- ها لسه تعبانه ؟!
- يعني هكون عجبني الدور، تعبانه يا ناس
- عملتلك اليانسون ..؟!
- مش قادرة تعباااانه ..
-طيب ماانا قولتلك تعالي اوديكي ل مامتك ؟!
- قولتلك لا ..
- طيب اروح اجيبها ..
- لا قولتلك ..
- ليه مش فاهم ؟
- ياسلام وليه مامتي مش مامتك ؟
- مامتي ست كبيره مش هينفع تقعد معاكي هتاخد الدور منك ..
- آه ع اساس مامتي خريجة كجي تو وكده .. أنت عاوز مامتي تتعب ومامتك لا يا سلام ..
- لا طبعا مش قصدي ..
- انسي حوار أمهاتنا دا ..هتشيييييي
- يرحمكم الله ، طيب اكلم أختك تيجي تقعد معاكي وانا هسيبكم ع راحتكم؟
- أختي الل لسه والده تيجي ومعاه بييبي عمره شهرين تقعد معايا وانا مستلمني دور البرد الغبي دا صح ؟!
- ماهو انا مردتش اقولك ع أختي هى فاضيه وهتيجي اكلمها؟!
- انت عاوزني ا/موت م/نتحره ولا ايه؟+ عاوز تخلص مني اوي كده ..؟!
- ليه بس ؟!
- أنا عارف كويس أختك مبتحبنيش وكياده وليها تصرفات كده تفقع المراره وانا مش قدرالها ولو جت هتستسهل م/وتها هتشيييييي
- لا خلاص ..طيب يعني اعمل ايه مش فاهم ؟
- نعم ؟!مش فاهم ايه ؟! هو البرد دا جالي ازاي؟! مش من الدور الل جالك وهتشووو هتشووو فى كل مكان فى الشقه وناسي ان فى حد معاك ..
- قولتلك روحي عند مامتك وسيبيني..
- واحنا اتجوزنا ليه، علشان نرازي فى بعض بس، مش علشان نشيل بعض فى تعبنا، انا شيلتك ولا اتكلمت ولا اشتكيت لغايه ما بقيت كويس .. الدور عليك بقي أثبت أن الل عملته مترماش فى الحوض ..
- طيب قوليلي عاوزة ايه ؟
- ثانية هعطس.. هتشوووووو اه يااني يا تعبانه
- يرحمكم الله يا حبيببتي ..
- شايف لما بعطس بعطس فى ايه ف منديل، مش العطسه فى الهوا الطلق زى ما كنت بتعمل..
- سوري كنت تعبان ومش حاسس
- علشان كده فوتلك بس المره الجايه هحبسك فى اوضه وهقول عليك أنت الل عملت شوربه الخفاش ..
- ازاي تعبانه ولسانك شغال كده ..
- يالهوووووي هتقر عليا وع حبه الكلام الل بتكلمه، أنت مستحيل تكون الل اختارتوا أعيش معاه ، أنت اتبدلت براجل تاني أعترف ها ..
- واضح كده أننا اتجوزنا بالغلط الل نقصدهم اتجوزوا وسابونا احنا نتجوز ..
- وانا اقول زوجي قرة عيني فين ، ايام الخطوبة مكنش بيستحمل عليا الهوا .. لو صداع يفضل يكلمني يطمن أخدت المسكن ولا لا .. اه يا زمن ..
- انتى محسساني انى بعذبك.. انا بقولك عاوزة ايه اعملهولك ..انا اول مره اقعد مع حد مريض فى حياتي .. لما بتعب ماما واخواتي بيهتموا بيا وهنا انتى ..
- ماما واخواتك دول صفحه ونقفلها ..
- عاوزة ايه يا حبيببتي واعملهولك ؟
- عاوزة شوربة خضار هتشووووووو
- عاوزاها ازاي باللحمة ولا الفراخ ؟
- لا بالخضار ..
- حاضر ..
- وبقولك شيل الكوسه مبحبهاش
- تمام ..
- استني والجزر والفاصوليا مبحبهمش ..
- يعني عاوزاهم بطاطس وبسلة بس ؟
- لا بطاطس بس مبحبش الخضار..
- وازاي تكون شوربه خضار كده ..
- يوووووه وهو أنت الل هتاكل ولا انا .. انا بحبها كده ياعم بقي متفردنيش تعبااانه ه ه ه هتشووووووو
- حاضر حاضر ..
-هتلاقي فى الفريزر كيس فى خضار ..
- وليه ما اقطع بطاطس وخلاص ..
- آه صح .. أحبك كده وانت مصحصح معايا يلا متتأخرش ..
بعد نص ساعه :
- كل دا بتعمل شوربه ؟
- ماهو كنت مش لقي شوربه خضار ماجي فطلبت من السوبر ماركت وكلمت ماما تقولي ازاي اعملها ..
- وليه مكلمتش امي انا ؟
- محبتش اقلقها عليكي يا حبيببتي ..
- اممم .. عصرت الليمون
- آيوه .. دوقي وقوليلي رايك انفع ؟
مسكت معلقه ورجعتها تاني فى الطبق :
- فى ايه ؟
- أنا تعبانه اوي بجد ..
- طيب اشربي الشوربه هتغذيكي ..
- مش قادره .. نفسي فى رنجه ؟
- أيه .. رنجه؟
- ايوه رنجه عليها ليمون ومعاها بصل أخضر يااااااه
- وانتى تعبانه كده ؟!
- التعب دا عاوز اكله حرشه تظبط ، صدقني
- متأكدة ..
- طبعا اسمع منى مش انت عاوزني أخف ؟
- آيوه طبعا ..بس مش كده ، يعني بحاجات سخنه والأدوية برتقال كده يعني..
- اسمع كلامي وصدقني هتلاقيني ولا الحصان انا عارفه نفسي ..
-معنديش مانع ، لما تخفي طيب ؟
- بقولك عاوزة أخف، شكلك عاجبك تعبي دا هتشوووووو
- خلاص خلاص ..هنزل اجيبلك ..
- وانا مستنياك ..
رجع بالرنجه :
- خليت الراجل يظبطهالك اهو ..
- يا حبيبي انا .. هات هات خليني اشفي أوجاعي والالامي..
- كل دا من الرنجة..
- اشرب انت الشوربة بقي مفيدة ..
- لا بجد ..
ابتدت تاكل الرنجة بلهفه رغم تعبها ومره واحده معدتها وجعتها ورجعت:
- شوفتي مش قولتلك ..
- الحقني بطني ...
بسرعه اتصل بالدكتور جارهم فى العماره اداها حقنه ونامت وفضل جنبها :
- حاسه ب ايه؟
- مدروخه شويا ..
- هتشربي الشوربة دى حالا يلا ..
- أنا..
- لمده اسبوع شوربة خضار بس
- لكن انا ..
- اسكتي بقي هتشربيها هتشربيها يلا ..
ساعدها شربت الشوربة ..
وتاني يوم بقت أفضل:
- أيه الأخبار انهارده ؟
- الحمد الله هو لسه فى تعب ..
- يومين تلاته بتوع اى دوى برد وهيعدي الدكتور طمني
- هو انا ايه الل تعبني امبارح ..
- الرنجة.. مكنش ينفع تاكليها خالص وقال ايه علشان تفوقي ..
- آه ياني يا تعبانه .. اه ياني هتشوووووو ..
- اشربي الشوربة
- شوربة ؟
- يلااا مش عاوز كلمة..
- الحمد الله خلاص مش قادره عاوزة انام ..
- يلا نامي وارتاحي ..
- اقعد جنبي واحكيلي حدوته
- نعم ..؟!
- زى ما قولتلك ..اعتبرني بنتك ..
- انتى بتتكلمي بجد ؟
- علشان خاطري ..
نامت ع السرير ونام جنبها واترمت فى حضنه :
- لما يجيلك البرد اصبر عليا ..
- بتستحلفيلي ..
- كح كح كح تعبانه
- والله لاسعه ..
- متقلقش لما يجيلك برد مش هسيبك زى ما انت مسبتنيش وههريك شوربة ..
- خفي انتى بس الأول..
- شكرًا انك مسبتنيش ..
- وهو انا اتجوزتك وقررت اكمل الباقي من عمري معاكي علشان أسيبك ..
- بحبك اووي يلا احكي الحدوته ..
ضمها فى حضنه :
- اسمعي الحكايه دى كان فى واحده تعبانه عندها سخونيه وبرد، و طلبت معاها تاكل رنجه وبصل ..
مشهد من مشاهد بقلمي #يارا_سمير ✨
رأيكم ❤
