- ايه النشاط دا صاحيه بدري ؟
- أنا منمتش من امبارح
- من التفكير فيا انا عارف ..
- طبعًا يا حبيبي .
- صوتك ماله ؟!
- من امبارح وحاسه انى مش كويسه
- ايه..فى حاجة حصلت ؟ حد ضايقك؟ هما استفردوا بيكي لما سافرت ولا ايه قوليلي ؟
ابتسمت : لا مفيش حد عملي حاجة متقلقش
- احكيلي في ايه ؟
- بعدين .. أنت وراك شغل بليل لما ترجع نتكلم ؟
- أنا رايح ع الضهر يعني قدامي ٤ ساعات ونص ف انا معاكي يلا قولي .
- ماهو انا مش عارفه فى ايه ، إحساس خنقة جالي معرفش ليه ؟
- واحنا أتفقنا لما تجيلك الحالة دى نعمل ايه ؟
- نلهي نفسنا ب أى حاجة .. عملت ع فكره بس برضه مخنوقة ..
- طيب بقولك ايه قومي البسي ويلا ننزل
- ياريت بجد .. لكن بينك وبينك بحور
- هننزل .. ايه هيمنعنا .. يلا بس
- هتفضل معايا فيديو شات ؟
- ايون .. يلا الوقت بيمر تيك تيك تيك ...
- لا لا لا .. خليني بأكتأبي فى بيتنا وأنت روح أفطر وروح شغلك .
- طيب ايه رأيك مش هفطر غير معاكي .
- أنت بتتكلم بجد .. ودا ازاي ؟
- قومي البسي وعرفيهم أنك نازله معايا date صباحي
- لا بجد .
- ع فكره انا جوزك واسمعي الكلام يلا بقي .
قامت ولبست بسرعة وهو معاها فيديو شات :
- ها لبست ونزلت وبعدين ؟
- عارفه اكيد مطعم الفول والطعميه إللى ع الناصية عندكم ، إللى كنت يوميًا قاعد فيه استناكي واراقبك
- ايوه ايوه برج المراقبه بتاعك .
- روحي اطلبي واحد طعميه من غير سلطة وواحد فول حار وشطه وواحد بطاطس شيبسي
- أنت بتتكلم بجد ؟!
- اسمعي الكلام يلا وانا رايح معاكي
- قلب الكاميرا: المطعم وهطلب زى ما قولتلك يلا
- دا جنان
- يلا بقي انجزي ومتقفليش
- الموبايل هيفصل كده ؟
- معاكي الباور بانك صح ؟
- ايوه
- يبقي احنا فى الأمان .. يلا؟
راحت المطعم وطلبت زى ما قالها وحطت الموبيل قدامها وهو كمان طلب وقاعد والموبايل قدامه :
- السندوتشات وصلت ؟
- ايوه وأنت؟
- وصل يا معلم .. يلا نقول بسم الله
- الناس بتتفرج عليا
- متركزيش مع حد غيري ممكن يلا بسم الله .. هتبدئ ب ايه ؟
- بالطعميه وانت ؟
- أكيد الطعميه ..
خلصوا الفطار وقامت :
- يلا هقفل بقي وانت روح شغلك
- رايحه فين .. مش هنحبس ؟
- إللى هو ازاي ؟
- الكافيه إللى بعدكم بشارعين إللى كنت بنتقابل فيه
- ايوه ماله؟
- روحي هناك واطلبي واحد شاي بنعناع وصايه
- هطلع اشربه فى البيت
- متخربيش الDate بقي يلا ..
- أنا مش مصدقاك .
- سيبيلي نفسك يلا .. انا رايحه اهو
قلب الكاميرا اتجاه كافيه وهي راحت وطلبت الشاي بنعناع وهما الاتنين فى نفس الوقت مع بعض من خلال الفيديو شات وبيتكلموا وبيهزرو ..
خلصت الشاي وقامت :
- ال date خلص كده ولا لسه
- لا لسه ؟
- فى ايه تاني ؟
- عارفه المكتبه إللى فى وسط البلد إللى كنا بنشتري الكتب منها وفيها كافيه .
- ايوه مالها:
- اقفلي واطلبي أوبر ع هناك وأول ما توصلي كلميني.
-ليه اروح ؟
- روحي بس يلا اسمعي الكلام .
ماشي
قفلت وطلبت أوبر واتجهت للمكتبة وقعدت وكلمته:
- وصلتي ؟
- ايوه وقعدت كمان .
- قومي هو انتى جايه تقعدي
- اروح فين ؟
- عند الكتب يلا ووريني
- بجد
- ايوه يلا ..
اتجهت لرف الكتب :
-مش دى الرواية إللى كنتي عاوزاها
- آه صح مكنتش لاقيتها المره اللى فاتت
- حظك حلو .. يلا خوديها واختاري كتاب تاني يلا
- ليه ؟
- لأنك وانتى زى القمر كده هتشتريهم وتقعدي تطلبي واحد مولتن كيك مع كابتشينو وتقري شويا .
- ها ..
- مفيش ها .. اسمعي الكلام يلا والكتب دى هدية منى ليكي عدي جمايل يلا ..
- طيب ما اخدهم البيت أحسن!
- لا مش هينفع .. انتى خارجة من البيت علشان تفصلي والقراءه هنا بتحسنلك المود .. افصلي عن الدنيا وأى حاجة حساها مش حلوة ساعة ممكن ؟
- حاضر ..
- وعلشان تعرفي انى راجل كريم هسيبك ساعتين تروقي ع حالك وهكلمك بس صوريلي لما تقعدي والمولتن كيك كوليلي معاكي.. يلا انجوي
قفل فعلًا وعملت زى ما قالها وقعدت وصورت الكتب والمولتن كيك الكابتشينو وبعتتله الصور ..
مر ساعتين بالظبط واتصل بيها فيديو:
- ها ايه الأخبار. ؟!
- تمام ..
لاحظ ملامحها بقت أحسن :
- يلا ولا عاوزة تقعدي شويا ؟
- لا كفايه كده .. انت فى الشغل ؟
- ايوه
- بس انت برا مش فى الشركة
- ما انا شغلي انهارده برا ... يلا بينا
- ع فين ..؟
- نتغدا بقي .
- وهتغديني فين ؟
- بما اننا فى وسط البلد ايه رايك فى شاورما ؟
- لسه واكلها امبارح
- يبقي مفيش غيره حبيبنا
- الكشري ..
- يلا بينا ..
كان محل الكشري مش بعيد مش مستاهل أكبر ف اتمشت المحل الكوري وكانت بتتكلم معاه فيديو شات وصلت وهو لسه موصلش ومطلبتش غير لما وصل وقعد طلب معاه .. طلبوا الكشري واتغدوا وهما بيتكلموا مع بعض ، خلصوا الاكل :
- ايه رأيك فى الكشري ؟
- عاوزة الصراحة ؟
- ايوه ..
- مفيش زى كشري وهو فى بلده الأصل.. بس ميقولش لا يعني
- لما تيجي بالسلامة ابقي خدلك غطس عند سيد حنفي
- ياااااا ياااااا طعمه لسه فى بوقي من اخر مره من شهرين .
ضحكت : هانت يا حبيبي
- يلا بينا نحبس
- شاي ؟
- القصب ..
- انت عندك قصب
- لا ..بس انتى عندك ف هعتبر نفسي شربت معاكي
- لا انا هطلب ليمون بنعناع وانت كمان ايه رايك ؟
- والقصب ؟
- لما تيجي نشربه مع بعض
- تمام.. يلا بينا
اتجهت لكافيه وقعدت طلبت الليمون بالنعناع وهو كمان ، فتح اللاب توب كان بيخلص شويا شغل وهي فتحت الرواية شويا وهما الاتنين فاتحين فيديو شات ،، خلص الشغل إللى ورا بسرعة :
- أنا نفسي فى ايس كريم يلا بينا ع العبد .
- دا ايه دا .. اندمجتي فى الdate
- محسوب عليا فقولت استغله بقي
- يلا بينا ع الايس كريم ..
طلبت الايس كريم وهو كمان وقعدت فى الشارع بتتكلم معاه وهما بيأكلوا ايس كريم .. خلصت وقفلت معاه وطلبت اوبر ورجعت ع البيت وكلمها لما روح البيت :
- ايه الأخبار؟
- تمام.. تمام
- انبسطتي انهارده فى الdate ؟
- جدًا رغم انه date مجنون بس بجد فرق معايا .
- هو دا المقصود .. الابتسامة دى متختفيش
- اقولك حاجة ؟
- ها ..
- الإحساس إللى كنت حساه اختفي
- كويس جدًا ..
- ربنا يخليك ليا ..
-ويخليكي ليا وعاوز اقولك مفيش حاجة تستاهل انك تزعلي علشانها وطول ماانا موجود مش هسمح لحاجة تضايقك سواء معلوم أسبابها او غير معلومة .
-، بس انا ضربتلك اليوم انهارده
- فداكي، واه بكره هكون شغال يوم كامل بس المهم انى اشوفك بخير ، فكره انك بعيدة عني فى وقت زى دا لوحدك مش سهله عليا وكنت عاوز اكون معاكي فى اللحظة دى ف كنت معاكي ع اد ما اقدر .
- يمكن فعلًا كنت محتجالك رغم انى عارفه انك فى شغل ومضغوط .. يمكن متعودتش لسه ع بعدك وحسيت انى لوحدي .
- انا هنا لوحدي زيك لكن بتونس بيكي بصوتك بصورتك وكلامك ورغيك انتى ونسي فى الغربة، انا بحارب إحساس الغربة بونسك .
- دايما بتكون معايا حتي وانت بعيد ربنا يديمك ليا ، ويخليك ليا ودايما مع بعض وترجعلي بالف سلامة
- ويدملي ابتسامتك إللى مهونه عليا الغربة
- هتعمل ايه هتنام ؟
- نتعشى بقي .. قومي ع المطبخ .
- هتتعشي ايه ؟
- العشاء الشهير بتاعنا سندوتشات الجبنه كوبايه الشاي بالحليب .. واحكيلي عملتي ايه انهارده لغايه ما ننام ؟
- تاني ..
- وتالت هو احنا ورانا حاجة
- يلا بينا ..
" وأختار ونيس أيامك بعناية ، حتي لا تصبح وحيدًا فى مكان من المفترض الا تكون وحيدًا فيه " ❤✨
مشهد من مشاهد بقلمي #يارا_سمير
عن موقف حقيقي
رأيكم ✍❤