اني جنت كلش عصبية وأحس حتى أيدي ظلت ترجف من الحالة العصبيه اللي اني بيها. ..وهو ولا كأنما يباوعلي بنص عين ويكلي: والله انتي بطرانه هاي شبيج خابصة روحج...انتي شنو دخلج. .طز بالناس. ..ولد شاب وحبيبته يعني شنو تتوقعين مثلا نصلي جماعة. ..ديلا عاد انتي شلونج...
روان: انت شكد حقير وما عندك غيره. .انت لو تحبها صدك جان خفت عليها ومجان خليت واحد يكول حرف مو زين عليها. ..لو تحبها جان اجيت خطبتها. .بس انت واحد ما عندك شرف
حيدر: سدي حلكج لا اسحلج بالكلية سحل. .افتهمتي.
بيومها شكد بجيت وشكد حسيت انو اني ضعيفة وما عندي ظهر. ..المن احجي والمن اكول. ..شلون أتصرف. ..أحس سوزان فلتت خلاص. ..جاي تمشي بدرب الضياع ويه حيدر. ...اللي ما احترمني ولا حتى يحترمها بسبب ظروفنا التعيسة اللي هو على علم بيها أول بأول واللي طبعا سوزان جانت تنقلها اله. ..
ورى هالموقف كعدنا أسبوع ما نتحاجى اني وسوزان وهي طبعا ما هامها لأن حيدوري تارس كل فراغاتها العاطفية. ...وطبعا منال وعمي لاحظو هالاشياء كلها. .لاحظو انو اني وسوزان ما نتحاجه وهاي اول مرى نزعل هيج. ..ما جنت اتوقع انو يجي يوم ويفرقنا ولد اني وأختي ....مدري الومها مدري اكول حقها مدري اسكت مدري احجي. .بس حتى لو ردت احجي اكول لمنو ؟ لو بيبي أم يونس الله يرحمها عايشة جان كلتلها كلشي وارتاحيت. ..أحس هذا الشي صار مثل الطابوكة على صدري. .حمل ثكيل وأريد أتخلص منه...
اجتي منال تدور علية. .لحد ما لكتني بالحديقة اسكي الزرع. ..
منال: روان. ..شبيها اختج مو طبيعيه. ..البارحة مدخلة التلفون وياها للحمام ومدري تسولف ويه منو وظلت ساعة يالله طلعت.
اني صار وجهي اصفر وشفايفي صارن بيض من الارتباك. ..وكلتلها: لا خالة متوهمة شلون تدخل التلفون للحمام غير يلكف رطوبة ويخرب...لا يمكن هاي اني جنت اسولف وين نوال عالمحاضرات وانتي عبالج سوزان.
منال : أي يمكن. ..يجوز اني متوهمة. .بس انتي هم ديري بالج من اختج احسها جوه رأسها شي. .مو خالية البنية.
روان: لا خالة شعدها تره سوزان فقيره وعلى نياتها ولا تخافين كلشي تكلي. ..اطمئني.
باوعتلي منال بنظرة حسستني أنها ما مصدكة ولا حرف من اللي كلته إلها وراحت. ..وظليت لوحدي بالحديقة وجانت الدنيا غروب. .ظليت اناجي رب العالمين واكوله يا ربي....استر على اختي يا رب. .انطيني الصبر والقوة حتى اعرف أتعامل ويه هالمواقف اللي هي أكبر من طاقتي. .هو أني لسة زغيره وأريد واحد يدير باله عليه انوب الله ابتلاني بهالبلية. ...يا ربي رجعلها عقلها وابعد عنها حيدر. .لو يجي يخطبها وينسد الموضوع. .وطبعا اني ادعي والدموع تنزل من عيني بلا ما أحس.
بعد هالشي اللي صار بيني وبين حيدر. ..علاقتي خربت كلش باختي. ..صارت علاقتنا ضعيفة ونادرا ما نحجي سوه. ..لأن اذا حجينا لازم نتعارك. ..فظلينا وحده تتحاشى الثانية. ..
بيوم من الأيام وبشهر رمضان المبارك. ..اتصل حيدر على سوزان ومدري شنو كللها بحيث تخربطت وظلت تبجي. .واسمعها تكله فدوه حيدوري هاي شبيك ما اكدر اطلع عطلة شكللهم. ....وهو ما اعرف شنو يكللها وهي ترجف وتبجي. ..اني بهاللحظه كلتلها بعلو صوتي شبيج شنو صاير ... شمرت التلفون عالجرباية وظلت تبجي وتدك على راسها وتشرمخ بخدودها وإني مظل دين براسي. ...ظليت كوة أجر النفس. ..كلتلها احجي شصاير.
سوزان: حيدر ديهددني ينشر صوري عالفيس اذا ما اطلع اشوفه هسه. ..
روان: معقوله ؟ اكيد انتي متفقة وياه دتسوين بية مقلب
سوزان: والله العظيم مدا اجذب هاي شبيج...يكلي لازم تطلعيلج عذر وتطلعين نتشاوف كتله والله ما اكدر ميقبلون اطلع. .كلي اذا مطلعين راح انشر صورج.
روان: عزا العزاج سوزان شنو من صور يهددج بيهن. ..احجي صخام الصخمج. ..شنو من صور
سوزان: صور اني وياه كلشي بيهن ..من جنا نداوم جنت اضرب المحاضرة واروح اني وياه لشقة صديقه. .وجان يطكلي صور بحجة انو يشتاقلي هواية ويريد كلما يشتاقلي يباوع بيهن. .
روان: وانتي شلون تنطينه ثقة. ..وشلون تأمنين بي لهلدرجه. ..وانتي شلون تنطين نفسج برخيص ..طبعا يسترخصج ويساومج على شرفج لأن انتي خليتي يحس انو انتي رخييييصه. .
سوزان: لا روان مو هيج. ..اني وحيدر واحد يحب اللاخ واني جنت اعتبره زوجي وهو هماتين جان كله يكلي مرتي
روان: قشمر عليج بهالكلمتين. ..ياما نصحتج. .يا كتلج. ..وهسه شنو النتيجة ...ديهددج بصورج يا مرته
سوزان: وهسه شلون روان دبريني شسوي
روان: اني راح اخابره وابهذل احواله
روان : ألو حيدر اني روان أخت سوزان. ..معقولة انت واصل لهلدرجه من النذالة بحيث دتهدد بالبنية اللي حبتك وامنت بيك وانطتك كلشي ؟ معقوله انت هيج مستوى اخلاقك متدني؟
حيدر: انتي هييييي احترمي نفسج. ..هي اختج لو شريفة ما جان تقبل ابوسها ورا الشجرة اللي يم القسم بالكلية. ..هي لو شريفة ما جان تجي ويه شاب غريب لشقة صاحبه وهي تعرف شنو ممكن يصير بيناتهم. ..أكمل ؟
هي لو شريفة ما تدخل للحمام وتفتح كام وياي
روان: احترم نفسك كافي لا تحجي. ..الله ينتقم منك انشاء الله. ..حسبي الله ونعم الوكيل.
وللحديث بقية
يتبع⬇⬇⬇⬇⬇
بقلمي رنا خالد