- اختاري يلا
- اختار معايا
- لا انا هختار وانتى كمان ونأخد رأى بعض
-تمام .
اتفرقوا فى المكان ورجعوا كل واحد ماسك زرعه ورد، الإتنين بصوا لبعض وضحكوا لأنهم أختاروا نفس النوع .
- ما كان من الأول
- بس اخدتي فرصتك علشان مترجعيش تقولي حاجة
- قولي فكرت فى ايه وأنت بتختار ؟
- اممم فيكي ..
- لا انا بتكلم بجد
- وأنا بتكلم بجد، فكرت فيكي.. إحنا جينا المشتل دا علشان نختار زرع لبيتنا ، ففكرت ايه الل تحبيه اللون والشكل
- ومفكرتش أنت عاوز ايه ؟
- لا طبعًا فكرت .. وفقت بين عاوز ايه وانتى عاوزة ايه ف اختارت دا .. وانتى فكرتي فى ايه ؟
ضحكت : مش هتصدق ..
- ليه ؟
- لأن حصل زى ما أنت قولت، فكرت فيك بتحب ايه وايه المناسب ووفقت بين ذوقنا إحنا الإتنين واختارت دا .
- دا احنا كده وصلنا لليفيل الوحش فى تطابق الأفكار
ضحكت وبصتله بإبتسامة مطولة:
- أنا بحبك اوي ..
- ايه المشاعر المفاجئة دي
- يعني انت مش عارف ان انا بحبك ؟
- لا عارف ومتأكد كمان لأن انا بحبك أكتر ( مسك ايدها وباسها)
قرب منهم صاحب المشتل :
- أنتم مخطوبين ؟
ضحكوا ورد عليه :
- متجوزين
- ماشاء الله عليكم ربي يديم الفرحة ع وشوشكم
- يارب.. هنشوف هناخد ايه وهجيلك
- المكان مكانكم
- عاوزة اسألك سؤال مفاجئ
- يلا وانا جاهز ..
- أحنا متجوزين بقالنا كام سنه ؟
- امممم
- ايه دا ..ناسي بجد ؟
- ٦ سنين و٣ شهور واسبوع و(بص فى الساعة) وساعه ونص ..
- الله ع الدقة،
- عارفة سبب إستمرار علاقتنا ايه ؟
- ايه ؟
- أننا مش بنخنق بعض لا بقرارات ولا اختيارات ودايما عاملين حساب ان فى طرف تاني معانا رأيه وقراره ميقلش عن اختيارنا وقرارنا .. المشاركة العلاقة بين اتنين ف هي بين اتنين فى كل حاجة تخص العلاقة دى ..
- بس فى سبب ميقلش اهميه عن السبب دا ؟
- ايه يا تري؟
- انك بتحافظ ع الذكري واللحظة الجميلة الل بنعيشها، انت بتخلق لحظة جميلة، ف أنك تعمل اللحظة وتحافظ عليها وتخليها مستمره كتير مبيعملوش كده ، اغلب الناس بتعمل اللحظة ويهملوها للوقت والزمن .. ف تلاقي اغلب العلاقات لما بتنتهي بتنتهي لان طرف من الطرفين أهمل انه يحافظ مع شريكة ع اللحظة الل هما فيها مع بعض ف الطرف التاني بيحن للحظة مش للشخص الل شاركة فيها ودا لانه اتغير .. أنت مبتتغيرش، ولو بتتغير بتتغير التغير المناسب لعلاقتنا واحنا مع بعض بتفكر فيا وفى بيتنا بتفكر فينا .. حتي وقت الخلاف بتاخد وقتك ونرجع نتكلم ونوضح سوء الفهم لبعض بالكلام مع بعض بتسمعني وأسمعك ..
- ودا لأنك معايا وبتشاركيني كل خطوة وكل لحظة لولاكي مكنتش علاقتنا توصل لكده .. الاتنين لو مساعدوش علاقتكم انها مش هقولك تنجح لا تستقر ودا لأن الإستقرار أهم عنصر فى نجاح اى علاقة لو فشل انه يحصل بيحكم ع العلاقة بالفشل رغم كل المحاولات .. احنا مع بعض وهنفضل مع بعض كل لحظة وطول الوقت ..
- أنا قولتلك بحبك صح اقول ايه تاني
- قولي وانا اقول معاكي ربي يديم ما بينا ونفضل مع بعض كل لحظة لأنك اهم حاجة فى اللحظة بالنسبالي إنك موجودة فيها ..
قرب منهم عامل فى المشتل وهما صوت بجهاز معاه :
- جو رومانسي برعاية المبيدات الحشرية
ضحكت :
- يلا بينا نروح بيتنا و علشان لسه هنمر ع مامتك نجيب البنات من هناك
- يلا بينا ..
اتجهوا للحساب:
- واحده ولا اتنين ؟
رد وقال : الإتنين قدرهم نختارهم وقدرهم يكونوا مع بعض فهيكونوا مع بعض واحنا هنراعيهم
خرجوا من المشتل بصوا الاتنين ع عربيه فول :
- بتفكر فى الل بفكر فيه ؟
- يااااه وهو بالزيت الحار وقرن الفلفل المشطشط
- يلا بينا فى السريع بس مندبش اوي علشان الغدا عند مامتك
- سبيها ع الله حد يفوت الفرصة دى
- بصراحة لا .. يلا بينا
مسك ايدها تقربوا العربيه الفول وقعدوا ع ترابيزه وحطوا الزرعتين قدامهم وجه الولد ياخد الطلبات :
- عاوزك تعملنا صينيه ع ذوقك احنا جعانين اوي
- من عنيا يا باشا ..
شويا ووصلت الصينية واول لقمة قطعوها الإتنين غمسوها فى طبق الفول وقربوها لبعض للحظة ضحكوا واكلوا من ايد بعض وبدأوا ياكلوا فى سعادة ومبسوطين واللحظة الل عايشنها مع بعض ❤
مشهد من مشاهد بقلمي #يارا_سمير
رأيكم
